A KAMKEUNA:
Zokhua leh Khawpui lamah chuktuah huan nei tawh phawt chuan Sērtawk hi kan nei tel deuh zel emaw tihturin kan zonun nen hian a inkungkaih nghet tlat niin a lang. Sērtawk hi a tui leh tui lo a awm . A tui chi chu a ngainatawmin einawn fo a chakawm thin; a tui lo chi lah einawn peihawm loh tak a ni. Kheh hnua dah reiin a kha hma hle a, chuvangin kheh tawh chuan ei zawh vat vat chi a ni.
A TOBUL
Sērtawk hi Asia chhimchhak leh Malaysia atanga lo awm tan nia ngaih a ni . Chuta tang chuan kum zabi 17-na lai vel khan United States-ah lakluh a ni a. Tichuan, California & Florida ahte an ching uar chho zel a. Asia leh Israel-ah phei chuan sumdawnna pawimawh tak a tling chho ta hial mai. British sorkarin East India Company a din hnu khan Captain Shaddock-a'n Bordados-ah lawngin a thawn chhuak tan a, chuta tang chuan a hming chawiin sapho chuan sērtawk hi "shaddock" an tih hlen phah ta a, 1696 khan Jamaica thlengin a lo darh ta a ni. Sêrtawk hi a scientific terms chuan Citrus maxima emaw Citrus grandis tih a ni a, Sapho chuan Pomelo emaw shaddock an ti mai thin.
A THATNA
Sêrtawkah hian Vitamin B1; 2; 3; 6 & C a awm tha ēm ēm a. Iron, magnesium, manganese, phosphorus, potasium, sodium leh zinc a awm tha hle bawk. Tin, chawtha (nutrition) a ni tel bawk.
Tun hma chuan sērtawk hi kan ngaisang tehchiam ngai lem lova tun hnu hian BP sang damdawi atan a tha nia sawi a tam avangin kan intihhmuh a; kan ei uar thar deuh ta hluai niin a lang. Hetiang a nih avang hian chiang zawka a thatna hrang hrang kan hriat belh theih nan i han belchiang lehzual teh ang.
1. NATNA DOTU A TICHAK:
Sērtawkah hian kan taksain nitina vitamin 'C' kan mamawh 60% ascorbic acid hi a kentel avangin kan taksaa natna lo dolettu hi a tichakin a thuam tharleh zel thei a ni. Hei hian thisenvar cell tlakchhamna tur a veng tha hle thin.
2. CHAW PAITAWIHNA:
Thei zawng zawng hian fiber an pai tha vek lem lova sêrtawk hi chuan fiber a pai tha ēm ēm a. Sêrtawk pum 1-ah hian nitina fiber kan mamawh za zela 25% lai awm avangin chaw pai tawih nan a tha a, chuvangin, chaw ei kham veleh ei thin hian digestion siamtu damdawi tha tak a ni.
3. BP SANG DAMDAWI: Sērtawkah potassium, a tam avangin thisen sang thununtu atan a tangkai hle. Nitina potasium kan mamawh za zela 37% hi Sêrtawkah hian a awm avangin thisen kal vel a siam thaa lunga thisen chhukchho tha takin a thunun thei. Mizoramah hian sertawk mu hi BP sang damdawi atan tha bika sawi a ni a, mahse, a mu aiin a takah hian potasium a tam avangin a tak hian BP a thunun tha zawka ngaih a ni.
4. ZANNA
Thau lutuk leh rih lutuk hian kan taksaah thauchhia a lo tam thin a, heng rihna leh thauna lakna fihlim theihna damdawi thatak hi sērtawk hian a ken avangin ei fo a tha hle. “fat-burning enzyme” tha tak a neih avangin taksa rihna a thunun thei a, thei danga awm ve lo 'carnitine palmitoyl-transferase' a ken tel avangin ēk thlengin a thunun a, rihna a titlahniam thei thin.
5. AIKHURH DAMDAWI:
Tarlan tak ang khan Sêrtawk hian potasium a ken tam avangin thisen kal vel blood circulation a siam thaa hei vang hian aikhirh, thachat leh maimizial lakahte mi a venghim tha hle thei.
6. RUH HRISEL DAMDAWI:
Sêrtawk hian potasium a ken tam avangin ruh natna emaw ruh mawih leh ruhna lakah him nan osteoporosis a veng tha a, hei hian ruh hriselna a thlen thei.Tin, Potassium tha hian bone mineral density a siam that avangin ruh hriselna leh ruh chakna a thlen bawk thin a ni.
7. TAR HARNA:
Sērtawk hian vitamin'C' a ken that avangin antioxidants tha tak a ni a, hei hian free radicals hlauhawm lakah mi a veng a, vun chuar chhe mai tur leh vun vuai thin then tur a venhim that avamgin tar har nan ei fo a pawimawh hle.
8. KACHHUNG HRISELNA:
Vitamin 'C' a ken tam avangin collagen a pe chhuak tha a, hei hian pangtimur siam thain taksa hrang hranga cell-te a tichak a, chu chuan kachhung natna hrang hrang a venghim thei thin a ni.
9. HLIAM DAMDAWI:
Intih pem, hliam kãng leh pilh vel dam hma nan sērtawk hi a tangkai hle. Vitamin 'C' a pai tam avangin cell thi tawh cell thara thlak zung zung theitu chu vitamin 'c' a nih avangin hliam/pem/kãng/pilh neih laiin sērtawk ei ngei ngei a tha a ni.
10. SAM THATNA:
Sērtawk hian Vitamin 'B1' leh zinc a ken tam avangin sam tan a tha êm êm a, sam tha/tle/nalh leh sam tlak har/tuak har duh tan chuan sērtawk ei fo hi sam hriselna tha tak a ni.
11. CANCER DOTU:
Sêrtawk kawr hian cancer dotu bioflavonoids a keng tha hle a. Hei hian thãlbe pancreatic, ril leh hnute cancer-te lo doletin cancer taidarh(spread) tur a veng thei nia ngaih a ni.
12. THISENZÃM TIFAITU:
Sērtawk tui thlum leh thur inpawlhah hian pectin a awm thaa hei hian lunga thisen peluttu artery-a bawlhhlawh tullo hnawhtu lo awm thinte a paihchhuakin a tifai thei a, tichuan, thisenzãm a tifai zung zung thin a ni.
A TLANGKAWMNA
Sērtawk hi a tak chauh ni lovin a mū leh a kãwr pawh hi a tha hle. A kawr hi zunkawng thalo, hahni puam, kawthalo, hritlang khuh damdawi atante an hmang thin.
A tui hi juicer-in a siam theih a tui nen inzata pawlh hnuah khawizu an telh bawk thin. A kãwr hi phorovin a dipin an siam thin a, thenkhat chuan dãl kanah leh sãahte chawhmeh tihtui nan an thlak bawk thin.
Damdawi anga a hun taka ei a, mahni ei tawk tetea ei hi a tawk mai a; a tui tih vang emaw, a tha tih hriat vanga vawikhata ven lawih emaw ei tlut tlut kher tur a ni lo tih kan hriat a pawimawh hle.
-Dr. C. Lalrampana
Post a Comment