A RUH LANGIN - by Vanneihtluanga - TIMES OF MIZORAM

Breaking

Home Top Ad

Post Top Ad

A RUH LANGIN - by Vanneihtluanga

Mizo WriterZanlaiah tawhsual tawk ila, Aizawl civil damdawiin hi thi lova ruangin vâk lut ila, major operation mamawh ila, telephone leh cell phone chhe si sela. Zaitu leh hnimhlum petu leh min viltu tur nurse leh tirhkah thlengin, veng hrang hranga an mu tui lai kaithova ka lam khawm chawp vek a ngai. Fit a ngai fu! Ka thih hmaa an lo thlen hman pawhin current, generator, diesel leh tui a awm em? Ka hre lo. Hre thei dinhmunah pawh ka ding tawh lo, ka tlin tawh lo. Ka thi hman hrim hrim! Ka thih hmaa he thu ka ziak hman hi ka lawm a ni.

Mak tak a ni. Aizawl civil damdawiin quarters-ah hian zanlaia rikrum thulha major operation ti thei tur doctor senior an awm mumal lo niin doctor ngeiin min hrilh tlat a ni. Luah tlak loh quarters an pe a ni awm e. Damdawiin bul hnaiah doctor an awm a nih pawhin casualty-a doctor junior duty hian an kaitho ngam lo zuk ti lehzel a! Heng hi a dik vek loh pawhin dik chin a awm ang. Mi ramah chuan thi ngei tur nunna an chhan ţhin a, kan ramah chuan dam ngei tur thihna kan thlentir ta zeuh zeuh. Chuti a nih chuan, Al Qaida tel lo pawhin Aizawla chen hi a ralţi tawk viau a ni. Aizawl mah heti, district khawpui dangte phei chu... ngaihtuah ngam pawh a ni lo.


Mak tih dang pawh ka nei. Major operation ti thei surgery doctor thiam paruk vel lek hi mihring nuaih 10 zet hian kan inţawm a. Mihring kan pun chak bakah, kawngpui leh lirthei ţhat tak avanga Aizawl damdawi in rawn pan thei an tam tial tial a. Chhinchhiah loh Tahan, Lamka, Falam leh Behliangchhip lama miten min ţawmpui zual zel. Chutih laiin, doctor specialist zir theihna tura kan state-in remchang kan neih hi a tlem tial tial an ti si. Ka sumin ka fa hi doctor specialist hna zir chhuahtir thei ta ila, khawpui liana damdawi in changkangah thawhna an hmuh laiin, thingtlang kilkhawra Medical Officer-a bul ţan tur leh PWD SDO pawh tluk mang lova khawsa turin ka thawhtir duh ang em? Chutianga lungawi taka specialist hna thawk duh tur chuan, eiruk tum nih loh vek chuan missionary thinlung put a ngai. Dinhmun chhe lutuka ei zawng turin ţhangthar lehkhathiam, phaia zir mekte hi kan ko haw zo lo thuai dawn. A nghawng tur lah in hre vek. Brain drain thlalera dangchara mahni thlahte vahvaihtir turin he hnam hi chak takin kan tlan mek a ni. A serious-zia kan hria em? Kan thil sawi hi kan car engine chungchang a ni lo, keimahni leh kan fate lungphu chungchang a ni. Bible-in “He ramah hian awm la, rinawmna ûm zel rawh,” ti lo se chu ka pem daih tawh ang!

Transfer and posting te hi aw! Pastor chuan a bial a chhuahsan hun tur a hre lawk a, chumi milin a chhungkaw hmabak a ruahman lawk thei. Hotu inthlak vangin dan palzut a ni dawn lo tih a hria. Chuvangin khaw chengker bera kal pawh a hreh lo. Doctor transfer and posting chuan system mumal a nei lo. Ministry malsawmna dawng lo chu an bet tlawk tlawk mai a ni. Hei zawk hi sorkarin chingfel hmasa sela, chuti chunga hmun harsa pan duh lo doctor chu mipuiin kan lo chingfel ve mai ang.

Thiamna a sang zel a, zir chhuak thar apiangin khawl an hmang nasa. Doctor remhria, ţuan rang leh sulhnu fel kan tih hi, khawl tha chhawr thiam tihna ang deuh a ni tawh. Kut lawng ringawt chuan mihring kawchhung chu sawi loh vawk kawchhung pawh kan ţhet thei lo tih hretute hian doctorte tan hmanraw chhe chi leh ‘hluihlawn thil’ kan chhawpsak fo. Chuvangin, kan doctor thiam ţhenkhat hi chu, driver thiam tak, motor khalh tur nei lo ang an ni. Medical college-a ‘car’ khalh rawn zir chhuak ţhenkhatte chu Mizoram sorkarin ‘sakawr’ a lo khalhtir! Kan doctor ţhenkhatte hi chu mistiri perek ngah tak, tuboh nei si lo ang an ni. Ţhenkhat lah chuan perek tel lovin tuboh ringawt an dawng a, perek lei phalsak an ni lova, an leisak duh bawk si lo. Electric engineer pakhatin, “A la ëng thei hi a mak viau a ni!” a tih ang deuhin, min la zai dam leh mial ţhin hi a mak viau zawk. Pute u, doctorte hian an hlutna leh thiamna vawrtawp mipui tana hmantir theitu hmanraw ţha an mamawh a ni. Manţang siamna khawl emaw in tih hi in chipuite thihna leh damna hriltu khawl a ni. “Supply it, shut it, forget it, dhak dhak, Go!” tih paha supply zawh rualin kut sil ngawt theih a ni lo. Pute u, harh mawlh teh u.

Kan Mamawh Kalphung Dik
Heng zawng zawng hi eng vanga thleng nge? Doctor zawng zawng hi inthurualin an sual lo vang. Kalphung (system) fel loh vang ni zawkin a lang. Mizoram political party te hian, kalphung fel neih hi inthlan dawn apianga an auhla a ni ziah. Kalphung a fel loh hian ministry, secretary leh health directorate tan mahni hamţhatna tura thuneihna hmansual (abuse) theihna remchang a tam. Chuvangin, sorkarna an chelh rual chiahin kalphung fel neih hlau ber ministry an ni leh ziah. Kan fel thiam lo a ni lo, kan fel duh lo a ni.

Doctor senior zinga ţhenkhat hi chuan an stethoscope nghawngkawl leh an hnathawh kawrfual var ai hian, ram te, thiltihtheihnate leh ropuina te an thlang ta zawk niin ka hria. MBBS ni lovin, Bachelor of Eiruk zir chhuak an ang. Mi ramah chuan doctor senior leh experienced apiang ringin kan pan ţhin. Kan ramah chuan doctor senior, Directorate lama ţhu chin ngat tawh hi chuan min zai ang tih kan hlau vek! Khawvel ram changkangte zingah, technical miten an technical hna aia office fileworks enkawl an ngaihsan zawkna ram ka la hre ve miah lo. Doctor quarters-a doctor dam lo zai tura koh ngam loh hi, pastor quarters-a pastor, mitthi vui tura koh ngam loh aiin a rapthlak. Chiahpuam pastor takngial pawhin an tih duh loh tur hi chu ti ve lul suh u.

Kan hotute thil ngaihtuah dan hi a mak bawk. Phaia dam lo refer titlem tura intodelhna ngaihventu ai chuan, phaia Mizo sum tam thei ang ber luanraltirna tura refer theih dan awlsam ngaihtuah chhuaktu hi ‘ram hmangaihtu’ zu tia! Chaw tak aia hmuamtelel tawktarhtu hian min chawm puitlin a tum lo, pangchang taka sawngnawi ral turin min vehthlem zawk a ni. Kawng siam tura phai vai company koh chhuah hi ka zak lo. Natna ho te, helai doctorte pawhin an tihdam theih tih hriat reng pawh, hmanraw awm loh vanga phai vai doctor hnena refer hi ka zak. A chhan lah tlang hriat. Eng vangin nge doctor aia engineer-in duhsak an hlawh? Culvert hian chhia leh ţha hriatna a neih loh avangin eiruk a awlsam a. Chuvangin kan politiciante hian engineer an tlawn a ni. Lungphu hi chuan chhia leh ţha hriatna a neih tlat avangin eiruk a har a. Chuvangin kan politicianten doctor an namnul a ni. Lungphu aia culvert-in ngaihsak a hlawh zawkna ram – ram changkang ka hre lo.

Damna aiah Thihna
He hnam hian damna ngaihven ţha hman lo khawpin thihna kan buaipui bawk. We sacrificed the joy of life by glorifying the sorrow of death ka tihna a ni. He khawtlang hian dam nawm a tum lo, thih nawm a tum a ni. Nun aiin thih kan uluk! Kan khawtlangin ‘mi zahawm’ a tih tamzawk chu nunna chhantu ni lovin chhiatni expert an ni. MLA-in voter dam lo aia voter thi an ngaihven zawkna ram awmchhun chu Mizoram chiah hi a nih ka ring. Dam lo dam theihna tur khawl ţha damdawiina dah aiin, mitthi phurh theihna tur morge van ţha damdawina dah an thlahlel zawk. Mizoram khaw tinah hian doctor aiah morgue van hi awm se, “Hma kan sawn” an tih ka ring. Pastor hlei hlei hian an timak: Dam lo an tlawh zat ai chuan mitthi an vui zat hi an chhinchhiah uluk daih zawk. Tv lamah pawh, hriselna programme ai chuan khawhar chhungte pualin hun a la tam zawk. YMA hian thihna sawngbawlna atana ‘resource’ kan sen ral zat hi damna sawngbawlna atan han hmang tehreng ila chuan, Aizawl civil damdawiina zai hmabak indawta ziah tlar hi thla thum daih laiin a sei hauh lovang. Khawvela Kristian dangten thlarau hriselna chakna hmanga taksa hriselna an thlentir laiin, keini chuan taksa hriselna hralhin thlarau hriselna lei kan tum tlat. Hei hian kan ramah doctor zahawmna a tichingpen a ni. Thihna elsena tihduhdah thu kan sawi lo, zahawm taka insenghawi chungin, kan dam theihna tur i ngaihven thar ang u kan tihna a ni.


Mortalititis!
Kan bona kikawi dan han en hian, kan harh hmain fiamthu ka la thawh hman awm e. Doctor i nih chuan, medical college lama ‘universal ethics’ in zir ang ni lo, ‘indigeneous ethics’ ka kawhhmuh ang che. Mizo ngaihsan zawng taka i awm theih dan tur ka hrilh dawn che. Dam lo i enkawlin i rilru seng uluk vak duh suh. Ti kual vel mai mai rawh. Dam lo tak tak aiin dam lo chhungte min ngai pawimawh la, ţawngkam ţha pawnlang takin min ‘bawl’ kual vak rawh. Dam lo an thih ve leh, “In rawn hruai thlen hma khan lo hria ila chuan kan chhan hman tur a nia, a pawi tak tak a ni!... A! Keima thiam loh a ni..!” tiin thu awmze nei lem lo sawi kual vak ang che. Chutiang chu kan ngaisang.

Thih chhana sap hming awm lova thih hi thih hrehin kan hreh bawk. Chuvangin mitthi thihpui natna hming hi Mizo ţawngin min hrilh suh. “Sikserh” te ti nulh nulh suh. Specialist i nih phei chuan, kan thih chhan natna hming hi tuma la hriat ve loh sap hming ngeia min hrilh theih hi kan beisei tlat a ni. Chuvangin, sapţawng mak deuh, ‘Mortalititis’ emaw, ‘Capcara Erectus’ emaw han ti zauh la. Mitthi board-ah kan han ziak kalh mai ang a. Mitthi chhungte chuan changkang ta riauvin kan inhria ang a, nang pawh kan ngaisang sawt ang che.
Tin, i dam lo enkawl an thihin, i hna pangngai chawlhsanin ruang bulah a rei thei ang ber indawm kunin ţhutchilh ang che. Kuang bula i ţhut hlana i dam lo enkawl dangte an lo thi hman a nih chuan, an thih chhan mawlh kha, saphming kha uluk la, an kuang va ţhutchilh leh la. Hetianga kum khat i tih chuan “Keini rethei, VIP-te hrethiama min lainattu doctor fel...” kan ti luai luai mai ang che. Thingtlanga an sawn chhuah che chuan, kar tluanin khawpuiah awm la, i post-ah chawlhni hmang la, langsar takin inkhawm ang che. Hna i thawk em tih ai chuan i inkhawm em tih kha kan ngaihven zawk. He fiamthu hi i practice duh chuan, kan hmaa mihuai kal hmasa, a taka nunpuitu Politiciante hnenah zir mai rawh. Politiciante hian khawi aţangin nge an zir? Mahni eizawnna hna aia mahni kohhran hna ngai pawimawh zawk kohhran upa officer zinga ţhenkhatte hi Politician-te role model an ni.

Hui ha! Heng hi kan dinhmun a nih si chuan, Pathian zawnchhuah rama Pathian hnam thlan inti Mizote hian, kan sakhua hi thawvenna atana hmang lovin, Latin American Kristiante ang maiin puithuna atthlak chawisanna remchangah kan chantir zel dawn a ang hle. Doctor leh damdawi aiah Uihlo khim chungin, world bank kawng tharah hian ţawngţai dam thei ûmin chak tak takin tlan vak vak ila a ni tawh mai! Zanlaiah thih ngama kan lo chesual palh ta a nih pawhin, damdawi in pan lovin, thlanmual lam kan pan nghal law law ila a ţha tawh mai lo maw?

Ni lo ve
Ni em lo ve. Mizova ţhatna mei si mit lek lek tawh hi chhem alh theih a la ni tih lantirtu chu nangni doctorte hi in ni a sin. Blood bank thisen a kang changa mahni thisen siak ţhin doctor kan hria. Thingtlanga retheite enkawla, mahni suma damdawi leisak ţhintu doctor pawh kan hria. Private clinic hawng lova sorkar damdawi ina mahni service zawng zawng thap ral ţhak duh khawpa a chipuite hmangaihtu doctor pawh kan hria. Phai damdawi in liana dinhmun ţha zawk hnara, Mizoram khaw chengker tak pana a Mizopuite tana thawktu pawh kan hria. In levelpui sorkar officer-ten sorkar motor tel lova thlen theih loh nia an ngaihna hmunah, zanlaiah, mahni car inkhalh chawpa mitthi tur in chhante kha kan chhungte an ni a sin.

Pastor senior ţhenkhat zin turin motor front seat an inchuh laiin, nangni zinga ţhenkhat chu, doctor senior tak in nih tawh hnuah pawh, thingtlanga dam lo en turin motor hlui tawh takah in inbeng khawm a, chuta leng lo chu mahni car-in in kal mai a. Nilengin dam lo in en a, in va kalna khuaah eitur inzawn chawpin hna in thawk ţhin. In hlawh leh in thawh inphu loh chang a tam tih hi kan hre lo emaw ti suh u.


He leilunga mihring lungphu a phût chhung chuan doctor hlutna hi a bo dawn lo. Nunna chhantu nunna tluka hlu a awm thei lo. Kan thih ni hian kan ram ngah thu leh kan in ropui chanchinte hi min vuituten an chham chhuak dawn lo. Min hrerengtute chuan levelpui kan tluk leh tluk lovah kan ropuina an rawn teh dawn hek lo. Kan dam laia heng mi te berte chungah kan thiltih zawk hi kan kuang bula dingin an la sawi dawn. Chumi nia bawlhhlawh kai lova i awm theih nan i stethoscope nghawngkawl leh i doctor kawrfual var zahawmna hi thlan thlengin vawng him la, he kawrfual hi thlabarte thlamuantu lo ni zel sela, rinawmnain i ngaihtuahna thunun sela, dikna chu i tehfung ni sela, hmangaihna zungzam chuan i zungţang hmawr thlengin fan chhuak sela, i ke pên chu ţanpui ngaite lam hawia tihchak lo ni sela, i enkawl damte lawmna nui ri chu i hlimna siamtu lo ni sela, beiseina nung chuan kiansan che suh se.

Eiru faten anmahni hringtute hming lamrik an zah ni-ah, I fate chuan chhuang takin i hming an lam ang a, a hretute chuan, “E! Min tidamtu fa i nih chu!” tiin an lu chunga ro ţha i khawl khawm chu i fate lu chungah an la vur ang a, tuchhuante thlengin van khian malsawmin a la chhang mawlh ang che.

Did you ever know that you’re my hero?
You’re everything I wish I could be.
I could fly higher than an eagle,
For you are the wind beneath my wings.

No comments:

Post a Comment

Post Bottom Ad