Govt. of India, Ministry of Culture enkawl, rampum huap thu leh hla lama pawl lian ber SAHITYA AKADEMI (National Academy of Letters), New Delhi chuan kum tina an neih țhin ‘Thu leh Hla Kûtpui’ – ‘Sahityotsav’ (Festival of Letters)-ah Dr. VR Râlte an sawm.
February Ni 24-29 chhunga neih tur kûtpuiah hian February Ni 24-26 chhūng ‘Tribal Writers’ Meet’ neih a ni dawn a, hetah hian Dr. VR Râlte-in ama phuah Mizo Hlachham a chham ang a, chu chu Hindi leh English-a lehlinin a chham zui nghal bawk ang.
February Ni 26, Fifth Session-ah “Aadivasi Samvednayein Aur Mithak” (Tribal Sensibilities And Mythology) tih thupui sawi turin Dr. VR Râlte hi sawm a ni bawk. Sahitya Akademi hian Poets' Meet OCTAVE' 2008 a neihah khan Dr. VR Râlte hi an lo sawm tawh bawk a ni.
High School, Pawl VIII a zirlai ațang tawha (Assam-a thlakip chhuak naupang chanchinbu lártak tak 'MAUCHAQ'-a) thuziah lo țan tawh Dr. VR Râlte hian a kutchhuak lehkhabu 13 a nei tawh a, tunah hian Mizo leh Hindi Poetry a bua khawr tham phuah a neih tawh bâkah Pu C. Chhuanvawra Padmashree, Prof. Laltluangliana Khiangte Padmashree, Pi Buangi Sailo Padmashree – te hla phuah Hindi-a a lehlinte Hindi lehkhabu hrang hrang ah te leh India Sawrkar chanchinbu-‘BHASHA’ (Language – thla 2 dana chhuak)-ah te chhuah a lo ni tawh a; a lehlin zinga “Nirasha Ke Us Paar” ("Beidawnna Piah Ram" – Pu Vanneihtluanga ziah) phei chuan chhuahchhawn a hlawh hle nghe nghe a ni.
Northeast SUN (fortnightly) chanchinbuin Dr. VR Râlte hi "THE MAN OF VERSATILITY" tiin a chanchin a lo ziak tawh a, THE TELEGRAPH (daily) chanchinbuin "YOUNG REVOLUTIONARY" tiin a lo chhuah tawh bawk a ni. India Sawrkarin Hindi thu leh hla thiam 1198-te chanchin a ziahna bu – ‘HINDI LEKHAK SANDARBHIKA’ (Reference to Hindi Writers) ah Dr. VR Râlte hi Mizo tel hmasa ber leh tel awmchhun a ni. A chhuanawmin, a hmalam zel atan duhsakna kan hlan e.
Hnamdangte hmusit mai lovin, Thrian atan i siam ang u.
Post a Comment