KA CHENNA RAM THLALER A NI LALPA (KHB. 294)

-Marama Pc
LALRUALI Chanchin

Mizo hlaphuahtu zinga ka duh em em, "THLALER NULA" tia Prof. Laltluangliana khiangte-a'n a hming a phuah sak Pi. Lalruali (1924-2001) a ni a, Sihfa khawchhuak a ni. Hla 36 a phuah a, he hla hi a hlaphuah hmasak ber a ni.

A naupan lai atanga Mizo upa ten an hlauh em em 'ngalnget natna nei a ni a, a buaiphah hle thin a ni awm e.

1958 khan Synod Dispensary, Sihfaa a awm laiin a lung lam that loh vangin a tawngthei ta lo tlat mai a. A tawng emaw, thawm ri emaw a hriat chuan a chauh zel avangin Pindan hranah, tuma tlawhpawh theih loh tura dah tlat a ni.

Kebai bawk, tawngtheilo bawk tura a indah chuan Thlaler hmun hrehawm taka awm ang maiin a inngai thin.

Zankhat a ke na a chhuak a,awmngaihna pawh hre lo khawpin nà a ti a ni. Hmeichhe naupang tan chuan na tawrh bawk nen muthilh chi rual a ni lo. Chumi zan chuan Pathian hnenah a tawngtai a, "Lalpa, hla min pe la, a satu apiang ka sawi ai sawituah ka ngai ang e," tiin a dil a. 29th Nov. 1958 zinglam darhnih velah he hla hi a phuah ta a ni...

"Hrehawm mah se i ta ka ni Lalpa,
I tan nung turin min pui la;
Ka hun zawng i tana hman ka duh,
I tan chauh tithianghlim ang che..."

A boral thlenga natna-in a thlah ngai loh Pi Lalruali chuan " HNEH THEIH LOH NUN KA NEI," tiin khawvel a rawn rum thaih leh ta rem rem mai a nih kha.

Isua kristaa innghat nun hi khawvel thil thleng reng reng hian a sawi phawng zo ngai lo vang.

Philip Yancey, Lehkhabu ziaktu hmingthang tak khan a Lehkhabu pakhat ' Where is God, When it hurts' tih buah khan, " Joba lehkhabu hi tuarna chungchang a ni ngawt lo a, harsatna leh manganna tawh laiin khawiah nge Pathian a awm tih lam pawh a ni hek lo! Harsatna hmunah Joba kha khawiah nge a awm tih zawk hi Joba lehkhabu ziah chhan a ni." tiin a ziak a. Tawrhna a lo thlen mek lai hian Pathian leh khawvelin Kristian hi khawiah nge a awm tih hriat an chak a ni.

Ka chenna ram thlaler a ni, Lalpa
Thlemna chhum leh lungngaihnaten;
An hliah fo Chhandamtu hmel duhawm,
Lalpa i hnena awm reng ka duh,

Ka tawngtai ngaithla la,
Ka dil malsawm ang che;
I aw nem nghakin ka lo thu,
I thlamuanna, i thlamuanna aw chu.

Hmanah Gethsemani-ah lungngaiin,
I tan venpuitu an awm lo;
Kei pawh i hniakhnung rawn zui vein,
Lalpa, i tanpui ka ngai a ni.

Buaina chhum kara ni eng mawi tak chuan,
Ka thinlung thim chu a rawn en;
Kalvari-a hmangaih lo lang kha,
Hril turin Lalpa min pui ang che.

Hrehawm mah se, i ta ka ni, Lalpa,
I tan nung turin min pui la;
Ka hun zawng i tana hman ka duh,
I tan chauh min tithianghlim ang che.

Post a comment

Powered by Blogger.