RAM PUM LOCKDOWN - Mizorama Lo Lutte Khung Hrang Zel - TIMES OF MIZORAM

Breaking

Home Top Ad

Post Top Ad

RAM PUM LOCKDOWN - Mizorama Lo Lutte Khung Hrang Zel

Prime Minister Narendra Modi-a chuan COVID 19 hrileng mek thunun turin rampumah nizan dar 12 atang khan ni 21 chhung inkharkhip National Lockdown a puang. Nizana ram mipuite hnena thuchah a sawiah Pu Modi-a chuan tun tum inkharkhip hi curfew ang tho a nih thu leh Janata Curfew aia khawng zawka lekkawh a ni ang a ti a.

Pu Modi-a chuan COVID19 hrileng laka invenna awmchhun chu pawn chhuak loa mahni inkhung hran chauh anih thu a sawi a. Mahni chenna in theuhah tawmim hrih a, midang nena inhnaih hrih lo turin mipuite a ngen a ni.

PM Modi-a chuan sawrkar laipuiin Coronavirus hrileng avangin hriselna lama hmasawnna ruhrel din nan cheng vaibelchhe sing khat sang nga a dah thu a sawi bawk a. Natna hrik enfiahna, Personal Protective Equipments, Isolation Beds, ICU khum,ventilators leh bungraw mamawh dangte a rang lama tihpun a ni ang a ti a. India chu natna hrik avanga buaina liantham tak thleng tur pumpelh thei dinhmunah a ding mek tih a sawi a. Tunah hian he natna hrik kai ti rem tura nghet zawka thutlukna siam hun a ni a ti bawk.


PM Modi-a chuan Central leh State sawrkarten mipui nitin mamawh tha taka dawn anih theih nan kawng hrang hranga hmalak a ni a ti a. Ni 21 chhung inkharkhip chu hun rei tak ni mahse keimahni leh kan chhungte himna tur a ni a ti a. Tuna chona hmachhawn mekah hian hnehna chan ngei a inringnghet tlat tih sawiin mipuite chu inenkawl uluk turin a ngen a ni.

National Lockdown chungchangah hian Union Ministry of Home Affairs chuan mipuite tan inkaihhruaina a siam a. Hei hi state tinten zawm ngei tura tih a ni bawk.

Mizoram sorkar chuan Corona Virus vei an awm thulha inrin lawk nan COVID-19 Medical Operational Team din a rel.

Nimin khan Health & Family Welfare Minister Dr. R.Lalthangliana'n COVID-19 hrileng laka invenna tur ngaihtuahin sawrkar medical officer te, private damdawiin aiawh doctor te, Indian Medical Association- Mizoram Chapter aiawhte a pisa-ah meeting a neih pui a.

Meeting-ah hian Mizoramah vanduaithlak taka COVID-19 vei awm palha, sawrkar hospital, kohhran hospital leh private hospital ten thawhhona tha leh mumal an neih theih nan Health & Family Welfare Vice-Chairman Dr. Z.R Thiamsanga kaihruaiin COVID-19 Medical Operational Team din ni se an ti a, Government Notification pawh a rang thei ang bera chhuah nghal ni se tih an rel a ni. Operational team hi team hnih- Medical Team leh ICU Team a then ni se, team member chu a tul ang leh mamawh anga ruat ni se, tih rel a ni.


Meeting-ah hian Personal Protective Equipments (PPE) unit 13,000 chah a ni tih tarlan a ni a, PPE hi suit anga hak, taksa tuam tha tak a ni. PPE hian Mizoram a lo thlen thuai theihnan a tul angin sawrkarin hma a la a, PPE hmang tur hian COVID-19 vei enkawl nana World Health Organization kaihhruaina zawm a ni ang.
COVID-19 vei enkawl nana khawvelin damdawi a hman- Chloroquine Phosphate, Hydroxychloroquinine, Azithromycin te mimalin mahni thu a lo ei lawk lo turin meeting hian mipuite a ngen a, COVID-19 vei enkawl nana damdawi te hi sawrkar neihsa bakah a tam thei ang ber lei belh ni se tih rel a ni.

Hemi zawh hian Minister leh Health & Family Welfare Board Member ten meeting an nei leh a. COVID-19 Treatment, Quarantine, Isolation Centre atan Zoram Medical College (ZMC) tih pawm tlan a ni.


Hetihlai hian, State Referral Hospital, Falkawn – Zoram Medical College Task Force buatsaihin vawiin khan COVID-19 hrileng avanga damlo te enkawl dan tur dik taka enkawl an nih theih nan a enchhinna Mock Drill buatsaih a ni.

Ramchhung hmun hrang hrangah Corona Virus kai an pun belh zel a, Mizoram a him theih nan a rang thei ang berin sawrkar chuan hma a la a. Mipuite him nan, a kai hmuhchhuahna hmun atanga Mizorama lo lutte chu khung hran an ngai ta ni.
Hemi chungchangah hian sorkar chuan thuchhuah siamin, he hripui lengah hian inbuatsaih lawkna leh in rinna hun a awmloh avangin inkhawm hmanhmawh vawi tam koh niin boruak a zir zelin ruahmanna siam chawp leh thlak thut thut ngai a tam hle a.

Foreign ram chauh ni lo India ram hmun hrang hrangah he natna hi a darh tak avangin international leh inter state ramri kana Mizoram lo lut te chu Sawrkar siam quarantine facility-ah engemawzat dah an ngai a. Hei hi mipuite himna tura inven lawkna niin Quarantine Facility a dah an nih chhungin he natna an kailo tih finfiah a nih hnuah chauh mahni chhungkuate nena infin phalsak an ni.

Hemi chungchangah hian Mizoram Sawrkar chuan mipuite hriatthiamna leh thlawpna a ngen a. Awmna hmun, dah hranna hmun, ei leh in leh inenkawl danah duhthusamin thil a tih theih vek lo a. Amaherawhchu, hei hi Mizoram mipui an him theih nana hmalakna a ni tih hrethiam a, hrehawm rih mahse tuar hram hram turin quarantine facility-a awm mekte leh an chhungte Mizoram Sawrkar chuan a ngen a ni.

Nimin thleng khan Mizorama lo lut sing 6 chuang endik an ni tawh a, mi 183 dahhran an ni a, mahni inchhunga inkhunghrang tura tih mi 2298 an awm a ni.

-AIR Aizawl

No comments:

Post a Comment

Post Bottom Ad