He hla "ZAN A LO THLENG MEK E, MUANG LO VIN BEI RU (KHB-526)" hi Dr. Ramdinthara Sailo phuah bawk a ni.

He hla hi August 15, 1996-a Lungleia a phuah a ni. Miziroran sualna chi hrang hrang- Zu leh Drugs ngawlveina te, O.D-a thi te, Politics thianghlim lo tak maia cheng te, Sumdawnna lama hlepna uchuak tak duh vanga mi bum pawi ti hauh lote, hmeichhiat mipatna kawnga kan inthlahdah nasatzia leh ram sualna hrim hrim hi a vei em em a ni.

Sual vanga ni tin, zan tin thi mekte dinhmun a ngaihtuah a. Sualin a sawisak mekte leh sual bawiha tangte chhanchhuah ngai ngawih ngawihte dinhmun a ngaihtuah a. Heng sualnain Zoram a fan lai hian Lal Isua neitu kan inti bawk si a, Lal Isua zarah kan hneh theih tur vek an ni si a, 'hnehna hi kan puang chhuak tawk lo a ni ang, Lal Isua hmachhuana huaisen taka hnehna puan chhuah hi a tul a ni," tiin, he hla, rawngbawltu chak lo pawh min cho tang at thei hi a phuah ta a ni.

Ka lehkhabu chhiar pakhat chu ' Setan never slept' tih a ni. Setana hi eng tikah mah a inthlahdah ve ngai lo. Kan ram tluchhe mekah hian chhuanlam tur zawng zawng thin mah ila, a bul tak tak chu kohhran hote hi kan tang nepin kan lo inthlahdah deuh thin a ni ang a? Ziaktu pakhatin setanan mi thlemthlu tura a nghah peihzia a sawi a. "Nakum, tun ang hun velah hian inthlahdah dawn ta ila, kumin chhung zawng hi min nghak ngar ngar peih a, kar tawpah inthlahdah dawn ila, tunkar chhung zawng min nghak peih a ni," a ti ringawt mai a ni.
Dr. Ramdinthara Sailo
ZAN A LO THLENG MEK E, MUANG LO VIN BEI RU (KHB-526)

Zawlnei Joela Lehkhabuah khan, "Zionah chuan indona puang ula. In eizawnna (leilehna hmawrzum) te chu Indona atan buatsaih rawh u", a tih kha. Chhuanlam siama kan inthlahdah chhung hian kan invuiliamin natna kan vulh lian nasa lutuk ta. He hla phuahtu min fuih ang hian hnehna puangchhuak chungin hma in la thar leh teh ang u. "Mi felte leh rinawmte tan, hnehna thu tiam sa a ni," hla phuahtu-in a tih kha maw le.

Zan alo thleng mek e, muang lovin bei r'u,
Zam lovin sual ral chu do zel r'u;
Dak la han thlir vel teh, lanu val rual te,
Sualna turin fam a chantir e.

Hnehna puangchhuak rawh u,
Lal Isua hmachhuanin;
Boral mekte chhanchhua

k thuai rawh u,
Kan hneh ngei dawn a ni, sual thiltihtheihna chu;
Kan hneh ang hnehtu Pathian vangin.

Thlir la kan Zoram hi, aw a pawi ngei e,
Kil tinah sual ral a hrang zual e;
Harh a hun tawh em e, Lal sipai rual te,
Hnehna hla nen ram i la ang u.

He khawvel thim zingah, eng atan min tir,
Hlau lovin sual thim i tawn ang u;
Kan Pathian hrin chuan khawvel a ngam zel si,
Rinnain hnehna chu kan chang dawn.

- Marama PC

Post a comment

Powered by Blogger.