MST BUS CONDUCTOR COVID-19 VEI HMUHCHHUAH CHUNGCHANG

ToMZ
14 Jun 2020, Sunday, June 14, 2020 IST

MST BUS CONDUCTOR COVID-19 VEI HMUHCHHUAH CHUNGCHANGA MISSION VENG LTF TE CHET VEL DAN. VENG MIPUI HNENA AN THUCHHUAH


MISSION VENG LOCAL TASK FORCE THUCHHUAK
Dt. 13.6.2020; 11;00 PM

Vawiin Inrinni (Dt. 13.6.2020) khan Mission Veng pa pakhat chu Covid-19 Positive a ni tih confirm a ni a, amah enkawltu leh buaipuitu ber a fanu erawh a Negative hlauh thung a ni. Ani hi Mizorama Local Transmission hmasa ber nia hriat a ni a, Community Spread awm thei venna leh do lêt nan, Mission Veng Local Task Force on Covid-19 Committee chuan, Aizawl District Magistrate rem tihnain, veng chhungah thu leh awm hma chu Total Lockdown a puang nghal a ni.

HMALAKNA HMANHMAWHTHLAK
Aizawl City Bus


Covid-19 Positive chanchinthar hriat a nih veleh rang takin Local Task Force Committee Meeting hmanhmawh koh nghal a ni a, Medical Team-te nen ngun takin ngaihtuah a ni a. Community Spread thleng thei dinhmun a nih avangin Aizawl District Magistrate be rawn chungin Mission Veng chhungah Total Lockdown puan nghal a ni a. Dam lote chênna Colony leh thenawmte In eng emaw zat Sealed nghal thuai a ni. A rang thei ang berin dam lo leh a chhungte veivahna leh chet lakna zawng zawng chhui nghal char char a ni. LTF member thenkhatte pawh fimkhur thilah in lama inkhung nghal tura tirh haw zui an ni bawk. Veng chhung leh veng pawn thlengin Contact Tracing neih zar zar a ni a, veng pawna mite chu an chhungkua bakah an awmna veng LTF hrilh nghal zel an ni a. Veng chhung mi, veng pawna lo chhuak thenkhatte pawh koh haw nghal niin an in lamah inkhung nghal tura hriattir zung zung an ni.

DAM LO ZINKAWNG

Dam lo hi a chet velna leh a zinna zawng zawng zawh chhuah vek a ni a. State pawn atanga rawn hawte lam leh thlahin Bairabi leh Aizawl inkar te, Champhai leh Thingdawl lamah te vawi eng emaw zat a kal tawh a. June 8, 2020 (Thawhtanni) khan Aizawl Hospital Casualty-ah a khawsik avangin an inentir a. June 10, 2020 (Nilaini) chawhma lam khan Aizawl Hospital-ah bawk an inentir leh a, result-ah chuan zunkawng hnâi la nasa leh Sugar sang tak a lo ni a. Chawhnu lamah Hospital-a in admit turin an lut leh a. Rei pawh an awm hmain, fimkhur thilah, amah buaipuitu ber a fanu nen ZMC, Falkawn lamah phurh phei a ni zui ta a ni. Vawiin June 13 zingah Result a lo chhuak a, amah hi Covid-19 Positive a ni a, a dam loh chhunga buaipuitu ber a fanu erawh a Negative hlauh thung a ni. Dam lo hian, State pawna rawn haw an phurh danah an fimkhur thute, pindan thlap a nih dan leh Driver side kawngka atang chauha an luh chhuah thin dan te a sawi a, result chu mak a tih thu a sawi. Kawng engkima buaipuitu a fanu a Negative leh tlat si chu mak a tih thu a sawi bawk. Tunah hian Dam lo dinhmun hi a tha a, a khawsik a awm tawh rih lova, a Sugar pawh an control tha a, a normal rih a ni. Chaw pawh a ei that thu kan dawng bawk.

HMALAKNA KAL ZEL

Zanin dar 11 dawn vel thleng khan Dam lo leh chhungte chetvelna chhui zel a ni a. Primary Contact (Direct Contact) a neih hriat theih chin apiang umzui zel an ni. Aizawl Hospital lam pawh an fimkhur hle a. Zanin khan Aizawl Hospital-a thawk mi 29 te chu Swab Sample lak sak niin Hospital-ah hian an inkhunghrang nghal a, in lama an chhungte zawng zawng pawh Quarantine nghal an ni. Mission Veng chhunga Primary Contact amah leh a chhungten an neih, tun dinhmuna kan hriat theih chin, mi 34 te chu Swab Sample laksak an ni a, veng pawn lama awmte pawh an veng LTF te hmalaknain Swab Sample lak an ni bawk. Heng bakah hian Secondary Contact awm thei ang zawng zawngte pawh a list siam chhuah a ni a, chawl lova bawhzui zel tum a ni. Anni ho hi Swab Sample result chhuah hma chu an chhungkua pawn chhuak lo tura hriattir vek an ni bawk. Heng zingah hian result kan neih dan azirin a veng ang leh Aizawl ang pawhin hmabak thui tak la awm thei tura ngaih a ni.

LAWMTHU

Mizoram State Health Minister Dr. R. Lalthangliana leh a Team-ten a hmunah ngei min rawn tlawh a, Dr. Z.R. Thiamsanga, MLA, Vice Chairman, Health & Family Welfare Board, chuan min rawn tlawh bawk a, an chungah kan lawm hle a ni. Medical Team lamin min ngaihsak hle a, zanin tlai tak tawh thlengin Swab Sample lain an vir buai hle a, a rang thei ang bera Result hriat a nih theih nan Dr. Pachuau Lalmalsawma, Mizoram State Nodal Officer, chuan a hmunah min vil reng bawk a, an chungah kan lawm hle a ni. Kan dinhmun hrethiam a, Official taka dilna leh thuchhuah siamna hun a awm lo a ni tih min hriatpui a, vengchhunga Total Lockdown puan min phalsaktu Aizawl DC hnenah lawmthu kan sawi bawk e. Veng mipuite thuawihnaah lawmthu kan sawi a, dawhthei taka thuchiang zawk nghak a, thuthang satliah pu darh kual mai mai lova an inthunun tlat avangin veng mipuite chungah Local Task Force chuan lawmthu a sawi mawlh mawlh a ni.
HMUHCHHUAH CHUNGCHANG


Theihtawp chhuahin Sawrkar leh Local Task Force-ten hma an la zel dawn a, mipuite chi-âî lo tur leh fîm taka fîmkhur zui zel turin Mission Veng mipuite kan inngen a. Dam lo tan leh Covid-19 dona kawnga thawktu zawng zawngte tana bang lova tawngtai fo turin kan inngen bawk e.

Mission Veng Local Task Force on Covid-19

Post-tu thubelh : Kan lo hriat tlan atan, tuna Covid-19 Positive te pafa hi June 2 khan Help,line 102 Call-in ZMC, Falkawn-ah, an kal a, Swab Test an dil a, "Kan criteria ah tuna khawsik leh thawhah nei lo chu kan test thei lo" tiin an lo hnawl a, "Chin hriat loh tawp ai chuan" tiin R. Dengthuama Hall, Mualpuiah an rawn kal kawi a, RAT Test an ti a, an Negative thlap. Hemi avang hian ngaihtha takin an lo awm ve tawp a lo ni a. June 8, 2020-a Aizawl Hospital-a an inentir pawhin, Covid-19 thilah ngaihthat lohna engmah an nei lem lova, inrin ngaihna pawh an hrethiam lo. June 10, 2020-a an inentir leh pawhin zun kawng hnâi leh sugar sang bak rin ngaihna dang an la nei thiam chuang lote pawh a ni ngei ang. Misual, zin veivahna thup tum tlat, midang tana harsatna siam pawh pawisa lo anga chhuah an ni mai hi chu a diktawk lo a ni. An phak tawk ang ang chuan an lo inngaihtuahin theihtawp an lo chhuah ve a nih chu. Demna tinreng nen an vawm zui hi an lainatawm khawp mai. An nat tawh sa teh lul nen, an phurrit tizual tur leh an natna tihnatbelhchhah duh kan awm hi a pawi khawp mai. Tawngtaina lamah i hre reng zawk ang u.

Source: Click Here
Visitor's Voice

Click to Comment

No comments:

Mizo Nula Khal

+