Pu, ka kum 12 pianchamphaphak min lawmsak tuma in in a ka nu leh pa te nen chaw ei tura kan lokal kha i theihnghilh theih ka ring biklo. Fanu mal ah pawh harsa taka kum tam tak an nghah hnua khawvel eng lo hmu ve ka nih a, tupawh mai khan min lawm a, ka nu leh pate ngat phei chuan kehthei dawmin min dawm a, min en ning ngailo tiraw.. Mahse khami zan zet kha chu la let thei ila chu maw pu, in ina lokal kha ka ngen tawp lo ang. Kan in pana kan haw laiin accident kan tawk a, ka nu leh pain an inkarah nghet takin min kuah a, keichu Pathian zarah ka him, mahse ka engkima ka engkim, ka nu leh pate erawh an boral ta si. Ngaihtuah dan pawh ka thiam lo, naupang mai ka ni. Damdawiinah in lokal a, i mangang hmel leh i mitmeng keimah min lainatna hmel kha ka la hrereng. Ka bulah i lo thu a, “Nubawih, thlaphang reng reng suh, i pi nen kan la awm a, theihtawpin kan enkawl ang che”, min tih te khan ka lawm lo a ni lo, mahse ka nuna thil hluber pahnih ka hmuh leh ka biak theih tawhloh tura an bo kha ka hrethiam thei thlawt lo ani.
Hunte a liam a, kum te a vei a. Keipawh thlamuang takin in hnenah ka seilian a, ka nu leh pa te ka ngaihna te,an telloa ka tlei theihlohna te hunin a liampui ve zel a, nang leh ka pi chu ka nu leh pate ang maiin ka ngai che u a, ka hlim ve lutuk thin. Zirna kawngah Pathian zarah chhun tur ka nei tha che u a, Mizoram sikul tha berah lutin matric exam ah pawh ram pumah a titha pawlah ka lan ve kha. Khami tuma ka hnena I sawi kha ka hrereng thin, “Nubawih, Pathian hrereng ang che aw, I nu leh pa an awm tawh lo a, ama enkawl leh malsawm I nih hi, tihian tha takin I zir zel ang a, I puitlin hunah hna tha tak i la thawk ang a, engkim i tihah dikna te, rinawmna te ngai pawimawh la, chhuan tlak leh fak phuin i nun hmang chho ang che”, min tih kha.
Kum 19 ka nihin cancer natna in a man che a, pu, i telloa ka pi nen chauha kan awm tur kha ka ngaingam lo a, ka thlaphang lutuk hi zantin ka tap a, Pathian hnenah nangmah tidam turin ka tawngtai bang ngailo. Mahse i hun a lo thleng a, chelh zawh ruallohin min liamsan ve ta mai si. Min enkawltu ber leh ka innghahna ber I liam ta si a, ka pi lah i thihna a tawrh em avangin a ni telin a chaklo mai si, mawhphurhna ka ko ah loh theihlohin a lo tla a, ka duh angin lehkha te ka zir tha thei ta lo a.Kan inchhungkhur enkawl ka ngaih avangin sikul pawh ka kal mumal thei ta lo.Mahse, khami hun chhung zawng pawh khan engemaw, tu emaw, nangmah avang chauh pawh khan nih chu ka la tum fan thin.
Tichuan harsa takin keimahin lehkha ka zir a, college ah te lut ve thei tawhlo mah ila private in ka exam ve a. Ka result pawh tha ve tak chu a la ni tho asin. Ka hlawhtlin ni tur nghakhlel a duhthu i sam te kha ka zir peihloh pawha min fuihtu an ni reng thin. B.A. ka zawh hlim khan i lehkha hnutchhiah ka pi nen kan haichhuak a, khatiang em em a kilkhawra i dah te tunge ring bik ang. Ka pi nen kan han nui leh bawk bawk a, kan han en chuan ka naupan laia ka nu leh ka pa thenrual thate’n an ralna kha ka lo puitlin huna zirna sang zawk ka beih theih nan bank ah i lo khawl reng tih kan hmu chhuak a. Pu, ka ngei bawk che sia, ka ngai bawk che sia, ka lawm bawk sia, awmdan tur pawh ka thiamlo. Tichuan i thiltih vel lo hriatpuitura engkim i hrilh, i thianpa pu ramtea hnenah kan va kal a, ani lah chuan bank pass book vel min pek pahin a lo nui ang tut tut a. I pawisa min lo khawlsak chuan M.A. chu ka zir chhunzawm ve ta a.Pathianin hriselna tha te min pe a, M.A. pawh chu tha takin ka zo a, kan department ah topper hial ka ni ve asin.
Tichuan, hna te a rem ang ang ka’n melh chho ve a. Hmanni chu hna tha ve takah interview turin ka tling ve hlauh a. Pu, ka lawm ve zia chu maw, hetah awm la chu i ha lem tla thawtin ka nuihtir ang che. Interview tur chuan ka inbuatsaih ve a. Kan thenawm nu lah phur lutuk Millenium centre a an kawr zawrhlai ka hak turin min pe ngei bawk a. Zanah te hian ka mu theilo. Ka interview ni tur chu ka ngaihtuah a, ka huphurh ai mahin ka phur. Hna te ka neih chuan ka hlawh ka khawl ang a. ka nu leh ka pa leh nangmah ngei kan zalhna che u, in thlan ka siam dan tur te ka ngaihtuah a, ka pi kawrthar ka lei ang a, a kum te a upa ve tawh sia, duh tawkin damdawi thain ka enkawl thei tawh ang, te ka tia. Ka suangtuah nasa lutuk hi ka mu hmanlo ani ber mai.
Interview ni a lo thleng a.Ka thianpa hmana ka sikul kalpui pawh a lo awm ve nawlh mai. Kan inhmu chu kan hlim hle a, kan sikul kal lai te kan sawidun luam a. Interview hun alo thlen chuan ama dawt chiaha lut tur ka ni a. Roomah khan a awm reilo riauin ka hria, ka helhhawlh vang nge pawh ka hre chuanglo. Ka hun a thlen chuan phur si, zam ve deuh tho si hian ka va lut a.Zawhna ho te te min zawt a, ka rin ai daihin an zawhna te kha kan interview level atan chuan a ho ka ti a. Nu pakhat erawh kha chuan kan hna mil leh ka zirlai mil har ve tak tak min lo zawt a.Zawhna pakhat ka chhang theilo tih mai loh kha chu chhanna kha ka pe tha thawkhatin ka hria. Min interview tu te pawh an lungawi tih an hmelah ka hmu thei. Room ka chhuahsan pah chuan chu nu zawhna har pui pui min zawttu chuan “Mami, tling ngei la ka duh khawp mai, I beisei ang i pha talo a nih pawhin beidawng lo ang che” , min ti a. Han ngaihtuah zui dan vak pawh ka thiam chuanglo.
Ka thianpa nen chuan dawrah thingpui te kan indun a. Ani chu kan naupan lai atang tawh khan naupang ngainatawm tak a ni thin hrim hrim a. Lehkha a thiamtheih em em chu ka hrelo mahse a nu leh pa in hna tha tak an chelh a, phai ah te lehkha zirin a awm a, kan han inkawm chu kan naupan laia a thil phal ngai rengin a thilphal a, fiamthu a duh a, a bula awm pawh nuam tak ani. Kan han titi dun a, kan interview chungchang te kan sawi a, ka thianpa chuan, “dik tak chuan hemi hna hi a ruak tih pawh ka hrelo a, ka inbuatsaih em em lo, ka pa in I interview a ngai min tia, ka peih vaklo a, mahse i hmel va inlan ve hrim hrim rawh min ti a, ka lo kal ve mai mai.Interview pawh kha ka ti tha lemlo, ka nui ral vel mai mai”, a ti a. Tichuan kan ei man te pawh chu a pe a, kal na tur dang kan la neih ve ve avangin kan inthen chho zui mai a.
Result chhuah hun chu ka nghakhlel khawp mai a. Post pakhat a awm a, mi 5 min ko a, ka thianpa lah chuan ka titha vaklo a ti sia. Midang ho lah kha interview ni khan an chutih hmel teh ual chuang silo, ka tling ve thei mai ang, te ka tia. Nikhat chu phone call ka dawng ta a. Interview board atangin pa pakhat hian interview ka pek danah a lungawi thu te, keimah ang ngei hi hna chelh tur a a duhthu te min rawn hrilh a. Ka lawm lutuk chu au chhuah vak hi ka chak a. A sawi zel a, tun tum atan chuan ka tlin ve rihloh thu min hrilh ta a. Mak ka ti lutuk, ka awih phallo, ka hisap, ka duhthusam zawng zawng te kha hawlhkian duak ang hian an awm a, ka hamhaih vek a. Ani chuan ti hian a ti ta a, “Mami, tun ang khawvelah chuan thiam na chauh te hi a tawk zo tawhlo a, thil tithei nih tel a ngai a. Nang chuan support tu tumah i neilo a, mahse i interview pui thenkhat te kha chuan minister thil tithei tak tak te back up tu an nei a, an lal em a, an thu zawm mai loh chu tihtheih vak kan nei lo ani, hrethiam ang che” min ti ta ringawt a. Ka chil ka lem duk a, ka taksa hi a vawt chhuak vekin ka hria. Harsa ti tak chungin chu pa hnenah chuan, “Anih leh ka pu, tunge in lak?” ka ti a. Ani chuan “LALNUNDIKA” a ti a, phone chua dah ta a.
Ka ngaihtuah chian poh leh ka hrethiam theilo. LALNUNDIKA chu ka thianpa, ka sikul kal pui, “interview ka ti tha lo, ka pa in kal rawh min tih vangin ka kal, ka nui liam vel mai mai”, titu kha a ni si a. Pu, i thlan mawi taka siam te ka duh a, min chhuantlak a awm te ka duh a, ka pi tan pawh innghah na tlak nih ka duh. Ka thinlung tina bertu chu keima tana sum i khawl ruk char char te kha ka ngaihtuah a, awmze neia chantir ka duh, mahse ka hlawhchham chu a ni si.
Pu, keini aia thiltithei tam tak an len suau suau na karah hian, kei i tunu, mahni inhaikuak chawp ngai, minister emaw, mi lian emaw hmelhriat nei velo hi ka tling zo ve ngang lo a ni e. Min ngaidam ang che. @Natalia Sailo
Post a Comment