A KAMKEUNA Mihring nunna a hlu a; dam duhin hmun hla tak tak panin damdawi in changkãng tak takahte kan inenkawl thin. Hetih lai mēk hian thenkhat erawh nun ningin mahni an intihlum fo bawk. Thla 3 kal ta chhung khan India rama damdawi in tha bera ngaih AIIMS-ah pawh Dr. 5 lai chu mahni intihlum an awm hman niin tarlan a ni.

Natna rãpthlak tak covid-19 hripuiin khawvel pumpui a nuai mēk a. Mizoram India hmar chhak kilkhãwra awm pawh min .ngaihhnathiam chuang lo. Hetih lai mēk hian Mizoramah mi then khatte'n mihring nunna atana hlauhawm tak thihna tūr (poison) chi khat Mendacium ngawl vei (addict) leh mipui zinga theh darh ching an awm tih hriat a ni a; chuvangin, he thihna tūr hlauhawm tak Mendacium hi enge a nih i han bihchiang lawk teh ang.

MENDACIUM CHU ENGE A NIH?
Mendacium hi latin thumal a ni a, Mizotawng chuan thlarau sual to pathian emaw, bumtuliana tihna a ni thei ang. Grik tawng chuan Pseudologos tih a ni. Hman lai Grik thawnthu (mythology) ah chuan Mendacium hi Pseudoloi an tih lei hnuai khawpui chunga roreltu niin an sawi. Mendacium hi awmze hrang 6 laia sawifiah theih a nih laiin a kawh ber chu dàwtthu; thuthang dik lo tihna a ni. A hlauhawm ēm avang hian a hming pawh hi a rãpthlãk thei ang berin an phuah nia ngaih a ni.

A CHAWHPAWLH (COMPOSITION):
Mendacium hi thil chihrang 5 hmanga awmze nei taka chawhpawlh a ni. Hetiangin:

O2, CO2, N2
Vocal folds
Saliva
Lingu/o
Muscle

EI DAN (DOSAGE)
Physician kawh hmuh dan azir zelin.

A HMANNA & SAWHKHÃWK (USES & SIDE EFFECT) Mendacium hi tūr chak tak leh thawk rang si leh thawk na tak a nih avangin a ching dawk lak (addict) tawh laklawhte chuan piantharna dik tak an chang a nih loh chuan dam chhungin an thlah thei tawh lo. A hmanna ber hi inbum nan leh dãwt inhrilh nan a ni. A nghawng tha lote chu;
1. Taksa & thlarau thihna
2. Rinawm lohna thlentu
3. Mi rilru chawh buaina
4. Ram & khawtlang, sorkar, chhungkaw chawh buaina
5. Nupa inthenna & chhungkaw kehdarhna
6. Mi rin kai lohna
7. Zahawm lohna
8. Indona,& innghirnghona thlentu

MIZORAMA HRIAT CHHUAH A NIH DAN
August 12, 2020 chawhnu dar 2:30pm khan CM zahawm tak Pu Zoramthanga hovin Sorkar mi pawimawh, ZKHC, NGO aiawh mi pawimawh tak takte'n Covid-19 laka mipui kan him zawk nan inrãwnkhawmna an nei dawn tih Social media hrang hrangah meeting kohna lehkha PDF theh darh a ni a.

Hemi behchhan hian mi thenkhat Mendacium ngawlveite chuan an rinthuin Lockdown chungchang rel leh tur anga sawiin thudik lo, dawtthu puarpawleng mendacium chu mipui zingah an vawrh darh chiam mai a. Hei vang hian nitin mamawh inlamkhawmin Aizawl khawpuia miuite chu khãukhuap puang thãwm ang maiin an phili a, an ri sung sung ta mai a ni! Mirethei inlamkhawmna nei ve lote chan tur awm lo lekin dãwr bungraw hrang hrang an chuh zo duak duak a; covid-19 hripui leng hre chang lo khawpa phili buaiin social distancing zawm that chu kaha ? a ni ringawt.

Hemi ni vêk hian Kolasib DC Dr. H. Lalthlangliana'n DDK palaite a hrilh atanga a lan danin Mendacium ngawl veiho avang bawk hian Silchar-Cachar lamah lirthei khalhtute an tichiai a, Mizorama lo lut an tlem phah niin a hriat theih. Hetianga rinthu leh zeldin thu bãwl ching, dãwt phuan chhuak lang leh mai tur thehdarha mipui bum chingte hi *Menfacium addict* dik takte chu te an ni a, hetiang thihna tūr chak leh danglam tak Zorama la luta thehdarh chingte hi Pawl, kohhran, Sorkar leh mipuite hian tutenge an nih tih a taka tihtakzeta zawn chhuah hna hi thawh a hun tawh hle. He tūr hi a zūna uai (addict) a awl êm êm a; Sorkar Official leh mi panngai pui pui leh Pastor kohhran upa leh rawngbawltute zingah pawh hetiang ngawl vei hi hmuh tur an awm fo niin sawi a awm thin.

Politician-,ho phei chuan dawhsãn (platform) atangin mendacium hi theh darh an ching a, hei hian mipui rilru sukthlek dan a tidanglam nasa thei hle a, moral curruption thlengin mipui rilru a tikhawlo thei.

A TLÃNGKAWMNA
Covid-19 hripui lēn hnu hian hetiang dãwtthu leng leh thuthangva dik lo mendacium thehdarh hi a tam zual hle a, Sorkarin cyber law hmanga hremna pek tlakte a man chhuak a, a hrem ang hian hetiang ngawl veite hi manchhuah ngei tumin a lo irh chhuah tanna epicentre hi zawng chhuakin hrem ve hmiah hmiah zel se, hetiang thihna tūr hlauhawn tak mendacium addict leh thehdarhtute hi an tawmim ang a, tul lova mipui kan buaina leh phawkleknate hi a reh thei ngei ang.

"Thuthang dik lo chu I sawi chhâwng mai mai tûr a ni lo ve: hretu fel lo tak nihna tûrin mi suaksual zîngah chuan I kut chu telh ve suh."* (Exodus 23:1)
Hretu der chu hrem lohvin a awm lo vang a, Dawt sawi chu a chhuak lo vang. (Thuf. 19:5)  -Dr. C. Lalrampana

Post a comment

Powered by Blogger.