COVID 19 KAI PAKHAT ENKAWL NAN CHENG NUAI 10
MIZORAM SAWRKAR-IN KAI KAN NEIH TE A THLAWNIN ENKAWL VEK DAWN

Kolasib Times
Covid 19 kai enkawl nan ni khatah Rs. 20,000 atanga 25,000 a ngai a, Ni 14/15 chhung vel a lo berah enkawl an ngaih thin avangin mi pakhat enkawl nan Rs. 7-10 lakh vel sen ngai a ni a. Mizoram sawrkar chuan a thlawnin Covid 19 kai kan neih te enkawlna pe dawn.


India ramah Covid 19 kai hi 1,06,737 awm mekin, mi 1,04,106 enkawl dam an ni tawh a, mi 6075 in an thih pui tawh a ni. Mizoram-ah Covid 19 hri kai hi mi 16 awm mekin, mi 1 enkawl dam a ni tawh a, thih pui an la awm lo.

Kolasib Times palaiin thu a dawn danin India ramah hian Covid 19 kai leh kai loh Swab sample laa endik nan Rs. 4500 a ngai a, hei hi Supreme Court-in a bituk zah niin, private laboratory te pawhin hemi rate hi an zawm tur a ni a. Swab test tura hmanrua (test kit) hi pakhat Rs. 3000 man a ni. Sample thenkhat hi positive si, tum engemaw zat enfiah anih hnu pawha negative tlat a awm avangin, a lo berah tum riat atanga tum sawm vel test nawn ngai a awm thin a ni.
Covid 19 kai, ventilator leh hmanraw dang hman ngai lo, tuna Mizoram a Covid 19 kai mi 16 kan neih te ang enkawl nan hian nikhatah Rs. 20,000 atanga Rs. 25,000 sen a ngai a. A lo berah ni 14 atanga ni 15 chhung enkawl an ngai a, chumi chhung chuan a enkawlna senso hi Rs. 3,00,000 chuang a ni a. Ventilator hman man hi ni khatah Rs. 25,000 atanga 50,000 vel a ngai a. Damdawi In a awm man (room rent) hi a room a zira danglamin, Rs. 1000 atanga Rs. 1500 a ni tlangpui a ni. State dangah hian sawrkarin engtiangin nge Covid 19 kai te hi a enkawl tih hriat ni lo mahse, Mizoram sawrkar chuan mi 17 Covid 19 kai kan neih te hi a thlawnin enkawlna a pe vek a ni.

Covid 19 kai te enkawl tu, Doctor leh Nurse te hian darkar tinin an thuamhnaw te leh hmanrua te an thlak reng a ngai a. PPE chu thlak ngun a ngai zual a, PPE pakhat man hi a quality azirin Rs. 750 atanga Rs. 1000 te a ni. Damlo te enkawlna antibiotics, anti-vitriol leh damdawi hrang hrang an pek hi nitin Rs. 500 atanga Rs. 1000 man a ni.

Covid 19 kai pakhat hmuhchhuahna leh an enkawlna senso tur hi a tlem thei ang bera chhut a, ni 14 chhung enkawl an nihin Ventilator ngai lo tan Rs. 3,09,700 a ni a. Ventilator ngai tan Rs. 6,59,700 a ni a. Tarlan tawh angin a enkawltu pakhat-in darkar tin a hmarua leh inthuamna te a thlak ziah a ngai a, chutiang anih chuan Doctor emaw Nurse emaw mi 1 in darkar khata 2000 a chhutin ni khatah alo berah darkar 12 damlo attend anga chhutin ni 14 chhung chuan Rs. 3,36,000 a tling a. Mi pakhat ni 14 chhung enkawl nan a lo berah Rs. 7-10 lakh vel sen a ngai a ni.

Post a comment

Powered by Blogger.