IN HMEICHHIATE HMEICHHIATE HI MIN NGAIDAM RAWH U!

ToMZ
4 Jun 2020, Thursday, June 04, 2020 IST

IN HMEICHHIATE HMEICHHIATE HI MIN NGAIDAM RAWH U!

(Tunlai hmeichhe lâr zualte news, so what?)

-Zoremi Hmar Zote


Covid-19 vanga phâi aṭanga rawn haw zingah, hmeichhia hlir kan lâr leh ta. Lar chhan hrang hrang neia lâr kan ni.

1. U Kim kârtachiami:
Zawhna mawl zet, "Vâi sawn i pai hnu hian i inchhir em?" tih zawhna chu mawl zet thova chhangin, "A teuh lo, ka hausak phah," tiin a chhang a. Mizo hmeichhw vai sawn pai hausakpui pawl din a tum nghe nghe niin thu kan dawng. Mizo hmeichhe vai sawn hausakpui awmchhun a nih leh nih loh kan hre lo na a, sawi chhuak ngam awmchhun a la ni rih a. Hei vang hian MHLTBTP(Mizo hmeichhe lar thut buaipuitu pawl) chuan ropui an ti hle a, vai sawn pai tur a hmuh zel a, a hausak zual an duhpui thu an tarlang.

2. U Vai fel ti em em-i:
Rel aṭanga video-a thla latu, "Mizoram chuan min hlau a, vaiho erawh chuan ei tur min pek tumin min lo zîm tuau tuau mai," titunu chu, vai fel a tih em avangin VFTVLP (Vai fel tih vanga lawm pawl) chuan lawm thu an sawi a. Hetiang khawpa vaiho fel a tih avang hian, Mizorama haw tawh lo tura ngenin, vai hnama sa phun tura ngen an tum thu an puang a, an zingah mahni hnam leh ram hmuhsit ching chu an hnama lo pawm duh lo pawl an lo awm ve bawk si avangin, an inhnial buai hle a ni awm e.

3. U Social distancing maintain hlei thei lovi:
Mizoram sawrkar zei loh vanga hnawhkhawm zinga lungawi lo pakhat pawh hmeichhia tho niin, ani pawh hi state dang sawrkar chuan chawimawi tlâk an ti a. Ama ram leh hnamte chu lak tlak loh lutuk, social distancing takngial pawh maintain lo, line pawh siam hlei thei lo khawpa nawi an ni chu an khawngaih hle a. Ani pawh hi haw lo law law se an duh thu sawiin, "A hawna man tur tumsaktu Mizoram sawrkar hnenah a haw man hi pe tâu se, lo chhuk leh nghal rawh se," tiin thu chhuah an siam lo.

4. U Hur em em-i:
IG lama hmeichhe hur live ṭhin chuan entu a ngah ṭhin hle. Zahmawh ngialngan zet zet sawia a hur thu a tlangaupui mawlh mawlh chunga tuma'n in bachuar lo hi, MHLTBTP chuan Mizo mipate a dem hle cheu a, hetiang khawpa râwpa in dah hi in thiam lo hul hual a ni tiin, an lungawi loh thu an tarlang ve bawk. Mizo ṭawng ngei hmang ve mah se mi ṭhenkhat chuan, Mizo hmeichhe dik tak a ni lo tiin an lo ṭang kawh ve bawk.

5. U So what-i:
Mumbaia lehkha thiam awm lo haw niin, sharp ṭawnga a biak mawlh mawlh mipa chuan, "Hmm...umm..." tih vel ringawtin a lo chhang a ni awm a. Hei hi Mumbai hmeichhe lehkha thiam anga insawi pawl inzawmkhawm chuan awm ang lo an tiin an la na hle a, lehkha thiam tak tak ho an lo zak em em pawh chu, zak tawh lo turin an ngen a, phaia Mizo hmeichhe awm tam tak zingah, sap ṭawng thiam bik riau chi leh, mahni hnam mipa zahna nei miah lo, chaldelh ching chu tlem tê bak an awm loh thu an sawi a ni. Sap ṭawng thiam reng chuan "hmm" tiin lo chhang ringawt tawh lo turin MHLTBP chuan a ngen a. "Trell me" an tih phei chuan lo trell ngei ngei tawh turin an ngen che u a ni.

'So what?' tih emaw, 'i don't want' tih te a sawi leh a nih chuan, "hmm...umm..." tih ringawta chhang tawh lo turin leh, Mizoram veng him tura lo haw an nih thu an sawi phei chuan hnam pasal ṭha anga lo treat a, Nopui lo hlan zawk tur a ni a. Nopui hi a lo awm hnai remchang lo a nih pawhin Bucket lian emaw, ṭin emaw, chawhtawlh emaw tal lo hlan turin an ngen a, tawlh loh puan hmuh remchan mai loh chuan Gamchha pawh an pawm tho thu an sawi bawk.


6. Why she go-i:


Mizo hmeichhia thovin thinrim taka, "Why she go?" a tih hnu-ah, a ṭhiante chu police lamin an lo tawk lui niin hriat a ni a. Thinrim takin, "Why you release," a ti leh hial a ni. Ṭhian chhan thih ngam ang hiala ngaih niin, Mumbai lehkhathiam bik ṭhenkhat chuan chawimawi tlak an tih thu an sawi rualin, Phai lam khawpui hrang hranga Mizo welfare mipate tawrhchhelzia lantirtu ni-a ngaih a ni bawk.

Rêl chhunga buaina siam te, Rel aṭanga tla te. Z*** râwp em em leh vai sawn hausakpui te. Mumbai lehkhathiam leh Mizoramin kan hlauh, vai fel ti em em te, social distancing maintain tura sawrkar phût tlat leh video lâr zual hrang hrangah hian, Mizo hmeichhia hlir kan ni a, heng kan aiawha huaisen taka 'crack' ngam hmeichhiate hi kan chhuang hle lo.

Tui tla, rel aṭanga tla, Delhi nula pahnih chatthla tih vel, hmeichhia hlir kan ni mai. So what?

Mipate khan min ngaidam teh u. Mipui sang tam tak zingah hetiang hi pahnih khat tal an awm ve a, phaia awm hmeichhia hrim hrim kan nasa vek lo tih min lo hriatsak teh hrâm u!

"So what? Trell me please. For why she them, the you please trell me!"


Visitor's Voice

Click to Comment

No comments:

Mizo Nula Khal

+