Thin hi taksa
peng zinga a pawimawh
ber pakhat a ni. Hna chi
hrang hrang a thawh
tlangpuite chu : Kan chaw
ei zawng zawng te hi
thinah a lut chho vek a,
taksa tana hman tlak turin
a lo sawng bawl a ni. Glucose te, thau-cholesterol,
triglyceride te, sa (protein) te leh vitamin te a
chhekin a sem kual vel a
ni. Taksaa bawlhhlawh
tam tak mit (bile)-ah a
paih chhuak a, damdawi
tam tak te hi thawk thei
turin a lo siam danglam a,
tin, an thawh tur an thawh
zawhah a paih chhuak leh
a ni.
Thisen tikhal tu hi thin
siam a ni a, thin chak lo te
hi an thisen a pan a, an thi
duh bik a ni. Albumin te
siamin a siam tlem chuan
vung te a thlen thei a ni.
Tin, taksa in hrik a do naah
thui tak a thawk bawk a
ni. Hepatitis hi thin vung
tihna a ni. Chhan tam tak
a nei a. Natna hrik-virus,
bacteria, protozoa te,
damdawi chi hrang hrang
- antibiotic, na chhawkna,
hnimhlum, cancer dam
dawi etc ten thin vung an
thlen thei.
A tlangpui te
chu : Hepatitis A, B, C,
D, E, G, cmv, eb virus,TB
hrik, Amoeba/Santen
hrik/Malaria, Drugs - na
chhawkna - Acetaminophen, Brufen-Antibiotics - Tetracycline,
Rifampicin, Hnimhlum leh
a dang - Pa (mushroom)
thenkhat te a ni. Hepatitis
hi acute leh chronic in an
then leh a. Acute awmzia
chu, rawn awm thut - rei
vak lova dam leh mai.
Chronic chu benvawn
tihna a ni a.
ACUTE HEPATITIS: kan sawi tawh
angin acute hepatitis chu
rawn awm thut kan tih
kha. - Khua a sik ser
sera, - An chau ngawih
ngawih a,- Thin zawn a na
a, - Luak a chhuak a, -
Chaw eia tui lova,- Mit a
liam a (jaundice). A tlang
puiin kar 2 velah an dam
leh mai thin.
C H R O N I C
HEPATITIS: Acute
hepatitis dam zo ve ta lo
ho hi an benvawn ta thin
a ni. Thin vung an lo neih
benvawn hian zawi zawi
in a cell (timur) te kha a
tichhia a, insiam tha leh
teh mahse a ngai a awh
tawh lo thin a ni. Thin vung
hian ser a siam a, a rei
tawlh tawlh a, ser a tam
tawlh tawlh a, heng ser te
hian thin lo pawt sawngin
cirrhosis (thin sawng) a
lo thlen ta thin a ni. Hetih
hunah hi chuan thin a lo
chak lo hle tawh a, a veite
chu hetiangin an awm
tlangpui. - An zawiin an
chak lo hle - An vung/pum
puar - Thi a put awl- hnar
thi, thi a luak, ek dum etc.
- Mit liam, eng pip pep/
thisen tlem - Rilru te
khawih buaiin nikhaw hre
lo (coma) te pawhin an
awm thei. - Piles leh Oesophageal varix (pumpui
hnuna thisen dawt puar)
te an nei thin.
Eg. Mitliam
kan tih mai Viral Hepatitis ‘A’ hi thil thianghlim lo
ei vanga thleng a ni a, Mit
a lo eng a, an zawi hle a,
mahse a tlangpuiin kar
hnih velah an dam leh mai.
Zu in nghek te pawh hian
Acute Hepatitis a thlen
thin. Miin zu a in reng
chuan Chronic Hepatitis
a thlen thin a ni.
Mizoramah hian heng
hepatittis kan sawi tak
zingah hian hepatitis
benvawn pathum kan
buaipui zual a; chung te
chu Alcoholic Hepatitis
(zu), Chronic Hepatitis B
leh Chronic Hepatitis C te
an ni, Heng veite hian thin
cancer an nei duh bik a
ni. Tun tumah hi chuan
Hepatitis B leh C te hi han
chhui zau deuh ila.
Hepatitis B leh C
te hi virus an ni a, natna
an thlen dan a inan
tlangpui avangin kan han
sawi kawp mai ang a, an
inan lohna te a tul angin
kan han tarlang ang.
Inkai dan : Virus ve tho,
HIV (AIDS natna hrik)
te nen hian inkai dan a
inang tlang pui ie. inchiu,
sex, thisen inpeh, nuin nau
paiah etc. Amaherawhchu
kai awlsam dan a inang lo.
Hriau in vih palh tein inkai
a awl em em a, Hepatitis
C te hi chu sex lam
atangin kai a awl lutuk lo.
Natna thlen
dan : Hepatitis B or C
miin a veiin Acute Hepatitis (mitliam kan tihna) an
vei phawt a, hei hi Hepatitis A te angin a na lutuk
lova. Hepatitis C leh B
vei tam tak chuan an vei
lai pawh hre lovin an
benvawn, thin sawn (cirrhosis) hnuah chauh te an
in hre thin. Heng ho ah hi
chuan acute hepatitis kha
a na lo lutuka an in hre lo
a ni. Acute Hepatitis hi
chu kar hnih velah a dam
leh mai a, mahse dam zo
ve ta lo,a hrik pai
benvawn an lo awm thei
ta a. Hepatitis B:
Puitlingah chuan 95 % aia
tam an dam leh a, 5% aia
tlem an benvawn thin.
Nausen ah chuan 5% a
dam leha, 95% vel an
benvawn Naupang kum
4 velah 40% vel an
benvawn.
A awmzia chu,
naupangah a benvawn
duh bik. Hepatitis C-ah
chuan 20-30% vel an
dam leh a, 70-80% vel an
ben vawn ta thina ni.
Benvawn kan tih hian,
thla ruk chhunga dam
hman ve ta lote kha an
ni.Hetia Chronic
(benvawn) Hepatitis B or
C an lo vei tak hian an
hma lam hun chu a hrik
leh mihring taksa inbeih
danah a innghat ta a ni.
Hrik ninhlei tak a nih
chuan thin a khawih chhe
chak a, hrik nin hlei lo a
nih chuan muang changin.
Tin, taksain a hrik
a lo beih danah te a
innghat bawk. A
tlangpuiinkum 20-30 ah
30% velah chuan an thin
a lo sawng chhe hman thin
a ni. Hei aia hma deuh a
ni thei a. Tin, rei tak thin
khawih chhe lovin an
awm thin bawk. Zu nen
an pawi khawih dan a
inang a, chuvangin zu nen
chuan cirrhosis hi a thleng
hma hle a ni.
Kan sawi tawh
angin kum 20-30 vel thin
sawng turin a duh a, hemi
chhung hian tam tak chuan
an vei tih an inhre lo thin a
ni. A tam zawk chu thin
sawng in buaina a thlen
hunah chauh an in hre
chhuakthin a ni. Hetih
hunah hi chuan a tlai tawh
deuh a, enkawl an harsa
thin a ni. A then, a bik takin
Hepatitis B te chu Jaundice te an nei zeuh zeuh a,
chung atang te chuan an lo
hriat theih a ni. Mizorama
kan hriat chhuah hmate
pawh hi thil dang vanga
test emaw, in test ve tawp
te an ni hlawm.
Enkawl dan :
Hepatitis B : Hepatitis B
hi a dam har a, damdawi
a kan enkawl hian, kan
tum ber pakhat chu, a hrik
pawi sawi lova siam hi a
ni. i.e currhosis emaw thin
cancer a thlen loh nan.
Enkawl nan hian a chiu
chi, Interferon leh a mum
chi hrang hrang a awm.
Heng damdawi te hi thla
ruk atanga kum 2 emaw,
a aia rei te pek an ngai a
ni. Hepatitis C : Hepatitis
C enkawl hi chu Hepatitis B lakah chuan enkawl
a nuam hle a ni. Mi 70-
80% vel an dam thin a ni.
Mahse cirrhosis te a thlen
tawh chuan a dam har a
ni. Hepatitis C enkawl nan
hian Interferon chiu chi leh
tablet ribavarin pek dun a
ni a, 6-12 months pek thin
an ni. A hrik Genotype 2
leh 3 hi thla ruk chhung
enkawl an ni tlangpui a, tin,
a dang Genotype 1, 4, 5,
6 te hi kum khat enkawl
thin an ni.
Tin, genotype 2
leh 3 te pawh hi an nat dan
a zirin thla 6 aia tam te
pawh enkawl an ngai thei.
(genotype - hepatitis C
rau rauah chi hrang
paruk a awm a, an dam
har dan leh pawi
khawih dan te a in ang
lo.) Hepatitis C enkawl
hian ‘relapse’ kan ti a,
chu chu dam tawha
ngaihah a awm nawn leh
thei a ni. Heng awm nawn
lehah hian a hma aia rei
enkawlin tam tak chu an
dam leh thei a ni.
Amaherawhchu then
khat chu interferon/
ribavarin in a tih dam theih
loh an awm ve bawk. Kan
hriat tur pawimawh deuh
chu Anti HCV - kan test
hian, a hrik a en lova, a
hrik dotu sipai (antibody)
a en a ni.
Heng test hi
Aizawl a awlsam taka kan
test na hi a ni. Heng Anti
HCV test positive ho hi,
an thisenah Hepatitis C
hrik awm leh awm loh
phaiah kan thawn ta thina
ni. Enkawl dam tawh
hnuah pawh Anti HCV hi
rei tak a positive theih
avangin interferon la
tawhah chuan he test
hian awmzia a nei lo.
““Enkawl dam tawh then
khat ten mahni thuin an
lo test ve a, a lo positive
leh a, an ngaih a tha lo ta
thin a ni. A hrik test na a
ni lova- a hrik dotu sipai
test na a ni.
Enkawlna :
Hepatitis C Interferon a
enkawl zawng zawng hian
an dampui kher lo. A to
chi Peg interferon hian 70-
80% a ti dam a, a tlawm
chi Plain interferon hian
50-60% a ti dam a ni. Na
nei tawh leh thin sawng
(Cirrhosis) leh a hrik pai
hnenah te a dam har a ni.
Enkawl Man :
Plain Interferon -Rs
50,000/- vel thla ruk tan,
Pegylated Interferon -
Rs3,50,000/- vel thla ruk
tan Interferon hi hepatitis
B leh C tan a hman theih
a ni. Pegylated khi a chak
tha zawk a ni. Hepatitis
B enkawlna mum chi
hrang hrang te hi thla khat
tan Rs 600 atanga Rs
6000 te an ni a, kum 2
emaw a aia tam te pek
thin an ni. Heng aia
chipchiara hre duh tan a
in zawh theih reng e.
~Dr. Zoramthanga, MD
Post a Comment