james ramdinmawiaA hmasa-in Facebook Inbox lama Pu KL Liana nen kan inbiakna hi han chhiar phawt teh u. "Ka pu, Court Judge-te hi Lawyer an ni ve tho em?" tiin ka zawt a, "Judge an ni," tiin min chhang. Chumi zawmna chu ka screenshot tâk hi a ni. Fiamthu deuh reuh, thinchhe deuh reuh bawk si-a min chhanna hian min tihlim khawp mai!

Kan naupan lai khan Sakeibaknei chanchinbu kha kan chhiar ve țhin. Pu R. Vanlawma leh Pu KL Liana kha thuziak taima pawl an ni a, an thuziak pawh ka chhiar nasa khawp mai. Kha'ng hunlai ațang daih tawh khan Pu R. Vanlawma leh Pu KL Liana te kha kan ngaisang tawh. Anmahni hmuh ve theih kan châk a, mahse keini thingtlang naupang mai tan chuan anni meuh hmaichhana hmuh ve tùm chu bei nge sei Rûn dûng, tih ang vel a ni.

Thing delh loh, lung delh loh na nâ nà chu kan lo seilian ve a, zirna avangin Zâwlkhawpui te kan lo chuangkâi ve ta hial a. Kan naupan laia kan hmuh châk em emte chu hmaichhanah kan kàwm ve thei ta. Pu R. Vanlawma nena Zalèn Cabin-a kan inkawm țum erawhin thlâ kan lo la hauh lo mai a, a pawi ngawt mai. Khatih lai khan camera duh duha hawlchhuah tur awm hek lo!

Kum 1999 khan Pawl Sawm zir turin Aizawl-ah ka rawn chhuk thla ve a. Vawikhat chu LPS Vision-ah khan MLTP Act chungchang Interview a rawn chhuak hlauh mai a. Pa pakhat, sam sei, ha kuh deuh, hmel zozìal ve zet mai hian Dàn chungchang a lo sawi lai tak chuan ka pu hnenah, "Khi pa chu khawi lam zu zuar nge maw ni le, Dàn lah chu a hre phian lehnghal a?" tiin ka zawt a. Ka pu chuan, "Pu KL Liana a nih khi," tiin min chhang. "A ni maw?" tiin ka zâwt lêt hê hâw. Mak ka ti lutuk, a chhan chu a thuziak avanga ka hriat țhin Pu KL Liana kha'n khatiang hmel kha a pùt ka lo ring ngăi reng reng lo!

Kum 2002-2003 khan Hrangbana College-ah II BA ka zir a, Students' Self-Support Union (SSU), Hrangbana College Branch-ah Finance Secretary ka ni ve. Tichuan SSU HBC Branch chuan zirlaite inhlawh nan lehkhabu chhuah a rawt a, chumi buaipui tur chuan Sub-Committee din a ni a, chutah chuan Chairman-ah ruat ka ni. Tichuan thuziakmi hrang hrang hnenah lehkhabu-a chhuah tur tlawmngaia article / essay min ziahsak turin ngenna kan siam a, kan ngenna tlâwmtê chu an rawn tihlawhtling hlawm a. Loisbet te nen țangho-in "Falung" tih lehkhabu chu kan chhuah thei ta a ni.

Article / Essay lakkhâwm kha hna hautak zet a ni. Pu KL Liana article pawh a Office-ah ka va lam a. Chu chu hmaichhana amah ka hmuh vawikhatna a ni. Smiling face a lo nei țha vei phian a. Tichuan a thuziak, amah ngeiin Type-writer hmanga a chhut chu min lo pe a, SSU a ngaihsàn thu te a lo sawi lûam.

Kum a lo vei zel a, Facebook te a lo chhuak ta a. Keini pawh Mizoram-ah chuan Facebook Account nei hmâ pâwl kan lo ni ve a. Tlăi khawhnu-ah Pu KL Liana hian Account a rawn hawng ve a, ni hnih-thum chhung lekin a Friend List a full ta dèr mai. A Account hawn tirhah a Friend List-a awm hmasa pâwl ka lo ni leh hlauh a, vannei ka inti asin aw. Tichuan, hmaichhana inkawm fo lem si lovin Facebook ațang hian mimal takin kan innel chho ta viau mai! Ka thu leh hla nîngnêl ve tê tê te, ka thlalâk lâktlâk loh tak tak ka upload te hi a rawn comment ve fo a, mahse hetia a rawn comment hian pentui a ren țhin khawp. "Khai aww..." tih ringawt te hian a rawn comment țhin. Vawikhat chu heti hian ka chhâng lêt a, "Hei hi chu 'khai aww' tih ringawta comment loh tur, i ngaihdàn sawi chhunzawm turin ka beisei che," tiin. A nuih a za phian!

A chăng leh, "Facebook-ah hi chuan ka junior i ni e, min zah hle rawh," te ka va tifiam a, a lo nui seih zel a, kan inngamtlâk viau.

Kum 2014 khan Zofa Global Network (ZGN)-in khawvel pum huapa Zofate khawmpui lian ber "Zofa Global Unity Festival" chu Zokhawthar leh Rihdil-ah kan buatsaih a. Souvenir kan chhuah a, a hmingah "Zofa" kan ti. Kan hruaitute'n Editor mawhphurhna min pe a, kan bei ve nasa khawp mai. Chutah chuan thuziakmi hrang hrang hnen ațangin Article / Essay kan lakhawm a. Pu KL Liana thuziak "Mizo kan ni e" tih pawh a tel ve nghe nghe!

Kum 2019 May thla tawp lam khan Zàmzo Real Estate-a kan Managing Director, Tv. PC. Ramengmawia (Valtea) nen hna thila kan chhuah pahin Pu KL Liana Office kan va tlawh a. Thingpui senhâng te min lo hlùi a, kan Real Estate kalphung te min zawt a. Real Estate Firm din nachâng kan hria chu lawmawm a tih thu a sawi a, Mizoram-in bung thar a kai ta, a ti hial a. Dik tak leh fair taka kalpui zel tur te-in min lo fuih bawk. Hemi țum hi amah ka hmuh hnuhnun ber a ni ta!

Dikna, rinawmna, taimakna, pamhàm lohna, leh a dang dangte'n Zofate thinlungah hmun chang se a duh êm êm țhin. Zofate inpumkhatna leh inunauna a vei hle bawk. Kan ram hi dik takin kal se heti mai mai hian kan rethei tawh lo ang tih hi a thinlung luahtu lian tak a ni. Miretheite a khawngaihin a hmangaih êm êm a, Judge anga a rorèlna-ah pawh hei hian thui takin a influence niin a lang. Ram leh hnam a veina, eirûk a huatna, Sorkar (mipui) sumin a thlenna tur dik tak thleng tura a duhna, miretheite'n leirem rap ve se a duhna, kan ram hi lo changkang se, eirute chauh dingchhuak lovin mipui nâwlpui hi dingchhuak ve se a duhna te țhahnemngai takin a ziak țhin. Eirukna hi kan ram eichhetu lian ber a nih thu hi a thuziak laimu a ni fo.

Tunah chuan a lei taksa chu piallei thuahrîat hnuaiah zalh a ni ta. Pu KL Liana, Zofate lei Arsi lian chu a fam ta, mahse țhahnemngai taka a lo vahvaihpui Dikna chu a fam lo ang. A thuchah ropui takte hi Zofate thinlungah a nung reng tawh ang. Nung satliah lovin a nawlpuiin kan nunchhuahpui hun a la thleng ang, chumi hunah chuan Vàn ațangin a țhahnemngaihna âu àw kha a thlàwn lo a ni tih a rawn hmu ang a, Lal Isua kiangah hlim takin a nui ver ver tawh ang!

- James Ramdinmawia

Post a comment

Powered by Blogger.