HMEICHHE NAUPANG TAWNGTAINA
England doctor Helen Roseveare chu Africa khawmualpuiah missionary-in a awm thin a. Zan khat chu nau neihna pindanah nu pakhat nau vei mek hi an buaipui a. Vanduaithlak takin chu nu chu nau chungah a thi hlauh mai a. A fasen piang hlim chu an enkawl turin a hnutchhiah a ni ta ber mai. A kalsan tak a fanu kum 2 mi leka upa lah chu a tap hliam hliam bawk a.

Damdawi inah chuan nausen ur lumna tur an nei lo va, nausen hnute hnektirna hmanrua lah an nei chuang bawk hek lo. An awmna hmun chu lei kiar lai tak a nih avangin chhunah lum patlingin lum mah se, zan lamah erawh tih tak zetin a vawt thin. Chuti ang a nih avang chuan nausen chu thuk bul hnaihah an dah a, mi pahnihin thli thaw laka venhim nan an thut hual bawk a. Pathian hnena an mamawh thlenin chumi hmuna awm, puitling leh naupang zawng zawng chu an tawngtai ta a. An tawngtai lai chuan naupang pakhat, kum 10 mi lek, Ruth-i, Africa naupang dang ang bawka rilru mawl leh ngen ngawla a tawngtaina chuan Helen-i thinlung a dek zawk mai. Ruth-i chu, “Lalpa, khawngaih takin nausen hnute pekna tur bottle rawn thawn rawh. Naktuka i rawn thawn loh chuan nausen hi a thi hman ang; chuvangin vawiin chawhnuah ngei rawn thawn ang che. Bottle i rawn thawn rau rau chuan nausen u hmeichhe naupang lawm tur naupang lem rawn thawn tel bawk ang che,” tiin a tawngtai a.

Naupangho tawngtai chu Helen-i chuan a la thutak vak lo va, run dalah a lo Amen-pui ve lek a ni ber a, an tawngtaina chu Pathianin a chhan pawh a ring lutuk lem lo. Pathianin an tawngtaina a chhan dan tur awmchhun chu an ram (England) atanga percel an rawn thawn hmang chauhin a ni si a. Amaherawhchu, kum 4 lai Africa rama rawngbawla a awm chhungin tum khat mah England atangin parcel a la dawng ngai lo va, tun ataka beisei chi niin a hre lo. Parcel chu rawn thawn tehreng pawh ni se, nausen hnute hnektirna bottle kher chu an rawn thawn tel lo tawp ang.

Chawhnu lamah chuan a tihdan pangngaiin Helen-i chuan nurse training-ho a zirtir leh a. Chawhnu chanve velah mi pakhat hian a in kawta car a din thu a rawn hrilh a. Tlaia a hawn chuan car chu a lo awm tawh lo va; mahse an hulhliapah chuan parcel, pound 20 buk zeta rit an lo hnuhchhiah thung a. Naupangho an rawn kal khawm a, a chhunga awm hmuh chakin an kil thap a.

Parcel chhung chungnung berah chuan kawr mawi tak hi a awm a, naupangho chuan mawi ti zet hian an melh vawng vawng a. A dawt lehah chuan pan tuamna chi puan a lo awm leh a, chumi hnuai lehah chuan ei tur chi hrang hrang hi a awm teuh mai a. Helen-i chuan a han hai leh a, a kut chuan eng emaw hi a khawih fuh ta! A han pawt a, nausen hnute pekna tur bottle a lo ni reng mai!


Nausen hnute pekna tur bottle a hmuh chuan Helen-i lawm lutuk chu a te thawt a. A dil hauh loh, mahse an mamawh chu Pathianin a rawn thawn a ni. Pathian hnena bottle diltu Ruth-i chu a hmasa berah a ding a, bottle a hmuh chuan a kun hniam a, ring zet mai hian, “Pathianin bottle a rawn thawn chuan naute lem pawh a rawn thawn tel ngei ngei ang,” a ti chiam mai a. Parcel chhung chu a zen rawk rawk a, naute lem mawi zet mai hi a rawn phawrh chhuak nawlh tak tak a. A mitmeng chu a lawm avangin a eng sar a, a thil dil kha a ringhlel reng reng lo! Lawm takin Helen-i chu a en a, “Ka nu, he naute lem hi hmeichhe naupang i pek hunah i rualin ka lo kal ve thei ang em? Pathianin a hmangaih tih hi hrilh ka duh a ni,” a ti ta reuh a.

Parcel chu England ram atanga thla 5 liam taa an rawn thawn a ni a. Parcel rawn thawntu chu Helen-i te khuaa Sunday sikul zirtirtu thin leh a thawhpui te an ni nghe nghe a. An zirlai hmeichhe naupang pakhatin naute lem a thawh ve bawk a. A hun taka thleng thei turin Pathianin engkim a lo ruahman lawk vek a lo ni.
Ringhlel lova tawngtaina chu Pathianin a chhang thin.

By: Awmtea Leo Khiangte

Post a comment

Powered by Blogger.