China leh Pakistan in India thithaih
Ram sual Pakistan hian remna duh India a phiarru reng a, kan sipaite an ngawi bik dawn lo- Prime Minister Narendra Modi
He thu hih Mann Ki Baat tum 67 a hmanna hunah sawiin, July ni 26 hi Kargil War a India in Pakistan a hnehna champha vawi 21-na a ni bawk a, Modi hian Pakistan chu na takin a tawngkhum a ni.
PM Modi chuan, Kargil War hma khan India chuan inremna siam a duh a. Theihtawp chhuah in remna kawng a dap char char a. Mahse, thil tha duh ngai lo Pakistan chuan remna duhtu India chu a phiarru reng a. Indo a cho chhuah ta a ni, a ti.
India hi remna leh muanna zawng thin ram a ni a. Inhriatthiam lohna chu inbiaknaa chinfel a tum thin. Hei hi Pakistan hian kan dawizep vang niin a ngai a ni mai thei, mahse kan indo ta reng a, a thiltum zawng zawng India sipaite huaisenna zarah a hlawhsam a, khawvelin kan chakzia a hmuh pha ta a ni. Pakistan hian kan ram leilung chhete pawh a thunun kan phal ngai lovang, PM Modi chuan a ti.
Prime Minister chuan Kargil War hnehna champha pual hian India sipaite chawimawi an phu zia uar taka sawiin, social media velah India sipaite hmuhsitna lam sawi lo turin India khua leh tuite a ngen a ni.
Modi hian ramchhungah buaina neuh neuh a awm thu sawiin, ramriah chauh indona a awm lova, he ramchhungah hian kan ram laka hel tum tam tak an awm a. Mi tinin kan dinna kan thlan fel a ngai, a ti. PM hian opposition lam a beihna nge, firfiaka che pawl a sawina, ti chu zawna lian tak a ni.
Engpawh ni se, Narendra Modi sawrkar hian Pakistan hi a cho et et hle mai a. A trul huna chuan a che hmiah zel. Modi sawrkar hnuaiah hian India sipaite chu Ramri kanin Pakistan ramchhungah an lo che fo tawh bawk a. Tun hma a India in a lo hneh tawh a ni vang nge, Pakistan kher kher hi chu kan hlau loh chiang a ni.
China lah chuan, indo tak tak turin India a ngam chiah bik si lo. Tunlai hian Pakistan lamah bu khuar lehin, sipai nungchan an zir thûl a. Pakistan hian helpawl te hmangin India sipaite a kap fo a. India in na taka a chhan let zel avangin buaina liantham a thleng ngai meuh lo.
Pakistan chuan nimin July ni 26 khan Ladakh bula Skardu airbase ah a sipaite indo nungchan a enchhin tir a. He hunah hian JF-17 thunder fightet aircraft an hmang. He thila hian China a inrawlh ngei niin media thenkhat te chuan an tarlang a, a dik ngei ang. China sipai engemaw zat chu Pakistan ram chhungah hian an awm thu sawi rik a awm a. India in chiang taka a hmuh huna chuan United Nation rorelna hmaah China leh Pakistan chu a chaak lo khawp ang.
Pakistan Occupied Kashmir (POK) a Skardu airbase hi India ram Leh airbase atanga Kilometre 100 leka hlaa awm a ni a. Thil thleng thar engkim hriat nghal zel niin, Pakistan sipaite chezia hi ngun takin India sipai lamchuan an thlithlai reng a. Eng hunah pawh indona hmachhawn theih tura inpei diam sa an ni.
Pakistan Air Force (PAF) innghahna ber leh an fighter thra ber chu JF-17 hi a ni mai a. United States in F16 a titawp sak avangin an ropui loh hle.
F-17 hi China siam, single engine niin, ground attack leh interceptor atan a hman theih ve bawk a. India chhuanvawr zinga mi Su-30 fighter hian BVR (missile) pariat lai a phur theih a, JF-17 hian pali chauh a phur thei. Boruak lama chuan Pakistan hian India hi a hneh dawn lo, tih a chiang reng.
India hian fighter jet a kawl treuh mai a. MiG-21, Jaguar, Mirage 2000, HAL Tejas, Sukhoi, leh Rafale. Heng bakah hian a dang pawh Pakistan beih nana hman tlak fe fe a la tam mai. July 27 zingkar khan Inhlanna hun te neiin Fighter hi Mericnac, Bordeaux France aṭang in a rawn thlawk chhuak a, Pilot te pawh hi India Pilot te anni. France leh India inkar 7000km a thui zet an rawn thang na turah hian kawng lak ah atui thun turin UAE ah an rawn chawl ang. Indian Air Force lam chuan engkim an peihfel diam tawh a, Rafale jet khalvir tur a thiamsa pilot 12 a kawl bawk , Rafale jet hi kar khat chhungin a tulna hmun apianga hman nghal theih tura inbuatsaih hman turin Indian Air Force lam chu an inring.
Pakistan hian India a ngam dawn loh ti a hre reng a. Ramria che thin ho hi helpawl deuh vek an ni. A chhan chu Pakistan hian indo a hmachhawn ngam dawn lova, helpawl hmanga chhaih buai bak tih theih a nei tlat lo.
United States in khaw dang a hawi san tawh si, Russia lama hawi turin India nena an inzawmna nghet zia a hmu hmaih hauh lo. India laka a dinhmun hria in, China bak han belh tur a hre lo. Hei vang hian duh thlang thei a ni tawh lova, China hnuaiah a kûn kumkhua tawh mai thei a ni.
July ni 25 khan Australian journalist Anthony Klan chuan, China leh Pakistan in inremna thuruk an neih thu a sawichhuak. Anthony Klan hi "investigative journalist" niin, thuruk a lo chhuichhuak fo tawh thin a. Tun tuma a thuruk hriat pawh hi a dik ngei ring an tam hle.
China leh Pakistan inremna thuruk hi khawvel tana thil hlauhawm tak ni mai tur a ni. Mi tam tak chuan tunlai hrileng Covid19 hi chemical weapon angin an ngai a. A lo chhuahna Wuhan hi virus zirna hmunpui a ni bawk nen, rinhlel a hlawh hle reng a ni.
China chuan Pakistan nen inremna thuruk kum 3 atan a siam thu, Klan hian a sawi a. He inremna ang chuan, Pakistan sipai enkawl Defense Science and Technology Organization (DESTO) chu, Wuhan Institute of Virology tlukpuia anthrax zirna hmunpuia siam tum a ni. Anthrax hi hri chi khat a ni mai a. Virus leh hri chi hrang hrang zirna hmunpui din a ni ang a. China hian engkim a tum dawn a ni.
He thil atan hian Wuhan Institute of Virology chuan thil trul zawng zawng a supply dawn a, Pakistan hian a ram a hman tir a ni ber ang chu.
China hian Wuhan khawpuiah Virology Institute a nei reng a, eng vanga Pakistan ramah kher zirna hmunpui bun a tum leh nge ni? ti chu zawna lian tak a tling a.
Thil ni thei tam tak sawi tur a awm. Pakhatnaah chuan, China hian virus zirna hmunpui a ramchhunga awm hi hmun danga kalpui a duh vang a ni thei. A chhanchu, tihpal thila virus hi tihdarh thei a ni a. Tuna Covid19 pawh hi mi tam tak rin dan a ni ve bawk a. Ram danga sawnchhuah a duh niin a ngaih theih. Tihpalh thila a darh pawhin China in a tuar leh tawh loh nan.
A pahnihnaah chuan, China hian hetiang lama a thiamna Pakistan hnehna pek, Pakistan hi hri chi hrang hrang zirna kawngah a sang lo hle a. A tha lama hman atan pawh a ni ve thei.
Pathumna, Chemical weapon hi kan sawi fo thin a, awm pawh a awm réng a. China hian Pakistan hnenah chemical weapon siamna pek a tum niin a ngaih thei bawk. A chhan chu, tunlai boruakah ngat phei chuan, China hian Pakistan bak ram lian a tak taka han inmawngzawmpui tur a nei meuh lova, Pakistan lungawina tur ngeia hmin a duh vangin he thil hian a thlem niin a lang.
Palina, a chunga kan tarlan zawng zawng khi dahthra lawk ila. Covid19 hi kan tuar vek a. China hian a thrian thra Pakistan chu he hripui laka a damkhawchhuah theih nan, Virology Institute hi din sak a tum niin a lang. Pakistanah hian covid19 hri kai mi nuai 3 lai an tling tawh.
Rin dan chuan, China hian Covid19 damdawi (vaccine) hi a neih sa niin a lang. A chhan chu a lo chhuahna rama mi 4563 chauh thi an awm avang hian, damdawi an neih ti a rin thei. Tin, India in Bharat Biotech, NIV leh ICMR siam Covid19 vaccine mihringa enchhinna a kalpui thu a hriat veleh China chuan Sinovac siam Covid19 damdawi, mihringa enchhinna phase 3 lai a kalpui tawh thu hriat a ni nghal chat a. Engkim hi duan lawk ang maiin China hian a thunun theih niin a lang.
Covid19 a darh tir khan ramdang zawng zawngin PPE kits, facemask leh surgical gloves an tlachham deuh vek a. China hian ramdang tan a thawnchhuak nghal thei zel mai a, mak tak a ni.
Hetiang hi kan tunlai boruak awm dan a ni a. Khawvel mipui hi China Game ah kan buai ta nge ni dawn, thingtlang kilkhawr ber ber te thlengin kan harsatpui phah a nia. US hian han chinglet deuh se, a duhawm ngawt mai.
Post a Comment