Khawvel ram ropui leh thiltithei United States chanchin hian khawvel ngaihven a hlawh a. Uganda ram chanchin aiin kan hre duh vek ang. A chhanchu, United States a ni tlat a, bakah, Pu Hawla tawngkam takin, Pathian Nung betu an nihna hian, a bik takin kan Zoram hi min hîp riau bawk niin a lang. Chuvangin, United States sûkthlek hi kan thlir loh theih lova, chhiartute pawhin Donald Trump ta viau ang ten min ngai lek lek a. Trump leh Biden ai mahin, Christian ram ropui an nihna hi a ni zawk mah awm e. 
Trump church donation
Tun tum chu Donald Trumpa chungchang, social media-a sawi hlawh tak kan han tarlang ang e. 

Biak-Ina Trumpa inkháwm thu kan ziak tawh a. Trumpa inkháwm boruak kha rin loh lam daihin a thang chhuak leh ta hluai mai a. Amah Trumpa tantute tan chuan han dem chiam na tur a awm lo mai thei a. Mahse, sawiselna tur zawng tute erawhin an duh chu an hmu chiang mai! 

Donald Trumpa hi Kristian rum rût, chu tiang taka pa invawng leh fel thlip thlep ni loh mahse, a rinna chu huai taka tan bur chi ang kha niin kan hre thin a. Kan ralkhat rin dan chuan, thawhlawm thawh vel pawh huai sakei viau turah kan ngai ang. A chhan chu, kan ram Kristian hian thawhlawm pe tam te hi kan ngaisang tlat a. An sum lakluh dan erawh kan ngaipawimawh lem lo. Contractor pakhat chuan PMGSY hnuai a mi contract lain, kawng chhe deuhin a siam a, a lawina kohhranah sáwma pakhat dik takin a pe a. Kawng a siam chhe thiam bawk a, sum pawh a hlép tam ang reng phian a, a sawma pakhat pawh a tam naraw e! Kohhran ten kan lawm viau laiin Chung lam hian engtin nge a ngaih ve dawn le? 
Kan sawi duah nachhan chu, tun tuma Donald Trumpa chanchin nen hian a inzûl viau a. News mah ni se, kan lo inen fiah nan. 

Presidential Debate final khél hmain, a campaign-na hmun Las Vegas, International Church ah Donald Trump chu  October ni 18 khan a inkháwm a. Kohhran miten an lawm thu leh, an Senior Pastor Denise Goulet in, President Donald Trump, a tum hnih nan a tlin leh tur thu, chunglam hriattirna a dawng niin a sawi a. Donald Trump pawh a nui khi vur vur mai a ni. 

He inkháwm naah Donald Trump an thawhlawm a thlák lai tak chu thla an lo la hman leh pek a. Sawi a kai leh ta hat mai. Donald Trump hi zawng, a kalna apiangah chanchin a neih zel thei a, a ropui ve hrim hrim. 

Mizo te hi Social Media vela mi chanchin kan hriat, a dik leh dik lo pawh fiah hmasa zet lova fak hluai chîng, reilo tea dem leh chiam thin kha kan ni ve a. Democrats ho hi keini Mizote ang tho hian fak hluai, indem chiam, tih ang vel hi an uar ve hle. 

US President Donald Trumpa hi a inkháwm tam vak lova. Keini rama inkháwm tehfunga hmang thin tute chuan, zu zuar ang tlukin kan hmu mai thei a ni. A inkháwm tam lo, mahse Kristian rinna nena inhmeh loh thil chu a haw hle si a ni. Tun tum inthlan bikah, Nau tihtlak chungchanga a ngaihdan avangin Evangelical Christian ho chuan an tan bur a. Catholic kohhran lam páwl hruaitu Amy Coney Barrett, Supreme Court judge atan a han ruat leh a, Catholic voter ho chuan an duh leh ta ém em mai a ni. 

Hemi tuma Trumpa inkháwm hi White House staff Hope Hicks leh Kayleigh McEnany ten an zui a. Donald Trump chuan thawhlawm báwmah US dollar 20 a thlák a. Hei hi sawisel tute chuan Change for Change Inthlák danglam nan pawisa nawi tiin an fiam zui nghal a ni. Donald Trumpa thawhlawm hi India pawisa chuan 1460 vel a ni a. Sunday collection pangngai atan chuan a tlawm em em lo. Mahse, Biak-In pawnlama mi te hian thahnem an lo ngai lutuk a ni mai thei. 

Mahse, Trumpa pawh hi a uikawm ve deuh nge ni, a pawisa note ah ho chu a chhiar niap niap a, chéng 20 note a thlang ta mai a. Ram khat lal ber thawhlawm atan chuan a tlem lulai deuh chu a ni. 
Las Vegas International Church hi Kohhran bing awm lova a duh duh inkháwmna a ni a. City Pastor Paul chuan, Biak Inah i lo kal hrim hrim avang hian kan lawm che tiin inlawmna thu a sawi. 

He biak ina i vawi 3 inkháwmna a ni tawh a, nang pawh member ni tawh mai. Miten engtin nge an tih, ti lam ka engto love, tiin Pastor chuan Trump a lawmluh bawk.

Twitter lamah Trump thawhlawm thlák dan hi tweet a tam hle mai a. A langsar deuh tlem kan han tarlang ang e:
He pawisa hi campaign sum hmanna angin a sawi ang
Dollar 20 nge Dollar 40, harsa a va ti ve
Billionaire in thawhlawm báwmah $20 a thlák, pawisa nawi a la dil zui em ni?
Pawisa chhiar kha a pawimawh, a tax pek turah a chhiar tel dawn si a

ti teh, faksélna a tam mai a. Nuihzatthlak tak tak pawh a awm nual mai. Kan Chief Minister hian chéng 1000 thlák ve ta se, sawi tur kan nei ve ang em? Ram ropui US President meuhin dollar 20 a thlák hi a áwm táwkin i hria em, nge uikawm i ti? 

Tûn tum Donald Trumpa inkhawm hi a che fu loh deuh niin a lang. A iptea pawisa te kha phawrh kher lovin, dollar 20 kha lachhuakin pe mai se zawng, sawisel a tuar lo mai thei a ni. Pawisa note tel phawrh chhuak a, a tlem ber thawhlawm báwma han thlák kha chu a mawi loh deuh em aw.... Ka ti ve deuh.

Donald Trump an Covid19 a vei chungchang kha mithiam Dr. Anthony Fauci chuan thilmak takin a ngai ve lo. President hian mi tam tak a káwm a. A tam zawk chu Mask pawh vuah mang lo te an ni hlawm a. Covid19 a kai ta khan min thawng hlawl lo, a ti. 

Face Mask vuah chungchanga Donald Trump ngaihdan khan sawisel a lo tawk nasa mai a. Covid19 an kai ve takah chuan, kai áwm réng a ni, ti an tam hle. 

Ni 3 niin a tho leh ta tih ang deuin, ni 3 hnuah a chhuak leh ta kha a nia, tunah chuan Presidential Debate Final Match khél turin a inbuatsaih mek a ni.
~TimesofMizoram

Post a comment

Powered by Blogger.