Zing dar 5:00 alo rik chuan ka alarm set chu a rawn ri ral ral a. Zing thawh chu a chakawm duh lo ngei mai. Thlasik khawvawt tak hnuaiah hi chuan foreign rizai aia kuah nuam Nula/Tlangval tan chuan awm hek lo le. Nimahsela min hmuaktu chu loh theihloh a ka thawhpui ngai a ni miau si a. Mumang lamah enge ka hmuh pawh ngaihtuah zui lovin ka tho phat a, ka intifai zui nghal a, ka thawmhnaw uluk taka a hma zan a ka nawh mar ki zaih chu inbelin ka thawmhnaw airbag-a ka pack fel diam chu la in Aizawl atangin Leitlangpui lam panin Ni 13.8.2013 zingkar chuan ka hnathawhna tura ka lei thar Maruti 800 thar veng vawng chuan ka inkhalh chhuak ta a.
Thlasik lai a ni bawk a, boruak a nuamin a lunglen thlak hle mai. Aizawl khawhmawr fem lam ka thlen phei chuan tukchhuaka kum thum chhung zet mai kan lo chuankai vena ka college hlui chu kan lehhawi zuk a. Mitthlaah thian hluite anlo lang nghal zut zut a. Ka motor - a tape chu ka han on a, kan hranghlui zaithiam CFL a hla ngei chuan nunhlui chhuikirin Lunglei lam chu ka pan ta zel a. Lung avan leng duh tehlul em!
Hriatloh karin Aizawl pawh KM tam takin ka lo pel ta reng mai. Ka sana ka en thuai a, dar 9:00 a.m ka tukthuan ei hun alo ni der tawh tih ka hriat chuan Hotel awm hmasa ber a chaw ei tur chuan ka rilru ka siam ru neuh neuh a, khua lo awm hmasa ber ka thlen chuan an hotel nuam ber tur ni a ka ngaihah chuan chawlh ka rilruk a, Car ka dahfel hmasa phawt a, Hotel lam ka pan chiah chu ka hmaa chirhdiak nal ah chuan Bike in tlangval pakhat hi arawn tawlh zawt mai a, ka va pan hnai thuai a,vanneihthlak taka na a neih em em loh hlauh avangin ka tungtho a, ka tlantir ve leh mai a. Mahse kha Tlangval khan engemaw min hriatchhuah tir ta tlat mai. "Engemaw vangin ka la rawn hrechhuak leh fo thin ang che" tia ka sawi ri te chuan min rawn deng thar leh ta dawt mai. Ka chau nghal vek a, danzawh ruallohin ka mittui atla zui a, mualpho mai dawn a ka inhriat avangin Car ah ka lut thuai a, Steering chu ka vuan a, ka mittui chu atla ta zawih zawih ringawt mai a ni. "Kum thum dawn alo liam ta, Aw ka va han ngai tehlul em!"
September Ni 15.2010 a ni a, hemi kum hi B.A ka zawh kum chiah a ni a. Vanneihthlak takin Private Bank pakhatah Cheng 16000 hlawh turin ka lut ve hlauh a. Mahni thawhchhuah hmanga kan inchawm bakah ka nu leh pa thingtlang a awmte hnena pawisa ka thawn ve thei tak avang chuan ka inchhuang ve in ka hlim ru ve hle thin. Hetia hnate kan neih thar takah chuan nula rim pawh ka Confi sawt khawp mai.
Ni 22.December. 2010 chu kan office khar ni tur a ni a,tlai hlau tak takin Taxi ka phar ding a, kawngkhar ka hawng chiah chu tleirawl te mai pakhat hian min lo en zeuh a. A uniform atang chuan pawl sawmpahnih zirlai anih ka ring nghal mai a. Khua avawh avangin taxi ah chuan ka lut thuai a. Hei hi ani Siamsiami nen kan intawn tan ni chu. Tichuan taxi ah chuan ngawi rengin kan chuang a, a chhukna tur a thlen chuan driver chu cheng sawmhnih a pe a,a kal nghal sawk sawk a,tlai ahlau tih a hriat reng mai. Driver chuan ka kalna lam turah chuan min hruai veleh vat a. Nimahsela kan hmaa chuang nula te khan a phone a theihnghilh ta tlat mai. Driver chu kan hrilh thuai a, ani lah chuan thingtlangah dar 9:30 a.m hian mi han hruai tur a neih avangin ka kutah adah mai bawk si a. Tichuan amah pawh ka hriatloh tleirawlte phone chu ka kawl ta ringawt mai a ni. Hemi ni hi 2010 a office kan kal tawpni anih avangin hlawh kan la nghal nghe nghe a. Tlaiah chuan chau inti fahranin In ka thleng a, ka inthlak fel lai tak chuan Tleirawli phone kha arawn ri ral ral a, kan pick up thuai a. Amah ngei alo ni a, a phone leithar anih thu leh a mangan thute chu min han hrilh hmasa luam a. A tukah bazar a kal atum thu leh chumi rual lo lam a duhthu te min han hrilh a. Keipawh bazar kal ve ka tum tho avangin bazar-a inhmuh mai chu kan tum ta zawk a.
Ni 23.December a ni a, bazar pui pawh alun laih laih tawh khawp mai. Bazaar chhung chu dar 10:00 a.m ah ka thleng a, ka phone a rawn nghawr dat a, ka en thuai a. " MC building kawtah ka awm, nghak che, ka U phone nia" tih chu ka han chhiar zawk a. MC Building pan chuan hmanhmawh takin bazar atang chuan ka kal ta a. Building kawt ka thlen chuan a hmaa naupang mai emaw ka tih kha alo hmeltha hle mai a. Alam chu ka pan phei a, a phone ka pek hnu chuan a hmel ka en a, alo lai ve hle ani ngei ang, a hmai a sen awp awp hian ka hria a. Phone a ka biak khan atawng duh teh reng nen tawng nachang reng reng a hre ta hauh lo mai. "Ka lawm e" tih pah chuan akal zui ta daih a. Pen sawmthum vel a pen hnu chuan alo hawi let a, a rawn nui seih a, ka lo en reng ringawt a ni tih kan inhrechhuak leh hnuhnawh a. Hmangaihna hi tun hmain ka hrethiam ngai lova, nimahsela ani chunga ka rilru put ang hi anih ka ring nghal ngawt mai a ni. Heta tang hian ka rilru ah a awm ta reng ringawt mai a, ka hamhaih vang nge a hming zawh nachang pawh ka lo hre lo.
Zanriah ka eikham chuan thuthleng seiah TV enin kan thuchawl ve a, Message ka dawng a, ka en nghal thuai a, " Siam2i ka nia, ka lawm e aw". Heta tang hian zantin kan inbe ta a. Anu ten 12 passed hmaa inleng neih anphalloh avangin ka leng thei bawk si lo a. Kumhlui thlah ni anih chuan ka hmangaihi nen chuan inhmuh kan intiam a. MC Building kawtah chuan ka nghak hmasa ve thung ta a. Hemi ni hian nilengin kan lengkual dun a. A bula ka awm chiah chuan a hmeltha zual tulh tulh ni hian ka hre thin. Tlai alo nih chuan ka ina lo leng kawiturin ka hrilh a, a rei hman dawnloh thu asawi nghal vat a. Ka In a kan awm dun chu kan pahnih chauh kan nih avangin sawi tur avang duh kher mai. Bul ka tan loh chuan ani phei chuan atan dawn lo tih ka chiang bawk si a. Zam tak chungin "Ka hmangaih che, min hmangaih ve em?" kan ti ve tawp a. Min duhthu a min han chhang chiah mai chu ka hlim kher mai. Kan inkuah a kan infawp vawng vawng a. Hmangaihnaa bultan a he khawvel nun hi hmang dun turin kan intiam bawk a ni.
Ni 28.February. 2011 a ni a, Siamsiami nen pawn thla hnih kan inngaihzawnna alo ni ve ta reng mai. Zan dar 10 alo rik chuan ka phone arawn ri ral ral a. Ka han chhang thuai a, ka hmangaihi ngei alo ni a, Thingtlangah a U te an innei dawn a, kalpui turin min sawm a. Kan Pu ka han dil veleh a,min phalsak hnu chuan ka kalpui tur thu ka hrilh a, a hlim lutuk chuan min hmangaih thu min hrilh nawn sek mai a ni.
February Ni 29 alo thlen chuan kan chunga thil thleng tur reng hre lovin ka Putea Bike-ka hawhsak a, ka hmangaihi lam tur chuan ka inkhalh chhuak a, an inkawt ka thlen chuan vawi hnih Horn- kan hmet ri a, a ni tel hian ka hmu hmeltha zual thin. Ka bike hnungah chuan arawn thu vat a, Thingthlang a mo lawmna tur pan chuan kan chhuak ta a.
Aizawl atanga Km 20 vel kan tlan hnu chuan ka hmangaihi chuan ka pum arawn kuah a, alu chu ka hnungah arawn nghat hle hle a, muangdam dapin kan tlan zel a. Kawngkawi ve tak pakhat kan thlen chuan Sumo - nen kan han intawk tur ka bike break ka hmet chu awmzia a awm ta hauh lo mai, kawngkual a ka tlan muang theih tak siloh ah chuan sumo chuan min rawn su ta bur mai a. Ka bike chu avir mup a, ka hmangaihi chu metal road ah a tla ri thlawp tih chu ka la hre thei hram a. A bak chu hriat mumal ka nei ta lo. Kan accident atanga kar khatnaah chuan Damdawiin ICU atang ka harhchhuak ve ta hram a. Ka hmangaihi hming chu ka lam ruai a, ka bula awm ka chhungte chu ka Hmangaihi chanchin ka zawh chuan min chhang thei tumah an awm si lo.
A tawpah chuan ka nu chuan ka lu dawm pahin aliam tawh thu min hrilh a. Ka khaw hmuh hi afiah lo zo vek in ka hria a. A tak ni lo hian ka ring tlat a. A bula min hruai tur chuan ka ngen ruai a, ka ringphal hlawl lo a ni. Ka harhchhuah atanga thla khatnaah chuan Doctorten ka ngen nasat em avangin athlan ka tlawh chu anphal ve ta hram a. Kross vara R.I.P tih hnuaia Lalnunsiami, Kum 18 tih inziak chu ka han hmu a, rin harsa ka van ti tehlul em! Kross vuan chuan he hla thu hi ka chham ta ngawt mai a ni. By- Rpa Kawlni
Post a Comment