Mipui sum Eirukna ni lovin Eilanna langsar tak

SEDP Board Vice Chairman-te

Nimina Mizoram Assembly inkhawma Pu Lalrindika Ralte, Congress zawhna Chief Minister Pu Zoramthanga’n a chhannaah Mizoram sawrkarin SEDP hnuaia Board hrang 14 (Viz. 1.Bamboo Link Road Board 2.Bamboo Development Board 3.Agriculture Development Board 4.Rubber & Allied Crops Development Board 5.Horticulture Development Board 6.Veterinary & Fishery Board 7.Social Rehabilitation Board 8.Health & Family Welfare Board 9.Road & Infrastructure Development Board 10. Land Revenue & Survey Board 11.Manpower DevelopmentBoard 12.Culture & Tourism Development Board 13.Industrial Development Board 14.Human Resource Development Board) a dina Vice Chairman-te chu Minister of State Rank pek an ni tih a ni a. Vice Chairman-in hamthatna an dawn zawhna chhannaah “Mizoram Salaries, Allowances and Pension of the Member of the Legislative Assembly Act-in a duan sa bak hamthatna an dawng lo” tih a ni bawk a. Vice Chairman chu MLA an nih loh chuan: 

i) Honorarium Rs.40,000 per month,  

ii) Sitting allowance Rs.1,000 per day during the sitting of the Board, 

iii) Office land line telephone bakah telephone/mobile phone allowance Rs.1,000 per month, 

iv) T.A.Class I officer dawn ang an dawng tih a ni a. 

Sawrkar lirthei kawltir an ni lo va, amaherawhchu Board tinin pool vehicle pahnih theuh an kawl thei tih a ni. Board Vice Chairman chu MLA ni lo 4 an awm a ni. 

A chunga dan sawiah hian eng emaw zat hamthatna a awm bawkin a lang a. Chumi awmzia chu Minister of State dawn ang chu Board 14-a Vice Chairman-te chuan an dawng vek tihna a ni ang. Board 14 bakah sawrkar undertaking-a Chairman/Vice Chairman an la awm leh a ni. An chenna bungalow/private residence kum 2 dana chei emaw te pawh a tel ang tih a rinawm.

 

India Constitution siamthat 91-naah central sawrkarah a ni emaw, state sawrkarah a ni emaw, Prime Minister leh Chief Minister-ten Minister tam pui pui an neih chu chintawk (limit) siamsak a ni a. PM/CM telin house  member zat atanga 15% aia tam a ni tur a ni lo tih a ni. Amaherawhchu state tenau, Assembly member nei tlem, Goa, Sikkim leh Mizoram,etc. te chu ngaihnathiam an ni a. 15% ang chuan Mizorama Minister awm thei zat chu 6 emaw a ni a. Mahse, ngaihnathiamna avangin Mizoramah CM tiamin Minister 12 an awm a ni. 

 

Hetianga minister zat biktuk a nihna chhan awm thei chu

i) senso a hautak lutuk, 

ii) sawrkar tihnghelnghehna atana minister ruat a nih loh nan a ni ngei ang tih a rin theih. 

 

Chutiang a nih laia Minister ang thoa enkawlna dawng tunah Board Vice Chairman emaw sawrkar hmasa hunah Parliamentary Secretary emaw Minister zat deuh tho ruat chuan a bikin sawrkar/mipui sum senso chu a titlem chuang lo a ni. Hei hi thil thiang lo niin a lang a,  sawrkar hmasaah pawh khan Parliamentary Secretary-te chu kum 2017 or 2018-ah an bang ta sang sang a nih kha. 

 

India Constitution 91st Amendment-a minister zat 15%  ni tur  ngaihnathiamnaa Minister 12 neih tawh baka Minister rank pea Board Vice Chairman 14 emaw, Parliamentary Secretary emaw Minister zat vel neih chu sawrkar/mipui sum eirukna ni lovin eilanna langsar tak niin a ngaih theih a ni.

 

Board Vice Chairman 14 zinga 10 chu MLA an ni a. MNF MLA zingah MLA fang(hau) ti mai ila, chu an awm lo a ni. Heng thil han sawi chhuah fo hi mimal initsikna te pawh a ang thei mai thei a. Mahse, a ni hauh lo a. Sawi lan tum zawk chu Constitution 91st Amendment-in a tum nia lang sawrkar senso tihtlem tumna  chu a that nia a lan vang a ni. India ram hmun tam berah pawh an zawm thei a nih chuan Mizoram Kristian state tia chhung taka inchhal thin chuan theih ve awm tak a ni. 

D.R.Zirliana

MIZO AW Editorial 

Dt. 27.2.2021