MAWHPHURHNA AIA THUNEIHNA

MAWHPHURHNA AIA THUNEIHNA

NEWS COMMENTARY: 23.05.2020 - AIR Aizawl

Mizote hi hun khirh leh harsa tak karah pawh fiamthu duh tak kan nihna hi a lang fo ţhin a. Tun hnaiah khan Aizawl veng pakhat aurinna hmanga an thupuangtu titau der chuan, thuawih lova pawn chhuak lui an awm chuan phailama tangkhang lo haw khung hran mekte chu hmuituamna tel lova an veng chhunga duhtawka vah chhuah tirah vau tih kan chhiar ang chi kha nuihzatthlak tak tak a tam mai a. A nuihzatthlak hle rualin a phenah khan thil tam tak a awm a. Mizote zingah hian a tak taka mawhphurhna nei aiin a phawvuaka thilti mai mai leh thuneihna duh vanga thiltih ching kan inphum tam hle a, tlawmngaihna suak, beisei neih vanga mawhphurhna hlen tur anga lang thiam hi kan ngah a, an mualpho fo bawk.

Covid-19 hripui avangin thla hnih zet chu kan inkharkhip ta reng mai a. Hmun ţhenkhatah chuan hripui darh zel tur venna atana inkharkhip kengkawhtu, local/village level task force te pawh vin leh thikthuchhe zual deuh kan hmu tawh a. Thuneihna an neih ngai loh han nei thar thut an nih vangin, awmdan thiam pawh a harsa thei viau ang tih chu a hriat a. Chutih rualin Sorkarin V/L LTF mawhphurhna leh an hnathawh dan kaihhruaina (Standard Operating Procedure) chhiar hauh lova duty hi a tam zawk fe an nih a rinawm a, chutiang inkaihhruaina chu tihchhuah a ni tih pawh hre miah lo awm theih a ni bawk.

Chutiang chu hripui laka kan ram venghim tura sorkarin a din leh a ruatte dinhmun chu a nih miau avangin, V/L LTF 900 dawnte hian an ar-khaw-thim-dai hle tih hai rual a ni lova. Thupek siama thehdarhtu sorkar lam thiam loh ni maw, sorkar laipui Ministry of Home Affairs-in India ram puma hman tur inkaihhruaina a siamte pawh an hre reng reng lo niin a lang a. Kan VLTF zinga titau hnuhnung Vairengte-I VLTFC te’n an duty-te in hnuhdawh chhan an sawi dan chu – “Phai lam aţanga nitin mamawh nilo Mizoram sorkarin Mizoram a phurhluh a phalrai tak vang leh nitin bungraw phur lirthei 200 chuangah lirthei khalhtu leh a puitute an lo luh reng vang a ni, tiin, hetiang a nih avang hian ramri a duty in awmzia a nei tawh lo ni a an hriat thu an sawi a, chuvang chuan duty post pali a duty te chu an ko haw nghal niin an sawi.

Vairengte chungchang bikah hian vawi 2 langsar takin an titau tawh a. Hetia an tih nawn chhan hi sorkar thuneitute lak aţanga inkaihhruaina dik tawk lo an dawn vang a nih loh chuan, tihtauh an ching ve reng renga ngaih a awl khawp ang. Hetih rual hian kan inkharkhip chhunga inkharkhip thupek kengkawhtu, veng leh khaw hrang hrang a sawisep kai an awm leh tlat ţhin leh, ţhenkhatin SRS ho chet firfiak lai ang deuhva an tehkhin leh ţhin chhan hi, a chunglama khaikhawmtu lamin thil an hrilhfiah chian loh vang nge, kan ze pangngai ‘kan khaw dan/kan khaw tihdan’ tih sahuaithingvawn tlut kan la tam vang aw tih hi ngaihtuah tham a ni.

Hetiang a nih chhoh mek lai khan kan Central YMA lah chu Civil Hospital, Aizawl blood bank-a thisen pek chungchangah an lo titau mek bawk a. Ţhenkhat hian YMA hi non-governmental organization (NGO) emaw an ti fo ţhin a, mahse, a ni lo. NGO chuan thil buaipui bik – entirna’n, hnuchham, ruihhlo ngai, AIDS vei emaw hmeichhe dinhmun tleu enkawl emaw an hmà ţhin a, YMA erawh chu kan Mizo hnam nun behchhana din a ni a, chanchinbu lama kan ziah pawhin ‘apex body of the Mizos’ (Mizo Inpui) tiin kan ziak hial reng a. A pawl thupui/inkaihhruaina (maxim) chu ‘ţanpuingaite ţanpui’ a ni a. Hei hi thu delhkilh awm lo thupui – chuti a nih loh chuan – tih awm lo a ni a, ŢANPUI NGAITE ŢANPUI a ni tawp mai a ni. Chutiang a nih lai a damlo tam takin an nunna chhanna atan hiala an mamawh ngawih ngawih tih kan hriat tlan vek; thisen pek rih loh tur tih thurolum an han nei ngawt mai hi chu, YMA thupui leh kaihhruaina nen chuan chhim leh hmar ang a ni. Tihtauh dan pawi leh rapthlak tak a ni a, Lal Heroda chibai bukna aiin a rapthlak dan a nep chuang lova. Insawithiam tum eltiang mahse, insawithiam theih a ni lova, chhan ţha tawk a awm thei lo.

Chu chu ţhenkhat tihtauh dan chanchin tlangpui a ni a. Chhim lama khaw pakhat village level task force-in Chief Minister relief fund an dawn dan, a dawng tur an thliar dana dawng tlem tur zinga telh an nih avanga an han tihtauh viau thawm pawh kan hria a. An titau zui ta lo tih thu kan hre leh a, a lawmawm e. Mizo ram leh mipui himna atana sorkarin a din (tlawmngai a thawk tura mahni indin chu an ni chiah lo), a dinchhan tihlawhtling tura tlawmngai a thawk chhuakte hi an han titau ta tlat mai pek chu a ni a, ‘Ramri chu kan vêng tawh lo mai ang,’ an ti a. An ram leh mipuite hi an vêng duh lo a nih chuan an vêng lo mai a ni ang chu. Mizoram chhunga chêng an ven turte hi hnamdang pawh an nilova, an chhungkhat laina, an thisen zawmpuite an ni miau a.

Thâwm dang mawi tak mai kan hre ta thung a. Myanmar ramri lam aţanga lo chhuak a ni. Melbuk VLTF leh YMA te chuan Covid 19 do na’n a CM Relief Fund kaltlanga Ruantlang BDO kut atanga Rs 10,000 an dawn chu, a mamawh leh thawkrim zawkte hman atan an hlan let a. Central YMA leh Champhai Sub Headquarter YMA hruaitute chuan Ţiau lui kama Melbŭk VLTF leh YMA duty na hmunte tlawhin, pawisa fai Rs 5,000 leh hmaikawr an hlan a. Central YMA aṭanga pawisa an dawn chu, Vanhnuailiana Group huamchhung a Branch pakhat, anni aia ramri a zan riaka lo duty rei tawh leh lo hah tawh zawk, Bulfekzawl Branch YMA te puih let na'n Champhai S YMA hruaitute hnenah an hlan let nghal a ni. Hei zet hi chu tlawmngaihna dik, ‘Zonunmawi’ kan tih dik tak kha a ni.

Engpawhnise, mihring hi kan tihtauh chhan ber chu thawk ţha tâwk a inngai, chumi phu tâwka chawimawi leh lawmman a vur ni lova kan inhriatna, kan thiltih ţha kan tih em em, miin min hriatpui a min faksak tawk lova kan hriat vang a ni tlangpui a. Tlawmngaihna ze laimu nen chuan inpersan tak a ni. Melbuk khaw VLTF te hi an hausak vang a nih a rinawm lohva, an hnathawhah an lungawi a, an thawh ţhat kha an lawmman-ah an ngai ni maiin a lang a. Anni ang, tihtauh chu sawi loh midang hnena pe thei nun nei hi he ram hian a mamawh ber chu a ni. Melbuk khua hi lukhum phawk meuhva chibai bûk tlâk an ni – an tihtauh ve loh piah lama an chetdan hi khawvel hma a Mizo hnam hmel ti ţhatu tling pha a nih avangin.