Kum 1720 daih tawhah khan, Marseille lawng chawlhnaah lawng leh a chhunga chuangte an lo quarantine tawh a.
Marseille hi France ram chhim lam Lawng chawlhna hmunpui a ni a, a hun laia sumdawnna hmun lian tak a ni.
He Lawnga chuangte hian Turkish mi pakhat aṭangin hri chhia an inkai chhawng a, engemaw zât an thi a, Lawng doctor pawh thi zingah hian a tel ve nghe nghe a ni.
Marseille Lawng chawlhna a lo thlen chuan, Lawng a chuangte leh bungrua zawng zawngte chu an lo khunghrang (quarantine) nghal a, mihring mai bakah bungrua lakchhuah an remti lo.
Amaherawhchu, chung bungruate chu thil man tam tak tak, mi tam tak eizawnna leh sum leh pai dinhmunnghawng thei anih avangin, sumdawng pawlte chuan an Sawrkar an hmin a. " Bungrua chauh kan la chhuak dawn a lawm, mihring kan chhuahtir ve dawn lo" tiin.
Nimahsela, bungrua an lak chhuah rualin, chu hri chhia tidarhtu Sazu-te chu an la chhuak tel ta a. Kâr lovah chu hri chu Marseille khawpuiah a darh ta a. Chumi hun laia mihring cheng zawng zawng 90,000 zingah a zatve aia tam mi 50,000 in an thihpui a ni. A hunlai chuan a rapthlak hle mai. Hei hi 'Great Plague of Mersaille' tiin history-ah hriatreng a ni.
Quarantine hi engnge ni?
Quarantine chu natna hrik kâi thei dinhmun a dîngte (who has been exposed), a natna lang chhuah rih silo te, mipui nawlpui zing aṭanga dah hran hi a ni.
Hei hi hripui darh chak lutuk tur venna hmanrua ṭha tak a ni a. A bikin a damdawi leh vaccine awmlo chi natna ah phei chuan, hmanraw ṭha berte zinga mi a ni.
Inkhung hran (quarantine) hun chhung hi a tlangpuiin a natna lan chhuah theih hun chhûng(incubation period) a ni ṭhin.
Kan tân a pawimawh em?
Kan state-ah tun dinhmunah Covid-19 hri vei kan awmlo in kan in hria. Kan kâi theihna kawng awm chu hmundang aṭanga lakluh (imported case) hi a ni.
State pawna kan unaute an rawn hawng mek a, chutiangin India ram pawhin khawvel ram 33 aṭangin India mi tângkhangte a hruai hawng mek bawk a. Hemi hunah hian a hri vei kan pun lohna turin Quarantine hi hmanraw pawimawh tak a ni.
Quarantine hi in hremna a ni lova, a hri vei dahkhawmna a ni hek lo. Virus an lo tawng palh thei a, a natna lang chhuak rih si lovin, dah hran chhung hian a lo lan chhuah chuan, a hri kãite hmuhchhuah nan leh enkawl an nih theih nan a tih a ni. Tin, mipui a kai darh huk lohna tur a ni bawk.
Quarantine in a tum ber chu natna vawilehkhat a lakluh hûk loh hi a ni a, kan damdawiin, kan hmanrua leh mithiamte enkawl zawh tawk damlo kan neih theihna tur a ni(WHO).
Ni 14 quarantine chhung hian, a natna vei zaa sawmkua(90%) chu a lang chhuak hman tura ngaih a ni. Chutih rualin, natna lang chhuak mai lo an awm thei, a bikin naupangah. Chuvangin, ni 14 quarantine bâkah, ni 14 dang hi lo fimkhur a, puipunna ah tel lovin, midang lak aṭangin a tam thei ang lo inthiarfihlim tur a ni. Mahni hriselna ngun taka lo inchîkin, ngaihṭhatlohna a awm chuan, mithiamte rawn vat tur a ni bawk.
Incubation period kan tih fo hi,a natna lan chhuah hun tihna a ni a. Covid 19 ah hian a tlangpuiin ni 14 chhung a ni. Hemi hun chhung hian virus kha kan taksaah nasa takin a lo inthlahpung a, kan khuh leh hahchhiau zawngin virus a lo chhuak a, midang kan kai thei ta ṭhin a ni.
Midang kai theih hun nasat lai ber (most infectious period) ni a sawi chu, a natna lan chhuah hma ni 2 leh lan chhuah hnu ni 7 chhung hi niin study tam berin a sawi. Hemi chhung hian taksa ah virus hrik(viral load) a tam hunlai ber a ngaih a ni bawk. Chutih rualin, a natna lang chhuak silo, midang kai chhawng thei(asymptomatic transmission) an awm thei bawk a ni.
Quarantine hi kan state tan chuan kan hmanraw ṭha ber te zinga mi a ni leh zual. Sawrkarin theih tawp chhuahin Quarantine Centre tam tak a siam a. Kohhrante rawn pen chhuakin Kohhran Hall-te quarantine centre atan an hman tir a. Kohhran ṭhenkhat phei chuan an ei leh in thlengin an lo tumsak bawk. Hetiang taka Sawrkar leh Kohhran thawhhona ṭha hi khawi ramah mah a awm awm love. Kan tihdan hi history-ah sawi a ni ve reng tawh ang.
Quarantine hi Isolation nen ngaihfin loh tur a ni. Isolation-ah chuan a natna lang chhuakte leh a hri vei tih finfiahte dah an ni a, damdawiin ah enkawl an ni ṭhin.
He Virus hrik hi
Virus hi a hranpa in thui tak a che sawn thei lova, mihringte hian hmun hrang hrangah kan pu darh zawk a ni. A pu darhtu fimkhurna ah a hri darh dan a innghat thui hle tihna a ni.
Virus hi natna hrik te tak te a ni a. Bacteria leh parasite-te aiin a te zawk a. Mit lawng a hmuh theih ani lova, en lenna Microscope ṭha bik (electron microscope) chauh a hmuh theih a ni.
Bacteria-te hi mihring taksa pawnah a insiam pung thei a. Chutih laiin, virus erawh chu thil nung(animals or plants) chhûngah lo chuan an insiam pung(replicate) ve thei lo.
Miin virus hrik an lo kai khan, a thawkna dawt aṭanga lutin, an timûr(cell) chhungah nasa takin a insiam pung ta ṭhin a. Chu virus hrik chu mihringten kan pu darh ta a. Chuvangin,a hrik pai mihring kha midang a kai chhawn theih hun chhung kan khung hran theih chuan, a hri darh chak tur kha kan veng thei dawn tihna a nih chu.
Prof. Woo Joo Kim, Korean Doctor thiam, hri leng awm a pianga Korea sawrkar thurawn pe ṭhintu leh, kum 2015 a MERS a len lai pawh a Rapid Response Team Leader chuan, " A vaccine kan neih hma chuan, Covid-19 hri leng hi a tawp mai dawn lo. Tun dinhmunah Korea ramah zia awm deuhin lang mahse, thlasik boruak in ṭan tir September leh October velah a rawn thual nawn(2nd wave) leh ngei hi ka ring. Spanish flu(1918) ang khan, a thawkna zawk thei bawk ang. Chumi hun atana kan lo inbuatsaih chu a ṭul ani" tiin a sawi.
Hei hi keini pawhin kan hriatreng a, kan theih tawk a lo inbuatsaih leh fimkhur hi kan tih tur a ni.
Fimkhur loh a pawi
Quarantine mekte fimkhur a ṭul. Jaipur ah chuan Oman atanga lokir kum 45 mi chuan quarantine palzût a a inkhunghran loh avangin a chhungte leh a ṭhiante engemaw zatin an kai phah a, an district pawh hri vei tamna/hotspot anih phah ta. Odisha pawh hri vei an pung a, Ninganiah khan kai thar 73 zinga 71 te chu state dang atanga lo haw te an ni. Biharah pawh kar khat chhunga kai thar zaa sawmsarih panga(75%) te chu lo haw thar te an ni. Kan ṭhenawm state-te pawhin a hri vei an neih belh mek a.Hetianga India ram puma a pun chak na chhan chu haw runpui vang nia ngaih theih ani. Chuvangin, kan fimkhur leh zual sauh tur a ni.
Fimkhur lo pakhat avangin mi tam tak kan inkai thei a,kan hnam pumpui dinhmun kan ti derthawng thei.
Lo inkhung hram hram la. I tan , i chhungte tan, i ram leh hnam tan a ni. Kan Health Minister zahawm takin "Tun hun hi fimkhur ngaih hun lai ber a ni a, zan hnih khat thil thuah fimkhur loh avanga chhiatna vawrtawp thleng thei reng kan ni" a tih hi a dik ngawt mai.
Quarantine a inkhung mekte kan ngaihsak fo an ngai. Sawrkar tih turah chauh dah lovin, mimal leh pawlho pawhin kan tihtheih ang ang tih hi kan mawhphurhna a ni. Rilru ipik leh tawt lutuk a an awmlohna turte, an insawizawi theihna turte, lehkhabu chhiar turte, internet connection leh mamawh dangte hi kan ngaihtuahpui a ṭul. An ni lam pawh an rilru an buatsaih a ṭul.
Tin, lo hawngte zingah kum upa (kum 70 chunglam)te, nau paite, naupang leh natna benvawn(cancer, zunthlum, thisen sang leh a dangte) neite hi a bîk tak a ngaihsak an ṭul. Quarantine centera dah vek an remchan loh pawhin, in lamah Home quarantine na tur hmunhma an neih ṭhat chuan, phalsak emaw a ṭul thei ang. Eng hunah pawh ngaihsak ngai bik(vulnerable group) hi an awm zel a ni. An ni ho lakah hian rilru nêm zawk kan put pawh a ṭul awm e.
Heti taka Sawrkar, tlawmngai pawl, Kohhran leh mimal kan ṭan tlan avang hian, Pathian malsawmna kan dawng a, tun dinhmun hi kan thleng thei a ni. Tha kan la thlah thiang lova, infuih tawnin i ṭangrual tlat ang u.
"Beih hmain ngun taka râl rêl a ṭha,
Rem i hriat poh leh i chak zâwk ang." Thufingte 24:6
Dr JLalramchhuanga
MD(Medicine)
16/05/20
Post a Comment