Tunlai hian Serlui 'B' tuikhuah chu a chim chin a hniam lai ber a ni. Serlui B tuikhuah hnar lam hi Kolasib atangin a lang dum pawl ruih thin a, a mawi thei hle. Tunlai hi chuan tui a kam nasat avangin Kolasib atanga lang thin Builum khawhlui awmna te chu tui a lang pha tawh meuh lo. Serlui tuikhuah kam vak mai hian ti ti a ti tam hman hle a, thenkhat chuan Serlui 'B' enkawltuten an lawng an tih pil avangin tui an paih kam tih te, Serlui Tuikhuahna a khi tih ri te a awm bawk a ni. Serlui Tuikhuah kam nasa em em hi enfiahin kan kal ta nge nge a.

Serlui Tuikhuah a kam nachhan ber hi "Tui hna a tlem vang" tih bak a dang vak a lo awm lo. Nikum lamah ruahtui a tla tlem a, kumin hian Serlui 'B' power siamna khawl lam a lo tluang teh kher bawk nen a tui lamin a daih ta lo a, Mizoram-in a ma pual a Hydel Project a neih ve zinga lian ber chu a tui a kam ta suai suai mai a lo ni. Tun ang zel a kan ramngaw te kan kit rem chho a tui hna hi a tlem tial tial chuan Serlui 'B' tuikhuah hian kum 20 hnuah chuan Power siam thei dinhmunah pawh a ding ta lo a ni. Thing leh mau hi kan kit rem zel a nih chuan sum tam tak seng a kan siam Power siamna tuikhuah hi thangtharte chuan sangha khawina dil sum tam tak seng a khuap emaw min la ti ang a, รข min ti ve ngawt maithei a ni.

Serlui tuikhuah tui hi Serlui 'B' lama thawktute chuan a bawhawk (a full) in an kal tir mek a, a power siamna khawl pawh a tha a, tuikhuahna khi pawh a awm hek lo. Heti chung hian Serlui 'B' Mini Hydel Project 12 Mw pechhuak thei hian 2Mw a siam chhuak thei hram hram a, hetianga power siamna khawl hi a tluang chho a nih chuan tun thla a ral meuh chuan Tuikhuah tui hi Power siam nan siakchhuah tham a awm thawktute chuan an ring tawh lo. Tuikhuah kang denchhen hian power siamna khawl enfiah leh siamthat ngai te siamthat nan an hmang dawn a ni.

Serlui B aia lian NEEPCO in kum 99 vel an enkawl tur Tuirial HP lam pawh a tira a power siam zat tur 60 Mw kan hriat lai a kan phur hlut ang kha a ni bik lo. Ruahpui a sur buak hawk hawk lai hi chuan 40 Mw te Power siam chang nei mahsela, hun tam zawkah hi chuan 20 Mw bawr vel an Power siamchhuah a ni deuh reng mai a, thal chho deuhah phei chuan chhun lamah TUI an khawl a, zan lamah Power siam nan TUI an chhuah leh thin a ni.

Engemaw hi chu tihtur kan nei ve chiang a ni.




-Zmp Tlau

[ToMZ is dedicated for archive and exposition of Mizo affairs to the rest of the world. Informations obtained are re-posted 'as-is' basis as a digitization initiative so as to make accessible to all through online surfing. Due credit is given to all author/owner except those which cannot be ascertained]

Post a comment

Powered by Blogger.