Suakliana hla HOSANA TI ZELIN AW, HALLELUIAH! AMEN

Suakliana hla

HOSANA TI ZELIN AW, HALLELUIAH! AMEN

Hla lo pian dan ngaihnawm 

       He Krismas hla sak nuam tak leh sak hlawh tak hi Suakliana, mitdel phuah a ni a, Zoram chhung leh pawnah Zofate awm tawhnaah chuan hre lo kan awm âwm lo ve. He hla lo pian dan leh phuah dan ngaihnawm tak hi i han sawi teh ang.

       Hla phuah hun lai : He hla hi Kanghmun khuaah kum 1930, buhseng laia a phuah a ni. Ni khat chu buh seng tur an ngah em avangin hna thawk mumal ve thei ta lo chu in lamah a naute leh a fate a awm khawm a. A fa naupang ber hnute hne lai, bawkvak thei tir tê a pua a, a u te chu an leng bo vek a. An in kawmchar kawngka hawngin thlasik nilum a ai a, rei tak a lo muhil a. A han harh chuan a thaw a sa em em a. Amah pawhin lum a tihle a, a hnunga a nau puak phei chuan sa a ti hle a, a kaih hial a ring a, tap kawm, bang chhak hrulah a mut a, thoin an bawm loh nan a puakpuanin a hmai a khuha. Ani chu khumpui lam dawhthleng hmawrah pathlang lam hawiin a thu a. 

      A kein naute a rap palh : Chutia dawhthlenga a țhu chuan naute a mutna zawn bang chhak, sang deuh taka lehkha târ, lak chakawm zel mai a hmu a, dawhthleng ațang chuan inngaihtuah fim hmasa lovin lehkha lak tum chuan a zuang vak a, a tla lam chuan a naute mut chu a ke dinglamin a rap ta chiam mai a. Naute chu a han khawih a, a nem nuak a, a lum purh mai niin a hria a. A hlauthawng lutuk chu chhuatah tlu tawpin a thin a phu zawih zawih mai a, a kaih ta hial a. Mahse, chutih lai chuan a rilru a harh kiau thung a. 

       A kaih a reh, naute a che lo : Pathian hnenah tawitein a țawngțai a, chuveleh chuan a kaih chu zawi zawia rehin sual nih inhriatna nasa tak a nei a. Men pawh meng ngam lo, chet pawh che ngam lo chuan a awm a. A nau rah lah chu a ngawi hmiah mai si a. Ani chuan a rap pherhin a lute a keh anga, a rilte chhuak hialin a thi ta a nih a ring ta hial a.

       Tualthah vanga hremhmun kal a hlau : Pathianin tualthatah a ngai ngei ang tih a ring a. Rei loteah vantirhkohte lo kalin hremhmunah a nung chungin  an paih mai ang tih a hlau em em mai a. Chutih lai chuan a khawng ta tlat a, a meng chhuak thei ta hek lo. Pathian hnena a țawngțai dawn chuan, "Lalpa" a ti hman chauh anga hremhmunah an pai daih mai ang tih a hlau si  Pathian ngaihdamna leh chhandamna a chan leh theihna tura dilsaktu tur a ngai ta en em mai a. Hmana Sadhu Sundar Singh-a'n suanhmang rura tak hnena Pathian thu a hrilha a lo pianthar a, Sadu Sundar Singh-a rawngbawlna rei tak a țawiawm tak te a hre chhuak a. Chu suamhmangpa chu lo kalin a lungngaihna leh a mangannaah rawn thlamuana Pathian ngaihdamna leh thlamuanna chang leh turin a lu chungah kut nghata tawngțai turin a duh em em a. Chhim leh hmara rawngbawla a chhuah ve tawhnate chu tihpalh liau liaua a nau rah hlum vanga engmah lo ni mai dawna ngaiin a inkhawngaih hle mai a, a mittui te a far zawih zawi mai a. 

       Sual ngaihdam dilin a țawngțai : A sualna lak ata chu van mipui leh Kohhran zawng zawngin chhandam pha dawn lo mahse Kalvari tlanga sual tinreng phurtu Isua hnenah a manganna zawng a thlen chuan a tlantu chuan a ngaidam zo ve em em ang tih a rilruah lo awmin, a rilru zawng zawngin Pathian hnenah ngaihdamna dilin a țawngțai ta a. A țawngțai tawp a, "Lal Isua hmingin ka dil e, Amen" a tih veleh chuan a thinlungah Pathian thlamuanna a lo thleng ta a. Pathianin a hmangaihna pangngaiin a la hmangaih a ni tih hriain a thla a muang ta em em a, lawm tak chuan a țhu chhuak ta hlawl mai a. 

       Ring la, dil mai rawh : Mahse naute awmna lam chu a la en ngam lo va, naute chu a rah palh ațang chuan a la reh vang vang mai. A khuhna a han hawn chuan a lu te a lo keh ang a, a rilte a lo tla nuaih ang a, a kaah te thi khar a lo chhuak nuaiin a lo thi fel der ang tih a hlau a. A hmaa a awm dan ngaia awm leh tur chaun țawngțai dam a harsa fu tawh ang tih a ring  Chutih lai chuan a thunlungah thu hrilhtu a lo awm a. "Pathian chu nangmah anga thil ti thei lovah ngai suh  nang ngei pawh lungngaihna namen lovin a tuam lai che pawhin thlamuanna ka pek che hi! I fanu i rah pawh hi i mut tirh ang taka awm leh tur leh a puanah pawh thi kai lo tur te, 'a dam chiang tak tam em aw?' tihna tur pawh awm lo va dam fel vâk turin rinna rak tak neiin Pathian dil la, Pathian chuan a tidam leh duhin; a tidam leh thei a ni. In rin duh țhin loh avangin Pathian chakna leh thiltihtheihna in chhawr thei lo thin alawm. Tunah ring la dil mai rawh," a ti a. Tichuan, Suakliana chuan a fanu lu chungah a kut nghatin a rilru zawng zawngin Pathian hnenah a țawngțai ta a. A țawnfțai lai chuan a thinlungah Thlarau Thianghlim chuan a dam tawh thu a hrilh a. 

       Rinhlelhna sual aw ring tak : A țawngțai zawhah chuan lawm takin a fa chu a malchungah a han pawm a, mahse a lo thaw hauh lo mai a. A mar a han dek a, a phu miah lo mai a. A lehlam a han deh leh pawhin a awm hauh lo mai bawk a. A thawk leh thawk loh hriat tumin a han chawikang a, chutih lai tak chuan a thinlungah rinhlelhna sual lo chhuakin Setana aw ring tak chu a hre leh ta a.Chu aw chuan "I fanu hi i rap per lo reng a ni, mahse i hlauh luat avanga i phûtna lamah i phu hlum țhelh zawk a ni. Zawi zawia thi tawk velin i rap a, a kawchhungah thi a tla a, a thi nghal țep a ni," a rawn ti a.

       Lalpa min pui rawh : A fanu chu a thih mai zawngin thil zawng zawng a pawi dawn tih a hre si a. Țawng pawh țawng chhuak thei lo chuan a rilru zawng zawngin Pathian a ko va. Chutia a fanu thih leh dam hriat theih loh chhung chu  hun rei lote ni mah ni se, Suakliana chuan ni sawm tluk zeta rei niin a hria a. A mangang lutuk chuan a rilru zawng zawnga țawngțaiin "Lalpa, min pui rawh," tiin Pathian a ko chiam a mai a. Tichuan a fanu chu a lo che chhuak ta a. A țawngțai zawha a han en chuan a lo meng a, a lo nui ta sen sen mai a. A mal chungah a han dintir a, engmah a na tawh lo vang tih hriat fahranin hlim tak maiin a nui ta iarh iarh mai a ni. 

       Lawmna hla ... Halleluia! Amen : Chuveleh chuan Suakliana thinlungah lawmna nasa tak, a fa a dam leh avanga lawmna leh Pathianin a la hmangaih reng a ni tih hriaa a lawmna nen chuan a lo khat liam a. Mitthi kaih thawh nung leh ta ang mai niin a inhria a. Sual zawng zawng chung lamah Pathianin a hruai chhuak ta nia inhriain, lawmna sawi hleih theih loh leh thlamuannain a lo khat a. Chutih lai chuan Pathian Thlarauvin a thinlungah hla thar, a thluk chawpin a pe a, "Hosana ti zelin aw, Halleluia! Amen" tia bul țanin a thunawnah phei chuan "...Tupawhin chu nunna eng, lo lawma ring chuanin, Lungchhiat țah leh buaina an tuar tawh lo vang," a tichhuak ta hial a ni. He hla hi a sa a, a lam a lam ta hial mai a. Kum 1930 -a vanram a hmuha a lawmna nen  chuan inang hialin a hria a ni. 

       Ka awih lo tawp mai : Tlai lama a nupui, buhsenga feh a lo haw chuan thil awmdan chu a hrilh a. A nupui chuan dam taka naute chu a hmuh avangin chu thil thleng chu awih pawh awi pha lovin naute mawngah a beng thak thak a, "Ka awih lo tawp mai, hei a sil pawh a sil miah hlei nem," a tihsan vel mai mai a. Chutianga Pathianin a hmangaihna ropui tak a chunga a lantir zel avangin a lawmna chu a lo zual ta zel a ni. /- bchhangte klsb vthr 

                

Source : Suakliana leh a Hlate by VLC Vanlalhriatrenga