TRUMP-A TAN ȚAWNGȚAIPUI A NGAI

ToMZ
6 Jun 2020, Saturday, June 06, 2020 IST
Tunah hian America ramchhung buaina lo chhuah mup mupna chhan a chiang ta. He buaina phêna Opposition party, liberal democrat hovin Trumpa paihthlak tuma an beihna a lo ni a. Thubuai nasa tak tak leh impeachment hmanga paih thlak an tum an hlawh chham zel si a. Inthlan kum a ni tawh si a, an candidate Biden-a hian a khing hneh dawnin an ring si lo va, hetiang hian mipui sang tam takte buaina siam kãrah inrawlhin, protest movement huaihawtin, ANTIFA an tih te ruaiin an che ta vak mai a. Minneapolis khawlaiah mihang nungchang țha vak lo, covid 19 vei lai, zu rui bawk pakhat, George Floyd-a chu police officer nikhua lo deuh kutah tihlum a ni ta hlauh mai si a. Chu tak chu remchanga la-in, democrat ho chuan buaina siamtute chu an fuihpawrh a, an tipunlun zel a, chu Mihang thihna changchawi chuan police station te leh in tam tak an hal a, mi inah lutin an sawisa chiam chiam a, dawr an rawk a, mi an that a, an ri luai luai reng a. America ram pum mai bakah ram dang, Australia te, England te pawh a chim ta zel a ni.
ȚAWNGȚAIPUI A NGAI



Kum tinin Mihang leh Mingo leh Juda te hi misual kutah an tualthi țeuh țeuh țhin a, buaina a chhuah phah kher lo. Hman nia Police officer pakhatin protester zinga pakhat a lo that kher si a, a mawhphurtu, law and order kengkawhtu lah chu Minnesota Governor leh Minneapolis khawpui Mayor te an ni daih si a. Mahse he state hi democrat lalna a nih avangin an governor te dem lovin, Liberal Democrat-ho chuan Donald Trump-a chungah mawh an phurh daih a. He buaina chhuahna hi Democrat rorelna state a ni si a. Buaina chinfel aiin Trumpa eptu Liberal Democrat ho chuan namen lovin buaina siamtute an fuihpawrh a, America khawpui tin deuh thawah inhawr khawmin, curfew an bawhchhia a, hmun tin hmun tangah chhiatnain ro an rel ta, opposition party leh mi thiltithei pui puite support-nain. White House bula St John's biak in hlun tak, America President apiangte lawiluhna ber țhin pawh an hâl chhe duh hial a, mi dawr te rawkin, thawmhnaw tam tak an pu chhuak țun țun lai te chu khawi hmunah pawh vedio atanga hmuh tur awm emaw tih tur a ni.

Mihang George Floyd-a țhingțhit hlumtu police officer Derek Chauvin-a leh a thihnaa inhnamhnawih police officer 3 dangte kha manin jail rip chhungah an khung tawh a, tualthah thubuai rip tak awrhtir an ni a. Chauvin-a phei chu an khung hrang a, minute 15 danah a nungchang enthla rengin, inthah a tum leh tum loh te chenin an enthla reng a ni. Kum 40 thleng pawha tantir theih an ni awm e. Chutih laiin a nupui chuan a pasala pawm duh tawh lovin, ințhenna tur lehkha a lo siam fel tawh a, George Floyd-a chhungte a tuarpui thu pawh a sawi. Chutih laiin Floyd-a unaupa chuan mipui hmaah thu sawiin buaina chingfel tura inremna leh inngaihdamna thu a sawi hial. Mahse tuna an buaina khu opposition politicianten Trumpa an beihna remchang a ni si a, an inrem tlang mai ang tih hlauvin namen lova buaina chhunzawm zel an tum. Inremna a awm mai chuan an che na thei dawn si lo va.

MIHANG NUNNA A NEP LO (Black Life Matters) tih țanchhanin, mingo police in mihang a tihhlum chu boruak tihsosan nan an hmang a ni ber a. Chutih laiin misualin an țhenawm dawr an rawk lai chhan tumin ex-police officer, kum 77 mi David Dorn-a chu a va lut ve a, mahse an lo kap hlum a. Heta a kaphlumtute hi mihang, dawr rawktu an ni a an kahhlum David Dorn-a hi mihang bawk a ni bawk. Mahse he mihang ex-police officer thih thu hi democrat-ho te, CNN leh eptu pawl TV leh pressmen lam chuan an report țha ve duh der si lo va; buaina siamtuten police mi panga vel an kah hlum tawh thute pawh an ngai pawimawh chuang lo. Mihang țheuh țheuh, he buainaa tihhlum ve ve ni si, pakhat zawk thihna chu an vaw vul vak a, pakhat zawkin ngaihsak a hlawh si lo.

Heng thil thlengah hian Trumpa chu dan leh hrai kengkawh zo lo, bang rawh se, an ti a. Trumpa'n state tina governorte chu an ram chhunga buaina control turin theihtawp chhuah turin a ngen a, mahse democrat governorte chuan an pawisa duh chuang lo. Tuna America khawpui 140 vel zeta buai zualna bik leh inthah, dawr rawk, leh dan bawhchhiatna tam ber khu Democrat ho state a ni zel. Republican mipuiho erawh chuan dawhthei takin an lo thlir mai a ni.

Buaina control thei lo, tia an president ber an mawhpuh laiin, vengtu police te leh National Guard te a han koh chhuah chuan an haw leh bawk si. Governorten an state chhunga buaina an ching fel thei lova, inrawk, bungraw tihchhiat leh mi nunna him lo khawpa thil a thleng zel a nih chuan sipai rual koh chhuah pawh a tum thu a sawi chhuak a. Nimahsela chu thu a sawi ringawt pawh chu eptu lam chuan an tàwng lêt nasa em em a. Lehlamah a rilru tihah lehzual turin duhsak taka minister hna ropui a pek Esper-a, Defence Secretary lah chuan sipai koh chhuah chu a ngaihdan a nih loh thu-in a pu chu a rawn hnial ve leh bawk si a, a hnuah a thu chu zûk leh mahse, pu te thu hnialtu a ni ta reng reng a. Hei hian Trumpan a thawhpui miliante a bân leh țhinna chhan pawh a tifiah nghal awm e.

Tuna buaina siamtuho khu eptu party te fuihpawrh a nihzia a chianna chu, Floyda thihnaa mawhphurtute jaila an khung a, case rip tak an awrhtir hnuah pawh sorkar tibuai zawngin 'police tan sum pek tawh loh tur,' tiin Democrat lalna New York a buaina siamtute chuan "Defund Police" tiin an au țhup țhup a; gang rualte nen khawlaiah ro an rel a ni ber mai. Nimin lawk khan democrat state pakhat Pensylvania democrat state a Philadelphia khawpuia super market lian tak mai chu misualten darkar 15 teh meuh mai an han rawk aleh! Bungraw țha pui pui khati zat an hnawh muk tlat kha a ruak duak mai a ni. A enkawltute hnenah, 'Police in ko lo em ni?' tia an zawh chuan, "Ko tehreng mai (numerous times), koh chhuah zawh ni hek lo," a ti a ni. Chutiang khawp chuan Trumpa hawtu state thuneitute chuan an ram president meuh pawh an zah lo va, tihmualphona nia an ngaih avangin thil tihchhiat vek pawh an pawisa lo. Chhe vek se, Trumpa hi mualpho se, tichuan bang turin nawr vak ila, tih chu an chet duh dan hian a tinzawn tlat a ni. California Democrat governor phei chuan moral support pe in buaina siamtute zah entir nan an hmaah a țhingțhi hial mai. He buainaah hian Trumpa tihchhiat duhin a rukin China a inrawlh ve nia ngaih a ni.

ENG VANGA BUAINA HI CHHUAK NGE? ENGVANGIN NGE HETI TAKA A PUNLUN? He buaina hi America tualchhung buaina mai a ni lo. A tirah chuan local problem thila ințan mah ni se, khawvel pum huapa sual leh țha, kristianna leh khawvel indona a hril pha a ni. Khawvel chhandamtu ni țhin America chu Liberal Democrat, Leftist leh Socialist, Globalist thila a inhman nasat avang leh, kristian nuaibo tumna leh phiarrukna ril tak a inphum thuk tawh em avangin, chu suahsualna laka chhanchhuak turin Pathianin Donald Trumpa khu a ko va, kristian kohhrante tawngtaisakna avang chauha tling thei a nih kha. Mahse hmelma pa Setana hian heti tak hian a lo haw em em si a, amah tichhe thei tur apiang a fuihpawrh a ni. Chuvangin a kut phuar tur leh, opposition lamin namen lova paihthlak tumin, president office a luah hma atangin an beihrawn a. Russia puihna avanga tling a ni, tia puhin kum 2 zet investigation an bei chur chur a. A thlaphânawm hman hle. 

Mahse a tawpah thiam a chang ta. Phuahchawpa an puhna mai a lo ni tih hailan a ni a. Chumi hnuah, nikum krismas dawn khan thu hotê te hmangin president a nihna paihthlak tumin American House of Representative (an Lok Sabha) in an impeached ta a, mahse ama lamțang tamna Upper House, Senate-in chiang takin an lo hnawl ve thung a. Kumin November 3, 2020 inthlanpui lo awm turah an khing huphurh si a. Boruak tikhaw lova, a tihchhiat theih apiang tichhia a, tihmualpho dan ngaihtuahin, mawi leh mawi lo pawh dawn lovin, khawlaia buaina siamtu protester-te, mi dawr rawktu leh tualthattute, Gang rualte nena țang rualin America ram pum chu buainain an tikhat ta ringawt mai a ni. Chanchinbu mite lah chuan hleihluak takin, boruak tisosang zawngin an report chur chur a, CNN te, MSNBC te, New York Times etc te chu liberal lamțang tih takah Trumpa sawichhiatna ringawt hi an chawtui ber a ni tih hi US News Channel hrang hrangte leh International News channelte hian ngaihthlak sen loh khawpin nitin darkar 24 an puang a ni.

Vawiin, 6th June 2020, Inrinni zan hian Trumpa awmna White House hual bet turin buaina siamtute chuan a maktaduai tela inpun khawm an tum. President a nihna atanga nawr chhuah chu an tum ber a ni. Hetih hun lai vek hian, USA a mi rintlak tak țhian tha hnen atanga ka hriat chu, khawvel puma evangelical kristian-ten a rûkin Trumpa tan țawngțai turin hma an la mek. Ani president nih theihna chhan chu ringtute țawngțaina chiah a ni a. Case rip tak an awrhtirna ațanga hnehna a chan theih zelna chhan pawh ringtute țawngțaina bawk a ni. Tuna beihvakna a tawh mekna ațanga chhanchhuaktu tur Lalpa Pathian hnenah hian i dil leh ang u. Tun hmain America President zozaite kha rinna kawnga an dinhmun pawh kan hre phak ngai lo. Tuna mi Donald Trumpa erawh chuan Zoram khawvel hmun tina ringtu, nang leh keia țawngțai sakna a mamawh tlat. He thu i lo chhiar ațang hian Lalpa hnenah lo kun ve ang che. 

Tichuan Pathian hriak thih Trumpa hmang khuan -

Communist nunrawng leh Pathian hre lo China ram thiltihtheihna chu vuak țhiah sawmin a awm ta mek a. Sum leh pai, tihduhdahna leh vauna, inbumna hmanga khawvel awpbeh a tum laiin, a tum dan tihlawhtling tura pulh hri theh darha khawvel a chawhbuai lai takin, a thangkam chu khawvelin a hre chhuak ta hlauh va; tunah hian khawvel ram zauvah țhian pawh nei lovin, ram tinin an thinhrik ta.


Trumpa avang hian Israel ram chuan chhantu ropui leh thlamuantu neiin, a hmelma ramte chu duh tawkin a phîn let thei ta. India sorkar nen ram pahnihten ințhian țhatna an nei ta a, Australia nen inremna thuthlung an siam tawh bawk.

Kumin November ni 3 a USA president thlannaah hian Trumpa chu a term hnihna atan a ding leh dawn a. Hetah hian amah bakah, House-ah leh Senate ah Republican party in majority seat a lak ngei theih nan tawngtaipui bawk ila. Tuna coronavirus hripui damdawi hmuh chhuah tuma khawvel ramten an beih mek karah pa ber chan chang USA hian a hlawhtlin thuai theih nan kan dil bawk ang.

Dr. P.C. Biaksiama
Trumpa chhiatna duhtu democrat hovin he hripui avanga thihna rapthlak lo thleng pawh pawiti hmel pu hman lo khawpa Trumpa dodalna ringawta an inhman hlel lai leh, America economy lo tla chhia hian Trumpa dinhmun tiderthawnga an hriat lai hian, an duh loh zawng thu lawmawm a thleng tlat mai. America economy chuan hma a rawn sawn leh ta thut mai a, May thla chhung ringawt khan hna thar nuai 25 zet thawh tur a awm leh ta a, Covid-19 avanga unemployment lo pung thur thur kha tunah chuan a tla hniam leh ta duai mai. Beisei phak lohvin ram economy pawh 13.3% in a zuang chho zawk mai. Mexico nena an inrîna bang, Trump Wall hna pawh an thawk chak bawk a, a ruka USA a lut rû leh drugs tawlh lut ru pawh an kiam ta duak mai. Hmasawnna kawngah chak takin an kal leh thei dawn. Kristianna ngaisang Trumpan sorkarna a chelh loh chuan a khingpui democratic candidate Joe Bidena te pafa hian China sorkar lakah dollar vaibelchhe 1500 lai an lo eisak si a, Communist China thuhnuaiah kan kun mai ang. Chuvangin Trumpa tan hian Thlarau finna leh thiltihtheihna hmanga ro a rel zel theih nan i ṭawngṭaipui zel ang u.

- Dr PC Biaksiama
6th June 2020.
Visitor's Voice

Click to Comment

No comments:

Mizo Nula Khal

+