ZORAM MEDICAL COLLEGE A COVID-19 TESTING LABORATORY

ZORAM MEDICAL COLLEGE A COVID-19 TESTING LABORATORY VAWIIN ATANG HMAN TAN A NI

- Dr.R.Lalthangliana, Minister, Health & Family Welfare

No.175/2020-2021

Aizawl the 7th April, 2020 : Health & Family Welfare Minister Dr. R. Lalthangliana chuan Zoram mipuite World Health Day, 2020 chibai buk pahin Zoram Medical College a COVID-19 Testing Laboratory pawh vawiin atang hman tan a nih thu thuthar thehdarhtute puala a thusawiah a tarlang.

Health Minister chuan vawiinah a hmasa ber atan COVID-19 vei kan neih enkawl mektu mi inpe te - doctor , nurse leh healthcare worker mi 14 te nasopharyngeal swab test a nih thu leh anni bakah hian low risk damlo pakhat test a nih thu a sawi a, heng test result hi zanin hian hriat theih a ni dawn thu leh result hriat a nih veleh I&PR kaltlangin puanchhuah a nih tur thu a sawi a. Vawiin a sample test hi COVID-19 vei rinhlelh an ni tihna lam a nih loh thu a sawi bawk.

Health Minister chuan Mizorama COVID-19 vei enkawl mek dinhmun a tha tih sawiin ani bak test neih tawh dang zawng zawng a la negative vek rih thu a sawi a. COVID-19 testing laboratory chu a hranpa in hawnna programme siam a nih loh thu leh Mizoram Kohhran Hruaitu Committee hruaitu thenkhat leh tawngtai mite’n Pathian hnenah an awmhmun atangin an hlan thu a sawi a. Laboratory-a thawktute leh COVID-19 vei mek tan Zoram mipuite tawngtai chhunzawm zel turin a ngen a ni.

Health Minister chuan a hmaa sample kan test-na thin Silchar lamah COVID-19 case a lo awm ve tak nual hnuah Silchar lam tihbuai ngai lova keimahni pual ngeia testing laboratory kan nei thei ta chu a hun takah Pathianin min peihsak ni a a hriat thu sawiin, testing kit pawh 1000 lai Dibrugarh atangin chah thlen a nih thu a sawi a. World Health Day takah he COVID-19 test-na khawl peih fel a ni pawh chu a lawmawmin a inhmeh hle a ni, a ti.

Health Minister chuan Mizoram chheh vel Assam leh Tripura-ah COVID-19 vei hmuhchhuah an nih tak zel avangin ramri ven fimkhur a ngai zual hle tih sawrkarin a hria a, hemi atan hian theihtawpa inzarhpharhin hma an la mek tih a sawi bawk.

COVID-19 veite puala Zoram Medical College tih ruah a nih tak avangin Aizawl Civil Hospital leh Private Hospital dangte’n nasa takin an buai phah tih sawrkarin a hriat thu leh an inpekna sang tak avangin lawmthu a sawi a. COVID-19 test-na khawl kan neih theihna tura hmalatu Core Committee leh COVID-19 vei mek enkawl tura inpe te chungah lawmthu sawiin, sawrkar hmasa in tha taka Zoram Medical College-in tun dinhmun a thlen theihna tura hma an lo lak avangin lawmthu a sawi a. COVID-19 dona kawnga rim taka thawktu zawng zawngte chungah leh Zoram Medical College staff zawng zawngte chungah lawmthu a sawi bawk a ni. -DIPR