Kan thawhpui Rev. V.L. Hruaian vanduaithlak taka Covid-19 a vei chungchangah mi hrang hrangin thu chi hrang hrang an sawi a. Ka mit a chak loh avangin an thu ziakte hi ka chhiar tam lo. Amaherawhchu ka chhiar ve chhunahte nasa taka dem leh diriam a nih dante an sawi thin a. A thawhna hmuna mawhphurhna chelhtu ka ni a, a zinna leh a lo haw lehna pawh ka hriatpui vek avangin hemi chungchang hi chiang deuh hleka sawi ve tul tain ka hria a, ka hriat chin ka han sawi a ni.
Rev. Hruaia hian a thesis chungchangah a supervisor nen uluk zawka thlir dun a ngaih avangin a supervisor hman hun a nghak reng a. January ni 24 khan thla hnih thang turin Netherlands khawpui Amsterdam-ah a kal ta a ni. Hetih lai hian India ramah leh Europe-ah Covid-19 chungchangah buaina a la awm meuh lo. China-in a buaipui tan mek lai a ni a, China ramah mi 26 chiah an la thi a ni.
Amaherawhchu March thlaah chuan Europe lamahte a lo darh ta zel a. Netherlands-ah pawh a vei an pung chak ta viau mai a. March ni 12-ah chuan heti hian min rawn hrilh a, “Hei corona virus vei an pung chak riau a lock down te thil awm thei a ni sia ka Prof te nen kan sawi hova ka lo haw ran mai tul kan ti tlang ta a ni. Travel agent ka dawr mai ange aw thil awmzia ka lo hrilh zel mai dawn che nia,” tiin.
March ni 13-ah chuan heti hian min rawn hrilh leh a, “Ka ticket hmuh hi Sunday 15th March a nia Istanbula-ah kalin Delhi, Kolkata-ah zan khat ka riah a ngai dawn a. Tuesday-ah ka lo thleng ang. Vawinah 200 dawn positive an identified leh a, 804 an ni ta. Tun thlengin ka awmna municipality-ah hian confirmed case a la awm lova, Amsterdam khaw pumpuiah 20 an awm. Chhim lamah a darh nasa bik a, Pathian zarah ka hriselna a tha e,” tiin.
March ni 14-ah chuan heti hian a rawn sawi leh a, “Hei Istanbul khan Netherlands atanga thlawh luh an phal lo leh ta thut mai a, tunah hian Qatar airways in Doha lamah kal turin ticket ka book a,” tiin.
March ni 15-ah chuan, “Delhi ka lo thleng a, naktuk hian tlang ka tum e,” tih a rawn sawi a.
March ni 16-ah chuan tlai dar 4.13-ah Aizawl a rawn thlen thu heti hian a rawn sawi a, “Hei tluang tein ka lo thleng e. Lengpuiah house quarantine ni 14 chhung min rawn ti a, kan tawm ve hrih phawt mai dawn a mi ang? Keimah chu ka tha a inrinhlelhna ka nei lo ve,” tiin.
Kei chuan, “a nih tak chu, a tha zawkah ngai zel mai ang,” ka ti a. March ni 21-ah chuan March ni 18 atanga a khawsik thu min rawn hrilhin tawngtaipui turin min rawn chah a. Chutianga khawsik ta chuan hlauhthawnna deuh chu a nei a, mahse covid-19 a nih loh a la beisei reng a. “Eng em a ni lovang” a la ti fan a. Kei pawhin, “eng em a ni lovang, mahse in test hma chu a tha a nih chu, a nihna lam lam finfiah hma a tha e,” ka lo ti a. Tin, a symptom an sawi, hrawkna leh thawk harsa te, a neih leh neih loh ka zawt a. A neih loh thu leh hritlang hnar ping erawh a neih thu min hrilh a.
March ni 24 zan dar 11.52-ah chuan heti hian message min lo thawn a, “Dil loh zawk malsawmna ka dawng a, ka lo positive tlat mai a, Falkawn State Referral Hospital ka pan dawn e. Ka chhungte pawh lokal ve law law se an ti ta deuh a ni,” tiin. Hei hi zan ka mut hnu a nih avangin a tuk zingah ka chhiar chauh a. Ka va phone-a, a ni chuan zan dar 11-ah Zonet-in sample test zat leh a result an puan thin chu a nghah thu min hrilh a. Result a negative vek tih an puang thin a, hemi zan pawh hian chu chu a beisei thu a sawi a. Mahse, hemi zan hian an puang hauh lo mai a, ama test result avang chuan an lo puang lo a ni awm e. Tichuan a thawktu lamten a result va hrilh pahin damdawiin lamah an hruai ta a ni.
Amah nen kan inbiakna hrang hrang atang hian hengte hi lo lang chiangin ka hria: Covid 19 a hlauhawm tih hriat hmain a zin chhuak a. A zinna ramah covid-19 a len tak avangin a haw hun hmain a professor-ten an rawn haw tir a. Ama lamah hriselna tha tak nen, inrinhlelhna nei lovin a rawn haw a, amaherawhchu hri lenna ram atanga rawn haw anih avang leh sorkarin a phut anih avangin a theihtawpa fimkhurin, a inkhung hrang nghal a.
Vanduaithlak takin khawimaw lai ber atangin a haw kawngah hri hi a rawn kai niin a lang. Airport panna kawng leh taxi, airport terminal, thlawhna, engemaw ber atangin a ni thei vek mai. A rawn haw hmain a inringhlel sa anga sawi hi Zeldin thu bawl mai niin a lang.
Amsterdam-a a awmna municipality huam chhungah hian a rawn chhuahsan niah pakhat an hmu chhuak chauh a ni. A dinhmunah hian ding ila, a tih bak hi tih a har hle ang. A vanduai tak zet a ni.
Chuvangin hetianga vanduaina nasa tak a tawh aliama lo dem leh lo diriam zui hi Pathian duh loh zawng tak a nih ka ring. Amah leh an chhungkua, kan ram leh khawvel tan theihtawpin i tawngtai zel zawk ang u.
Rev. Dr. Vanlalchhawna Khiangte, Principal, AICS. 26.03.2020
Post a Comment