Kolasib lam journalist Pu Zomuanpuia Tlau leh Mumbai atanga rawn haw Mizo nu inchhang hi a tam zawk chuan fiamthu-ah leh nuihzatthlakah kan la a. Mahse, he thil thleng hian kan mamawh lian tak a tilanga, chu chu kan hmaih a nih chuan thil reng reng hi a ho zawngin kan la zo vek dawnin a lang. Chumi hma chuan helam chanchin tlemazawng sawi lawk ang.
Nizan khan kan Bible zirhona pawl min kaihruaitu doctor in zir zawhah COVID19 chungchanga thuthar leh a kaihhnawih min sawipui a, nimin piah khan kan awmna state New South Wales ah chuan kai thar hmuhchhuah pakhatmah an lo awm lova. State dangah pawh hmuhchhuah miah lohna a lo awm nual a. A ram puma enin kai thar zat hi a hniam hle a. Maktaduai 1.5 chuang an test tawh zingah hian 0.5% vel chauhvin an kai a. Hei hian a entir chu ram pumah miin social distancing te an zawm tha a, tin kut an sil uluk bawk tihna a ni a. Hemi avang hian sorkar pawhin dan a thlahdul a, sikul pawh nitin an kal leh tawh a, zu dawr (pub) te leh chaw dawr (restaurant) te pawh mi 50 chin awm theih tiin state thenkhatah chun hawn an remti a, biak in te pawh a tir khan mi 10 kalkhawm an phal a, mahse pub ah te min 50 an phal chuan engvangin nge biak in ah chutiang zat chu an phal ve loh tih zawhna te a awm a, tunah chuan mi 50 inkhawm tura kalkhawm an remti tawh a ni.
Hetianga kan inthlahdul hi kan Bible zirhona hruaitu chuan kar 2 hnuah a tha nge tha lo tih kan hriat dawn chauh avangin fimkhur taka chet a pawimawh thu a sawi a. Bus ah te, rel ah te hmaituama chuan a tha a tih thu te min hrilh a ni. Fimkhur tak zela thiltih hi an in zirtir a ni ber mai. Biak inah pawh mi 50 inkhawm theih an ti naa Pathian biak inkhawma kohhran mipui zai ho te kha a rem lova. Tin, inkhawm zawng zawng hming chhinchhiah vek a ngai dawn bawk a ni. Chutianga fimkhur tak chung chuan kohhran hruaituten Pathian biak hona leh inpawlhona kalpui an rel chho tan niin a lang.
Pu Zmp Tlau nena inchhang Mumbai atanga lo haw hi a thil sawi thenkhat avangin miin nuihza siamnan an hmang a. A nuihzatthlak laia ngaih theih te chu a awm nain he hun khirh tak kan paltlang mek laia kan nunphung khaihlak ta vek maiin manganna leh rilru tawt up up na (frustration) min siam hi nuih liam emaw fiamthu thawhnana siam chi niin ka lo hre lo. A chhan chu kan han sawi manganna leh rilru tawt up up na hian kan nun a nghawng nasa thei hle a. Tun hunah hian fiamthu te kan han thawh bawrh bawrh a, kan han nui ho bawk bawk tak nain kan rinaiin kan rilru, taksa leh thlarau hi he hun khirh hian a thalo zawngin a nghawng tih kan hriat a pawimawh hle.
Pu Zmp-a hnena thinrim taka Mumbai atanga rawn haw-in, "Kawng lakah hian eng harsatna nge kan tawh in hria em?" a tih khan inhriatthiamlohna engemaw an nei ngei a, a hmuna awm ve loh chuan tu nge thiama thiam lo lo sawi a har a. Mahse, khatiang rilru hahna (frustration) kha miin a neih chuan an dinhmunah kan din ve chhin a tha mai thei.
Indopui lai leh rambuai lai hrepha chuan nunphung leh khawsakphung buai kara awm a harsatzia an hrechiang a. Khatiang hunlai nen chuan a inang chiah lo nain India rampuma kharkhip vanga kan nunphung khaihlak ta vek hian phai rama tangkhang te rilru ah phei chuan rilru chawlhahdam a neih tir lo hle ang tih hi kan hre thei awm e. Tin, Mizoramah pawh hian a nihna takah chuan, a ki dang deuhvin, he kharkhip avanga eizawnna chatlak ta vek te tan hian sorkar hnathawk hlawh kiam chuang lo te thlamuan ang hian thlamuan a har ang tih hi kan hrethiam bawk turah ngai ta ila. Sorkar lamah pawh hian a nihna takah chuan rilru a mangang hle a ni tih hai rual lohin kan sorkar hotute pawhin press conference ah te khan an tilang a ni. Australia ram ang teah pawh hian eizawnna buai ta vek hi an thahnem hle a. Mangang tak tak pawh an tam a ni. Sorkar pawh hian a theihtawpin tanpuina hrang hrang te hi ruahmanna siamin han pe chhuak mah se, sum leh pai zo thei lo nei a ni lova, an lu hi a hai ru fu ang tih a hriat theih awm e. USA ah pawh an economy chak tak mai kha vawilehkhatah a tlachhe duai a, an hma a ko leh hle a ni. He'ng harsatna te hian mi tam tak rilru a ti mangang em em a. Chutah tak chuan a sang ber atanga a hniam ber thlengin hruaitu tha hi kan mamawh em em a ni.
Helamah chuan kohhran hruaitute hian kohhran mipuite hi hun khirh tak kan paltlang dawn tih an hriat khan a hmasa berah Pathian Thu-a inpawlhona khaihlak tur vennan technology remchanga hmangin awmze nei takin kohhran te enkawl hna chhunzawm dan tur an ngaihtuah nghal a. Tin, kartluanin a zat insemin kohhran hruaituten kohhran mite phone hmangin an vil a. Kohhran thenkhat chuan kum upa lam te chhawk zangkhai na turin chaw te an buatsaih sak a, an inah te an pe a ni.
Mizoram sorkar hian a theihtawp chuan a ti ang tih ring ila, amaherawhchu tlinlohna pawh a ngah a rinawm. A hmaa pawisa tam zia ha hipa lo sawi thin kan Chief Minister phei chu nasa takin a mualpho kan ti thei ang, sum chungchangah hian. Amaherawhchu, tun hi indem bawng bawng hun a ni lova. In tanpui tawn hun a ni. Sorkar lama hruaitu tha kan mamawh ang chiah hian kohhranah leh khawtlangah leh chhungkuaah pawh kan mamawh a. Hun khirh bikah phei chuan Pathian hriatna nena chhungkua, khawtlang, sorkar leh kohhran kaihruaina hi kan mamawh takzet a ni.
Hmalam chiang lo ruaia boruak a awm hian kan rin aiin rilru ah zamna leh manganna te hial pawh a piang thei a ni.
Heta tanga lo lang chiang chu kan society hi kan inenkawl tha kan tih laiin kan ngaihthah leh ngaipawimawh loh lai thenkhat a ni. Mental health ngaihpawimawh a tul tih hi kan ngaihtuahnaah kan dah lo mai thei. Kan thlarau nun chawmna/enkawlna phei chu kohhran hian he hunah hian midang kutah a dah ta mai emni aw! tih theih turin a tih tur a ti lo a ni.
Author: Matana Pachuau
Post a Comment