BAIRABI PROJECT CHANCHIN TAWI

-Lalhmingthanga  Ex Deputy Chief Minister

Bairabi Project

1978 atanga P.C Party a lo sawrkar khan Mizoramin mahnia intodelhna kawng hrang hranga a neih theihna tur leh kan tu leh kan fate lehkhathiam lo pung chho zel leh lehkhathiam lote tan pawh mahni intodelha hnathawh tur tlachham hauh lova (employment generation) an khawsak theih nan chuan , a bul tumtu atan Tlawng lui hi Bairabi khuaah  khuah a tulin a hria. Chumi ti tur chuan nasa takin hma a la ta a. 1979 December thla atang khan mithiam rual chi hrang hrang a ruai a, chung mithiam rualte chuan ruahmanna chipchiar (detail investigation) hna harsa takte chu a hmunah awmchilhin kum 4 (1980-1984) chhung khan an thawk zo hman a.

Heta tuikhuah tur hian, thil pathum tangkai tak a tichhuak nghal dawn a.1) Electric 164 Megawatt, 2) Luidung lawng kawng thar, Bairabi rail station nena inzawm -Bairabi -Sairang, Thenzawl -Buarpui thleng Lawnga kal theihna leh 3) Sangha khawina tur dil tha, dil zau tak, Sangha saa Zoram kan intodelh theihna khawp  khawi theihna a siam dawn a ni. Chutiang chu a nih avangin BAIRABI MULTIPURPOSE PROJECT tih a ni nghe nghe a.

A khuah man tur hi an chhut chhuah danin Compensation pek turte huam tel vekin cheng Vaibelchhe 250 a ni a, khuah puitlin hun chhung tura an hun ruat chu kum 6 chhung, 1984-1990 April thla thleng a ni. Hemi ruahmanna chipchiar hi tahrik ni 3 April, 1984 khan mithiam rual N.H.P.C (National Hydro Electric Power Corporation) te chuan  he lama India ram  thuneitu sang ber C.E.A (Central Electricity Authority) hnenah an theh lut a ni.

CONGRESS SAWRKARIN CHHUNZAWM TUMNA A NEI EM?


1984 May thla atanga Congress Ministry a lo din khan chhunzawm tuma hmalak zuina nei lovin,  he tuikhuah tur hi an nuihzat a.(i) a man a to lutuk an ti a.(ii) hun a duh rei lutuk dawn , an ti bawk .

BAIRABI CHHUNZAWM AIAH NLUP : New Land Use Policy hnuaia rangva sem, vawkte sem, bawng sem, thlai tiak sem, thei tiak sem , etc. atana pawisa hman tan hi 1984 May thlaa Congress Sawrkar a lo din atang khan a ni a. An term hmasa leh term hnuhnung chhung zawnga NLUP atana an pawisa hman zat sawrkar record-a lan dan chuan cheng Vaibelchhe 285 a ni.

Chu chu Tlawng lui, Bairabi -a khuahna tura pawisa senso zat tur ai khan cheng Vaibelchhe 35 in a tam tawh zawk a ni. 1984 May thla atang khan tawp lovin Tlawng lui khuah kha lo chhunzawm zel ni ta se, ruahmanna ang chuan kum 6 chhunga zawh hman tur a ni a.Kum 1990 ah a puitling lo deuh a nih pawhin kum riatna , 1992 -ah chuan a puitling ngei tawh tur a ni.

HEI CHAUH PAWH HI A NI LO : NLUP -a kum 8 chhunga pawisa sen tawh bakah hian chhut tel ngai chu kan ram lui tui khuah atanga kawlphetha kan neih loh avanga mi ram atanga kan lei nan hian kum tin cheng vaibelchhe 5 vel kan seng ziah a, Bairabi tuikhuah kha lo chhunzawm ni sela chuan 1990 emaw 1992 atang emaw hi chuan he kan sum ram dangin min eisak thin hi keimahni ram chhungah ngei hnathawh nana hmang thei tan tawh tur kan ni a. Chu bakah kan thenawm State -
ah Kawlphetha Megawatt tam tak  hralh chhuakin kum tin Vaibelchhe 30 -40 vel la lut tan ve thei tawh tur kan ni bawk.

ZAWHNA PAHNIH CHHANNA : Tuna kan han hriatfiah theih tak chu NLUP hian Bairabi Tlawng lui khuahna tur aiin a let sawm mai pawh ni lovin a let sawm thumin pawisa a duh tam zawk a, a to zawk bawk tih a chiang a.A pahnihnaah chuan Mizoram leh Hnam mahni intodelhnaa hlangkai tur chuan Bairabi tuikhuah aiin  a let sawmthumin hun a duh rei zawk  tih kan hmuchhuak thei ta a ni.

Post a comment

Powered by Blogger.