RORELNA NI ROPUI – January 6, 2021 Lo Thleng Tur Hi!

X’mas: Heroda Policy

RORELNA NI ROPUI – January 6, 2021 Lo Thleng Tur Hi!

~Dr. P.C. Biaksiama,

22 Dec 20, Thawhlehni.

Lei chungah remna ni lo, inremlohna chi tuh pawizia hi tun ṭum US inthlanna tluka tichiangtu dang a awm thei lo vang. Hnehtu nih duh si; mahse thianghlim taka inthlan a nih chuan tling zo dawna an in hriat si loh avangin Democrat-ho chuan Heroda angin ‘lal thar lo piang tur tihhlum dan tur zawngin, inthlana zawnga corrupt ber leh chì-rî ber, hmanraw thianghlim lo leh inbumna nasa ber an thlen ta mai a. Tichuan, Nov. 3 a an inthlan atanga ni 49 a liam hnuah pawh hian official taka President tur zawk (president-elect) a la chiang thei ta chuang lo a nih hi. Main-stream Media (MSM) tinrengin Biden-a hi president ni thlap turin, nemngheh tawh angin lo sawi vek tawh mahse a la ni chuang lo. MSM te game khelhna zel a la ni. 

Inthlan kha ‘rûk-rûk’ thiltih a nih avangin Dec. 14 a elector inthlan tih pawh kha party pakhat Democrat-ten an vote hmuh sa 227 atangin state buai 6 atanga elector vote awm zat 79 kha an chan vek tura ngaiin an belh ve tawp a; tichuan vote 306 hmu angin a lang apauvin rukrûkna a thleng nawn leh a ni; party pakhat zawk Republican elector-ten an vote neih sa 232 atanga 79 an belh ve khan vote 311 hmu thei an ni ve leh tho si a: a insu buai ta. State 6 zinga 5-a sorkarna la, senate leh House a majority nei ve ve chu Republican an ni zawk lehnghal a. Eptu party aṭangin dan bawhchhiatna vawi 2-na a thleng leh ta a ni. Chuvangin kha Dec. 14 elector inthlan kha awmze nei lovin a liam a; media-te game khelhna thang kam a la per ṭhelh zel; an zak chuang lo. Chuvangin January 6, 2021 khi America President thlanna final-na tur – Rorelna Ni Ropui ni turin i thlir leh phawt ang u. Hetah erawh hi chuan game khelhna chance a awm vak lo – Constitution dan ang taka kalpui tur a ni tawh – mitin hmuh theih turin chhûn êngah, Congress (parliament) Hall chhungah a ni tawh dawn.

Chu Congress – Senate leh House Joint meeting-ah chuan Vice President Mike Pence-a chu thuneitu ber dinhmuna dingin meeting a kaihruai ang a. State buai ve lote atangin hnehtu zawk an puang ang a, hnialtu awm lovin pawm a ni ang. Mahse state buai 6 atangin Democrat leh Republican ten an party aiawh elector neih zat an report ve ve ang a; an in pawm sak lo ve ve ang. Tichuan, vote buai, chhiar theih loh, chak zawk awm thei lo an ni ang. A ‘bam’ dawn ta a ni. Chuvangin President thlang turin state tin aiawh pakhat zelin an thlang tawh mai dawn a ni a; state nei tam zawk zawkin vote an neih tam zawk dawn avangin an duh zawk president chu an thlang ang. Kan sawi fo tawh angin Democrat aiin Republican ten state-a sorkarna an neih tam daih zawk avangin an thlan tur chu Donald Trumpa a ni ang. Bidena tan president nih theihna chance a awm lo; US Constitution-in tun dinhmunah Bidena tan kawng a hawng lo hrim hrim. Senate-in Vice President tur an thlang ve bawk ang; Senate member za awmnaah hian Republican-in sorkarna an lak avangin Mike Pence-a an thlang dawn a ni. Chu chu January 6, 2021 a lo thleng tur kan sawi lawk theih chin a ni. Hetiang ni lova, a hma ang bawka Democrat hovin buaina an chawk chhuak leha, president tur zawk a chian theih bawk si loh chuan, President Trump-a tan Martial law puan mai loh chu tih tur dang a awm tawh lo hial awm e. Chu martial law hnuaia inthlanna free and fair taka America mipuiten an thlan tlin zawk tur chu, tu pawh zawt ila, an sawi thei nghal ang, tih tlukin Trump-a hian inthlan hma aiin mipui a ngah tawh zawk a ni. Public hmaa thu an sawi pawhin Bidenan ngaithlatu mipui a la khawm thei chuang lo. Trumpa erawh chuan hmanni lawka Georgia state a Rally a neihah khan mipui an la tleh dul dul tho a ni. Mahse Trump-a paltlang mek boruak chhe zualpui hi i han hrût kual deuh teh ang.

CORRUPTION BUPUI ATANGA PHATSANNA RUNPUI

Nov 3 inthlan kha US inthlan tawh zinga inbumna nasa ber, inthamna sum lêng vak tam ber leh mahni party leh hotu phatsanna rûnpui turu ber, court case tam ber ṭum – ramdang mite pawhin “America hi heti khawp hian an lo tenawm thei a ni maw?” tia khawvel miten an ngaih hniam phahna thlentu a ni. A indawtin hruaitute rilru tlûk chhiat tawh dan leh America mite ‘moral break down’ nasat tawhzia i han thlir teh ang.

1. A hmasa berin, America mipui zahve, Democrat party lama awm te khu sakhaw ngaihsak lo lam, a zalen thei ang bera sex hmang duh mi, nau tihtlak pawisa lo, dan bawhchhiat pawh pawisa lo leh hurherh, mawngkawhur khawvel thiangzau din duhtute an ni. Chu khawvel thar din tur chuan Joe Biden-a, mawngkawhur pastor tia sawi theih tur khawpa gay inneih tirtu, a cabinet member pawimawh zingah pawh mawngkawhur ngat ruat duhtu chu an candidate ta a. Biden-a tling dawna an hriat tirha an Opening Ceremony kha MAWNG HLÎM a nih kha. New York khawpuia Trump Tower building kha a rualin an mawng an hlim khum suau suau mai a nih kha. Bidena ṭantuten Bidena sorkar awm dan tur hi rawn sawi mawi ve tal rawh se. A ngaihnawm dawn em mai.

2.  Republican-ho, Grand Old Party (GOP) te erawh chu Pathian thu lungphuma vuantu America dintute thuthlunga kal duh, sakhaw ngaihsak (Conservative) mi, nau tihtlak duh ve lo an ni. Mahse he inthlanah meuh chuan thiangzau hovin GOP lamah ram an lâk nasat zia, a bikin an hotu lawkte suma tham lungawi theih an lo tamzia leh an thurin an kalsan nasat zia tawitein lo thlir ila:

(a)  Official-ho corrupt zia. State buaia Election duty officerte leh official dangte kha corruption sum hmanga tham lungawi theih vek an lo ni a. An officer lian, Republican mi leh sa te ngei, Georgia Governor leh an secretary of state te phei chu thamna an ei hnem avangin anmahni party tlûk chhiatna tur an la dap char char mai a ni.

(b)  Milian-ho Corrupt zia. Trumpa duhsakna dawng sorkar milian, Cybersecurity Director, Christopher Krebs-a te, Defence Secretary Mark Esper-a te leh Attorney General, William Barr-a te chuan thamna sum petu Democrat lamah an pu Trump-a chu an uirêsan ta hlawm. Inthlan dawna Democrat mi hausa rualin sum an thawhkhawmte leh Facebook neitu pa Mark Zuckerbergan dollar maktaduai 500 zet a thawhte chu Trumpa vuak thlakna turin dinhmun pawimawh chelh deuh chin chu an tham lungawi zung zung mai a ni. 

(c)  Rorelna Court rintlak an awm lo. Thil sualtitute chu court-a roreltu judge te chuan an lamṭangte emaw, anmahni fa hial te pawh an hrem thin a ni ngai a. HmAmaherawhchu, heng state buai 6 a court zawng zawnga roreltute khan inthlan tihchingpen a nih dan mit ngeia hmutute thu leh hla an theh luhte kha an lo en ṭha duh reng reng lo mai a. Trump-a ukilte chuan, Court hniam lam chu engpawh ni se, an chungah Court sang ber Supreme Court-ah tal chuan ngaihsak kan hlawh deuh ang, dan bawhchhetute hi dan angin i khing hram hram teh ang, tiin a fee tur thawhlawmte an in khawn a ni a. Mahse supreme court pawh chuan rin an lo ang ta hauh lo mai a; an hotupa ber, chief justice John Robert-a chu GOP president Bush-a ngeiin a lo thun luh ni mahse, Dem-hovin an lo hmin tawh, Trump-a hawtu a lo ni leh ta zel a. Vote tihchingpenna a awm ngei tih finfiahna hnial rual loh a za tela an theh luhte chu an lo ngaihsak ṭha duh lo hle mai. Trump-a pawhin, “Supreme Court hian bei in va tidawng ve. Dan bawhchhetute thil sual tih pawh in pawisa lo vang maw?” tiin a khak nghe nghe. Harsa chung chungin court hmaah chuan dan bawhchhiatna thil thleng tam takte chu finfiahna za têl teh meuh nen Trump-a team-te chuan an la bei chhunzawm zel. “Kan tlawm (concede) dawn lo, kan bei zel dawn,” an ti a ni. 

(d)  Adviser-te pawhin an phatsan. Mak tak maiin, Trump-a adviser-te ngei pawhin an pu chu tlâwm mai turin thurawn an lo pe thin tih CEO Patrick Byrne-a ngei pawhin a sawi tlat mai! White House Chief of Staff Mark Meadows-a leh General Counsel Pat Cipollone-a, kawng engkima Trumpa thurawn ṭha pe tur leh harsatna karah pawh thlamuantu ber tura ngaihten an pu chu dâwih âw chhuah turin thurawn an lo pe thin tih Trump-a adviser pakhat,  Patrick Byrne-a sawi han hriat chuan, rilru a tina hial a ni. Chuvangin chhung lam leh pawn lamah, hmelmate atang leh duhsaktute atangin Pu Trumpuia hian a duh anga che thei lova a kut phuartu hi a lo khawi fer fur mai ni tur a ni. Byrne-a sawi danin, *Trump-a chan hi a chhe lo, tlawm tur pawh a ni lo. Hnehna chan theihna chance za-ah za (100%) a nei. Martial law puan rum rum pawh a la ngai hran lo. Mahse a rilru tihnual tur zawnga ama khawnbâwlte lehzelin ‘tlâwm mai rawh’ an lo ti fo mai leh, chhungril lamah lehzel phatsantu an awm hian ka rilru a ti-na takzet a ni,” a ti hial mai. (Reported by Ivan Penchaukov, in The Epocch Times, Dec. 20, 2020) 

Hei vang ngei hi a lo ni ang, Trump-a tana thih thâ meuhva beitu Lt. Gen. Michael Flynn-a te, attorney Sidney Powell-i ten, “Hetiang buai mangan hunah tawh chuan Martial Law hi puang tawh mai rawh ka pu,” an tih pawha, lehlamah che thei lova Trump-a kut lo phuar tlattu, a inchhung ril ber luahtute an lo awm tlat mai si a. Heng atang hian Donald Trump-a tana ṭawngtaisak dan kawng zir chhuah tur a lang chhuak ta a ni awm e. “Che thei lova Trump-a kut chelh tlattu hi Lalpa, nang i nih lohva, thil dang a nih chuan, chu phuarna chu phelhsak ang che,” tih hi ka ṭawngtaina a ni.  

(e) Tuna ka sawi leh tur phei chu ka sawi hreh ngawt mai. America leh khawvel puma Evangelical Christiante rilru a tina thei hial ang. 2016 a Trump-a lo vote tu chu evangelist ropui Billy Grahama a ni a; a fapa Franklin Graham-a, Trump-a tana campaign ve hialtu khan hman ni, inthlan zawh hnu lawk khan CNN-in interview a neih ṭumin Biden-a hi ‘president elect’ tiin a lo sawi chhuak ve zu nia! A sawi zelnaah, “Trump-a hi ka ṭan viau pawh a ni chuang lo, a tling tling chu kan pawm mai tur a ni,” tiin tlanchhe âw a la chhuah (compromised) tak deuh deuh va. Franklin-a hi thamna pawisa ei ve turin kan ringhlel lo; mahse a rinna fiahna chu a ‘fail’ chiang hle a, a inti thangtlâwm hle mai. Rawngbawltu dangte rilru a tina, a rawngbawl zelnaah pawh rinna nghet nei mi a nih lohna lai chu mi thinlunga thusawitu tur a ni reng tawh dawn a ni.

Tlangkawmna. Heti khawp hian Donald Trump-a hian kawng tinrenga dotu leh tihchhiat tumtu, hmelma chak tak takten beihrawn vak vak mahse an hlawhtling thei chuang lo. Trumpa lakah Bidena hian hnehna chan reng a nei lo. Bidena pawlten inbumna hmanga vote an tihchingpenna te kha Trumpa legal teamte hian a hmatiamin an rêk chhuak nghauh nghauh mai zawk a ni, tlinga puan theih an nih loh avangin tihbuai bak theihna an nei lo va, Trumpa sawi chhiar nghek nghek bak tih theih an nei hek lo. Heng fake news te hi America mipuite khuan an hai tawh lo. Bidena pawh mainstream news te thu leh hlaa lo inhampuar vel mai mai mai a la ni. Officiala president dik tak puan hun chu kum thar hunah a ni e.

Lehlamah chuan Trumpa hi ama mite ngei leh amah pawhin duhsak taka dinhmun sang tak taka a dahte ngei pawhin phatsanin, a chhiatna turin phiar ru chiam thin mahse, anmahni zawk a mualphovah an ṭang a, hnawmhnawk anga thenfai ngai ang leh, buichhia laih lova inpuang ang lek an ni. Hnawmhnawk thenfai tur hi eng zat lek nge la awm tih erawh chu hriat a ni lo. Nitin hian thuthar hriat belh tur a la awm zel. Harsatna namen lovin a tlak buak a, chinfel theih lohva beituten an beih bur bur lai hian, a tana mi rinawm lo leh thawhpui tlâk lo te chu hunin a rawn hailang chho zel a; mi tam takin an phatsan mek lai hian, mi ṭha leh rinawm, mi ṭangkai tak tak an lo lang chhuak zel thung a. A boruak tawn a hautak vei nen, Trumpuia hian rahbi rah sual sawi tur meuh hi a nei tlat lo. A pên sual ta emaw kan tih pawh hi han hriat chian chuan a lo dik leh thlup ṭhin a. Heng thilte aṭang hian Thlarau Thianghlim hian finna a lo pek thukzia hi a chiang leh ṭhin a ni. 

Heti khawpa beitu hmelma ngah si, a nunna atan pawh a hlauh thawnawm ang, tia kan ngaihtuah viau pawhin, vantirhkoh chak tak tak pathum (Three Powerful Angels) ten an veng tlat a ni tih han hriat chhuah leh hian min tithlamuang thin. Engtik hunah nge Pathianin ropui taka a chhan chhuah dawn? tih hre lo mah ila, a hretu Lalpa hnenah nitin zantin kan thlen mawlh mawlh alawm. Min chhâng em em ang. Lei lam dana a hun leh ni, hmuh leh hriat theiha Rorelna Ni Ropui kan nghah erawh chu kumthar, January 6, 2021 hi a ni e. Hemi hunah hi chuan tuna ri rêt rêt kan hriat hian harsatna tinreng paltlangin, ringtute ṭawngṭaina avang leh Pathian khawngaihna avang ngei hian Lalpa mi ruat chu tuma chuh buai lohvin a rawn inlâr chhuak dawn e. Lalpan ropuina chang rawh se.