International news & politics:
KHAWVEL JAIL ZAU "GAZA STRIP" AH TUTE NGE CHENG?
FATAH LEH HAMAS DANGLAMNA: BIBLE-AH GAZA A LANG TAM HLE!
May 27, 2021: Israel leh Hamas - Islamic Jihad hote Ni 11 chhung indona avangin, Zofaten Israel ram leh Middle East boruak kan ngaihven zual phah a, Palestinian, Fatah leh Hamas tih thumalte chu social media leh chanchintharah chhiar tur leh hriattur a tamin, hnam hrang hrang emaw lo ti tawk lah bo lo! Palestinian hnam zingah political party angin Fatah leh Hamas hi an awm mai chauh a ni. Gaza Strip lam hi Hamas hoten rorelna changin, 2007 atangin an thunun tlat a, West Bank erawh Fatah an tihten an thunun a ni. Mualzavata Tukverh atangin Gaza Strip leh a chheh vel i han bih chiang teh ang.
GAZA STRIP-AH TUTE NGE CHENG?
(1) Gaza Strip-ah chuan kum 2020 July thla khan mihring 1,918,225 an awm a, an zingah Juda an tel ve lo. 98.6% chu Islam/ Muslim an ni. Sunni Muslim 99% niin, Kristian 1.0% awm ve a ngaih a ni. Gaza Strip-a mihring chengte hi maktaduai 2.1 angin Al Jazeera news chuan a tarlang.
Israel ram pumah erawh kum 2019-ah Juda 74.2%, Muslim 17.8%, Kristian 2.0%, Others 1.6%. Jan-Feb 2021 chhungin Jewish 21,052 (75.83%) piangin, Muslim 5382 (19.39%, Kristian 321 (1.16%) leh Druze 319 (1.15%) an piangin an sawi.
Gaza Strip chu Israel ram chhung, Palestinian hlang chenna a ni a, mahni ro inrelna neiin an khawsa ve a ni. UN Gen. Assembly chuan Palestinian hote hi Gaza leh West Bank a chengte chu Independent ram angin, ram 130 chuangin an lo pawmpui tawh a, Israel leh US leh West ram thenkhat erawh Independent ram angin an la pawmpui lo a ni.
Gaza Strip chu Governor 5-in an awp a, North Gaza, Gaza City, Deir al-Balh, Khan Younis leh Rafah biala then a ni. Egypt leh Israel ram nen inthenawmin, Mediterranean Sea tuipui kamah a inzam pharh a, 365sq.km (mel 141) a zau a ni. Chhim lama Rafah khua chu Beit Hanoun atanga 41km leka hlaah a awm.
(A): North Gaza chuan Israel ram nen 10km ramri a nei, ramri chu Israel-in uluk takin cement concrete hmangin a hung tlat a, ramri hnaih 0.6km leka Palestinian lo kal hnaite chu, fimkhur thu hlaah Israeli Security Force ten an lo kaphlum thei a ni. Gaza chhak lam leh Gaza hmar lam Erez atang chauhvin Israel ram a luh theih a, chutianga Israel ram an luh duh chuan Special Permit an neih a ngai. Jerusalem khawpuiah leh West Bank-ah te medical thilin an kal duh a nih pawhin, phalna tha tak an neih a ngai. Jerusalem chu mel 60 chauhva hla ni mahse, kawngah uluk taka lo endik (tight security) an paltlang a ngai thin a ni.
Kum 2007 atangin Gaza Strip-ah Israel ram pawmlotu Hamas hoten thuneihna an chan avangin Israel chuan boruak leh tuipuiah a dangchat (blockade) hmak a, ram dang tanpuinate chu Israel phal chin bak thawnluh theih a ni lo. Gaza Strip a chengte chu a tam ber Refugee an ni a, North Gaza-ah Refugee Camp lian ber a awm a, Jabalia Refugee Camp a ni. 1.4sqkm a zau niin, mi 114,000 an khawsa a ni. He khawvela mihring cheng bitna ber a ni, an ti.
(B): Gaza City-ah mihring 700,000 chuang an awm a, veng hlawm lian pui pui Rimal, Shujaya, Tel al-Hawa te a ni. Rimal hmunah Gaza Strip a hospital lian ber Al-Shifa Hospital a awm, ICU te a khat thei hle, an ti. UN hnuaia peng UN Relief and Works Agency (UNRWA), UN Coordination Special Peace Process, UN Development Program te chu Rimal vengah a awm. Gaza City-ah hian Al-Zhar University, Al-Aqsa University te chu Rimal hmunah inhlat lo takin a awm bawk. Tin, Shati Refugee Camp (Beach Camp an tih mai) chu awmin, Refugee Camps 8 zinga lian ber a ni.
(C): Deir el-Balah chu "Monastery of the Date Palm", an ti bawk thin. He hmun hi Gaza Strip a Agricultural products hmunpui ber a ni. Refugee Camp lian pui pui - Nuseinat, Al-Bureij, Al-Maghazi leh Deir al-Balal camps a awm. Gaza Strip pumpui Power Plant lian pui leh Health, Water supply hmunpui a ni. UN chuan Gaza Strip - a mihring 68% chengten food security nei lovin, 5% chuan tuiin tur thianghlim an neilo, a ti.
(D): Khan Younis ah mihring 400,000 chuang hret an awm a, a khawpui laili takah Refugee 87,000 an cheng. He khuaa Juda mi 8,000 lo cheng thinte chu 2005 Oslo Peace Accords angin Gaza Strip atangin West Bank leh Israel ram chhungah sawn chhuaha inbenbel tir an ni. Kum 1967 Six Day War-ah Israelten Gaza Strip hi Arab awp ram atanga an lak (capture) niin, Oslo Accords angin Israel chuan Gaza ramri, boruak leh tuipui a thunun a ni.
(E): Rafah khuaah mi 250,000 an cheng a, Gaza Strip chhim tawpa awm niin, Egypt ram luhna kawngka ber a ni. Kum 2007 atanga Israel leh Egypt ten Gaza Strip chu an kharkhip (blockade) vangin, UN chuan kum 2020 khan Ni 125 chauh Rafah khua luhna leh chhuahna an hawng, a ti. Palestinian hoten Gaza Strip atanga ram dang an kal dawn chuan Egypt phalna lak a ngai a, Sinai thlalerah darkar 8 zet kalin, 400km a hla Egypt ram chhung Daleh al-Din Gate-ah bungrua an lalut thei ang. Rafah hi Israel sipaiten Karem Shalom (Arab hoten Karem Abu an ti) an ti a, an veng a, May 18-ah Gaza Strip a tanpuina lut tur thiarluh a ni. Gaza Strip-ah kum 2001 khab PLO hotupa Yasser Arafat hming chawia phuah Yasser Arafat International chu, a hawn hnu kum 3 lekah Israel sipaite an bomb chhe vek a ni. Hetiang hi Gaza Strip dinhmun tlangpui a ni. Al Jazeera news chuan, khawvelin The World largest Open - Air Prison (khawvela open-air Jail lian ber) tiin an koh phah a ni, a ti.
TUTE NGE "FATAH" LEH "HAMAS" TE CHU?
Belfour Declaration, 1917-a siam a nih khan Indopui-1 hnua British hoten "Palestine" an awpna chu chhuahsan tur a ni. Europe rama Juda ho, Nazi-Hitlera thah bang tam takin hmakhawsanga an pu Abrahama te, Mosia te hnena Pathianin ram tiam a lo pek chu, luah leh tumin an lo pem khawm leh tan ta. Belfour Declaration/ thupuan anga Judate hnena ram pekna thu, UN Assembly Resolution# 181 anga pek a nih khan Judate leh Arab te awmna then fel sa diam an duh a, mahse, Arab hoten an duh tlat loh avangin May 14, 1948-ah Israel Independence pek an nih hnuah buaina a lo chhuak zauh zauh tan a, 1967 Six Day War hming thang tak lo chhuah phahin, Arab - Muslim hote chuan Zion fate chu an hnehin, an ngam silo a ni. Six Day War-ah Israel chuan Jordan, Syria leh Egypt ram awp chin a laksak nual a, chung an ram chhuhsaka Arab-Muslim, Palestinian hote chuan Israeli te chhuah tir tumin nawr chhuah tumin, lungngaihna leh chhiatna Ni "Nakba ( Day of Catastrophe) tiin, 1948 atanga lungawihlohna an la lantir thin chu, vawiin thlengin Nakba chu an la chawlhsan lo a ni.
Mahse, chuti mai maiin indona chak zawkten chaklo zawk ram an chhuhsak a, an awpzui hi inpek let hi thil awlsam a ni lo. Indopui 2na hun laia Soviet Union/Russia in Japan ram Kurill Island a awp sak pawh a la pe let biklo. Hetiang neuh neuh hi sawi tur a tam. Indona vang ni lem lova Aizawl khawpuia Assam Rifle ho ram luah pawh, chuti mai maiah sawnchhuah a awlsam loh tawp hi!
Palestinian hote chuan kum 1950's chho atangin, Yasser Arafat chuan secular party "Fatah" dinin Palestinian hote zalenna (independence) rawn sual tanin, a hnuah Palestinian Liberation Organization (PLO) tiin 1964 a din chu Palestinian hoten an zawm nasa hle. A hnuah phei chuan a ruk a rala chetna (guerilla warfare) hmangin Israel sorkar an bei ta zel a. Munich Olympics-ah Israeli infiammi rukbo tuma thahna te, Entebbe - thlawhna hruaikawi, etc an rawn tichho ta zel a. Mahse, kum 2004 atangin tharum leh a ruk a ral a Israel an beihna thin chu, inremna angin an lo tawpsan ta a ni.
Fatah tih thumal chu Arabic tawngin, Hnehna" (Conquest, Victory) tihna. Arab tawnga Harakat al-Tahrir al-Filistinya tih chu Fatah awmze dik tak niin, mihring ni lovin pawl hming a ni. Palestinian Liberation Movement=Palestinian hote zalenna tura beitu pawl, tihna a ni ber awm e. Fatah pawl dintu leh PLO hotupa Yasser Arafat chuan Israel ram pawmin, inremna a siampui Israeli President Yazhak Rabin leh PM Simon Peres te nen, 1994-ah khawvela chawimawina ropui Noble Peace Prize chu Middle East a remna an siam vangin an dawng tlang a ni.
ISRAEL NUAIBO DUH PAWL 'HAMAS' A LO PIANG TA!
Fatah leh PLO dintupa ber Israel do reng mai chu hneh rual an ni lo tih hriaa inremna a siampui chu duh lovin, Israel chu nuaibo tur tih ngaihdan khauh rumrut, tharum thawh pawisalo pawl Hamas tih chu, kum 1987-ah Sheikh Ahmed Yassin chuan, Muslim Brotherhood pawl leh PLO zinga Sakhaw la urhsuntute thlawpna hmuin a rawn din ta a ni. Non-secular party niin, 1993 a Oslo Peace Accord pawmlo burtute an ni. Hamas tih chu Arabic tawngin, "Hanakat al-Murqawamah al-Islammyah", Islamic dodaltu pawl (Islamic Resistance Movement) tihna a ni.
Fatah leh Hamas pawlte chuan Israel awpna hnuai atanga mahni rorelna (self determination) chu an tum (goal) ber ni mahse, hmuh leh neih an tum dan a in anglo a ni. Hamas hote an duh rum il el a, tharum nen Israel beih an tum a ni. Fatah hoten 2002-ah Israel thiltih dan West Bank leh Gaza a awm chu danlo thiltih tiin, East Jerusalem chu Palestinian Independence hunah an khawpui turah an beisei tlat a. Hamas chuan Israel kut atangin tharumin, Jerusalem khawpui laka neih an tum thung. Fatah chu firfiak (terrorist) pawlah dah lovin, Israel leh US-EU ten Hamas pawl chu terrorist pawlah puangin, US State Dept chuan a tira Fatah zinga tel Al-Aqsa Martyrs Brigade leh Abu Nidal Organization te chu terrorist pawlah a puang a ni. Al-Aqsa Mosque, East Jerusalem a awm a mi Muslim hmun thianghlim 3na, Judate hmun thianghlim an tih Temple Mount, Islam hoten Noble Sanctuary an tih thih thlenga venhim tumtu Al-Aqsa Martyrs Brigade tihte a lo piang ta a. Islamic Jihad tih pawlte chu tharum hmang a Hamas anga Israel beih duhtu an ni. Della Walla news chuan, kum 1977-ah East Jerusalem-ah Juda 4400 chauh an awm a, 2015-ah 385,900 an awm, a ti.
Hamas hote chuan 2006-ah Gaza Strip inthlanah hnehna changin, Fatah an tih Palestinian Authority President Mahmoud Abbas hote an um chhuak a, an zingah Civil War reilote a awm a ni. 2011 khan Egypt leh Qatar hmalaknain Fatah leh Hamas inrem turin hmalak a ni a, thuneihna insem zaiin Unity Gov't siamin Fatah mi PM Rami al-Hamaddah chuan 2014-ah Gaza a tlawh a, a tirah an thawkho tha a, mahse, an inrem rei theilo. Gaza mipui 40% chu hna thawh tur neilo an ni a, UAE, Egypt, Saudi Arabia leh Qatar ramin an tanpui nasa thin a ni.
BIBLE-IN ENGTIN MAW "GAZA" A SAWI?
Gaza khua leh a chheh vel hi Bible leh khawvel History-ah pawh a lar hle. Tun hnaia rawn lar thar thut a ni lo! Joshua, Roreltute (1375-1406 BC) leh Lal Solomona hunah pawh Gaza khua hi a lar daih tawh a ni! Samsona hun lai pawhin, Gaza khuaah Nawhchizuar an lo tam tawh a (Roreltute 16). Bible-a " Superman" Samson hun lai chuan Philistia hoten Israel chungah ro an rel (Roreltute 14:4) a, mahse, khawvel History enin tuna Gaza Strip a cheng Palestinian hote erawh khu chu niin an lang lo. Gaza hmuna lo cheng tawh thinte chu Bible enin, an sual reuh riau a ni mai thei? Kum 760-750 BC hun laia Zawlnei Amosa (1:6-7) chuan, an sual vangin, "Pathianin mei sa in a tichhia ang" a ti. Amosa'n Gaza khaw sual hremna tur a lo hrilh lawk chu, kum 323 BC-ah Grik lal Alexander the Great chuan rawn tidikin, a mi chengte a that chiam a ni.
Bible-a Zawlnei Zephania (2:4-6) kum 640-621 BC hunlai a mi leh Zakaria (9:5), kum 518-480 BC a mi te chuan Juda lalten an awp ram Gaza chhiat tur hi an lo hrilhlawk dim diam ! Zephania phei chuan kum 612 BC-ah Ninevi chu Babulon miten an run a, an tihchhiat turte a puang tel bawk.
"Aw Gaza khua chu kalsanin a awm ang...Aw Kanaan, Philistia mite ram, LALPA thu chu i chungah a lo thleng dawn a ni. Luahtu awmlo khawpin ka ti boral ang che" (Zaph 2:4-5), tiin. Zaphania hi a hunlai chuan Zawlnei lian, Jeremia anga ngaih a ni a, Judah lal Josiah pawh khan siamthat hna a thawhna kawngah, Zawlnei Zaphania thurawn a awih hle.
Zaphania 2:16-ah, " Kerethia mite" tiin Gaza khawpuia chengte hi a sawi a, chumi awmzia chu Crete (Kupra) thliarkar atanga Philistia hote ruala Gaza Strip vela rawn pem, Crete-mite an awm nual an ring (Life Application Study Bible, p. 1418). Chuvangin, Gaza khua hi hman lai atangin hnam tin chi tin inchen pawlhna niin alang.
Zakaria 9:5-6 -ah chuan,
"Ashkelon pawhin a hmu ang a, a hlau hle ang. Gaza pawhin a hmu ang a, na a ti em em ang. Lalber chu Gaza ata a boral anga, Ashkelon chu luahin a awm lo vang", tiin.
Joshua bung 11-13 enin, Gaza velah Anakim hnamte lo chengin, Jordan lui dai kai a Kanaan ram an luha Israel faten ram an insem khan an luah mai lo niin alang. Michak tak Samsona lo thattute chu mi kawlhsen tak an ni phawt mai (Roreltute 13:1). Lal Solomona'n Gaza chheh velah ro a rel. II Lalte 18:8-ah Judah lal Hezekiah chuan Philistia hote chu Gaza thlengin a hneh vek a ni.
GAZA HI KHAW UPA TAK A LO NI E!
Ram leh hnam leh khaw upa chuan chanchin mak sak leh ngaihnawm an ngah duhin, Gaza pawh hi kum 4000 dawn lo awm tawh, khawvela khawpui upa Jerusalem ang mai a ni. Khawvel History atang pawhin, Gaza hi lal inthlahchhawng (dynasty), lalram (empire) awp leh mipui chi hrang hranglo chenna a ni. Kum 730 BC-ah Assyrian Empire awp ram niin, kum 323 BC-ah Grik lal Alexander the Great chuan hual betin, mi tam tak a that a, Bedouin bulah Greece Empire - Hellenistic tan philosophy zirna hmun puiah a din a ni, an ti.
Seleucids Syrian lalram leh Plotemies of Egypt ten lo awp tawhin, kum 96 BC ah pawh Hasmoneans chuan a lo awp tawh bawk. Gaza chu Roman General Pompey Magnus chuan a chei tha a, Heroda Lalropuia (Herod the Great) enkawl turin a kutah a hlan. Gaza chu lo thang duang zelin, a khawpui roreltu Senate Governor te ruatin, an zingah Grik, Rom, Juda, Aigupta, Persia leh Nabatean mite an tel nual.
Hun a lo kal zel a. Saint Porphyrius chuan Gaza khuaah Kristianna a la lut a, kum AD 396-420 chhovah chuan ringlomi (pagan) temple tihchhiat a ni. Kum AD 637-ah Muslim General Amr ibn al-As chuan Gaza runin a hneh a, Gaza-ah Islam sakhua a la lut ve leh a. Kum AD 1100-ah Crusader -hoten Gaza chu thunun ve lehin, chumi hnuah Muslim sipai Saladina hoten an um chhuak ve leh a. Kum zabi 13-naah Mamluk kutah awmin Sinai Peninsula leh Caesarea thlengin a awp. Chumi hnuah Ottoman Empire hnuah a awm leh a, kum zabi 16 ah Ridwan dynasty hnuaiah awm lehin, kum 1917-ah Indopui 1na hun laiin British Sipaite kutah a awm ta a ni.
Gaza hi kum 1903 leh 1914-ah lirnghing na takin a lo nuai tawh a. Gaza hi Egypt leh Mesopotamia inkal pawhna hmun pawimawh "Great Caravan" an tih hial thin a ni a, sumdawnna hmun pawimawh (Commercial Center) a ni (The Libery Illustrated Bible Dictionary, p. 407).
Kum 1470 BC huna ziaka ngaih, Deut. 2:23-ah chuan, " Gaza thlenga khaw te tea awm Av-ho chu Kaptor hovin tiboralin, an hmun an luah" tih kan hmu. Joshua'n ram a sem khan Juda thlahten Gaza khua hi an chang a (Jos. 15:47) mahse, Roreltute 1:18-ah chuan luah tak tak turin Juda leh Benjamina thlahten an hneh chauh niin alang.
Thuthlung Thar hun, AD 63-70 inkarah pawh Gaza chu a lo lang zel a, Evangelist Philipa leh Ethiopian mi tilrehna chu Gaza kawngah counseling an in pe a, Ethiopian tilrehpa chuan var pawh nun neiin baptisma a chang zui nghe nghe a ni (TT 8: 26-40). Ethiopian mi tilrehpa anga mahnia Bible chhiar ve mual mual, mahse, a awmzia leh zirtir tum hrethiam si lo kan awm em? Bible zir ngun hi a tulin, ava pawimawh em!
- CT LALRINAWMA
Post a Comment