CAB-IN MIZORAM HUAM LO - Citizenship Amendment Bill 2019

CAB-IN MIZORAM MIN HUAM LO HI A LAWMAWM TAKZET A NI: CHIEF MINISTER

Vawiin 8.12.2019 (Thawhtanni) hian Mizo Hnam Runah Chhung Inkhawm neih a ni a, he hunah hian Pu Zoramthanga, Chief Minister chuan thusawiin, Citizenship (Amendment) Bill (CAB) 2019-in Mizoram min huam ta lo chu lawmawm a tih thu a sawi a. “He bill hi nasa takin kan doin kan bei a, Party hrang hrang, NGO hrang hrang leh Kohhrante thleng pawhin kan duh lohna nasa takin kan tiri a, nasa taka kan beihna zarah Mizoram telh a ni ta lo hi a lawmawm takzet a ni,” a ti a. “North East Student Organisation (NESO) huaihawta MZP-in North East State dangte thlavang hauha total bandh an neih tur pawh hi awm kan tihpui khawp mai,” a ti bawk.

Chief Minister chuan, kar khat dawn lai thanga tunhnaia sorkar laipui hotute dawra an zin report a pe a. CM chuan mi pawimawh an hmuh duhte - Prime Minister, Home Minister, Finance Minister leh Niti Aayog hotute an hmuh kim thu a sawi a. “Tun tum kan zin chu Pathianin min hruai nasa hlein ka hria a, kan hmuh duh mi pawimawh tak takte Session lai a ni chungin kan hmu thei a. An hnenah hian Mizoram mamawh hrang hrang kan thlenin kan sawipui a, tin, anni lam pawhin min mamawhna lai a lo awm ve a, chu’ngte pawh chu an lo thlen ve bawk a ni,” a ti a. “Prime Minister leh Home Minister-te hian North East-a remna a awm theihna tura an rawnghuai neih kan nih thu min lo hrilh ve bawk a. India ram hruaitute hian an thlen phak loh leh an tih theih loh ti turin min mamawhna kawng a awm ve nual tih an hria a ni,” a ti.

MNF President chuan, “Lalpa’n he ramah hian arsi a tieng zual zel dawn a, he ram malsawmna ruai chawi hniamtuah min hmang dawn a. Kan elpui ber Congress Party an chhe nasa em em a, Symbol hmanga nih dik tumte lah ni a chhuah hmain a tla ta si a. Zoram inzimar chho mekah hian awmzia an nei thei tak tak lo a ni. India ram leh khawvel huap pawha Lalpa rawngbawla mipuite tana malsawmna ruai chawi hniam turin arsi a eng zual zel dawn a ni,” a ti bawk.

Chief Minister Pu Zoramthanga chuan, “Mizoram hi chaw, buh leh saahte intodelhtir tumin hma kan la mek a, leileta siam theih zawng zawng leitleta siam turin hmachhawp kan nei mek bawk a. Kan bamboo project pawh nasa taka kalpui turin hmalak mek zel a ni. Kan hmalakna hmachhawp tam takah Delhi lam zawkin a ngaihna an hriat tawk loh a awm nual a, Mizo National Front hian Mizoram hma mai ni lovin India ram hma kan hruaina tur subject tam tak a awm chho dawn a ni,” a ti.

He inkhawmah hian Wake-up Mizoram Secretary Pu Rosiamliana'n hunserh a hmang a, Pu Lalnghakliana, General Secretary-in inkhawm a kaihruai a ni.

~LALLENMAWIA JONGTE, Joint Secretary

Media & Publicity Dept., Mizo National Front

Memo No.MNF/Media/02/2019/225 Dt.09.12.2019.