ZAWHTE HLO (Euphorbia Hirta) Thatna - TIMES OF MIZORAM

Home Top Ad

Post Top Ad

ZAWHTE HLO (Euphorbia Hirta) Thatna

-Dr. C. Lalrampana

A KAMKEUNA:
Hnim hnah sin lam, a kung pawh lian vak lo; kawng sira to thin, hlobet nalh ve tak, par mawi ve tak, mizo chuan 'zawhte hlo' kan tih mai hi India ram hmun tinah deuhthaw a awm niin a lang. Phaizawl kawngpui kamahte pawh hmuh tur a awm nual mai.

India ram hi khawvel huapa ayurvedic damdawi hmanga natna inenkawlna ram lian ber leh lar ber a ni hial awm e. Zawhte hlo kan tih pawh hi ayurvedic damdawi atana hmang hmasatu leh tangkaipui bertu a ni. Abikin Mizote pawh hian zawhte hlo hi kan hmang tangkai hle a, a thatna hrang hrang erawh kan hriat famkim loh takin tlema zawng i'n haihawng teh ang.

1. NATNA DOTU:
Zawhte hlo hian natna lo dolettu ( Immune System) a thuam chak a,
Invenna tha tak a ni. Hei vang hian ayurvedic damdawi siam nan an hmang tangkai hle thin.

.2. NACHHAWKNA:
Zawhte hlo hi tur that theitu tha tak a nih avangin a hmingah pawh rūl tūr hlo tih a ni bawk. Hei vang hian nachhawk nan leh rūl chuk damdawiah an hmang thin.

3. RŪLHLŪT DAMDAWI:
Tūr thattu tha tak a nih avangin rûl chuk damdawi atan hman thin a nih angin rūlhût damdawi atan leh êklung damdawi atante leh mawngmirh tihreh nan damdawi tha tak a ni. Naupang rûlhūt pai leh mawngmirh nei tan a tui sãwr intir thin hian damdawi tha tak a ni.

4. THAWCHHAM DAMDAWI;
Thawchham (asthma), awmna, khuhhip leh hritlang khuh nasa lutuk avanga thawk chhamna leh chuap chak lo vanga boruak oxygen tlakchhamna a veng thei.

5. CHITHLAH LAMA HRISELNA:
Zawhte hlo hi hmeichhe serh thak leh thi nei tha thei lovah te, thinei that loh vanga tãinaahte leh natna hrik bacteria thattu atan leh na chhawk nan a tha hle a, hman lai atangin hmeichhe natna lam atan an hmang tangkai hle thin.

6. TISA CHÃKNA PUITU:
Zawhte hlo hi abikin mipa tisa chãkna (libido) puitu atan leh mipa chi tla hma lutuk tur (premature ejaculation) vengtu atan damdawi tha tak nia ngaih a ni a; hmeichhia bikah chuan hnute tui titamtu atan a tha ve thunga ngaih a ni, naupai/rai lai erawh pek loh tur a ni.

7. PUMPUINA DAMDAWI:
Zawhte hlo hi pumpuina chikhat (gastrointestinal system) damdawi atan a tha hlea ngaih a ni. Tin, kawthalo leh santen damdawiah pawh hman thin a ni. Ek nem nan hman thin a ni bawk.

8. VUN THATNA:
Ãrngeng, vun bawl, thak leh vun sen leh khawihli damdawi atan hman thin a ni. Vun a tinungin vun a tinalh thei bawk. Ringworm tan pawh hman theih a ni.

9. KAL LEH ZUNKAWNG TAN:
Zawhte hlo hi kal leh zunkawng lama harsatna ei tan a tangkai hle a, kala lungte awm tikehsawmtu atan pawh an hmang thin.

A TLANGKAWMNA
Ramhmul damdawi hian thatna tam tak a nei a, chutih rualin a ei dan leh sawngbawl danah erawh kan fimkhur a tha hle. Thianghlim taka sawngbawl a pawimawh a, a loa luata ei hian nghawng tha lo a nei thin tih pawh hriat a tha hle.

No comments:

Post a Comment

Post Bottom Ad