Thu Ngaihnawm Huang chhiar thin te chuan Sibuta chanchin hi kan chhiar tawh ka ring a, mahse Sibuta khan chhan nei lo, suahsual tukhum pawn vangah a farnu kha a that angin kan hmu a, lehkhabu rawnte nena lo tarlangin, a farnu a huat vang hrim hrima that a lo ni reng em tih in bihchiang teh ang.

Mizo Lal SibutaSibuta a hnam hi chiang taka hriat a ni lo a, Rivung hnam nia sawi a ni a, mahse ziaktu tam ber chuan Palian hnam tiin an ziak. Mi thenkhat chuan Darlalpui pa sawn niin an ring a, thenkhatin a hmeifa a nih an ring a. Mi dangin Darlalpuii pa sal man fa a nih an rin laiin thenkhat chuaan lal vanlung ur fapa a nih an rin thu an sawi bawk.(Van lung ur tih chu lal sutpui vuan kan tih ang hi a ni) Engpawhnise a farnu se chaiha a chaih avang hian Mizo te thinlungah a thi tawh dawn lo a, a damlai lungphunaa thisen buak nasatzia te pawhin theihnghilh ni a nei dawn hek lo.

Sakhan lal chu lal tha leh zaidam tak mai a ni a, a khua leh tuite a hmangaihin, a khua chuan kum that kum an hmang deuh reng emaw tih mai turin buh leh thlaiah an intodelh a, a boruak a nuamin nula leh tlangvalte thothang pawh a tha hle a ni. Sa pawh kah tur tam tak awmin pasalthate hla do chham ngaihthlak tur a awm zut thin a ni.

Lal chuan fanu pakhat Darlalpuii a nei a, hmeichhe duhawm tak leh zia pawh pangngai tak a ni, mahse fapa a neih loh avangin lal thinlai chu a dam thei lo a, Sibuta chu kum li mi vel a nihin fa atan a la ta a, lal zedingah mipa an awm loh avangin Sibuta chu nakin lawka roreltu tur a ni mai dawn a, mi vannei tak pawh a ni.


Hun a han rei deuh a, Darlalpuii pawh taitaw rah tiatin a hnute a lo lian ve ta a, a farnu Darlalpuii nena inngeih taka an awm lai chuan lal thisen kai ngei mipa a lo piang a, chuta tang chuan Sibuta chuan lal in chhungah ngaihsak a hlawh lo tan a, atan nau mipa thar chu lawmna ni lovin lungngaihna a lo ni a, thinrimin awmzia a nei lo a, hrehawm ti-ru takin hun a hmang chho tan ta a ni.

Sibuta chu lal in atang chuan a lo seilian zel a, naupang chhia kan tih ang mai hi a la nih avangin Darlalpuii chuan a tiduhdah thin a, a changin thirkhaiin a vit a, a changin a puan tahna bulah thuttir a, a themtlengin a ngal te a khawnsak thin a. A awm hle hle lai te hi meilingin a dep phu leh zeuh thin a, a changin in hnuaiah a bakilh thlauh ang tea sawiin a zawn tir a, chutia a zawng lai chuan in atangin tuiin a leih thin a ni.

Sakhan lal nupa chu a nu leh pa tak tak an nih loh avang leh a vuivaina a thlen chang pawhin ‘naupang thuchang mai mai’ tih ten an lo tihkawi sak a, mahse Sibuta tawrh dan chu naupang tawrh atan chuan a nasat em avangin a hrehawmin lal in chu atana chuan hremhmun te-nau temna a ni ringawt.

Ni khat chu Darlalpuii chuan a tiduhdah leh a, naupangte a ni na a, “Darlalpui, heti em chuan min nghaisa tawh lul suh, a hrehawm em mai, naupang mai ka la ni si a, ka thang thei lo ang. Zangkhua a la bungbu thei a nia,” beidawng leh hrehawm takin a ti a.

Darlalpuii chuan nau mipa a nei bawk a, Sibuta chu lal a nih theih a ring
lo a, lal te chuan sial an chhun tih hriain, “Sibut, lal i nih chuan sial angin mi chhun dawn nia,” a tikher a. Sibuta chuan chu chu a hre reng ta a ni.

Sibuta chu a lo thanglian a, tlangval a lo nih hnu chuan Darlalpuii chuan a tiduhdah ngam ta bik lo va. Darlalpuii hnena a lo sawi tawh ang ngei chuan phuba lak duhna a lo nei ta a ni. Pitar pakhat hmuin ani chuan tur (hman lai chuan hnamtur hi an hmang ber) hman dan te a lo hrilh a. (Sibuta hi amah khawngaihtuten an fuih pawrh a nih an ring a, a hringtunu pawhin a pui nia ngaih a ni) Zu bilhna tur bel mawngah hnamtur hnah a dah ru ta a, a pa nen chuan zu an in dun a, ani chuan a rukin a leih bo zel a, tichuan a pa chuan zu a in emaw a tih lai chuan tur a lo in reng a, reilo teha a thi ta a. A unaupa chu a vaw hlum bawk a, mi bulah chuan ‘Thingkungah sava bu lak a tum a, a tla hlum palh a ni a’ ti tlat a, a nu leh a farnu Darlalpuii chu lal in atangin a hnawt chhuak a.

Darlalpuii chu hmeichhe hmel hmuh nuam tak a nih ang ngeiin a nu a hmangaih a, puantah te pawh a thiamin la deh te chu eirawngbawl ang maiin a thiam a, lal fanu, lal in chhung atanga seilian ni mah se mizo hmeichhe hnathawh ang zawng zawng chu a thiam vek a ni.

An khaw thenawm lal, ranngaw zawnga rilru tiharh mek Lalngura pawhin Darlalpuii duhawmna chu a hmuhhmaih lo chiang kher mai. Sibuta tlawh pahin a an inah a leng lut fo thin a, a ngaina hle a ni. Lal in atanga hnawhchhuah, dai kila cheng mah nise hmeichhe tha chu sawi sawi ngai loin an hming a thang thuai thin a ni tih chu chiang takin Lalngura khuate pawhin an hria a ni.

Sibuta chuan lua kel sam a to hmain khuang achawi dawn a, Lalngura pawh a sawm a, zana an inah an inkawm lai chuan a beisei loh zawng takin a farnu chu nupuia neih a duh thu a sawi ta mauh mai a, Sibuta nupui chuan a duh lo hle a, khawhring pai ang hial ten a chhuah a. Mahse Lalngura thinlung chu a sawi nghin phah eih lo. (Sibuta nupui hian a pasal hi thawi dan kawng a hre hle a, a thu a chhia a tha a zawm diak diak a, lal nu mah nise a khua leh a khaw thenawm tlangvalten an ngaina lo hle a, ‘Mi biakna thlum viau, mitmenga min huphurhtu’ an tihial a ni. A farnu
chunga thil duhawm lo tak lo thleng tur pawh hi Sibuta nupui remruatpuina angin mi thenkhat chuan an ngai.)

Sibuta pawhin a farnu pumrua-ah chuan duhawm tak a nih thu te pawh a sawi a, mahse khuang a la chawi kim loh avangin a khuang chawi zawh te nghak rih se a ti a. Tichuan, thuawih takin Lalngura chu a upate hnena thu lawmawm tak hrilh turin a haw ta a.

Sibuta chuan a khuaa se thau tha tha pakua a tlangval te a hlin tir hnu chuan, “A se sawmna tur hi khawia mi nge kan hlin leh ang aw? kan khuaah chuan a awm tawh kher lo ang. A awm a nih pawhin favai atanga a chil achil chhuah a ngai ta ve ang,” tia tlangval leh pathlawite an inhnial bap bap laiin Sibuta chu a lokal a, a khaw tlangvalte rin loh zawng takin a farnu leh lal fanu Darlalpuii chu a se sawmna atan hling turin a ti mauh mai a. Mahse tlangvalte chuan an lo duh lo nasa mai a, “Lalpa, min tir lui suh, ang che. Se chaih tura kalkhawm kan ni a. Heti ang ngawta tlangvalho nuar pawh ni si lo min bum hi kan ngaithiam lo mai tur a nia,” tiin lal zahawm tak thu chu an hnial hial a, a tawp a tawpah amah ngeiin hnam hruiin a farnu chu an in chhung atangin a hling chhuak ta a ni.


A farnu Darlalpuii chu sial anga chaihin tui pawh in a phal lo a, a tlangvalten an chaih that duh loh chuan a hrem zel mai si a, hremawm titakin lal tualhmaiah chuan an chaih kual a, a nuin tui a in tir dawn pawhin a lo tihbuaksak a, a tui a hal em avangin a thaw te chu lawi ang maiin a thaw huam huam a, a hmaite chu thisenin a khat a, Sibuta en chungin, “Sibut, heti em hian ka chungah i rilru a chhiat hi ka ring lo va sin, i rilru chu ram huai tluk lek a nih hi,” Darlalpuii chuan a ti a.

Sibuta chuan, “Ka naupan lai khan zangkhua a la bungbu ang ka tih kha, a bungbu ta a nih hi, i hre lo’m ni? Chu bakah nang pawhin, ‘zangkhua a bungbut chuan sial angin min chhun dawn nia i tih ngat kha i theihnghilh ta em ni?” a ti thung a.

Darlalpuii chuan, “Theihnghilh lo e, ka hria asin. Lal tha leh ngilnei i nih beisei avang chauhva hrem thin che ka ni asin. Heti ang hian i ti duh tak tak ang tih ring phah lo mah ila, i nun chhiatzia hi chu ka hre tho. Turin ka pa i hrai hlum a, ka nau i vaw hlum bawk a. Heti taka nun chhia leh nun rawng hi chu i dam rei bik hlek lo vang le. Ngai reng rawh, i thih hunah ka pa leh mama te nen mitthi khuaah kan lo hmuak ang che, nuam i ti bik hlek lo vang,” a ti a. Sibuta chu a dangin a hil bul a, a thidang emaw an ti hman hial a. Darlalpuii luphan atan Fartuah kung an phunah chuan a thlun tir a, Se chhun tur pangngai ang deuh hlekin a lu kun deuh hlekin an phuar a. Dar bu leh dar khuang an tum ri a, Thangchhuah tur pain a tih thin dan ang takin diar trial a khim a, puan a sin a, a muzuk chu chung lamah vilik chho zoh zohin a lam hual a, dar tum tih mai loh chu thawm leh tawng ri a awm loh avangin a reh thuap a ni.

Khawvela thil awm ngai lo, thil rapthlak lutuk lo thleng tur chu mipuiin mak ti taka an en lai chuan Sibuta chuan a fei chu a vilik leh a. Mi se chhun chuan thi ser ser thei chauhvin an chhun a, mi dangin an talh leh thin a ni ngai a. Ani erawh chuan dangdai takin, a tum ang ngei chuan, a fei lu bawr tlum hmawk khawpin, nula thianghlim Darlalpuii nakah chuan a chhun ta a ni.

Darlalpuii chu a tlu ta riai riai a. A thi tur chuan, hmeichhia zawng zawngin an tih thin dan pangngaiin a pawnfen kau tur a dawm a zui trang trang a, dawm chung zelin a thi ta a ni. A lu chu an tan a, fartuah kung Seluphanah chuan se lu tar ang chiahin an tar ta a ni. Darlalpuii nu chuan hla hmangin a fanu a ngaihzia leh a khawngaihthlakzia tah hla chu mizo zinga hla phuah hmasa ber pawl zinga chhiar theihin a lo awm ta hlauh a ni.

A khaw mipuite chuan a chet dan chu mak an ti hle a, malsawmna pawh a dawn an beisei tawh lo a ni. Sibuta chuan a thiltih chu a khaw mipuiten an duh dawn lo tih hre lawk mah se a lal sutpui vawn chak an tam em avangin an hnial ngam dawn lo tih a hre chiang a, hei hian lal te hausakzia leh an neih tawm a, an buh leh bal hnianghnar taka chen ruk tum ve reng an awm thu chiang takin a tilang a ni.

Chutihrualin khatia Darlalpuii, nula ngilneih sial ang maia tihduhdah a nih khan hmeichhia leh naupangten an en ngam lo a, lal khawchhungah tulum a lut ta emaw an tihial a, hmana Sakhan khua leh tui nih nuam ti thin khan Sibuta khua leh tui nih chu mualphona a ni tih an hria a, hrehawm an ti em em a ni.
Lalngura chuan a hmangaih Darlalpuii chanchin a hriatin rang takin a hote nen an thawkchhuak nghal a, Darlalpuii nuin a hmuh rualin nasa takin tah hla nen a lo kuah a. Lalngura chu Sibuta inah thinrim alh puat puat chungin a lut a, Sibuta awmna a zawh laiina upaten, “Daithlang tuikhur kawng a zawh ta a nih kha. Min en zui chuan ka that ang che u min ti a, tumahin kan en zui ngam lo a,” tiin an chhang a. Lalngura chuan a hmangaih Darlalpuii phuba lak chu duh hle mah se an zawn ngial hnuah pawh an hmu tak loh avangin a kir leh ta a ni.
Nula riangvai leh khawngaihthlak Darlalpuii thihna avangin Darpuii nu leh Lalngura chu nufa ang maiin a phuarkhawm a, Darlalpuii thih dan chu rapthlak hle mah se hmangaihna zung par chhuah tir tu a nih phah a, he khawvel awmchhung zawnga nula khawngaihthlak tia hriatreng a ni tawh ang a, lal Sibuta pawh a farnu chungah a chet dan tenawm tak avangin a chhe zawnga hriatreng a ni tawh bawk ang.

(Sibuta chanchinah hian mizo nun tam tak a tarlang a ni, keimahni aia pachhe zawk hmusit that lohzia te. Fahrah, hmeithai leh khawtlang chu tangho bawk mah se a ruka hmusit an nih thu te, pipute thufing ‘zangkhua bungbu’ thu te thlengin a takin kan hmu a. Chhantu nei lo emaw kan tih te pawhin chhantu an lo neihzia te, lal ngai lo lal a khakzia te, Sibuta nupui pawhin a pasalin khatia a farnu se chhun anga a chhun dawna ti lo tura thlemna reng reng a neih loh avangin Sibuta lawmna hlir ngaihtuah, a sum chiah hmangaih, tun lai tawng takin, ‘sum ngah ngah hmeltha’ kan tih ang nun vawngtu a nihzia te pawh chiang takin a lang bawk a ni.) 

Ziaktu: David Lallawmawma

Lehkhabu Rawn
1. Rev. Z.T. Sangkhuma - Mizo Lal Ropuite. Publishby Art & Culture Dept. Mizoam. 1996. 2nd Edition
2. Lalchungnunga (8.6.1968- 29.9.2001) - Darlalpuii. B.A Mizo Zirlaibu

Post a comment

Powered by Blogger.