Kan pipu mihuai kal ta te, sa leh ral hmaa zam ngailo, tawlh loh puan bahtir tak te, khawtlangin an thlamuanpui leh an zah te leh vantlang tih theih loh ti a Thangchhuahte chanvo, an tana rô tling Thangchhuah diar khimtu zawng zawng kha lo tho leh se vaipa kan pe fo hi lawm lovin an dawnsa pawh an hal ral duh hialin ka ring!!
DEUSAWH PUAN -
Vai chu sawi loh kan dem rawn luih luih kan Politician te chu chawimawi an phu leh kan chawimawi kan chak lam aimahin Party dang deusawh chakna hmanrua ah 'Tawlh loh puan' chu kan hmang fo a, kei chuan "Tawlh loh puan hi a awmzia va zir leh rawh u" ka ti a ni. A hman hman, vai ram dawra kal satliah, vawikhat pawh ram hmangaih vanga la pilh eih lote bahtir zel hi sim ila, kan Tawlh loh puan thulkhung hi a hlu leh zual ngei ang.
VAI TLAWN PUAN -
Central a Minister emaw, Party hruaitu lian an lo kal a, kan hnam rohlu zinga mi nazawng neih theih loh chu a ti Common tu ah tangin Lengpui Airport atangin kan lo bahtir thawt thawt a, a awmzia pawh hre hawt lo leh hrilhfiahna pawh awm hman hawt lova MIZO chauh bah tur khawpa ngaihsanawm chu Vai ngaltliang kan lo pe zung zung ta mai. Kan hnam rohlu chu an bât haw a, khawimaw laiah an dah bo mai mai ang a, an chhungkua ah hmun pawimawh a chang dawn der si lo!! Kha vaipa khan hetiang puan ropui bât tur hian 'Tawlh lohna' an neih kan hre ngai lova, a awmzia ber chu 'VAI TLAWN PUAN' a ni ber.
THANGCHHUAH KAWR- RUIH KAWR!!
Thangchhuah tuten diar anga an khim thin chu kawr angin kan ha sup sup a, Thangchhuah tawh, diar khim pha ngat hi lo tho lehin Chapchar kut ah rawn kal ve dek dek se, a Diar roh tak chu rawn khim se, tumah hian kan va ngaisang dawn lo tak!! Diar chu sawi loh a hâkin kan lo ha sup sup tawh sia!! Chapchar Kût leh Anthuriam Festival velah chuan chunglama Thangchhuah kawr ha, hnuailama Jeans ha te chu rui tura ngaihna kan nei lak lawh tawh a, kan ruih kawr ber leh Pisa kai kawr berah kan hmang ta si. Mahni hnam rohlu DIAR ngei KAMIS a let duh hnam hi awm ve tak ang maw....
Kan hnam rohlu ti dazat zawng kher lo hian Khumbeu, Khiangkawi ipte, chem, tuthlawh etc te hi inpe thin zawk ang u. -David Sailo
Post a Comment