Pathianni vawi 15, chawlhkar 14 zet chu Covid-19 hri leng hlauhna avangin kan Inkhawm thei lo ta a, a khawharthlak rualin mi tam tak chuan 'ngaiah kan neih' titih tawh a, Inkhawm châkna pawh kan hloh zo mai dawnin a lang ta! Mi tam tak, thlarau lama tuihâl, Biak Ina mimal leh chhungkua tea ṭawngṭaina hun hmang ṭhin erawh an la awm reng bawk a.
Inhrûtrual reng hi...
Lockdown kaihhruaina hrang hrangah thingtlang leh khawpui chu kan kal dan a inang vek lo tih kan hria a. Chutihrual chuan sakhaw biakna hmun leh zirna sikul khâr chungchangah erawh min hrutrual pawp mai si a. Zirna school bik hi chu kan sawi phak a ni lo va; Inkhawm chungchang bik erawh hi chu June thla lockdown zawhah pawhsei a la ṭul a nih pawhin thuneitute hian min rawn hrutrual tawh lo mai ula kan va ti êm!
Zing ṭawngṭai Inkhawm, social distancing vawng chunga kalpui awl tak thlengin kan titawp hlawm si a. Mi pakhat phei chuan _"Zing ṭawngṭai Inkhawm thupuiah hian lirnghing leh leilunga chhiatna thleng theite laka humhim dilna hi a tel a, zing ṭawngṭai Inkhawm pawh kan nei thei ta si lo va, lirnghing te pawh kan tuar ta fo mai a nih hi!"_ a ti ve hmiah a nia aw! Himna hnuk hi Pathian hian a mite inlungrual tawngṭainaah hian a thlung fo ṭhin tih kan hriat kha (Mt.18:19).
Biak In pawn lamah chuan
Thingtlangah chuan hna kan thawkho a, dawrah kan bazar ho a, thlam zimteah dar insi khupin chaw kan fâk a, mit mim pawh kâin kan inhamsak hum hum a, mask vuah lovin kan inthâwkkhum hluah hluah a; vantlanga hri darh (community spread) a awm miau loh avangin kan inhlau lêm lo. Mi hlauhawm tur chi, test hnua quarantine centre-a term hmang zo tawh pawh kan khaw tih danin kan duh chen chen kan lo khung hrang leh a; kan ngaih a ṭha khawp mai.
Inkhawm tih loh kawng dang zawng zawngah kan zalen a ni ber a. Hman ni phei chu Ni 100 inhlawhnaa thawh laiin ruah a rawn sur ta a le! Thlam chêp takah mi 60 zet mai an han inhnawh mai a, social distancing chu vawn a awl lo ve khawp mai. An demawm loh; hri kai awm hawt lohnaah tunge ruahsur karah feet 6 dan vela va ding peih tehlul ang ni!? Kawng dang zawngah kan awmho ngam a, Biak In chhunga Pathian biaa ṭhutho min la rawn hlauhpui reng mai hi chu hriatthiam a har ṭan ta!
Van lam tih dan a ni
Ringtute hi a huhoa Pathian be ṭhin tura koh leh ruat kan ni a, kan Pathian mit hi a koh chhuah (koh hran) pungkhawmte chungah a fu tlat a, a mit naute ang hialin duat takin a enkawl ṭhin (Deut.32:10). Mal tlat hunah pawh rinawm tur kan nih rual hian Pathian mite reng reng chu inpâwlho tur te, infuihchak tawna huhoa Pathian pâwla chawimawi tur tea koh kan ni.
Hri lên ve miah lohna hmun, lût chhuak pawh awm mang lohna thingtlang kil tak tak leh khaw mawngping deuh deuhah nen lam 'sakhaw thila punkhawm khap', "Pathian biakna hmun hawn loh tur" kan ti reng mai hi chu kan thlarau nun hian a tuar ta tak meuh a nia!
Lockdown tir lamah kha chuan chhungkaw lamah ṭan kan la a, Home Crusade boruak nung tak karah "Chhungkaw lama theihtawp chhuah turin min ko" kan ti a, dik pawh a dik ang. Mahse, tunah chuan min ko zel ta lo nge ni, min ko rei ta lutuk a kan 'eih' peih ta lo zawk ni, sakhua chuan kan chhungkuaah a ngêk pawh a hlawh zo ta meuh dawn lo!
Vana miten an tih ang leia kan lo tih ve hian kan zingah Pathian ram a thleng zel dawn a ni a (Mt.6:10). Keini chu vana mite tih loh danin Pathian fakho thei lo, chawimawiho thei lo, beho thei lovin kan in-lockdown rei ta bawk a, kan zinga Pathian ram pawh ṭhiahin a awm ṭan mek ta! Kan vuaiin kan ro telh telh a; ro leh vuai nih lah chu nuam kan ti tial tial niin a lang a. Inkhawm rawt hmasatu nih pawh a inthlahrunawm ta lek lek a, he thu pawh hi tuang tichhah fê chunga ziak a ni e.
Work is worship = worship is work!
Inkhawm loha kan tlei viau laiin hnathawh lam kawngah erawh kan harh tulh tulh a. Hna kan thawh loh chuan kan ṭam mai ang tih chu kan invaukhân dân a ni miau si a. Zawlnei Haggaia hun lai ang maiin keini kan inhaivur mup mup a, Pathian Biak In erawh a ram a ni ta ber si! Kan kawngte hi chhût ngun a hun ve tawh lo maw (Hag.1:5-9)? Thutaka ṭâmna a thleng mai dawn e!
Hna thawh loh chu ṭâmna a nih rual chiah hian Pathian biak loh pawh rôna a ni. Home Crusade thuchah ṭha tak takte kha Biak Inah fakna hla nena han chhawm alh zui ni se la chuan kan ramah hian harhna a thleng tawh ngei ang! Huhoa intichaktawn tura kohte kan in-lockdown miau si a, rah ṭha a chhuah mawh a ni e.
Kan hna ṭha taka kan thawh hi Pathian duhzawng a ni a, Pathian chibai kan bûk pawh hian chatuan daih tur hna ṭha kan thawk a ni. Mahni tana sum khâwla Pathian lama ngah si lo mi hausa â kha hre reng ang u (Lk.12:16-21).
Inkhawm aiawhtu chu!
Mimala Bible chhiara ṭawngṭai keuh keuh hi engemawzat an awm laiin chung mite lêt tam tak chuan Phone Games an âtchilh a; an rilru, an thlarau zawng zawngin theihpatawpin an khêl a! Playing Card te, Carrom Board, Chess/Draught Board te a hnûm tual tual ta!
Chawlhkar niah te chuan hna kan thawk ṭul em em hlawm a, Pathianni erawh chu chawlhni atan kan hmang a, naupang leh tleirawl tê tê, sakhuana lama nun kaihhruai mamawh zet zet te pawh sakhuana rawngkaia punkhawm a theih miau loh avangin zalên takin kan theuleu hut hut a ni ta ber mai a, an thlarau hmangaihtu mit aṭang chuan en liam mai mai a har ta khawp mai.
Hun hnuhnung chhinchhiahna hrang hrangten min nghawr nghing nêp ta riau a, kan Kristian centre ber kan khâr tlat avangin Pathian leh a 'aw' in kan ngeng a chhun zo ta meuh lo! Rawngbawltu tuihnâng ngah tak ṭhinte pawh an hawi lawl lawl a; piantharnaa chiang lote lah hlauhthâwnna leh chi-âi buaina (panic & anxiety) in a rûn a, nitin zantina Setana duhzawng titute erawh an khauphâr thawven a; lockdown vanga kan dâk ral lai tak hian Isua hi lo kal lul suh se!
Kawng a awm
Kan khaw dinhmun ṭheuh chu kan hre chiang a, hlauh tur awm lo na nâ nâ chu lênho te, hnathawhho te, infiamho te kan ngam vek. Sorkar emaw Kohhran headquarters lam emaw thuchhuakin, "Hri vei awm lohna khua/veng/thingtlang lama Kohhranhote chu Inkhawm chungchangah chuan tualchhung lamin ṭha an tih angin an rel thei ang" te min han ti ula. Social distancing vawng reng chunga Inkhawm dan pawh kan ruahman thiam ang. Upa bial ṭhen angin Biak Ina thawl taka ṭhua Inkhawm chhâwk pawh kan thiam ang.
Pathian pawh hi kan lamah a ṭang a ni tih a chiang a, kan state hausak loh dan mil zelin hri kai kan neihte pawh a ziaawm chi (asymptomatic) deuh vek an ni a, a serious deuh an awm lahin tlangtin mualtin aṭangin kan ṭawngṭaisak chur chur a, Pathianin mal min sâwm dante thlir hian han zâm em em reng tur kan ni dawn em ni le?
Mi thiamte thuziak aṭangin Covid-19 hriin a chakna a hloh tial tial tih te kan lo hmu ve zel a. A enkawl nana damdawi hmantlâk tak tak an hmuh chhuah thute lah kan lo hre ve zel bawk a. Kan doctor te leh damdawi lama thawktute lah Pathianin mal a sâwm a, an enkawl dam chur chur ta bawk a. Hengte hi kan ṭawngṭai chhânna a ni tih pawm ila, min venghim theitu kan Pathian ber beho ngam lo, fakho ngam lo, a hmaa inlanho ngam lova awm reng hi thil ṭha ber a ni ta hauh lovin a hriat.
Hlauhawm a lo hnai thar leh a nih leh khauh zawk pawhin kan in-lockdown leh mai ang a. Hmun hlauhawm lo tih chiang sa rengah hi chuan sakhuana thila zalên hretna thupek min rawn pe ve tawh ula, mipui tam tak bakah kan Pathian pawh a lawm ngeiin kan ring e. @M.S. Dawngliana
Post a Comment