MIZO GRAMMAR: PHRASAL VERB

PHRASAL VERB

PC Thang Zikpuia

June 1, 2022

Mizo ṭawngah hian ‘phrasal verb’ hi kan lo la hmelhriat ngăi lo niin a lang a, Mizo ṭawng grammar bû kan lo neih ve tawhah te pawh ‘phrasal verb’ hi ziah lan a lo la ni ngăi lo niin a lang. Amaherawhchu, Mizo ṭawngah hian ‘phrasal verb’ hi kan nei ṭha ve êm êm a; chuvangin, kum 2019-a ‘Mizo Ṭawng Grammar’ bû ka han tih chhuah veah khân ‘phrasal verb’ hi a sawi fiahna kimchang nen ka rawn târ lang ta a. Kha kha Mizo ṭawng grammar bû-a ‘phrasal verb’ a lanna hmasa ber niin ka hria a, a hnua grammar bu pakhat rawn chhuakah chuan ka grammar bu sìama ‘phrasal verb’ ka tàr lan zul zui deuh chiahin ‘phrasal verb’ hi rawn tàr lan a ni ve leh a, a lawmawm hle.

 Phrasal verb chu ‘verb’ leh ‘adverb’ ṭang dun ni si; amaherawhchu, an awmze pangngai (literal meaning) ang diak diaka kan hman tawh si loh, an awmze pangngai (literal meaning) aṭanga awmze dang neia kan hman ṭhin hi a ni a. Entir nân–“Bawngin pal a bawh chhia,” tia kan sawiah hian verb ‘bawh’ leh adverb ‘chhia’ hi an awmze pangngai (literal meaning)-in kan hmang a, bawng hian pal hi a taksa hmangin a bawhin a bawh tak tak a, pal pawh hi a chhe tak tak tih kan sawina a ni. Amaherawhchu, heta verb leh adverb ‘bawh chhia’ tih hi ṭawngkam dangah chuan an awmze pangngai aṭanga awmze dang neiin, “Liana’n dan a bawh chhia,” te kan ti ṭhin a. Hengah hi chuan ‘dan’ hi taksaa a bawha bawh tak tak thu kan sawina a ni ve tawh lo a, ‘bawh chhia’ tih hi verb leh adverb ṭang dun la ni reng siin; amaherawhchu, an awmze pangngai (literal meaning) aṭanga awmze dang neia kan hman, ‘phrasal verb’ a ni ta a ni.

 Entir nân–“Arte ka vawm hlum,” kan tihah pawh hian, heta verb leh adverb ‘vawm hlum’ tih hi an awmze pangngai (literal meaning)-in kan hmang a, arte hi hmanraw eng emawin a vawmin kan vawm tak tak a, arte hi a thi tak tak tih kan sawina a ni. Amaherawhchu, heta verb leh adverb ‘vawm hlum’ hi ṭawngkam danga kan hmannaah chuan, “Bank-a ka pawisa bat ka vawm hlum,” te kan ti ṭhin a. Hetianga kan hmannaah hi chuan ‘vawm hlum’ tih hi hmanraw eng emaw hmanga pawisa kha a vawma kan vawm tak tak thu kan sawina a ni ve tawh lo a, ‘vawm hlum’ tih hi verb leh adverb ṭang dun la ni reng siin, an awmze pangngai (literal meaning) aṭanga awmze dang neia kan hman, ‘phrasal verb’ a ni leh ta a ni.

 Chutiang zelin, “Sawrkârin mi retheite a dâwm kâng,” tia kan sawi ṭhinah te, “Mizote min châwi sâng,” tia kan sawinaah te, “Upa atân an nem nghet,” tia kan sawi ṭhinah te hian, ‘dâwm kâng’ tih hi kuta a dawma dawm tak tak thu kan kan sawina a ni tawh lo a, ‘châwi sâng’ tih hi kuta a chàwia chàwi tak tak thu kan sawina a ni tawh lo bawk a, ‘nem nghet’ tih pawh hi kuta a nema nem tak tak kan sawina a ni tawh lo bawk a. Heng verb leh adverb ṭang dun ni si; amaherawhchu, an awmze pangngai (literal meaning) aṭanga awmze dang nei atâna kan hman hi ‘phrasal verb’ an ni leh ta a  ni.

1.  Dan a bawh chhia.

2.  Pâwl a bawh kân.

3.  Hun tìam a bawh pelh.

4.  Mizo min châwi mâwi.

5.  Hnam zia a châwi sâng.

6.  Retheihna ata a ding chhuak.

7.  Mi harsate a dâwm kâng.

8.  Upa atân an nem nghet.

9.  Bank-a a pawisa bat a vawm hlum.

 Heng entirna sentence kan chhawp chhuaha ‘bawh chhia, bawh kân, bawh pelh, châwi mâwi, châwi sâng, ding chhuak, dâwm kâng, nem nghet, vawm hlum’ tih ang chi hi verb leh adverb ṭang dun ni si; amaherawhchu, an awmze pangngai (literal meaning) aṭanga awmze dang neia kan hman, ‘phrasal verb’ an ni ta vek a, ziah zawm loh tur a ni ta a ni.

 Mizo ṭawngah hian hetianga verb leh adverb inkawp ni si; nimahsela, an awmze pangngai (literal meaning) ni lova awmze dang neia kan hman, ‘phrasal verb’ hi kan ngahin kan nei ṭha êm êm hlawm a. Amaherawhchu, hetianga verb leh adverb ṭang dun, a literal meaning lova kan hman ṭhinte hi an nihna kan lo la hriat chian ngai loh avang leh, kan grammar bu neih veah te pawh ‘phrasal verb’ an ni tih hi a lo la chuan ngăi bawk si loh avangin, a ziah dan thu-ah hun kha leh chen kha kawng kan lo bo phah ta a. Phrasal verb rau rau, a ṭhen ‘bawhchhia, châwimâwi, nemnghet’ ti tea thu mal anga kan ziah zawm mai mai lâiin, a ṭhen erawh ‘bawh pelh, châwi sâng, vawm hlum’ ti tein a inzawm lovin kan ziak thung a. Phrasal verb rau rau si kha ziah dan inang lo nuaiha ziakin, chiri leh mumal lo takin Mizo ṭawng hi kan lo ziak ṭhin a ni.

 ‘Phrasal verb’ nei ṭha ve êm êm si hi; kan grammar bu-ah te ‘phrasal verb’ a lo la chuan ngai loh avanga a ziah dan thu-a kawng kan bo kumkhua si avangin, grammar bû-ah khân ‘phrasal verb’ hi a sawi fiahna kimchang nen ka rawn târ lang tel ta kha a ni a. Verb leh adverb inkawp, an awmze pangngai (literal meaning) ni lova kan hman ṭhin hi ‘phrasal verb’ a nih avangin, phrasal verb chu thu mal anga ziah zawm daih tur a nih loh dan ka rawn târ lang ta a. 

 Grammar kàl phung man pha chinte chuan ‘phrasal verb’ awmzia leh nih phung hi an lo hmu fiah ve nghal zel ni pawhin a lang a. Phrasal verb kan lo la hriat loh avanga Mizo ṭawnga kan phrasal verb ni si, a ṭhen ziah zawm a, a ṭhen ziah zawm loh a, ziah dan mumal lo nuaiha kan lo ziah chiri mai mai ṭhin kha, tunah chuan ṭhangtharte’n grammar aṭanga a ziah dan tur dik awm fel sa thlap hi an rawn hmu fiah tulh tulh dawn ta niin a lang a. Mizo ṭawng ziah dan pawhin mu leh mal a neih chhoh phah zel ang tih a beiseiawm bawk a ni.