MIZORAM STATE DAY 2020 - TIMES OF MIZORAM

Breaking

Home Top Ad

Post Top Ad

MIZORAM STATE DAY 2020

State puitlinga Mizoram hlan kai a nih kum 33-na vawiin khan District hrang hrangah lawm a ni.

State Day-ah hian President Ram Nath Kovind, Vice President M. Venkaiah Naidu, Prime Minister Narendra Modi, Union Home Minister Amit Shah bakah Union Minister dang te leh State hrang hrang Chief Minister-te’n Mizo mipuite duhsakna hlanin an lawmpui thu an sawi a ni.

State Day lawmna hun pui ber chu hlawhtling takin Aizawl Vanapa Hall-ah Governor PS Sreedharan Pillai; Chief Minister Pu Zoramthanga leh Council of Minister, MLA rual, sawrkar hnathawk, Hnam Sipai lo ni thin te bakah mipui thahnem tak nen hman a ni.

Governor PS Sreedharan Pillai-a chuan state puitlinga inhlangkai tura zalenna sualtute inpekna te, Mizo mipuite thlawpna, thawhrimna leh tawrhna zawng zawng chhut letin “Mizoram State Day” hi a hlu em em a, ropui taka lawm a phu hliah hliah a ni, a ti a. He Ni chhinchiah tlak takah hian Mizoram mipuite hnenah duhsakna leh lawmpuina hlanin, state hlawhtlinna atanga lo lang chiang em em chu tunlai khawvel buai takah pawh hian a ram mipuiten an duh a, hruaituten tharum thawhna aia remna leh muanna an dahsan a thlah lova an vawn tlat chuan remna tluantling a awm thei tih hi a ni, Governor chuan a ti a. Remna leh muanna neitu nihna chu chawisang a, hmasawnna kawngah pawh chak zawka ke pen zelin state zahawm nih tawh bakah state intodelh nih tel tum turin mipui a chah a ni.

Kumina state budget chu lungawithlak a tih thu sawiin, state dangten deficit budget an kalpui mek laia Chief Minister leh a thawhpui ten Surplus budget an chhawp chhuak thei chu a phurawm tak zet a ni, Governor chuan a ti.

Chief Minister Pu Zoramthanga pawhin thu sawiin, he ni chhinchhiahthlak tak hi harsatna tam tak paltlang hnua chan a ni, a ti a. State nihna chan theihna tura remna sual chhuah a nih dan te, mipui, kohhran leh NGO te hmalakna leh sawrkar laipui hmalakna te sawiin,
Mizoram chu hmasawnna kawngah leh remna kawngah state dang leh ram dangte tana entawntlak tura hmalak chu a chhunga chengte hma lakna tur a ni, a ti.
Vanapa Hall-a State Day lawmna inkhawm hi Chief Secy. Pu Lalnunmawia Chuaungo chuan a kaihruai a. NGO Co-ordination Committee Chairman Pu Vanlalruata pawhin thu a sawi a ni.

Lungleiah chuan DC Conference Hall-ah DC Pu V. Lalsangliana hovin State Day, 2020 lawm a ni a. Lunglei District-a sorkar Office hotu hrang hrang, tlawmngai pawl hrang hrang aiawh, political party hruaitu, chanchinbumite leh sawm bik mi thahnem tak an kalkhawm a ni.

Siaha-ah pawh DC Conference Hall-ah Additional Deputy Commisioner Pu Malsawmtluanga hovin State Day chu ropui leh urhsun taka lawm a ni.

Champhaia State Day lawmna chu I&PR Auditorium, CHANEM-ah hman a ni a, DC SL Naveen-a’n kaihruaiin ramri leh ram dinhmun chu a la inthlak fo dawn a, a pawimawh ber chu Pathian hruaina dawn hi a ni, a ti. Champhai State Day lawmnaah hian sawrkar department hotute, NGO leh khawtlang hruaitute an tel a ni.
Khawzawl-ah pawh Electric Veng YMA hall-ah Khawzawl Addl. DC Pu Paul L Khuma hovin Mizoram State Day urhsun taka lawm a ni a. Khawzawl khawpui chhunga sorkar department hranng hranga thawktute an kal khawm a ni.

Kolasib-ah chuan Parish Hall-ah State Day lawmna hun hman a ni a, DC Pi Sangchhin Chinzah-in hmanpuiin district chhunga sawrkar hotute leh tlawmngai pawl hrang hrang hruaitute an tel a ni.

State Day 2020 hi Serchhip-ah chuan DC Conference Hall-ah DC Dr. Lalzirmawia Chhangte hova lawm a ni a.DC chuan State nihnain hamthatna tam tak a pek rualin mawhphurhna tam tak a keng tel a, ramin hma a sawn zel theih nan mipuiten an mawhphurhna puitling taka an hlenchhuah a tul a, sawrkar chu mipuite ta, mipui rawngbawltu a ni a, ral thlir mai lovin neitu rilru pu-a sawrkar tawiawm tlat turin mipui a sawm a ni.

Mamit-ah chuan DC, Dr. Lalrozama hovin Siamliana Hall-ah urhsun takin State Day lawm a ni a, Mamit khawpui chhunga sorkar Department hrang hranga thawktute, tlawmngai pawl leh khawtlang hruaitute an tel a ni.

Lawngtlai-ah pawh DC Conference Hall-ah DC Shashanka Ala-i hovin Mizoram State Day lawm a ni a. DC chuan vawiin hi State Day a nih mai piah lamah Lai Miphun Ni (Chin National Day) a ni bawk a, Zo hahthlakte tan ni pawimawh tak a ni, a ti a. Remna leh muanna vawng nunga ram hma sawn nana bei zel tur leh District chhunga hnam hrang hrangte chu inpumkhatna leh thawhhona tha neih zel tum turin a chah a ni. ~ AIR Aizawl

No comments:

Post a Comment

Post Bottom Ad