Michael Lalmanzuala Foundation aṭanga ṭanpuina dawng duh tana inhriattirna kan hawn hnu-ah mi 15 an rawn lang a. Ṱanpui turte chu 1st Div aia hniam lo, nungchang ṭha, zuk leh hmuam ti lo, ruih theih thila fihlim an ni tur a ni, tihte hi a khirh khân deuh nge ni, , Pu P. Rohmingthanga, Chaltlang, Convener, Prof. Lalthantluanga, Electric Veng, Rev. Vanlalzuata, Chawlhhmun, Dr. Zodinpuia (MZU), Mission Veng, Pu Rohlupuia, MJS, Chief Judicial Magistate, awmna Selection Committee-ina ṭanpui tlaka an ngaihte chu pathum an ni a. Heng zinga pahnihte chu vawiin khan ṭanpuina kan hlan thei ta a, a lawmawm kan ti khawp mai. Pathumna chu ‘architect’ zir tur a ni a, entrance test a paltlang huna ṭanpuina pệk turin kan dah ta rih a ni.
1. Ruatfeli hi unau pathum niin a nu leh pa an inṭhen hnu-ah a pa hian sciatica/asthma nei chungin a enkawl a, a boral san a. A chhung dangten an tawiawmna zarah tun thleng hian lehkha a la zir ve tang tang a ni. Amah hi MLF Interview Board-in interview an neihpui hian amahah theihna/tum ruhna a awmin mi inzir mi a ni tih a hriat avangin MLF hian a tanpui a ni. Zirna sang zel duhsakna avangin a awmna tur pawh MLF chhungkua-in kan ngaihtuah mek a ni. A tih theih hun hmasabera MCS exam turin a inbuatsaih ṭan tawh a ni.
2. John Lalmalsawma hi Sihphir aṭanga Chaltlang High School-a pawl 12 zir mek a ni a. A nu leh pate hi upa lam, eizawnna nghet nei lova, vawkvulh leh thil dang danga inhmang an ni. Ani hi chu BA zawh veleha Indian Military Academy zawm tura inbuatsaih a ni.
Kan tih theih chin hi tlệm rih viau mah se, ṭanpui ngai ṭanpui hian thinlungah hlimna min pe a, lawmawm kan ti tlang hle a ni. Mi hausa tawntaw, Bill Gates, a sumdawnna hnapui chawlhsana ṭanpui ngai ṭanpui hna ‘philanthropy’ thawk tura a inpe tawp ta mai te hian phûrna min pệk belh a. Lal Isuan, ‘In zinga tệ ber chunga in tih hi ka chunga ti in ni’ a tih te kha kan hre reng bawk a ni.
Post a Comment