Corona Virus, Covid-19 laka mipui an him nan Mizoram sorkar chuan ram dang inri-na ‘international border’-te chu khar rih ni se, a ti a, ILP pekchhuah pawh a khap rih.

Nimina Chief Minister Pu Zoramthanga hova thukhawm sorkar mi pawimawhte’n he thutlukna hi an siam a. State dang pathumte nena inrina hmun hrang hrang zingah luhna tur bika tih - Assam nen inrina Bairabi leh Vairengte, Manipur nen inrina Khawkawn leh Tripura nena inrina Kanhmunah te hri veil eh vei lo ulutk taka enfiah a ni ang a, heng hmunahte chauh hian state chhung luh phal a ni.

Khawvel hmun dangah hri leng hi a tam avangin India khua leh tui ni lo te chu Mizorama an lo luh phal rih loh ni se tiin rel a ni bawk a. Ramdangmi bakah state dang atanga lo lut tur te pawh chakkhai phur tur te leh ei leh bar atana pawimawh te chu uluk taka enfiah an nih hnuah chauh ILP pek an ni ang a; chutiang mi ni lo chu ILP pek rih lo tur a ni a, inhlawhfa tur te pawh Mizorama awm mek an nih loh chuan mi thar lo lut tur te chu ILP pek rih loh ni se, tih a ni.

Lengpui Airport-a screening tih mek chu uluk leh khauh taka kalpui zel bakah natna hri pai nia rinhlelhte dah hrana enthlak a tul hlauh hun atan Lengpui Tourist Lodge chu ‘Quarantine Camp’ atan buatsaih tura rel a ni bawk.
Mipui himna tur ngaihtuah a nih mek laia mipui mamawh hrang hrang lo chheprelh te, thil man lo tito vak vak te chu dan anga an chung thu ngaihtuah theih reng a nih thu meeting-ah hian sawi lan a ni a. Task Force hmalaknain Police leh FDA ten thil man leh mipui mamawh dinhmun an thlithlai reng dawn a ni.

Meeting hian loh theih loh thilah chauh lo chuan puipunnaa tel tam lo turin mi tin a râwn a; Mizoram pawna zin chhuah pawh a theih chin chinah tih tam loh ni se tiin mipui a chah bawk.
Natna hri vei hmuhchhuah an awm hlauh thulha anmahni hnaiha lo awmte chhui chhuah a awlsam zawk nen khualzin sumo leh bus ten an mi phurhte hming leh ‘contact number’ leh address kimchang dah tha vek tura hmalak a ni dawn bawk.

COVID-19 chungchangah hian thuthang dik lo a tam avangin Health Services Principal Director atanga chhuak a nih loh chuan Mizorama he natna chungchang thuthang dang reng reng chu thutlingah pawm tlak a nih loh thu sawi a ni bawk.
Chief Minister Pu Zoramthanga chuan COVID-19 laka invenna kawngah Mizoram sawrkar chuan theihtawp chhuahin hma a lak zel tur thu a sawi a. Nimina ruahmanna siam te chu invenna hmanrua a nih angin mipuiin buai phah na atan an hman loh a duh thu a sawi.

Health Minister Dr. R. Lalthangliana chuan kumin January thlaa COVID-19 chungchanga meeting neih a lo nih tawh thu te leh department-in hma a lo lak tawhna hrang hrangte sawiin State Level Training neih thuai a nih tur thu leh district hospital hrang hranga isolation ward buatsaih dan te a sawi.
Mizoramah COVID-19 vei hmuh chhuah an la ni lova. Ramdang atanga lo zin haw dah hrana enthlak mi 67 awm tawhin, an zinga 6 chu natna an neih loh avangin chhuah zalen an ni tawh.

Covid-19 laka lo invenlawkna leh chak zawka hmalak dan tur relin nimin khan Myanmar nena inrina Zokhawtharah pawh Health and Family Welfare Board Vice Chairman Dr. ZR Thiamsanga hovin Champhai DC, SP, Assam Rifles, Custom Superintendent, NGO aiawh Chanchinbumite leh khawtlang hruaitute an thukhawm a.
SMO Dr. R. Lianmawia’n Health & Family Welfare Department hmalak dan tlangpui a sawi a. February thla tir atangin Cross border vaccination booth-ah Medical Screening tan a nih thu a sawi a. February thla chhung khan mi 302, tuh thla nimin thlengin mi 155 te chu enfiah tawhin rinhlelh hmuh a la awm lo, a ti a. District Hospital-ah khum 5 awmna Isolation Ward siam a ni tawh a. Ramri depa awm Medical Officer ten mipui hrilhfiah hna an thawk tawh tih a sawi bawk.

Meeting chuan ramri kaltlanga inkalpawhna Zokhawthar leh hmun dang dangte chu natna leng mek vanga khar lailawk tura thuneitu sang zawka thlen nise, Zokhawthar chu International Border Town, insumdawntawnna leh inkalpawhtawnna pawimawh tak anih avangin Medical Facilities tha zawk dah theih ni se, natna leng hluar hun chhung chuan ramri kaltlangin tumah zin veivak lo tura ngen leh ram dang atanga lo lutte Medical Screening bakah rinhlelhte Quarantine neih ni se an tih bakah puipunna lam chi reng reng siam loh leh sum mamawh angte dawn thuai a nih theihna tura hmalak ni se tih te an rel a. Champhai DC thuchhuah, ram danga hnathawka awm emaw khualzinte reng reng an awmna khua leh veng ten an chanchin kimchang DC hnenah hriattir ni se, tih chu chak taka bawhzui ni se an ti bawk.

Lawngtlai district chu COvid-19 hri rawn luh theihna remchang tha pawl tak nia hriat a nih avangin Lai Autonomous Dist. Council Sanitation Deptt. chuan a theih ang tawkin hma a la mek a. Nimin khan department staff te chuan Myanmar atanga sumdawng rawn lut, China siam bungraw zuar te chu tunkar chhung ngeia Lawngtlai district chhuahsana boruak a ziaawm hma chuan rawn kir tawh rih lo turin an ngen a, mipuite pawh khawchhak thil lei leh lak luh kawngah fimkhur turin an ngen nghal bawk.

Siaha-ah pawh nimin khan Covid 19 chungchangah hian District Task Force Committee Emergency meeting DC Conference Room-ah neih a ni a.

Siaha District chhunga Myanmar atanga luh theihna khan, khaw 10 atanga Mizorama luh khapna thupek tihchhuah tawh chu khauh taka kalpui ni se, an ti a, heng khaw tina VC-te kaihhruaina hnuaiah NGO leh Dept. awmte nen committee dina Myanmar atanga lo lut tur khauh taka dan ni se; mipui hrilhriatna leh tul pawimawh zirtirna pek nghal ni se an ti a. Siaha dist-a lutte lo enfiahna hmun 3-ah siam ni se, rinhlelhte chu ni 20 chhung khung hran ni se, an ti a. Ramri kana lo luh phal lohna hmun 10 bakah hian hmun 3 dang pawh khar ni se, an ti bawk. (PTCs & IPR)

Post a comment

Powered by Blogger.