NEGATIVE TE AN POSITIVE LEH ZEL - ZMP TLAU

ToMZ
6 Jun 2020, Saturday, June 06, 2020 IST
March ni 22 a ni a, India ram pumah Prime Minister-in lockdown a puang. Kan in lockdown ta thup a, state pawn atangin zirlai engemawzat an rawn haw a, Delhi leh Kerala atanga rawn haw te pawh an awm. Home Quarantine tha taka zawm tura tih an ni a, an in quarantine-na hmun an lo bei zau viau hlawm mai. Bazar ah te an lokal a, mi in a len thlengin quarantine hrui thlun an lo phelh dul a ni. Ngaih a that loh viau laiin kan medical lam hotute chuan Covid-19 vei ang a ngaih tur an ni lo, an ti deuh roh a. Vairengte-ah khawsik enna hmanga enfiah vek an ni a, an positive lo zui bawk nen khawsik enna hi Pathianin mal a sawmah kan ngai ta deuh a, kan rilru lamah ngaih thatna lian tak min pe ta deuh roh a ni.

Tangkhang Mizo zirlai


Tangkhang haw runpui a rawn thleng leh ta. Special Train hmang te Bus leh Sumo etc. ten an rawn haw leh ta zut zut a, Pathian malsawm ni a kan hriat khawsik enna hmangin Screening Medical lamin an han nei leh a, ralthuam ropui zawk Rapid Test hmangin Medical lam thuam chhah an ni leh ta bawk. Khawsik enna pal tlang zo lo te leh Containment Zone atanga rawn haw te chuan Rapid Test an pal tlang a ngai a, he test pal tlang te hi chu Thuthlung hlui huna Israel Puithiamten Phar an dam thu an puansak ang deuh khan, "A thiang e" tiin an thiante zingah zalen deuh zawkin an awm ve leh thei a, ZMC lamah nawr liam an ngai ta lo thin a ni. A paltlang zo lo pahnih khat ZMC lamin an thian thu an rawn puang ve leh zui ta zel a. Ngaih hi a tha mai ni lovin, thawveng a awm tel tan ta a.

Special train hmangin Karnata lam Bairabi-ah an rawn tawlh lut zul zul a, Pathian malsawmna keng khawsik enna leh Rapid Test nen hmuah an ni a, hemi hmang hian Covid-19 Mizoram a rawn lut tur kan lo man chat chat mai dawn a ni. An zinga rawn haw hmeichhe pakhat chu a rawn in la Covid ta riau mai a, a rik hian a ri nghal mum mum mai. Screening leh Rapid pawh chawh buai lovin an awmna tur Centre lamah bus a thawn liam an ni a, ZMC lamah kan nula-i chu PCR a ni zui ta bawk. Result a chhuak a.. A Thiang e. Kan hallelui Amen lo chauh a ni e. Tangkhang rawn haw 5000 rual zet zawt zingah Covid-19 rawn vei haw an awm lo. Kan khawsik enna leh kan Rapid Test-in a ti tlat. All Negative a nih miau chuan engvanginnge kan fimkhur viau ang.

Red zone-ah pawh a sen duk tling pha Delhi atangin Special Train ngei chuan Bairabi an Tangkhang an rawn tawlh thleng leh ta a, hemi rual hian Gujarat leh Madhya Pradesh Special Train hmangin an rawn tawlh thleng ve bawk. Pathiam malsawmna keng ni a kan ngaih tawh Khawsik enna bakah Rapid Test nen kan lo hmachhawn leh ta rup mai. Screening + Rapid test hmangin Bairabi Rel Station-ah Covid-19 chu hup beh Medical lamin an han tum leh ta char char e. AN THIANG LEH TA.

Kan khawsik enna leh kan Rapid test ten damna an puang hnem ta lutuk chuan ngaih ti tha chiah lo mahsela, sawi chhuah a nuam chiah lo. TV a mi Sakei hlau kan ang deuh tlat. ZMC a kan khawlpui pawh rinhlelh a kai tan tawh bawk a. Delhi kal haw zinga tlem te chu ZMC lamin an chal ni lo, an thisen pawh ni lo, an chil an han PCR leh ta a. Chhei raw Kolasib District a Quarantine Centre pakhat Nursing Home, Thingdawl a awm mek mi 11 Khawsik enna leh Rapid Test kan ralthuam ropui su tlat vek te chuan Covid-19 an lo pai pawn reng mai. Ro a buai zo ta. A Mizoram ang pawhin Delhi haw an tam fal filawr a, Gujarat lam pawhin an lo pai pawn ru reng a, West Bengal atanga rawn haw te pawhin an lo hawn ru reng mai. Mumbai result hi a la lang lo thung a, eng tak ang maw.

Kan ralthuam ropui khawsik enna leh Rapid test te hi chu Covid-19 hian a lo bum hneh hle mai. THIANG E.. a tih hnu PCR lamin THIANG LO a tih leh si an tam zia en hian pawisa a tihek mai mai a, Rapid Test phei hi chu chelek tawh reng reng loh chi niin a lang.

Nimin thleng khan Covid-19 kai Mizoram-ah mi 22 an awm tawh a, tukin zing lama sawrkar lamin a rawn puan leh hun chuan 24 an nih tawh hmel e. Test result chhuak lo a la tam miah miah hle bawk. -Zmp Tlau, Editor - Zingtian
Visitor's Voice

Click to Comment

No comments:

Mizo Nula Khal

+