Tweet Share Share Share Share Share

July 23, 2017
Hetah hian chiang lutuk chu Bible-ah hian Pathian nena lengdun mi pahnih chiah kan hmu a, chu chu Nova leh Enoka te an ni a. Nova chu Pathian aw in a bia a, hmu lo mahse a rina chu a hria a, chuvangin kum za chhung rinawm em emin chhandamna lawng a tuk a nih kha. Zaninah hian mi chi hnih awmte zingah nakinah kan sawi hman loh tâkin ka rilrua tla na em em chu, Pathian nena lengdun thinte hi ram hnuk an ni a, Pathian nena lengdun thinte hi khawvel roreltute an ni a, Pathian nena lengdun a, amah nena inbe pawp thinte hian tunah hian khawvel hi an chelh ding a nih hi. Chuvangin vawiin niah khan “Prayer Day” tawngtai niah khati zat kha kan kalkhawm theite kha ka thinlung takin ka thla a muan phah a ni. 
Zaninah hian mipui helai hmuna lo kalkhawm ve lo, he thusawi hria zawng zawngte u, Zoram mipuite u, hei hi lo hre rawh u. Pathian nena lengdun, hmuh theih loh hmu a, khawvel mitena atthlak an tih thleng thleng a Pathian nena kal dunte avâng hian vawiin niah hian kan ram hi chelhin a la awm a ni. Chuvang chuan zaninah helai hmuna lokal khâwm a, Lalpa Thlarau Thianghlim zâra Pathian faka chawimawi a, a biling a balang engmah zah leh Pathian tana insitna nei chunga engmah ti hreh lova Lalpa tâna inhlân te hi vawiin niahte hian khawvelin min hmusit mahse Lalpa hming chhuangtute hi an hlu a ni. Unaute u, Bible kan chhiar pawhin, khawvel History kan chhiar pawhin hei hi thil dik tumahin an hnial theih loh chu a ni. Khawi ramah pawh mi Pathian nena lengdun an awm tawh loh chuan ram leh hnam a boral thin. Sodom leh Gomora a boral dawn khan ka rilru khawih em em thin chu Pathian nena kal dun nitin lengdun a inkâwm thin, Pathian be pawp tlat, Abrahama avangin Sodom leh Gomora hrem tur kha chelh dinin engemaw chen a awm a ni. Pathian nena Committee a ni. 
Zaninah hian thlarau fate hi van lam nena inzawm, Lalpa nena lengdun tih hi van lam nena inzawm an nih avangin vawiinah hian khawvelin hmuhsit suh se. Vawiin niah hian chu mi ni tur chuan Pathian nena lengdun turin van lam leh he khawvel tâna malsawmna ni tura Pathian nena lengdun turin zaninah hian kan insâwm dawn a ni. Amaherawhchu chutih lai chuan chu thil ropui lutuk chu Setana hian a huat em avangin Setana thiltum hmelma pa thiltum lian ber leh langsar ber chu Pathian leh a mite lengdun lai pawh then hi a ni. Chuvangin zaninah hian Setana sadâi kan thiat dawn a ni. Pathian nena lengdun hle hle lai, Zaninah pawh hian heng Revival Programme te, Presbyterian Kohhran chauh ni lovin Kohhran dang unaute programme lo mausâm a, lo nuihzattu kan awm a nih chuan zaninah hian eng hmanrua nge kan nih theih lo infiah ang che u. Setana hmanrua chu Lalpa leh a mite inhnaih taka lengdun pawh then hi a ni. Bible-ah hian kan sawi thui vak lovang a kan hmuchiang hle mai. Genesis bung 3-ah khan mihring hmasa Evi, Adama leh a siamtu thuhnuairawlh taka an lendun laia Setana thil rawn tih hmasak ber chu hmangaihtu Pathian leh a hmangaih mihring fate lengdun lai rawn pawh then kha a ni. Unau duhtak, zaninah hian i thlarau nun fiah rawh. Nangmah leh Pathian inkar kha a hla du tawh a nih chuan nangmah leh Pathian inkarah tla zep a awm tihna a ni. Hemi atan hmanrua,  Setana’n hmanruaa a hmanlar tak chu thil hmuh theih, khawvel thil, chatuan daih lo hmang hian a mite lengdun hi min pawt then a. Chumi chu vawiin ni thleng hiankan hmelma pa hnathawh dan a nih thin avangin. Khawvel mawinate hi lo vul thin mahse, ka tan zawng i hlu ber Lal Isu, damlai ropui leh nawmsaknate, ka phum ang rohlu ber ka nei tawh si ti turin, Pathian nena inkâr chingfel lehturin zaninah hian inbuatsaih ang che. Chumi tur chuan zaninah hian nang leh kei hi Pathian in min au va, tunah hian min sâwm a ni. Chumi a nih avang chuan tun hunah hian kan thupui kan luhchilh tak tak hmain heng kan hmuh theih khawvel thil tam tak Pathian aia kan thlan Lalpa leh a mite inkara tlazep hi unaute u, engmah lo a ni tih hi a hmasa berah kan sawi duh a ni. Chumi awmzia chu Isua ni lo thildangte hi lendunpui tlâk pakhatmah khawvelah hian a awm lo. Lal Isua aia thlan zâwk tlâk hi khawvelah pakhat te mah a awm hauh lo. Chu chu zaninah hian a hmasa ber a kan sawi duh chu a ni.  
Hun hnuhnung a nih tawh avangin unaute u, Isua ni lo thildang mawina leh ropuina hi a zual mek tih hi kan hria em? Hman aiin tunah hian khawvel chen tum tan khawvel hi a mawi tawh zawk. Khawvel aia mawi zawk Isua miin a hmuh loh chuan unaute u, khawvel hi chen thamin, mawiin, nuamin a lang a ni. Amaherawhchu unaute u, zaninah hian heng khawvel mawina zawng zawngte hian hringnun hi a fah zo chuang lo. Chuvangin zaninah hian tu nen ngekan lendun, tu rualin nge kan kal? Ka nun hi eng in nge thunun? tih hi kan inbihchian a tul hlein ka ring. Tunlai hian hla lar tak pakhat ka rilru khawih em em a awm a.
                        Ka nun tuihal a leng vel a,                        Rîak a châm hlenna a awm lo.                        Kawtthler hmun mawi, in nuam tinreng,                        Damchhung reilo te ah paw’n a tâwk zo lo.  
Unaute u, a ni tak tak a ni. Kalvari tlang hi kan hahdamna a ni a, tholeh Krista hi kan innghahna a ni. Chuvangin zaninah hian hei hi kan hriat a tul hle. Tunah hian khawvel zau zawk kan sawi hman lovang. Mizoram khawvelah ringawt pawh a taka kan tawn ten Zoram pum kum za zet Pathian nena lengdun tawh, min pawh thenna atana hmanrua thil tam tak sawi tur a awm, mahse hun a rei deuh tawha ka sawi chipchiar lovang. Kan rilru kaihruaitu atân khawvel hmasawnna hi kawng tinrengin zaninah hian a chak lutuk, khawvel speed hi a sang lutuk. Unaute u, engpawh lo thleng se, eng ang pawhin khawvel hian hma sâwn mahse, kan Bible hian a lo dai khalh vek nia. Hmanah kum 2700 daih kal tawhah khan zawlnei Daniela hnenah Pathianin a lo hriattir tawh. Hun hnuhnung lamah chuan, “nimahsela nang Daniel hei hi hre rawh, thu chu thup la, lehkhabu chu char tlat rawh, tâwpna hun thlengin mi tamtak an tlan vel chiam ang a, hriatna te a pung dawn a ni,” a ti a. Unaute u, hriatna a pung, khawvel hmasawnna chak lutuk hian Pathian leh a fate lengdun kan ramah pawh hian thalai tam tak a pawt then a ni, chu mai ni lovin nu leh pate pawh min tibuai deuh ta a nih hi. Amaherawhchu unaute u, hringnun tuihalna zual zel awm ngaihna hre lo, tuihalna zual zel  hian hahchawlhna zawng mahse hahchawlna an hmu dawn chuang lo. Hlimna a sâng hle a, zaninah hian pen kual deuh pawh a châkawm hle mai.  
Tunah hian khawvel finna sân tawh zia kan hria a, kan hmu a ni. I.T. khawvelah khawvel a lut tawh a, kan duh emaw duh lo emaw keini zofate ngei pawh hi tunlai tawngin Cyber Society-ah kan lut tan mek a. Amaherawhchu unaute u, mak em em chu, Bible dik em em zia chu eng ang pawhin finnaah sângin vanahte pawh bu chhep hial mahse kan Bible hian ka pawt thla ang, a tih hi a dik zel dawn. Khawvel hian hahchawlhna leh a tawp khawvel hian a thleng zo dawn lo. Chu chu ka’n sawi duhna chhan chu khawvelah hian Isua aia chelh tlâk, lendunpui tlâk hi a awm lo tih hi a ni. Damdawi thiamnate a sâng em em, amaherawhchu heti khawpa damdawi thiamna a sân tawh lai hian, hmanni deuh a lâr em em chu thinghnah atanga siam engemaw ni thinghnah atanga siamah bawk khan a ni damna kanzawn ni. Unaute u, khawvel finna hi sâng hle mahse, khawvel finna hi kal zel mahse, a duh hun hunah kan Pathian hian a rawn dah nil dawn a ni. A original khawvel hi a kir leh a, tunah hian mak em em chu, saruak te a mawi lo ve tiin inchei te kan uar em em a. Thla hmasa ni 18 vel khan Venezuela-ah chuan mi 3,000 zet chu ruak ngal ngatin a rualten thla an la vel mai mai tawh a ni. Thuamhnaw hak sen loh nei te unaute u, mihring inthuamna ten nun a fah tlei zo lo ve. A tawpah Pathian siamah hian a kir leh dawn a ni mai thei e. Tunah hian kan nula tlangvalte incheina te hi a va han tawngchham sâwt em ti rawh u. Chuvang chuan ngaihtuah tham a awm a ni. Khawvel thiamna leh finna lo sang zelah, khawvel changkanna kan ti a, Modernist kan tih ho chuan thu tak, thinlung thlamuanna thu tak, thil ngaihtuahna leh scientific hmangin a hmuh theih a ni an ti a. Bible an kal pel a, chuvangin tunah phei chuan mithiam te sawi danin Post Modernism-ah kan lut leh tawh an ti a, chu chu kan hriat fiah theihna tur atan chuan, chung ho zirtirna post modernist ho ngaihdan chuan thu tak a awm lo, sual pawh a awm lo an ti a. 
Khawvelin Bible tel lovin, Isua tel lovin, a hahchawlhna a hmu zo lova, tihngaihna hrelovin, thu tak a awm lo, sual pawh a awm lo an ti ringawt a. Anmahni duh dan dan a nun mai tur a ni an ti a. Thalaiho zingah chuan ka sawi thin ‘Its my life’ khawvelah mi dang ngaihsân lohna, mahni nuam tih zawng ang apianga nun duhnain tunah hian khawvel hi a khat zo ta. An aia uar deuh phei chuan, chutiang zirtirna an sawi uar deuh phei chuan, ‘Pathian a awm lo’ an ti tawh. Amaherawhchu eng ang pawhin Pathian a awm lo ti mahse an hahchawl dawn chuang lo. Unaute u, vawiinah hian khawvel hmasawnna sâng zelah hringnun tuihalna hi a leng vel a, riaka châm hlenna a awm lo. Kawtthler hmun mawi, in nuam tinreng, damchhung reilo teah pawn a tâwk zo lo. Vawiin niah hian Kalvari tlâng kan hahchawlhna hi rawn hre ve sela, Krista nena kal rual dan hi rawn zir ve sela tih hi kan tawngtaina a ni lawm ni. Chutih mek lai chuan zaninah hian chungin a hrin zel chanchintha dang tunah hian a pung chak em em a ni. Tunlai hian Isua hming lam si lova, harhna a thleng nasa hle. Zaninah hian tlemin kan thusawi kan la buaipui chiah lo a nih pawhin, India ram te, khawvel te kan thlir chuan, Mizoram pawh min rawn nâwktu tur tunah hian Kohhran, Pathian leh a Kohhran engah mah a ngai lo. Amaherawhchu mi thiam si te, khawvelah hahchawlhna zawng khawvel hmasawnna leh changkan nain a rawn tuam si ten tunah hian finnaah nasa takin harhna a thleng mek a, sakhaw dangah pawh harhna a thleng bawk. Chuvangin zaninah hian hei hi sawi ka duh, he kan harhna pogramme pawimawh takah hian hei hi kan ram tan sawi ka duh. Unaute u, eng ang a thuk leh Philosophy mawi leh tha leh thuk pawh lo kal se, Isua hming lam tel lohna chuan hringnun hahchawlhna a pe dawn lo. Chu Isua nen lo chuan eng ang pawhin kal dawn mah ila, lengdun mah ila kan zawh tawpna tur chu boralna a ni. Chu chu zaninah hian kan ram hian hre rawh se. Zaninah hian i hria ang u.  
Ka ngaih ti tha lo pakhat chu hei kan Pulpit-ah te chuan kan sawi ri tawhin ka ring. Thla hmasa lawkah chuan Aizawlah Book Fair ropui tak a awm a, chuta kan rama lehkhabu hralh tla ber leh an hralh hnem ber chu Mosolman ho sakhaw lehkhabu thianghlim Quran a ni. Phek 450 vel Rs 20 leka an hralh vang nge? a tlawm vang? Unaute u, Isua pawh tak tak si lo hahchawlhna zawng hi vawiin niah hian zofate zingah pawh kan awm tawh pawh a ni thei e. Mahse hei hi Pathian hmingin ka hrilh a che. Lal Isuaah lo chuan hahchawlhna a awm lo. Pathian nena lendunna ah lo chuan chatuan nunna a awm lo. A kut thirkhen min hruaina ka thlang zawk. Isua neih ka duh zawk, thil dang zawng aiin, khawvel zawng ai pawhin ti a, zaninah hian Pathian hnaih turin, Pathian nena lengdun turin i kut phar chhuak la, sâwmna chhang thintu kan Pathian kut ser ngei khan zaninah hian a chelh duh che a ni. Unaute u, zaninah hian sawi zel dawn ila sawi zel tur a tam kher mai.  
Chu mai a la ni lo tunah hian Isua hming lam ni lova, thlamuanna leh hahchawlhna neih theihna zirtirna saptawng in ‘Peace of Mine’ an ti a, Hindu Philosophy-a innghat YOGA zirtirna ten kan mithiam rualte a hrut tawh. Zaninah hian thenkhat tan a ngaihnawm loh a nih pawhin sawi ka duh. Unaute u, zaninah hian Pathian nena lendun tih hi Isua Krista miten hmâna an duh loh, thia tho leh Isua nen ngeia lendunna a ni. Thildang thuk leh  philosophy-a thuk, Khawvel ropuina leh finna nen a ni lo ve, hmâna miten an duh loh, mualpho taka an khaikan Kraws-a thi kan Lal Isua ngei nena lendun a ni zanina kan sawi ni. Chuvangin eng ang pawhin khawvel hi tlân chak mahse khawvelah hian dap hmu zo lovin, thlaahte pawh dap mahse, Sikeisenah te pawh dap mahse unaute u, hringnun hian Krista tel lovin hahchawlhna a hmu dawn lo. Chuvangin zaninah hian kan ram hian harhna a thlen loh chuan a hlauhawm thei. Tuna kan hlima kan lawm viau lai hian kan hmalam hunah hian Isua ropuina hi amah nena lengdun a kan tan ngam tak tak loh chuan kan ram tan, khawvel tan thil hlauhawm a awm thei. A chhan chu hmuhtheih loh ni lo, thil hmuh theih mawina hi Setana’n a chawimawi zel a, tha âwm takin a lantir zel a. Kan sawi uar deuh teh ang, min lo hrethiam teh u, kan chanchintha puandarhna ah pawh hian, Tirhkoh Paula’n a hlauh em em chanchintha dang, Isua hming lam ri lova chanchin tha dang puan te pawh hi a awm thei dawn a ni âwm e. Unaute u, zaninah hian kan hnam kan ram dinchhuahna bul chu Isua Krista hi a ni. A thlarau min chantirtu kan hlimpui pawh hi Isua Krista a ni. Zaninah hian chu Isua Krista tel lo chanchin tha chu endawngin awm rawh se. Tirhkoh Paula’n engtinnge a tih kha,Galatia mite hnenah Chanchin Tha kan hrilh che u chauh lo kha chu vana Vantirhkohte pawhin rawn hrilh sela anchhedawngin awm rawh se, a tih kha. Unaute u,  kan Kohhran chauh ni lovin Kohhran dang zawng zawng pawh Pathian hmingin kan sawm e. Lal Isua Krista Pathian fapa, khawvel chhandamtu ni lo, a hming ni lova chanchin tha hi anchhedawngin awm rawh se. Zaninah hian chu Isua Krista nena lengdun tur chuan, nang leh kei hi Isuan min sawm a ni, a va ropui em. 
Pathian nen kan lengdun em? tih hi kan thu pahnihna atan ka’n hmang ang e. Heta tang hian thu thuk ka sawi dawn lo. Amaherawhchu zaninah hian zawhna ka pe a ni. Unaute u, kan ram hi, Zoram hi Pathian nen tunah hian kanlengdun mek em? In lama min lo ngaithlatute pawh kha Pathian hmingin hei hi kan inzawt, keiin chhân fel ka tum lo. Amaherawhchu Isua kan Pathian nen hian tunah hian a hnam, a ram pumpui ang hian kan lengdun mekin kan in hria em? Hei hi zawhna pawimawh tak a ni, sawi thui ka tum lo ve. Chhungkua, khawtlang, hnam nun thlir ila, tunah hian, helaiah hi chuan Lal Isuan hmun sâng ber a chang a, a nuam. Amaherawhchu unaute u, hmun kilkhâwr ber thlengin kan mit len ila zaninah hian Lal Isua a Lal em? A hnam angin khawvel mi ramdangte mithmuhah Isua nenkan ram hi a kal em? tih hi zawhna pawimawh lutuk a ni. Kristian ram tia inchhal kan ramah hian Thlarau Thianghlim a zalen em? Unaute u, tun kan Revival-a Lalpan min pek ve nia ka hriat, ka thinlung khawih em em a chu nakin a ka la sawi tur, ‘kan hnenah awm ta che’ tih hi. Kha mi hma khan Luka 24:28-ah ‘Isua chu hla deuha kal tum angin a awm a’ a ti. Emau khaw kawng a khualzin pahnihte nen rei fe an kal ho hnuah Lal Isua chu ‘hla deuh a kal tum angin a awm a’ Bible in a ti. Unaute u, a Biblical em tih lam ka sawi lo. Ka rilru a a chian dan chu hetiang hi a ni. Zoram hi kum za zet Isua nen kan lengdun. Chumi avang chuan malsawmna pawh kan dawng nasa a. Unaute u, vawiin niah hian a ropui, lawm tham a ni. Pathian hnenah lawmthu kan sawi tur a ni. Thlarau Thianghlimin min chenchilh, zaninah pawh hian kan hnenah a awm. Pathian hnenah lawmthu kan sawi tur a ni. Amaherawhchu unaute u, han dâk zau hret ila, tunah hian a hnam pumpui ram pumpui ang hian han thlir ta ilangin. Ngaihtuah teh, Lal Isua hi kanram atang hian min kalsan ta ka ti lo, amaherawhchu hla deuha kal tum ang hian a awm a ni mai lo maw? Lendunpui atan kan Pathian hi kan duh tak tak lo a ni mai lo maw? Chuvangin zaninah hian kan ngaihtuah a ngai, ‘Aw Galili, ram vannei mi, a chhungah Isua a leng si. Kan ram pawh hi chham tak a ni. Tihmawiin Isua leng ve se kan ti.’ chuvangin zaninah pawh hian programme kan Synod pawhin a siam ve a, Kohhran unau dangte pawhin an siam a, chuvangin zanina harhna kan chan te hian unaute u, dai kilkâr hi kang thleng rawh se. Chumi a nih loh chuan kei chu Pathian nena lengduna inchhal hi a har ka ti, ka zak deuh, kan thuhriltute pawh an ni fo mai. Nichinakan sawi tâk ang khan mi dik tak engemaw zat an awm avang hian Pathian kan fak tur a ni. Unau duh tak te u, engmahin a khawih buai phâk lohva Pathian nena lengdun kan ramah hian mi thahnem ngai engemaw zat an awm. Hengte avang hian Pathian hnenah lawmthu awm rawh se.  
Amaherawhchu unaute u, a la tâwk lo, kan Pathian nena lengdun angin Zoram hi kan hmu thin em? Kanhnathawhna hmun kan office te thlir ila, kan sumdawnna hmun te hi thlir kual teh. Tin, chu mai chu ni lovin kan thalaite khawlaia khawsak dan leh Aizawlah te han leng ila, kan inchei dante hi Pathian nena lengdun kan ang em? Unaute u, zaninah hian sawi deuh pawh ka chak hle mai, amaherawhchu hunin min phalsak lovin ka hria. Unaute u, hetia han en vel hian mi lokal sela, Pathian nen Aizawl khawpui chu an lengdun tih kan puang ngam ang em? Kanpuang ngam lo a nih chuan nang leh kei hian mawhphurhna kan nei a ni. Zan lama kan khawpui dai vel leh kankhawpui boruak te hi kan hrechiang em? Kan fate pang a tatoo in chhu te hi kan hrechiang em? Chhungril nun chu zaninah hian kan hmu phâk lo ve, a lan danah ringawt pawh zaninah hian Pathian nen kan lengdun meuh maw? Hetia Lalpa faka hlim taka kan len a kan lam lai hian kan nun hi Isuan a hneh em em zia lantir tur in khawvel mite tih ang hi engzatnge kan tih loh ngam? Zaninah hian unaute u, kan ramah hian zawhna lian pui pui chhan tur kan nei. Thalai Baal hmaa thingthi ngai lo tam tak kan nei. Pathian hnenah lawmthu sawi a pawimawh. Chutih lai chuan unau duh tak te u, a langsar a tam zawk niin ka ring tlat kan sawi tâk ang khan, Lal Isua nena lengdun lo engemaw zât hikan la awm a ni lo maw? Nu leh pate hian Kasauti Zindage Serial tui taka kan en lai hian, kan fate khawlaia an khawsak dan hi kan hrechiang meuh maw? Unaute u, a hnam angin a ram angin Pathian nen kan lengdun tih hi kanpuang ngam ang em? Newspaper-ah te National Newspaper-ah te Mizoram chu Pathian nen an lengdun tih hi kanpuang ngam ang em? Zaninah hian a chhânna ka sawi lovang ka tih kha. Thutlukna siam turin ka dai zau tâwk lo. Amaherawhchu in inchhungah khan lo in zâwt theuh rawh u. Zaninah hian Pathian hmingin i inzâwt teh ang u. Pathian hnena kan hlan thianghlim tawh kan in chhunga kan room ngei a kan khawsak dan hi kan chiang em? Kanzawhna hi unaute u, ka chhang thiam lo. Amaherawhchu hei hi ka chiang, Pathianin pawn lama kan ram sualna kâng fai tur Thlarau Thianghlim harhna meipui Zoram hian kan mamawh takzet tih hi chu kan chiang. Chuvangin zaninah unau duh takte u, helaia Pathian khawngaihna azarah Thlarau Thianghlim pâwlna kan chan leh Thlarau Thianghlima harhna lo thleng mek hi pawn lam leh Biakin pawn lam leh dai kil kâr te hi thleng ve rawh se. Chumi atan chuan zaninah hian tan lo la ang che.  
Unaute u, ti hian ka khaikhawm mai teh ang. Tunah hian kan hmaah hian thil pahnih chiah thlan tur a awmin ka hria, Zoram mai pawh ni lo, khawvelah pawh hei hi niin ka hria. Kan ram hian duhthlan tur pahnih kan nei – Pakhatnaah chuan Pathian nena lendun chumi a nih loh vek chuan kan duh emaw duh lo emaw revolution, kan sawi nawn leh teh ang zaninah hian intelectual sermon atanga lo ngaithla pawh kan awm mai thei. Kan ram hian thil pahnih duhthlan tur kan nei. Pakhatnaah chuan Pathian nena lendun, amaherawhchu chu chu kan duh lo, kan hnar a nih chuan thlarau kan ti vui a nih ngat chuan kan hmabâk hi Revolution a ni thei. Amaherawhchu zaninah hian Pathian khawngaihna azarah Lalpan a Thlarau Thianghlimin a mite thinlungah hmun a nei, Lalpa chu fakin awm rawh se. Thim chhah tak hi Zoram hian a hmabâk hauh lovang. Kan ngaihthlâk tawh ang khan hnam dang leh khawvel zau zawkah pawh Isua chanchin tha meichher chhitna zau zâwkah a nih dawn avangin Pathian hnenah lawmthu i sawi ang u. France ramah chuan Revolution a chhuah dawn lai chuan sualna tinreng kan sawi seng lo, Bible ang thovin Pathian thinurna vâwr tâwp, a tawngbaw thintu mipat hmeichhiatna avangin harsatna an tâwk nasa a, an khawlaiah te chuan mipa leh hmeichhe serh lem te an kher keu kuau mai. Unaute u, Pathian thinurna an tawng buak tâk avangin thisen tam tak a bua a ni. Unaute u, zaninah hian Pathianin kan ramah chuan Kohhran leh Pathian Thlarau Thianghlim zarah mi hausa leh rethei inkarte hi suihzawmin a la awm a ni. A tha lo zawk kan sawite kha chu kan ram hian a hmabak lovang. Amaherawhchu unaute u, he lai hmuna awm chauh ni lovin, mahni in lum atanga lo thlîr tute pawh, kan ram hi chhuan lo awm leh turte tan awmna tlâk, midangte hnena nun luang liam kan neih theihna turin hekan harhna Centenary hian amah nena lengdun turin min ko a ni. A hnam angin min kova, tunah hian nangmah kha a ko che a ni zaninah. Chuvangin Pathian hnenah Lalpa nena lengdun turin i nun kha buatsaih rawh le.  
Mimal angin zaninah hian Pathian nen, a hnam angin kan sawi a, Zoram angin, mimal angin Pathian nen kanlengdun em? Kan rawn kal lam khan min phurtuin zai a play a, chuta ka rilru rawn khawih zawk chu. Nitin ka hnenah awm reng ang che Lalpa, keipawh i kianga awm ka ning lo. A va ropui em, sawi tam a ngai lo, Isua nena lendun hi eng dang a ni lo. Nitin ka hnenah awm reng ang che Lalpa kei pawh i kianga awm ka ning lo. Unaute u, chu chu a ni Pathian nena lendun nun chu. Tam tak chuan Lalpa hi kan ning thin. Lal Isua hi hnawk kan ti thin. Amaherawhchu zaninah hian amah nen kan lendun theih nan kan nunah Lalna chang rawh se. Chumi tur chuan zaninah hian Lalpa’n kan thinlung a lo hawn chuan kan thinlung kan lo hawn chuan, kan hnenah Lalpa a lo cheng dawn a ni. Thian duh tak, tunah hian Pathian nen in lengdun em? I  OO em? Kan hrethiam lo mai thei, Kum 1862-ah khan Thuhriltu hmingthang D.L.Moody-a chu London khawpuiah a thianpa nen an lendun laiin, Duplin khawpuiah dawrkai pakhat a thianpain a introduce tum chuan, hei hi chumi kha mi chu a ni a, thuhriltu hmingthang Moody-a an tih hi a ni a. Tahchuan chu pa chuan ngawi teh unaupa, kan thianpa thar chu chibai buk pahin a OO em? min ti a, ka thinlung a khawih kher mai tih hi Pu Moody-a’n a sawi a, I OO em tih chu thianpa enge ni OO tih awmzia chu? tiin an zawh chian nak chuan, OO tih chuan Saptawng in ‘Out and Out for Christ’ tihna a lo ni a, chumi awmzia ni âwma lang chu. Ngawi teh thianpa, kan thianpa chu Lal Isua nen an lengdun em? Engkimah Isua hi a ringin, engkimah Isua hi a hmang tangkai em? Unaute u, zaninah hian kan OO em? Pathian nen in lengdun em? A nung a nung, Krista Isua a nung, kan inkâwm, kan lengdun thin nun kawng zîm takah hian. A nung a nung chhandamna pe turin. Khawvel miten, engtin pawn sawi se, a nung tih ka hria. Pathian nena lengdun chu unaute u, nun kawng zîm takah hian, unau duhtak, zaninah hian Pathian hmingin ka zawt a che. Ringtu hming pu si in hla takah em ni Isua hi i zui? Aw! harhna a thlen theihna tur hian mimal tin hian tihlawhtling thei ila aw. Zaninah hian hla takah nge i zui hnai takah, Pathian nen in lendun? Petera ang khan em ni hla takah i zui in fiah teh. I nunah Isua hi hla takah kal tum angin a awm ve em? A hla vawng vawng em? Tunlai tawngin i ro ngawih ngawi em? Hmân zanah kan ngaihthla tawh a, Immanuela hi lendunpui lovin kan ti hnawng ve thei a nia, Pathian nena lengdun turin Pathianin min sawm a ni. A chhanna pahnihna a awm thei Bible-ah, ka sawi deuh ang ka ti na a, tawi te in kan sawi lawk teh ang. Unaute u, Gerasin ram mite khan, Marka 5:17 kan chhiar chuan an kawchhung ata ramhuai, misual kawchhung ata ramhuai hnawtchhuaktu atan Isua an duh, amaherawhchu lendun puiah an duh hauh lo. Engvang nge? A tawi zawngin sawi teh ang. Vawk a hek lutuk. Ramhuai pai a hnawtchhuak a, vawk kawchhungah an tlân lut a, vawk sanghnih an thi. Chu chu a len zawng Bible in a sawi lova, ka chawk rual a, pakhat Rs 7,000 theuh ka chhiar a ni. Tichuan thlarau bo pakhat man na atana senso zat chu cheng Maktaduai sawmpali a tling nia, Lal Isua thlenna chinah khan a hek lutuk a, lendunpui tak takah Lal Isua kha an duh lo.  
Unaute u, kan ramah hian Lal Isua hi hausakna atan chuan kan duh, amaherawhchu kan hmun kil khâwr ber thlengin kan welcome em? Lal Isua hi Unaute u, kan sâwm em, kan duh em? Unaute u, min chawimawitu atan a Kohhrante hi kan duh, kan nun kil khâwr ber thlengah kan ngaihzawngte nen kan inkara leng turin kan phal em? Miin chutiang anga a phal theih chuan kan ramah harhna a thleng ang, a thleng mawlh ang. Zaninah hian tun aia thuk zawka lo luh hi Lalpan a duh a ni. Tunlai tawngin min lo hrethiam teh u, tun aia in close zâwka lendun Lalpan a duh a ni. Tunah hian kan ram hi a mawi a, a ropui, hetia kan programme te hi a va han mawi tak, a va han ropui tak em. Amaherawhchu a aia thuk hi a la awm a ni. Harhna meipui au thla turin zaninah hian Lalpan nangma nunah kawngkhâr a kik a, a hnawng em? Tin, ka’n sawi leh hrâm duha chu Lal Isua a hnawn theihna pakhat Bible-ah kanhmu a. Marka 6-ah khan Nazareth-a a seilenna-ah khan Lal Isua a lo thleng. Amaherawhchu Lal Isua Krista kha an ngai common lutuk a, chuvangin Lal Isua kha a hnawng nia! Unaute u, nichina thuhma kan sawi tak ang khan Zoramah hian Isua chanchin Simple Gospel thuthlung thisen hi thil narânah kan ngai palh ang tih a va hlauhawm em! A mak deuh leh eng emaw deuhah chauh hian tum lovin, sim tura thu min pek lai hian i sim mai teh ang u. Unaute u, eng emaw thilmak chhinchhiahna dang phut lovin, Lal Isua thisen kha Hebrai 10-ah khan thil narân a ngai chu sual rapthlâk ber a ni a tih kha. Zaninah hian Zoram hian Lal Isua chanchin mâwl te hi i tuipui leh teh ang. Zaninah hian Kohhran mi chauh ni lovin kan zavai mai hian eng emaw ni thuril leh thu thuk leh thil dang Lal Isua chanchintha amah tak ni lo thil dang kan buaipui avangin harsatna kan tâwk fo a ni. Chuvangin Isua kan tih hnawn theihna chhan chu Nazareth mite khan Isua hi an ngai common lutuk a, chuvangin Isua a hnawng a ni. 
A dawt lehah chuan chelhdin theih Isua Krista tih hi ka’n sawi tawh ang e. Pathian nen zaninah hian kan lengdun em? Ka rilrua tla na em em chu Pathian nena lengdun tia inchhâl ngam lo engemaw zat kan ramah hian kan la awm avangin ram pum huapa thusawia ka inngaih avangin unaute u, min lo hrethiam teh u, hei hi sawi ka duh a ni. Thlarau thianghlim ang zâwng pawhin sawi dawn ila, zaninah hian min kalsan lo ve, chelh din theih a ni. He Kohhran hian Thlarau Thianghlim hi a welcome a ni. Amaherawhchu unau duh tak te u, kan  Lal Isua Krista hi amah mamawh ngawih ngawihtute tan lo chuan a hnathawh leh thiltih hi hmuh a har khawp mai. Koh ei theih kan Pathian a ni. Sawi thui a châkawm hle mai mahse, kan chhinchhiah atan chauh thil pathum kan sawi ang e. Chanchintha Luka bung 19 kan chhiar chuan Lal Isua programme-ah khan chhun pelh tur a ni. Lal Isua programme-ah Jeriko-ah châm leh chawlh a lang lo. Amaherawhchu unaute u, Lal Isuan Jeriko a chhun pelh dâwn khan a khaw mipuite pawhin engah mah an ngai lo, misual anga an ngaih misual Zakaia’n a chelh ding thei. Aw Galili, ram vannei mi, a chhungah Isua a cheng si. Unaute u, zaninah hian kan ram hian Lal Isua kan va mamawh em! Zaninah hian mimal khawvel nena lengdun, amaherawhchu hlimna hmu zo tak tak leh thlamuanna hmu zo si lo khan Lal Isua i mamawh a nih kha, i awm hmun atang khan inngaitlawmin Lal Isua hi lo chelh ding rawh le. Zakaia ang khan Lal Isua i chelh tlat chuan a ding ang a, i inchhungah a lo lut ang. Hei inah hian chhandamna a lo thleng ta i ti ve dawn a ni. Zakaia anga i inngaihtlawm a theipui ler atanga Lal Isua a hmuh theihna atana a mamawh ngawih ngawih tana koh din theih Lal Isua kan zingah hian a awm e. Unau duhtak, tunah khan i hmaah khan Lal Isua thlarau chuan hei i tan mi sang tam tak an tawngtai asin. Tunah hian misual nung tlâk lo i ni tih i inhria a nih pawhin tunah hian ‘Isu Isu’ tiin lo chelh ve rawh. I nunah Lal Isua a lo lut ang, Unaute u.  
Pahnihnaah chuan Jaira fanu thih thuah Lal Isua an ko. Zualko ten Isua an ko ei, amaherawhchu, unaute u, kalkawngah khan, Jaira chhungte aia urgent zawk midang hmeichhe thi put pakhat a awm a, a kal laklawh âwm tehlul nen Lal Isua hian mi beidawng leh amah mamawh ngawih ngawihtute hi unaute u, a en thei mawlh lo. Tih tak taka amah lendun puia sâwmtute hi Isuan tukhum chhah a chhawn ngai lo. Lal Isuan a hmangaih a, hmangaihna kutin a chelh thin. Unaute u, Thlarau Thianghlim tunah hian kan hnenah a awm e, in inchhungah pawh khan Thlarau Thinghlimin tunah a rawn fan che. Tunah hian hmeichhe thi put ang a na ngawih ngawih, aw ka thlarau vakvai i Lal in hmu lo vem ni.? En rawh, Zion fate chatuan ram ropui panin an kal mek e. TV-a Pathian khawngaihna an chan avangin an hlim a, an lâwm a, lâwm mek i hmuh lai khan i thlarau nun kha zâwt la, Aw ka thlarau vakvai, i Lal i hmu lo vem ni? tiin inngaihtuah rawh. I awmna hmun atang khan hmeichhe thi put angin unaute u, helaia mi sang tam takin Lal Isua an koh mek lai khan i awm hmun atang khan i nat em vangin Lal Isua hi lo ko rawh, a puan hmâwr lo dek ve rawh. Pathian ropuina i hmu ang. Haleluiah Lalpan a khawih ang che. Lalpan a tidam ang che, zaninah hian chu chu Bible-in min hrilh a ni. 
Zaninah hian unau duh tak, kan zingah pawh hian ka tawng in huat thu suhah nula vanga lokalte pawh in awm mai thei, inthiam lo ngawih ngawihin tlar hma lamah pawh i lo thu a ni mai thei. Khawnge zaninah hian mipui an pungkhâwm tam em mai, an thawm mitdelte hriat khawpin tih ang khan zaninah hian he Thlarau Thianghlim proramme hian a rawn ko che a nih pawhin mak ti suh. Thlarau Thianghlim aw a ni, i thut hmunah khan tunah hian nang aia sang pui pui milian Jaira-in a fanu thi kai tho tura Lal Isuan a va cho chhuah mek lai hian Nazareth Isua a kal lai hian lo chelh ding ve rawh le. Tun hunah hian a puan hmâwr lo dek ve rawh, tihdamin i awm ang. Lalpan malsawm che rawh se. Unaute u, thil pakhat sawi ka duh leh chu Jabok lui kamah Jakoba bumtua khan kan Pathian thianghlim hi zu chelh ding thei a, a va ropui em! Hmânni ah khan Moderator-in ropui takin inhlan tharna programme ah a sawi tawh. Sawi zui vak ka tum lo, amaherawhchu lo ngaihtuah rawh mahni sualna inhria a, a u Esauva hmel hmuh hlauva Lalpa bum tum a ka ni, misual ka in tia, a u Esauva hmu ngam lova Jabok luia inngaitlawm taka Lalpa au tu khan khawfing chah thlengin Lalpa a buan a, a hnenah malsawmna a lo thleng ta. Bumtua chu bumtua ni tawh lovin Pathian ngaihdamna famkim chu a chang ta. A hmingah pawh hming thar ‘Israel-a’ ‘Pathian Lal fa’ tih a ni. Unaute u, zaninah hian he inkhawmna hmuna i lo kal hian Pathian nena lengdun turin i kut phar chhuak rawh. A chelh che ang a, bumtua ni tawh lovin zaninah hian Pathian lalfa ‘Israel-a’ an ti tawh dawn che a ni. Lalpa nena lengdun tawh turin tun hunah hian i vawn thin leh Isua nilo i lo lenpui thinte kha sîrah hnâwl la, Lal Isua nena kal dun tawh turin in peih rawh le. 
Unaute u, a dawt leha ka sawi duh chu hei hi a ni. Kan hnenah awm ta che tih hi a va lunglenthlâk em! Chelh din theih, koh ei theih Isua hi unaute u, sâwmtute hnar ngai lo Lal Isua a ni. Zaninah hian Pathian khawngaihna azarah Thlarau Thianghlim kan zingah a awm a ni. Unaute u, he kan programme hi Zoram pumpuia harhna meipui fawh kaina atan Lalpan a hmang duh a ni. Chumi atan chuan zaninah hian sâwmtu ni turin Lalpan a duh che. Amah nena lengdun turin Lalpan tunah hian a sâwm che, chutiang bawkin keini pawhin tun hunah hian, ‘Kan hnenah awm ta che, khua a tlai dawn ta e’ tiin Lal Isua hi i ko ang u. Entirna pakhat ka rilru khawih em em han sawi leh ka duh, hun ka hmang rei deuh tawhnâ a min lo hrethiam ulangin, vawikhat chu nufa pangpar huanah an kal a, huan a la kal ngai lohna a nih avangin a nu chuan a kai a, nuam hi an ti em em a, pangpar mawi tak takte a va hmu a, tahchuan chu a fanu naupangte chu huan an thlen a pangpar mawi lutuk an hmuh khan ama duh thu ngeiin a nu kaih pawh a duh tawh lo, a tal chhuak a. A nuin khaih khaih, i tlu ang a tih pawhin. Amaherawhchu tap chungin a tâl chhuak a, pangpar mawi zingah chuan a va fang kual ta a ni âwm e. Tahchuan mawi hi a ti em em mai a, a nu pawh a ngaihsak tawh lo. Amaherawhchu a tawi zawngin sawi ilangin, nakinah chuan tlai khua a lo ngui, zan thimin a nang dawn ta, ni a lo hniam tan ta, khua a lo tlai ta, nakinah phei chuan tlai ni a lo liam dawn ta a, tah zet chuan a nun tihlimtu pangpar mawite chu a lo chuai ve ta, tah zet chuan chu naupangte chuan enge ni a hriat chhuah tâk kan tih chuan, thildang a ni tawh lo, pangpar mawi leh rimtui chuan a hnem zo tawh lova, tahchuan a inhre chhuak. A nu a zawng tan ta, a nuin a duh lova, a paih thla a ni lo. Amahin a tal chhuak a ni. Zaninah hian kan hnenah awm ta che khua a tlai dawn ta. Khawvel parmawina leh khawvel mawina ina a awih tlei nun neite kha, khawvel hun hnuhnung lamah hian hei thlarau ruah hnuhnung Lalpan a sur tîr mek e. Khawvel mawinate hi lo vul thin mahse, Unaute u, kan khawvel nî a kin dawn, tlai ni kâwlah a tlâk dawnah chuan, khawvel parmawina hian kan nun a tihlim zo tawh lovang. Tahchuan chu naupangte pawh chu a nu ngaiin a tap ta. A rawn tlân phei, a nu’n a hmu reng pangpar buk phen atangin, tahchuan mi au rawh se tiin a nu’n a nghâk, tahchuan tah chhuak em emin ka nu khawnge i awm? Tahchiah chuan a nu chu pangpar buk phen atang chuan engatinge min kalsan? a ti a, a tap hawm hawm mai. A nu chuan Mamte ka kalsan lo che, ka kut atang khan ka kalsan reng reng lo che, ka phihthla lo che. Mahse, Mâmte, nangmah zâwk kha pangpar mawinate khan i nun a hneh em avâng khan ka kut atang khan i tâl chhuak a. Amaherawhchu ni a lo tlâk dawn meuh chuan pangpar mawinate chuan i nun a ti tlei zo ta lo che a, keimah bawk min ngai a, ka hnena i lo kir leh hun hi ka nghâk reng che a sin. Tahchuan chu hmeichhe naupangte chuan ‘Ka nu, ka kalsan ngai tawh lovang che.’ tiin a kutah a kai leh ta a ni. 
Zaninah hian Unau duh takte u, kan zingah thlarau fa inti thin, amaherawhchu hmâna kan lawmna pawh pha tawh lo, he Revival Centenary lawmna beisei em em a, thlarau nghâk in awm em? Tunah hian Lalpa’n a hmu reng che a, amah nena lendun puiah a nghâk reng che a nih hi. Chuvangin khawvel nawmna zâm ral leh mai tura i inawih tleina ata kha lo zuang chhuak la, hmangaihtu Pathian ângchungah hian lo zuang chhuak la, hmangaihtu Pathian ângchhungah hian lo zuang lut rawh le. Tichuan Thlarau Thianghlim pawlna thar Lalpan a pe ang che. Kan hnenah awm ta che, khua a tlai dawn ta e, tihtak zetin zaninah hian sâwm rawh, “Thu chuan a hnaih a che, i ka leh i thinlungah pawh a awm.” Rom 10:8-ah Lalpa thlarau hi unaute u hmun leh hmunah kan ti vui palh ang e. Zaninah hian engtinnge Lalpan a tih? “Min au la, ka chhâng ang che, thil ropui leh inthup i hriat ngai lohte chu ka entîr ang che,” a ti. Zaninah hian kan Lalpa i âu ang u, kan hnenah awm ta che khua a tlai dawn ta, i ti ang u. 
Unaute u, a tâwp ber atan chuan kan Pathian au ei turin amah nena lengdun turin thil pakhat tih mâkmawh a awm a, hmân zanah khan kan thuhriltuin a rawn tarlang zauh tawh a. Amaherawhchu ka lung a ti leng em a, kan sawi nawn leh hrâm teh ang. Chu chu hei hi a ni, ‘Pathian nen lo inrem rawh u’. Zaninah hian kan inkâra tla zep zawng zawng, Lalpa nena kan lendun theih lohna min daltu zawng zawng hi Thlarau Thianghlimin kâng fai rawh se. Tichuan kanramah hian harhna a thleng ang. Engtinge Mosia’n a sawi kha? “An inrem chauh loh chuan mi pahnih an lengdun ang em ni? Unaute u, kan Pathian lam hi chu a inpeih asin, kan Pathian hi chu zaninah hian lengdun turin a inpeih a ni. Amaherawhchu kan inkarah hian dâltu a awm a ni thei, chuvangin zaninah hian Pathian nena lendun theih lohna tura daltu awm hi Kraws thiltihtheihnain i khengbet ang u. Ka rilru khawih em em thin chu 1906-ah khan, hei a kum za-na chiah a ni a, Toronto khawpuiah AR Torry, thuhriltu ropui takin crusade an nei dawn a, harhna inkhawm ropui tak an buatsaih dawn a, chuta an thiltih Lalpan mal a sâwm em em chu hei hi a ni. Lehkha sen lar inches 6 a sei, inches 3 a hlai, book mark tiat vel lek hi a ni awm e, chu chu tam em em mai hi an chhu a, chu lehkha sen te reuh te ah chuan he thu hi an ziak a, “Pathian nen inrem rawh” tih hi. Unaute u, mak tak maiin chu thuziak an sema chu Lalpan mal an sâwm ta a le, harhna hmanrua atan Lalpan a hmang a, harhna ropui tak chumi hmunah chuan a lo thleng ta a ni tih hi ka chhiar a. Unaute u, zaninah hian lehkha them sem tur ka nei ve lo, amaherawhchu zaninah hian he thuchah hi Lalpan min pe, kan rama harhna a thlen theihna turin Pathian nena lengdun thin a inhria, a thlarau fa inti, piangthar tawh inti te nunah pawh Pathian nena kan inzawm, kan lendun theih lohna dâltu Pathian rem theih loh i nun ami kha zaninah hian Pathian hmingin paih thla rawh. Pathian kan rem chuan unau duhtak te u, keimahniah Thlarau Thianghlim thiltihtheihna a lo thleng dawn a ni. Pathian nena inrem fel turin Pathian lam a inpeih, keimahni lam kan buai zawk a ni.  
Unaute u, kan sawi leh lawk min lo hrethiam teh u, Pathian min hmuh dan hi kan inpawm thlap a ngai a ni. Kan Bible chang chhiarah engtinnge kan hmuh kha, “Ka hmingpu”a ti. Zaninah hian helai hmuna lo kal khawm Lalpa hmangaihtute hian Lalpa hmingpu tute hian inngaitlawm a, kan nihna dik tak hi hria a, Lalpain misual in ni a tih chuan, Ni e, Lalpa  misual kan ni ti mai ila. Lalpain min hmuh dan ni lova awm phet kan tum hian bumna keimahniah chhak chhuahin a awm a, chu chuan Thlarau Thianghlim hi a dâl a nih hi. Chuvangin zaninah hian Lalpan in ni a tihna hmun, Lalpa misual ka ni, Lalpa ka sual a ni zaninah hian kan ti mai dawn lâwm ni. Sual entirnan min pui turinthlarau chauh a tangkai. Unaute u, hetianga hlim em em a kan awmlai hian ka rilruah tuihalna pakhat ka la nei. Sual inhriatchhuahna tak tak he Revival programme hian thlen rawh se. Lâm ka sawisel a ni lo, kan hlim leh lâwm lai hian keini sual nih inhria, ngaihdamna chang tawhte hi kan hlim a ni thei e. Amaherawhchu misual nih inhre ve lo te hi Lalpa hmaah an tlukluh theihna turin Thlarau Thianghlim hian hna thawk rawh se. Chumi tur atan chuan unau duhtakte u, i tuihâl ang u. Jonathan Eward-a thusawi Pathian thlarauvin a hman tak tak chuan ‘an rahbîte a tleu hunah chuan’ tih a sawi zan phei chuan, chu a sawina khawpui chu in tin mai hi tahna in a ri chhuak chuah chuah mai a ni. Harhna a lo thlen a, Lalpa nei ngai lote amah nena lengdun tura a koh hian unaute u, thlarau lungchhiatnate, sual nih inhriatna a lo lang thin. Unaute u, chumi chu a tâwi zawngin  ka sawi mai ang. “An nun dan sualte an hawisan chuan Van atangin ka ngaithla ang a, an ram chu ka tidam leh ang,” Lalpan a ti. Unaute u, zaninah hian kan awm dan sualte kan sim a, kan hawisan chuan Lalpan min ngaidam leh dawn a ni. Sual vanga tawrhna, lungngaihna, inchhîrna, tahna hi a tâwk mai lo. Simna kailawn a ni, Simna tak tak a thlen loh chuan sual zualna mai a ni.  
Unaute u, zaninah hian ka’n sawi uar hret teh ang. Sual inhriatna leh sual phatna hi simna a la ni lo ve. Juda Iskariot-a khan nasa takin a sualzia a inhria a, amaherawhchu simna tak tak a thlen loh avangin a in awkhlum a ni. Simna tak tak chu unaute u, rilru lamlet a ni, Pathian hnaih a ni, thinlung danglam a ni, Lal Isuan a sawi. Pain fa pahnih a nei a, ‘Grep huanah hna va thawk rawh u,’a ti a. Pakhat chuan, ‘Aw le’ a ti a, mahse a kal chuang lova, pakhat chuan ‘Ka duh lo’ a ti a, mahse a rilru a lamlet a, a kal ta a ni. Unaute u, kan inchhirna leh kan lungchhiatna piah lamah hian simna tak tak a la awm a ni, nun danglam a ni. Ruth Maxon-i chuan, ‘Sual phat loh hi simna a ni lova, simna chu tih tawh loh a ni’ a ti. Unaute u, a tan tirh atang khan kan ngaithla tam tawh hle mai, zaninah hian Pathian khawngaihna avanga hetia harhna a lo awm a, kan hlim hle lai hian he programme hian ram pumah simna thlarau rah chhuah rawh se, chumi ni tur chuan Lalpan Zoram mipuite hi malsawm rawh se. 
Zaninah hian Lalpa thiltihtheihnain unaute u, chhinchhiahna mak tak tak leh engemaw in kan nunah a thawk lo a nih pawhin hawikir lehna remchang kan ramin kan nei a ni tih hriain kan tih dik lohte sim a ti tawh lo turin zaninah hian Lalpain min ko a ni. Awle, Pathian nena lengdun turin zaninah hian nang leh kei hi Lalpan min ko. Unaute u, keimahni tan chauh a ni lo ve, midangte tan pawh a ni. Kan thu khaikhawm nan, Pathian nena lengdun harhna meichher kengtu tur Lalpan zaninah hian a zawng a ni. Chumi tur chuan zaninah hian chona ka’n siam teh ang. Mahni leh Pathian inkar mai ni lova, Pathian nena lendunna zâr zo tura midang ten min nghah thup lai hian unaute u, zaninah hian Lalpan ram hi a tihchhiat loh nan dâi theu tur leh ram chhana a hmaa tang tur mi a zawng a ni. Chutiang mi ni tur chuan Lalpan a nghâk che a, meichher keng turin  tunah hian Lalpan a duh che. Tunah hian sualna meipui lakah i him a nih pawhin i tu leh fâte ah hian sualin kan ram hi a rawn kan kâi zel chuan kan him dawn chuang lo. Amaherawhchu unaute u, zaninah hian Ezekiela 22:30-ah a sawi ang khan “Ram chu ka tihchhiat loh nan an zing ata dai theu tur leh, ram chhana ka hmaa tang tur mi ka zawng a ni.” Lalpa’n a ti. Tunah hian midangte tana malsawmna ni turin a tlar hmaah, sualna rawn pun lun mek, sual kângkai zel tur lo dang chat a, hnehna puang chhuak tur a, tlar hma a ding tur leh harhna meipui chhi turin Pathian nena thuk taka lengdun a, khawvel hneh a ngam turin Lalpan a sawm che a ni.  
Lalpa’n a thu kan za atan mal min sawm sak rawh se. Amen 
Note: Sermon hji April 7, 2006 (Zirtawpni Zan)a Revival Centenary Lawmna Inkhawma a thusawi a ni.
Read more »
Tweet Share Share Share Share Share

July 23, 2017
Pathian ka lungpui hnenah chuan,
“Engah nge mi theihnghilh le?
Engah nge dotu hnehchhiahna avanga lungngaia ka van ruai thin le?” ka ti ang. 
Ka ruha khaidaih awm ang maiin mi dotute chuan mi sawichhe thin a; 
“Khawiahnge i Pathian le” mi lo ti chamchi a. 
Aw ka nunna, engahnge i kun reng? 
Engahnge ka chhungah hian i buai reng ni? 
Pathian beisei rawh; amahah chu ka la fak dawn si a,
ka hmel tidamtu leh ka Pathian chu… 

Pathian Thu(Sam 42 :9-11) 
Pathian beisei han tih hi amahah in nghat tih te, amah ring tihte hi a ni vek a, tunlai khawvelah hian Pathian a beiseina nghah a, rin hi ngam loh a awl ta hle mai. Pathian chauh ringa beisei hi a tawk zo dawn lo va rinna leh hlauhna hi mi tam tak in kan nei ta niin a hriat a ni. Amaherawh chu Pathian hi a pangngai reng a, hman a mi te tan a beisei tur awm ang leh dinhmun harsatna chi hrang hrang tawk ten Pathian an beisei a an lo hlawhtling ang khan vawiin ah pawh hian Pathianah hian beisei tur a la awm a ni tih hi he Kumthar thuchahah hian sawi ka tum chu a ni a.
Beiseina hi mihringte nun hruaitu leh mihringte nun innghahna a ni ti ila kan sawi sual lo ang. Kan nitin awmdan awmze neih tirtu leh kan khawsakna phung mi siam sak tu bulpui ber chu kan beiseina hi a ni. Chu beiseina chu khawvela kan beisei kan nghah chang te; milian leh mi ropuia beiseina kan nghah chang te; sorkar leh tute emaw kan nghah chang te hian a lo hlawhchham thin a, chutah chuan kan lungawi lova kan buai thin a, kan phunnawi a; kan beidawng thin a ni. Amaherawhchu Pathian chu a thutiamah a dingnghet a, a rinawm a, a tih tur chu a ti zel a ni. Chuvangin Pathian beisei rawh tih hi tunlai khawvel dinhmun harsa takah hian thu pawimawh ber angah a ngaih theih ang.
Mi thenkhat chuan sualna leh harsatna kan tawh hian Pathian atanga hla taka awm angah kan in ngai a, Pathian mit hmuha kan tih loh tur kan tih chang te hian Pathian lakah kan inthlahrung thin a. Pathian han beisei leh ngam tur ni pawhin kan in hre lo hial thin a ni. Amaherawhchu, Pathian thu chuan harsatna tawk te, misual te, dinhmun chhia te, Pathian mit hmuha tling tawh lo a inngai te tan beiseina hi siam a ni zawk a ni tih hi i hre thar leh ang u.
He kum tharah hian natna avanga he kum thar chuangchhuak ve hram ni a inngai; kum thar lo awm tur pawh lungngaihna nena hmuak mek engemawzat kan awmin ka ring. damloh harsatna tinreng leh damlohna khirh ber ber a kan ngaihah te pawh hi Pathianah hian beisei tur a awm a ni.Kan Lal Isua hun lai khan damlohna harsa ber nia an sawi thin chu phar natna hi a ni. tihdam theih loh a ni a; chhungte zingah pawh awm thei lovin daipawnah a hranin an khung hrang hial thin a ni. Chutiang ang beiseina nei lo harsatna tawk lian ber zinga mi pharte pawh kha Lal Isua hnenah beiseina neiin an lo kal thin a, chung pharte chu Lal Isuan a lo tidam a ni tih kan Bible-ah hian chiang takin kan hmu a ni. A hun laia khawvelin tih ngaihna an hriat loh harsatna chu kan Lal Isuan a hneh a. Hlim tak leh Pathian chawimawitute zingah khan phar tihdamna changtute hi an tel ve a ni. Chuvangin, vawiinah hian eng natna dinhmun khirh takah emaw i ding a ni mai thei e, Pathian beisei rawh. Amahah chuan beisei tur a awm a ni. A hnenah tawngtai la, a hnenah innghat la, amah chu ring rawh. Pathianin tihngaihna a hriat loh khawpa harsa hi a awm lo ve. Chuvangin pathian beisei rawh.
Sam ziaktuin “Aw ka nunna, engahnge i kun reng? Engahnge ka chhungah hian i buai reng ni? Pathian beisei rawh;” a tih ang khan Pathian beiseina thar nen he kum thar hi i hmang ang u.
Mahni sualna avanga lungngai tam tak kan awm a, misualte avanga lungngaite kan awm a ni thei. kan Lal Isua he khawvela a lo kal chhan bulpui ber chu, chung misual; sualna avanga lungngai, mahni tihngaihna in hre tawh lo, mahni inchhandam thei tawh lo, mahni intidam thei tawh lo te ti dama chhandam tur leh anmahni rawn siamtha leh turin he khawvelah hian a lo kal a ni. Chuvangin eng sualna avang pawhin mi a lo lungngaiin a lo mangang a ni thei e. Nimahsela, vawiin niah hian chung sualna avanga lungngai leh mangangte tan chuan Lal Isuaah hian beisei tur a awm a ni.
Nitin mi sang tam tak chung sual te avanga lungngaia Lal Isua hnena lo kal a, amah rawn beisei a, damna chang a nun thar chang hi kum thin, thla tin, nitin hian an la pung zel a ni. Chuvangin, nang khan i sualna avang leh nangma nuna i beidawnna avang khan Pathianah beisei tur a awm ta lo a ni lo ve. Mite ang bawkin Pathianah beiseina neiin amah chu ring la, amah chu bel la, vawiin niah hian i tan pawh beisei tur a la awm a ni.
Kan Lal Isua hun lai khan hmeichhe sual lar tak mai a hming pawha an koh loh hmeichhe sual an tih hial tawh pakhat chu Lal Isua hnenah a lo kal a. A hun lai mite lakah chuan a beidawng hle a, Lal Isua hnena a lo kal tum pawh khan amah beituten an hual thup ti ila a sual lovang. Amaherawhchu, a rawn belh tak Lal Isua khan chu hmeichhia chu a lo ti dam a, a lo chhandamin a lo ngaidam a; chanchin mawi tak a lo pe thar ta a ni. Vawiin niah pawh hian chung sual avanga lungngaiten Lal Isua an belh a, an lo dam pui a, an lo hlim pui a, an lo thlamuan pui ang chiah chuan Isua Krista chu niminah nen vawiinah nen a pangngaiin a awm reng a ni. Chuvangin misualin, mi lungngaiin; thinlung tih tak zeta Lal Isua a belh a, Lal Isua a pan a, amahah chuan beiseina a neih chuan vawiin hi a damna ni a ni thei a. Tun darkar hi sual avanga lungngaite tan thlamuanna a ni nghal thei a ni. Chuvangin eng sual pawhin min ti buaiin a tibuai a ni thei e. Pathian beisei rawh, Chhandamtu chu beisei rawh. A hmelah hian damna a awm a, sualna avanga lungngai te tan Pathian beiseina kawng a in hawng a ni. Chuvangin he kum tharah hian beidawng lovin chu Pathian chu beiseiin kum a thar ang hian chu beiseina eng min petu Lalpa chu i bel ang u. A ni chuan min tithlawn dawn lova, min ti zak dawn lova, min chhandam dawn a ni.
Tin, A dang leh chu sual avanga lungngai ringawt pawh ni lo, amaha beiseina nei tawh lova tlan bo hial tawh ni a inngai te tan pawh hian beisei tur hi a la awm cheu a ni. Bible-ah hian tehkhin thu lar tak amah kan Lal Isua ngeiin a sawi chu a awm a, Fapa tlanbo tehkhin thu kan hmu a. Hei pawh hi a pa laka a chanvo zawng zawng chu a la a, a tlanbo tawh a. Ama mihring ngaihtuahnaah chuan lo kir leh mahsela a pa hnenah chuan chanvo engmah nei tawh lovah a in ngai a ni. Amaherawhchu, a rilru beidawng takin a va tlanbona hmunah chuan a awm a, ei tur a nei lova, thian a nei lova, tanpuitu a nei hek lo. Chutih lai chuan a pa hnena kir leh turin ngaihtuahna a siam a. Tichuan, a pa hnena a lo kir leh chuan a pain a lo dawnsawn dan Bible-a kan han en hian a tlanbo hmaa a chanvo aia ropui zawk he fapa tlanbo hian a pa angchhungah hian a chang leh thei a ni. Chuvangin Pathian hnen atanga kan tlanboin, Pathian kan chhuahsanin kum hlui lo kal tawh te kum tluanin Pathian duh loh zawng tiin beidawng tak leh riltam tuihalin tunah hian kan awm a ni mai thei e. Mahse Pathian hnenah kir leh rawh, amahah chuan beisei tur a awm a ni. Sual avanga lungngai beidawng tawh te an lo kir a, chumi te chu Lapan a lo dawngsawng dawn a ni tih tehkhin thu amah Lal Isua ngeiin a sawi hi a rintlak a ni.
Dik tak chuan tuna kan Kohhran hruaitu pawimawh tak tak kan tih te leh rawngbawltu ropui tak tak kan tih te hi chumi sual avanga lungngai tawh; mahse Chhandamtun a lo tih dam tawh; chu damna changa rawngbawl tura lo penchhuak leh ta te an ni vek zawk a ni. Mifel chhamdam khawvelah hian tumah an awm lova, misual chhandam awmkhawm kan ni zawk a ni. Chuvangin tumah inthlahrung lovin chu Pathiana beiseina awm chu he kumtharah hian i bel ang u, i pan ang u. Amah chu vawiin niah hian kan beiseina, innghah nan i hmang thar leh ang u, anin min ti thlawn dawn silova. Kan sual leh kan bawhchhiatna te chu hriat renga awm tawh lovin, a ser nen lam hian Lalpa chuan min ti dam thei a ni. Chuvangin i tan pawh ka tan pawh vawiinah hian beisei tur a la awm a ni.
He khawvelah hian ropuina kan um thin a, malsawmna tam tak dawn tumin a thim a var pawh thlu lovin; a dik leh dik lo pawh sawi thei lovin kan tlan bawrh bawrh emaw tih turin khawvel hi a awm a ni. Pathian thu hi ngun taka kan han chhiar a, hun kal tawh zawng zawng te kan han zir hian Pathiana beiseina neitu te leh amah beltu te hi a ni ding chang thin zawk chu! Dik lo tak leh fel lo taka ti a, mahni theih ang tawk tawka in haivur tuma titu te hi a tawpah chuan beidawnna tlangah hian an mualpho fo thin a ni.
Vawiin niah hian hausakna te, ropuina te kan um dawn anih pawhin amah Pathian hnenah hian ropuina pek theihna te, hausakna pek theihna te, malsawmna pek theihna te hi a awm zawk a ni. Amah beltute chu an mualpho dawn lo a ni.
Hebrai sal tang pathum Daniala te, Henania te, Misaela te, Azaria te chanchin kan chhiar a. Daniala Bung khat-ah hian thil mak deuh mai awm chu Lal khawnbawl ni turin i ti mai ang (a tawi zawngin) Interview a awm dawn a, chumi atan chuan in chawm thau lawkna, in tih fin lawkna (tunlai tawng chuan training ang pawhin a sawi theih ang) hun pawimawh tak kal tlang tur an nei a ni. Chutah chuan an lo fin theina tur te, an hmelte a lo mawi theihna tur tein ei leh in tur tuihnai tinreng chu chhawp leh pek an ni a. Nimahsela, Daniala leh a thiante chuan chu chu an duh lo. Lalpa duh loh zawnga in tih hmelthat emaw in tih hmel mawi emaw, in tih fin emaw chu anni chuan thain an ring lova, chumi chu tih loh an tum tlat a ni. an mahni enkawltu chuan a hlauthawng hle a, reiloteah an hmel te a lo chhe bikin an lo cher bik ang a, chutih hunah chuan lal hmaa thlen turin thlen tlak loh hial an lo nih chuan ama chungah hotute chu an hlauhawm dawn a ni, a ti a. Amaherawhchu, Daniala te chuan, ni sawm min fiah rawh, chutah chuan kan Pathian beisei kan neiha hian min ti thalo ta anih chuan i mi pek a piang kan ei ang e, an ti a ni. Chuti chuan fiah ni a lo thleng a, an han fiah ta a. Mak tak maiin an beisei Pathiana chu a lo fail ve ngai si loh avangin midangte aiin an hmel te chu a lo thain a lo mawi ta zawk a ni.
Vawiin niah hian helai thu hi a pawimawh em em a ni. Pathian kan beisei a, amaha kan innghah a, amah kan rin hian kan mualpho dawn emaw i ti lovang u. Kan mamawh zawng zawng awmna chu amah Pathian hi a ni zawk a, amah kan theihnghilha kan vahbo chuan khawvelah hian unaute u beidawnna mai lo chu seng tur kan nei dawn hlek lo. Chuvangin tun hunah pawh hian ropuina um a, chutianga theih tawpa ziana lamah te, ei leh inah te, khawsakna thilah te, in leh loah te kan tlan anih pawhin a pawimawh ber chu – chung zawng zawng neitu Lalpaah chuan beiseina nei a, amah chu belh a, ama mithmuha dik lo leh thil tha lo zawng zawngte kalsan a, chu Pathian hnenah chuan in tukluh hi ropuina kan um, kan chan theihna tur, malsawmna kan um kan hmuh theihna tur chu a ni tih tun hunah hian i lo ngaihtuah thar leh ang u. He kum tharah hian chutiang rilru pu chuan Lapa hi belin bul i tan ang u.
Tunlai khawvela kan rilrua lian ber pakhat chu hausakna sum leh pai te hi a ni. Hausak kan tum avangin tunlai khawvelah hian thil dik lo tih te hi malsawmna dawnna emaw kan ti ta hial a. Pathian ai mahin tute zarzo thei nih emaw te hi malsawmna hnar ni zawk hiala ngaih te pawh a lo hun ta emaw tih mai turin chutianga ngaite pawh chu kan awm a ni mai thei e. Mahse Pathian thu hi han en ilangin Pathian zar chauh zo tumte hi an mualpho bik love. Thuthlung Hlui huna kan hmuh mi ropui tak mai Abrahama kha an va kalna ramah khanin a unaupa fapa Lota kha hmun danga an awm hlanin ralin an lo bei a, ral lakah an lo la a; an lo tlanbo pui a. Chumi thu a hriat chuan Abrahama chuan chung ral te chu bei turin a sipaihote (ti ve mai ang) nen chuan chu ral do tur chuan an kal a, Pathian khawngaihna an chang a, hnehna ropui tak mai changin rallak sum tam tak nen an lo haw a ni. Chutih laia Salem lal chuan a lo lawmin a lo chawimawi nasa hle mai a, chung thil an rawn lak zawng zawngte pawh chu an va hneh a, an va laksak a nih avangin Abrahama te chanvo liau liau tur chu a ni ngawt mai. Chuvangin Salem lal pawhin duhamna tel lovin nei vek mai rawh a ti a ni. Mahse Abrahama chuan chu chu a duh em? Duh lo. A thil kha a duh lo a ni lova, a neih dan tur kha a duh lo a ni. A duh lohna chhan bulpui ber a sawiah chuan thil mawi tak a sawi chu ‘Abrahama hi nangma tih hausak emaw hi min an la ti dah ang e, Abrahama hi keima tih hausak a ni te i la ti dah ang e’. Chu chu Abrahaman a duh loh chhan a ni.
Tute emaw avanga malsawmna dawng a, hausaah min min ngai dah ang e. Chuvangin engmah hi ka la dawn lo, tlangvalho eitur pe la a tawk e. Chuvangin ka hausakna te, ka malsawmna, ka nihlawhna te zawng zawng hi Pathian hnen atang chauhin a ni kei chu ka duh ni, chuvangin tute hming lam tel ngai emaw, tute avang tih tel ngai emaw hian hausak ka duh lo ve, tiin sum leh pai leh ral lak sum tam tak chu Abrahama chuan a lo hnawl ta a ni. Vawiin niah hian he kum thar hun lawmawm tak maiah hian hausak tumin kan tlan a ni thei e, Amaherawhchu, Pathian beisei rawh, amahah chuan chung zawng zawng chu a awm zawk a ni.
“Aw ka nunna engahnge i kun reng, engahnge ka chhungah hian i buai ni. Thil pakhat pawimawh bik a awm a, chutah chuan i nun hmang zo rawh. Chu chu enge ni? Pathian beisei rawh, amah chu ka la fak dawn si a. Ka hmel ti damtu leh ka Pathian chu” tiin a lo sawi ta a ni.
Chuvangin he kum thar hi Pathian chauha beiseina nghah kumah i hmang ang u. Misual harsatna tawk tawhte pawhin, dam lote pawhin, hausak tumte pawhin, ropui tumte pawhin chu Pathianah chuan kan mamawh zawng zawng hi a awm a ni tih hriain he kum tharah hian amah i bel ang u, amah i ring ang u. Amahah chauh hian beiseina i nei ang u. Chu chu Pathianin kan tan pawh min duhsak ber a ni a, amah chu engkim hnar engkim bulpui a ni, engkim awmna a ni tih hi he kum tharah hian i hre thar leh ang u.
Pathianin a thu thianghlim mal min sawm sak rawh se, Amen
Read more »
Tweet Share Share Share Share Share

July 23, 2017
Krismas sermonChhungkaw tinten he hun hlimtlang taka in hman ka beisei. Tin he hun lawmawm takah hian thihna tawk khawhar lusun chhungkua chhungkaw kima he hun hmang theilo te pawh chhungkaw engemawzat kan awm thei e. Amaherawhchu chungte pawh chuan he krismas lawmawm takah hian kan tana Lal thar lo piang Pathianin a chatuan fapa mal neihchhun kan tana khawvela a rawn tirh khawvela a lo pianna niah hian kan rilru kan ngaihtuahna ten Pathian thilthlawn pek ngaihtuahin he hunah hian khawhar viau mah ila; Lal Isua kan tana lo piang lal thar lopiang hi lawm tak leh hlimtlang taka chibai kan buk tlan theih ka theih beisei a, ka duhsak hle che u a ni. chutiang a nih theih nan ka theih ang tawkin khawhar lusun chhungkuate pawh ka tawngtai pui che u a ni.
Zoram mipui ten he hun lawmawm takah hian Remthu leng rawh se tih Pathian thu hi kan ngaihtuah tur atan tunah hian ka thlang chhuak a, chuta tanah chuan hei Pathian thu Luka2 :14 chauh hi han chhiar ila, “Chungnung berah Pathian ropui takin awm rawh se, lei chunga a lawm em em mihringte hnenah remthu leng rawh se” an ti a.
Hei vawin Krismas ni lawmawm takah hian kum 2000 dawn lai liam tawha Zawlnei Isaian kan tan naupang a lo piang a, fapa pekin kan awm ta tia a lo puan tawh kha a takin a lo thleng dik a. Lal Isua Khawvelah a lokal a ni tih hi kan hrechiang tlang theuh awm e. Chuvang chuan vawiinah hian he Krismas hun hi a taka kan zaa kan hman tlan theih nan Isu vawiinah hian kan thinlung bawng inah lo piang thar leh la tia Pathian hnenah fakna hla saa lawm chunga vawinah hian a hnenah kan tawngtai a pawimawh hlein ka hria. Berampute beram venga khawhar taka an awm laiin Vantirhkohvin Hlau suh ulang ngai rawh u, mitin ta tur chanchin tha lawmawm em em ka rawn thlen che u a ni, vawinah hian in tan Davida khuaah chhandamtu a piang ta, Lal Krista chu. tia a rawn puan khan thawklehkhatah vana miho mipui an lo awm ta chiam a, “Chungnung berah Pathian ropui takin awm rawh se, lei chunga a lawm em em te hnenah remthu leng rawh se” tih kha.
Chuvang chuan kha hlamawi ropui tak kha keini pawhin kan sak pui vea, kan rem pui ve a, Pathian ram he khawvelah a lo thlen a, remna chanchintha hi a taka a lo thlen zel hi kan tan a pawimawh em em a ni. Hlaphuahtu chuan he van mite hlasak hi hriatnawn chakin Aw vana ngelte chu lo zainawn leh se. Bethlehem dai hmun khawhara ka awm laiin a lo ti ve hial a ni. chuvangin vawinah hian keini ho pawh he kan tana Lal Isua lo piang hi thinlung taka chibai kan buk a, kan tan ngei he Lal thar hi a lo piang a ni tih kan hriat a, thinlunga kan lo hmuah a, thlarauva kan lo hmuah a, he hun lawmawm takah hian malsawmna thar kan hmuh theihna turin i inbuatsaih theuh ang u tiin kan insawm duh a ni.
Remthu leng rawh se tih hian kawng hrang hrangin ngaihtuah/sawi theih a ni a. Tah chuan a pawimawh leh hmasa ber atan chuan ka rilru a awm foa chu Pathian leh Mihring kan inremna thua hi, Pathian leh mihring inrem tawhlo. Mihring sualna avanga Pathian hnena ta tlanbo, keimahni duhthlanna hmang ngeia Pathiarn hran san leh bosan ta kha kan ni a. chuvang chuan Pathian leh mihring inkarah remthu leng rawh se tih hianmihring ten Pathian kan rem leh theihna kawng hawnga remna Lal lal isua krista remna lal thar ber chu a lo piang ta tia he hunah hian kan thinlung taka he remna lal hi kan fak a pawimawh a.
Pathian leh mihring inkara inremna, van leh khawvel inremna, mihring leh mihring te inkara inremna chungchu kan tan a pawimawh em em a, chung inremna thuah thum atan chuan vawinah hian lei chungah rem leng rawh se Remthu leng rawh se tih Pathian thu hi kan rilruah ngaihtuahin chutizawng chuan han ngaihtuah ila tiin kan thlang chhuak a ni.
Kan hriat tak ang khan, Hlau suh ulang…. a tih hnua van mipuiin Pathian faka remthu leng rawh se an ti hi a va han ropui em! Thlahtute atanga mahni duhthu ngeia Pathian hnen atanga tlan bova, sualna leh thihna leh boralna rama leng tawh hnu hmangaihna tawp neilo Pathianin a fa atana min pawm leh duh a, van khua leh tui nihna min chantir a, van lam thuchhuak hetianga lei chunga a lawm em em mihringte hnenah remthu leng rawh se tih patian thu lo thleng ta mai hi a ropui em em a ni. Chuvang chuan Pathian leh mihring inremlehna Pathian ngaihdamna remna chanchin tha hi khawvel zawng zawng a hrilh darh hi kan va ba na sa em!
Khawvelah hian hnamtin chitin te hnenah Pathian lehMihring inremlehna remthu leng turin remna chanchintha palai khaidiat bun tirhkoh paula pawh khan remna chanchin tha khawvelah thehdarh/puandarh zel a nih theihna tur khan nasa takin a bei a, chutiang atan chuan a hun a hmang zo a ni. Keini pawh hian he remna chanchin tha khawvela puangdarh tur hian he krismas niah hian inpekna famkim nena kan inpek thar ve pawh a pawimawh hlein ka hria.
Mihring suala a tluk hnu reilo teah khan mihring leh mihring inkara inremlohna chu haider ruallohvin a lo lang chhuak a, Kaina chuan a nau, a thisen zawmpui Abela chu a that ta ngawt mai a ni. Pathianin a duh taka a siam leilung leh khawvel chu sual thuneihna ram a lo nih phah ta a ni. Leilung leh khawvel enkawl tu tur leh hotu ber mihring chhungkaw zingah tualthahna rapthlak tak a lo thleng a, chu chu engvang nge kan tih chuan mihringin ama duhthu ngeia pathian a hran san a, sual lam a thlan tak vang a ni. chuvang chuan leilung leh khawvel enkawltu tur leh hotu ber tur mihring chhungkhaw zingah khatianga tualthahna rapthlak tak mai lo thleng kha a rapthlak hle a ni. Mahni hmasialna te itsitna te inhuatna te duhamna te, inremlohna te chung ang mihring zia leh a nihna dik tak chu a lo lang chhuak a, vawin ni thleng hian chu chu kan mihring pianzia a lo ni ta zel a ni. Hei hi Bible chuan kan mihring hlui tiin he mihringin sual lam awn tlat dinhmun a lo nei ta leh chutiang dinhmuna a lo ding ta chu Pathian thuin chutizawng chuan mihring hlui ti ang zawng te pawhin min lo tarsak a ni.
Mihringa inremlohna chi ah te heng chhungkuah te, thenawm khawveng leh chi leh chi inkarah te leh hnam leh hnam inkarah te nasa taka hmuh tur a awm a, a hluar chho zel dawn ni te pawhin a lang. chhungkuaah te, pafa inkarah te, nufa inkarah te, nupa inkarah te leh unau inkarah te thleng pawhin inremlohna hi a piang nasa a, vawinah hian kan tan remna lal a lo piang a, remna chanchin tha tlangau pui tu turte kan ni a. Mi zawng zawng nena inrem tur kan ni. kan chhungkua te, thenawmte nena kan inkarah te, kan khawtlangah leh ramah te remthu leng rawh se tih hi vawina pathian chah ropui tak a ni. Tin, mihring leh mihring inkarah mai pawh ni lovin, thilsiam te pawh hian he chanchin tha lo lan hun hi an nghakhlel em em a, thilsiamte pawh hian Pathian fate lo lan hun an nghakhlel em em a ni tih i hai lovang u.
Sangha te, sava te, ramsa te leh thingleh mau te pawh hian zalen tak leh thlamuang taka awm ve an mamawh a, chung chu an chak thin, amaherawhchu mihring ten kan ti ralti a, kan tithlabar a, thah tumin nasa takin anmahni pawh kan zawng in kan vaiin a chang leh kan kap a, kan perh a, thangah te pawh kan awk a ni. Chutiang ang chu a ni a, mahse heng thilsiam chi hrang hrangte hian Pathian fate lo lan hun an nghakhlel em em a ni. lei chunga a lawm em em mihring te hnenah remthu leng rawh se tih hian mihring leh thilsiam dangte inkara remthu leng turin he Pathian thu hian a huam vek a ni.
Pathian nen inremin awm ila, chu chuan kan mihring puite nen min inremtir ang a, chuvek chuak thilsiam dangte nen kan karah pawh remna ngilneihna leh hmangaihnate a thlen ang a, kan chhungkaw khawsak honaah te pawh kan nupa kar leh fanau te thlengin inremna a lo thleng thei ang. Remna siamtute chu Pathian faa vuahin an awm dawn si a, tiin Pathian thuin a sawi a, vawiina kan tana remna lal lo piang hi keimahniah theuh hian lo piang sela, remthu leng rawh se tiin vawinah hian he chanchin tha hi kan nunah a tak theuhvin lo thleng sela, kan nun hian chu chu var pawh sela, kan nun hian man fuh sela, Pathian leh mihring inkarah te, mihring leh mihring inkarah te, mihring leh thilsiam inkarah te remthu leng rawh se. Lei chunga a lawm em em mihringte hnenah remthu leng rawh se tiin Pathian thuin a sawi a ni.

Chuvangin he remna chanchin tha hi khawvelah kan puanchhuah a, remthu mamawhtu te hnenah a lo thlen zel theih nan, Lalpan kan za atan mal min sawm sak rawh se, AMEN.
Read more »
Tweet Share Share Share Share Share

July 23, 2017
Kum 2002 April thla khan USA-ah Khawvel hmun hrang hrang atanga Mission hruaitute inhmuh khawmnaah ka tel ve a. Mission Hruaitu 60 chuang zet kan kal khawm a. Vanneih thlakin report pekna hun min siam ve hlauh a. Chu report ka pek zawha thingpui ina kan chawlh lain CMS hotupa, Asia khawmual pui bialtu, Rev Canon Chye Ann Soh chuan min rawn be pawpin kan in kawm zui ta a. India ram an vei thu te, anmahni’n Missionary tir lut tura a harsat zia te, India ramah thawhpui tha tak neih an duh thu leh thawhpui tlaka min ngaih thu te a sawi a. Visiting card te in pe tawnin thla te
kan la dun a. Kan in then hnuah rawn bawhzui zelin CMS Mission Consultation, Bangalore-ah thusawina hun te min pein, Mission Conference-2005, Noida-a tel ve turin min sawm bawk a. Chumi hnuah South-Asia Manager, Mr Adrian Watkins chu Mizoramah rawn kalin Mission Board Executive Committee nena inkawmna hun te neih a ni. Thu a kal zel a, thawhhona thuthlung chipchiar tak mai an rawn duang a. Synod Mission Board chuan CMS nena thawhho policy chu pawmin tuna thawhhona thuthlung an rawn duan hi chu a chipchiar em a vang leh kan kal phung in anglo deuh te a awm avangin, zir chian ni se, agreement sign dawnah zawhna kan neih ang te pawh zawt ila a ti a. Chu thu chu London lama kan zu hrilh chuan anni chuan ‘In hriat chian chu a tha a lom, kan lo kal hmain CMS chanchin hre chiang tur leh kan kal phungte zir turin lo kal ta che,’ min rawn ti ta a. An Missionary tur an lakna Board meeting-a tel remchang turin hun an rawn ruat tak avangin February 8-21, 2006 chhung London leh a chhehvelah hun ka zu hmang ta a ni.
Hetia hapta hnih zet Saprama awm dawn takah chuan Wales rama kan Missionary Rev Sangkhuma te tlawh leh Council for World Mission (CWM) office-a hun engemaw chen hman ka duh thu CMS lam hi ka hrilh a. Anni pawh chuan hrethiamin Wales-ah zan hnih, CWM lamah zan hnih riak turin hun min lo duan sak a, ka tlawh tur lamte pawh chiangkuang takin an lo hrilh lawk bawk a.
British Airways-a London tlang nghal turin February ni 7, 2006-ah Aizawl atangin Kolkata ka pan a. Kolkata atanga ka thlawh chhuah leh hun tur hi zing lam dar 4 anih daih avangin kan Field Secretary te chenna Synod House lam ka pan a. Zanriah te eiin zan dar 12-ah Airport lam chu ka pan a. Tih tur tul ang ang te ti felin a hun takah London panin kan chhuak ta a. Zing dar li-a chhuak kha darkar 10 dawn kan thlawh hnuin zing dar 10:15-ah kan thleng thei a. Kan hun inthlauhna chu darkar 5:30 vel a nih chu. CWM hotunu Mizoramah pawh vawihnih lai lo kal tawh, Ms Sylvia Coombs inah ka thleng a. Amah chauha awm a ni a, mahse kan Missionary thin Pi Lalnunthari Fanai te nupa, keima inneihtir ve te chu eirawngbawla chaw te ei nghal turin a lo sawm a. Tin, Dr Rintei (D/o Pu Hmingthanzuala IAS) a lo tel thei bawk a, kan hlim hle.
February ni 9, Ningani-ah chuan Breakfast te kan ei zawh hnuin CWM Office lam kan pan ta a. Rev Dr Andrew Williams, Executive Secretary leh Ms Sylvia Coombs te nen kan thawhhona chungchang leh tuna kan Missionary CWM-a thawk mek te chungchang te, Mizo tam zawk CWM Missionary-a tirh dan tur kawngte sawiin darkar hnih zet kan in kawm a. Chumi hnuah chuan CWM Chanchinbu ‘Inside Out’ enkawltute’n interview min neih pui leh hnuah Dr Andrew leh Ms Sylvia te nen chaw kan eiho hnuin duan lawk angin CMS Office lam ka pan ta a. CMS-ah chuan Mr Stuart Buchanan, Personnel Manager nen darkar hnih zet kan in kawm a. Hetah hian thawktu an lak dan tlangpui leh naktuka ka tel vena tur Partners Selection Board meeting kalhmang te kan sawi dun a ni ber. Tlai dar 4-ah CWM Office lam pan lehin Sylvia nen a In lamah kan haw a. Hemi zan hian India chaw min ei pui a duh avangin chaw kan ei chhuak a. A thiannu Olive leh an Pastor David-a te bakah Lalnuni te nupa te’n min rawn kilpui thei bawk a, hun hlimawm tak kan hmang leh a ni.
Zirtawpni-ah chuan CWM lam kalsana CMS lama ka hun hmang turin ka thlen in hmasa ber chu ka chhuahsan ta a. CMS Office atangin Car-in Leamington Spa lam kan pan a. London atangin 200 km chuang lai a ni. Hetah hian thawktu tur te interview neihpui tura mi thiam bik sawmte leh hna diltute hmun khatah riak khawmin CMS hnuaia thawk tur (Missionary) lakna hun kan hmang dawn a ni. Hna diltu zawng zawng ten interview vawithum theuh an neih a ngai a. Chungte chu Personal and Professional interview, Family and Relationship Interview, leh Faith Interview te an ni a. Vawikhat interview-ah hian darkar hnih zel hun pek an ni bawk. He interview neih hma hian an dilna lehkha (form) te uluk taka zir bakah Office lama hotute’n uluk taka interview neih puiin report chipchiar tak an rawn ziak bawk a ni. He meetingah hian International Observer pahnih kan awm a, ka thianpa chu Kenya lam mi Rev Dunccan Olumbe a ni. Ani nen hian hmun danga lo inhmelhriat sa kan ni nghe nghe a. Interview hi mi pakhatin diltu pakhat zel interview anih avangin Observer tan pawh indaih loh a na duh hle a. Interview session zawh apiangin Interviewers’ meeting a awm zel bawk a. Thu tlukna siam tura Inrinni zana kan han inhmu khawm phei chu zanlai kan thleng hial mai. Thawktu thlan an ulukin an  bei ngawrh hle mai. Thu harsa deuh an neih chuan ‘Hetiang hi engtin nge in tih ve thin’ tiin min han rawn ve bawk thin. Tin, thawktu atana an lak tak loh te rilru tih nat an hlau hle a. An rilru thawi zawnga lehkha thawn tur kan duang thlap vek a ni. Chutianga zanhnih riaka buai taka hun kan hman hnu chuan a kharna hun urhsun takin Lalpa Zanriah kilin Pathianni chawhnu dar khatah kan tin a. Chuta tang chuan kei chu Wales lam pan tur ka nih avangin Rail Station-ah Pi Joan-in min va thlah a, Birmingham lam pan relah ka chuang ta a. Birmingham-ah hian Rel thlak a ngaih avang leh Pu Zaichhawna Hlawndo hnena thil thawn pek tur ka neih avangin ka chhuk a. Pu Zaichhawna leh a thianpain min lo hmuak a, Coffee te kan inho hnuin Cardiff lam panin ka chhuak leh ta a. Thian tha tak mai ka chhar a Glaucester hmuna Redcliff College-a Head of Mission Studies Rev Dr Kang San Tan, Malaysia mi a ni a. Kan Mission tan pawh mi tangkai tak la ni thei tur ani. Malaysia-ah leh Myanmar-ah te kum tin lecture pe in vawi khat tal a rawn zin thin avangin Mizoram-a rawn kal a har loh thu leh zirtirna lama min puih a inhuam zia te a sawi a. Tin, an college-a Mission lam zir tur an awm chuan min puih a duh thu te min hrilh a. Glaucester-ah min chhuk san a, biak chu kan in be pawp zui ta zel a, a tihzia hle mai.
Cardiff-ah hian Rel thlak leh a ngai a. Ka han chhuk a, Bridgend train ka han zawng hmu chu an lo zi hut hut mai a. A hmei a pain zurui hmel pui pui, incheina maksak tak tak leh lukhum ki nei fer fur nen tawng bawlhhlawh pui puiin an lo au lung lung mai a. Relah pawh chuan an thu duh mang hlawm lova, an dinga, an vei nuk nuk a, an au tuar tuar mai a. Ka rilru chuan ‘Wales zet chu a va ramthim zia ve le’ ka ti mai a. An zingah chuan ka thu ve ta ran mai a. Kan han kal ta pawh chu an zai a, an au vak vak reng a. Him tak chuan Bridgend chu kan thleng ve ta mai a. Ka han chhuak a, kan inhrilh lawk dan chuan Pi Lalnunchami te nupain min lo hmuak tur an ni a. Anni awzawng ka hmu ta lo va. Gate bulah chuan sap nu naupang lam deuh hian ka0 hming min lo hmuh a “Ka pu, hei hi i ni em?” min lo ti a. “Aw, ni e, tunge inih?” ka han ti a. A ni chuan, “Sangkhuma’n min tir a ni. Ani lah chu Sarament a buatsaih si a” a ti a. “Ka hria alo’m, mahse Chami te’n min hmuak tur an ni a,” ka ti a. A ni chuan, “Theih lohna thut an nei aniang, chawpchilh takin min tir a ni” a ti ve mai a. Car kan han thleng a, an nupain an lo ni a. A tihzia hle mai.0 Pu Sangkhuma te enkawl kohhran Upa fate nupa an lo ni a. Ka rel chuan pui te chungchang ka’n sawi chuan vawiin hi Rugby tournament final khelh ni anih thu leh, Wales an chak avanga chutiang boruak chu awm anih thu te min hrilh chuan ka thaw a veng huai mai. ‘In nih phung ve rengah ka ngai mai asin,’ ka tih chuan an nuih a za ve hle mai.
Thawhtanni (13/2/06)-ah chuan Rev Sangkhuma nen ama car-in Bala leh Aberyswyth te tlawh turin Breakfast ei zawhah kan chhuak a. A khawhar thlak deuh nain titi na hun tha tak kan nei thei a, kan hlim dun hlein ka hria. Bala khua kan thlen chuan chhun dar 12 a lo ri tawh a. Pi Rovi (Mrs Imorgen Roberts) In kan pan nghal a. Ani hi Durtlang Hospital-a kum nga zet lo thawk tawh a ni a, min lo lawm hle mai. Min hruai kualtu turin an Pastor Rev Eric chu a lo hrilhlawk a, ani pawh a lo thleng ve
thuai a. Thingpui te kan in hnuin Pi Tei thlanah kan kal a. Thla te kan lak hnuin Mary Jones hnena Bible pe tu Rev Thomas Charles-a kohhran Biak In leh Mary Jones hnena Bible a pekna (a chenna In) te kan tlawh a. Tichuan Kolegi Bala, an Theological College hlui, tuna Mission Office leh Conference Centre anga an hmanah kan kal leh a. Hetah hian Pi Tei ro, Mizo thil a lo la vawn te an lo dah khawm a, a lunglen thlak hle mai. Tin, an Office-ah pawh Synod Calendar te, Mizoram Gospel Centenary Souvenir te leh Kohhran Hmeichhe Centenary logo te an lo dah ve hlawm a, a tlangnel thlak sawt mai. Pastor Eric-a kan thlah fel hnuin Pi Rovi In-ah chaw ei turin kan haw ta a. Chaw te kan ei hnuin Aberyswyth lam kan pan leh ta vang vang a. He khuaah hian National Library of Wales a awm a. Chutah chuan Mary Jones-i Bible kha a awm. Chu chu hmuh duhin kan va tlawh a. An dahna an siam that lai alo nih avangin a thawktute pawhin a awmna min hrilh mai thei lo va. Darkar chanve zet hnuah chuan min hmuh sak thei ta a. Uluk takin bawm chhungah an lo dah a. A hun lo taka en kan nih chu kan vanneih phah ta zek a. Ni danga an phal loh khawih leh thlalak te min phalsak a, kan lawm hle mai. A tlai deuh tawh na a, Pi Zawni, Pu Zawna (L) (Rev Dr Basil Jones) nupui kan va tlawh leh hram a. Mizoram tlawh hlim a ni bawk a, sawi tur a ngah hle mai. Pu Zawna thlan te kan tlawh a, thla te kan lak hnuin kan hawsan ta a. Haw kawngah Pi Lalnunchami leh a pasal Mike-a te kan tlawh a, Sazuk sa hmeha zanriah te ei nghalin Rev Sangkhuma te In chu zan dar 9:30 velah kan thleng leh ta a ni.
Thawhlehni (14/2/06)-ah chuan
Presbyterian Church of Wales Mission Board Secretary Rev David Andrew Jones hmu turin Cardiff lam kan pan leh ta a. Ani nen hian darkar khat vel kan in kawm hnuah Cardiff khawpui min fan pui a. Pu Sangkhuma te rawngbawlnaah an lungawi thu leh a term zo tur hi pawtsei leh hram tura min duh thu te min hrilh a. Rev Z John Malsawma Colney kal ve leh dan tur te kan sawi zui a. Rev John-a hi kal maitura kan ngaih laiin a enkawl tur kohhran pathum zinga a hausa deuh ber an in hnuhdawh leh avanga tangkhang ta a ni ber a. Chu pawh chu Mission Board-in engemaw zata tanpuia tihhlawhtlin hram an tum thu te min hrilh ta a. Chuti anih chuan March emaw April thlaah emaw a kal dan tur ngaihtuah ni se tiin kan sawi dun a. Chhun chaw te min eipui hnuah chawhnu dar 2-ah London pan leh tur ka nih avangin Pu Sangkhuma nen Bridgend Rail station kan pan leh ta nghal a. Tluang takin tlai dar 5-ah London Padington station ka thleng leh ta a ni. Rail Station-ah hian ka thlen in tur pa Mr William Fittal-a’n min lo hmuak a. Train vawi thum zet kan thlak hnuah Bus-in minute 15 vel kan tlan leh a, an in chu kan thleng ta a. An fate an awm bo avangin Pu William-a hi a nupui Pi Barbara nen chauh an awm a. An in erawh a lian hle. Chhawng li (4 floors) a ni a, an thawl hle mai. Amah Pu William Fittal hi sorkar hnathawk lian tak ni thin a ni a. Tunah hian Church of England-ah Secretary General hna hun puma thawk a ni. Zanah House Group meeting ka thlen Inah hian kan nei nghal a. Mi pathum an lo kal a, kan kal tha vak lo a ni. Bible zirhona leh tawngtaihona te kan neih hnuin zan
dar 10 velah kan bang.
Nilaini (15/2/06)-ah chuan program duan lawk angin CMS hotute nena in kawm tur a ni a. CMS Office-ah relin ka kal a. South Asia Manager, Mr Adrian Watkins leh Dr Cathy Ross, Mission Adviser te ka hmu a, anni nen hian chaw kan eiho nghal a. Chawhnu lamah Fund Raising Team, Paul Bigmore leh a thian te nen kan in kawm leh a, a bengvar thlak hle. Zanah Dr Julian Churcher nen Thalai Inkhawm (Alpha Course)-ah kan kal a, chaw te eiin, inkhawmna hun duhawm tak kan nei a, thalai 40 chuang zet an inkhawm.
Ningani (16/2/06)-ah chuan CMS Office-ah bawk kal lehin Ms Carol Walker, Training Manager leh Mr Patrick Gvigan, web writer te ka hmu leh a. Ms Carol nen hian chhun chaw kan ei dun nghal a. Ani hi Pakistan-ah hun rei tak Missionary hna lo thawk tawh a ni a. Bangalore-a Mission Consultation kan neih tuma in hmel hriat kan ni.
Zirtawpni (17/2/06)-ah chuan ka thlen In pathumna pawh chu ka chhuahsan a lo hun leh ta a. Ka programme-ah chuan chawhma lam hun awl nei tur anga ziak a ni a. Mahse, a duangtute duan danah
London khawpui hmun thenkhat tlawhna hun tura an tih a lo ni a. Min kalpuitu tur pawh an lo ruat thlap a. Tichuan chawhma dar 11-ah CMS Office thlengin Mr Adrian Watkins nen kein kan thawk chhuak ta a. London khawlaia lui hmingthang Thame lui dung zawh zelin kum sangbi thar lawm nana an siam Millennium Wheel, London Eye an tih bawk kan tlawh a. Hei hi ‘Merry go-round’ ang deuha siam bawm (capsules) sawmthum chuang zet nei a ni a. Bawm pakhatah hian thawl takin mi 10 chuang kan awm thei a. Muang tein a vir a, sir tin atanga London khawpui thlirna nuam leh remchang tak a ni. Ka thianpa pawh chu a vawi khat chuanna ve tho a lo ni a, kan hlimpui dun khawp mai. Chhun chaw kan ei zawhah House of parliament (Big-ben leh Westminster Abbey te ) tlawhin tlai dar 4-a Billericay lam pan turin CMS office kan pan leh ta a. Billericay-a Pathianni ka hmanna tura min hruaitu tur Ms Julie Whitfield nen chuan Train station lam kan pan ta a. Train vawihnih kan thlak hnuin ama carin minutes 15 zet kan tlan hnuah ka thlenna tur Rev Elwin Cockett-a In chu kan thleng ta a. A ni hi Anglican kohhran Rector a ni a, a enkawlna hnuaiah hian Pastor leh kohhran panga lai an awm a. A thutchilh kohhran chu Emmanuel Church a ni. A nupui Susanne leh an fanu Rachel te nen an awm a, an fapa Thomas erawh chu University-ah Vocal Music zirin a awm bo a ni. Julie pawhin chaw ei ve nghalin naktuk programme te kan sawi fel hnuah zan dar 9-ah min hawsan.
Inrinni (18/2/06) zing dar 9-ah Julie a lo thleng a, Cambridge University tlawh turin kan thawk chhuak ta a. Ama car a rawn keng leh a, darkar hnih zet kan tlan hnuin Cambridge chu kan thleng ta a. Chipchiara sawi sen a ni lovah ngai ila, nilengin hmuh tur hlir a ni mai. Building mawi leh tha tak tak te chu kum zabi 18-na lai vela sak deuh vek an ni chu a mak tak zet. College hrang hrang leh an Biak In te chu a ropui zia hmufiah khawpa hun senga en tlak tak vek an ni ang. Chawhnu dar hnih atanga dar thum inkarah punting (tui kuanga mau tianga in kar kual) kan han ti phei chu a vawt deuh nain mit a tlai kher mai. Tlai dar li-ah hawin ka thlen In chu tlai dar rukah kan thleng leh ta a. Ka thlen In te fapa Thomas pawh zan khat riak turin a lo haw bawk a, kan hlim hle mai. Ka thlen In te hian an thiante chhungkua Andrew-a leh a nupui Nancy leh an fapa Timothy te chaw eiah an lo sawm bawk a. Nancy hi Singaporian Chinese a ni a. Andrew hi Construction Engineer a ni. Hong Kong Airport thar kum 1993-96-a saknaah te thawkin Hong Kong-a Pathian thu ka han zir ve lai te khan an lo awm ve niin; chung hunlai Hong Kong chanchin te kan sawi a, kan titi a rual phian nghe nghe a. Zan rei tak thleng kan inkawm hlawm a, dar 11:30pm-ah ka mu ta a.
Pathianni (19/2/06) zing dar 8 inkhawm chu ka nang hman lova, ka thlen In pa inkhawm bang leh ka zingtho kan in tawk chauh a ni. Zing dar 10 in khawm turin kan in siam a. Ka thlen In pa chuan report tawi ka pek zawhah min interview tur thu min hrilh a. Min inhmel hriat tirna te a neih hnuah report pe turin min sawm a. LCD Projector hmangin Powerpoint Presentation ka neih ve ang ang te ka han ti ve a. Pastor-in zawhna te min zawt a. Mihring nuai li emaw lekin Mission hna thawk 1400 vel zet kan chawm/ rawih theih mai dan te, State hausa lo tak ni chunga Mission budget Cheng maktaduai 150 zet kan ngah theih mai dan te, CMS nena kan in hriat pawh dan te, Wales rama Pastor Missionary kan tirh chhan te leh thil dang tam tak min zawt a, min phur pui ve viauin ka hria. Tlai tawngtai inkhawmah pawh sharing hunah ka report an sawi zui nasa ve hle a, a hlawhtling ve khat niin ka hria. Zan lamah khua a nuam lo hle a, khawiah mah chhuak lovin kan awm a.
Thawhtanni (20/2/06) chu ka thlen In nu Birthday a ni a. Zingah thovin ka zu chibai a, a hna lamah min kalsan nghal a. Dar 8:30am-ah Julie a lo thleng a, train station lam kan pan dun leh ta a. CMS Office chu dar 10:30am-ah kan thleng. Dar 11 am-ah Rev mark Oxbrow, International Director nen darkar khat zet kan in kawm a. Chumi hnuah Prayer and Advocacy Coordinator Mr Jamie Bird ka hmu leh a. Advocacy Mission hi CMS pawhin a tihna a la rei bik lova. Mirethei te dikna humhalh na leh retheih avanga rahbeh leh palzuta awm te tana rawngbawlna pawimawh tak a ni. Rev Mark Oxnrow leh a Secretary Anton-a te nen chhun chaw kan ei hnuin CMS Chanchinbu ‘YES’ enkawltuten darkar khat dawn min kawm leh a. Zan Ina ka thlenna atana CMS-in min lo hauh sak Union Jack Club lam ka pan ta a. He hmun hi British Sipai leh an chhung te zin veivak leh London-a lokal te thlenna atana din a ni a, a ropui khawp mai. Chhawng 24 vel niin ka hria a. Kei chu chhawng 19-na Room No 331-ah ka thleng a. Ka programme-a a lan dan chuan zing dar 7-ah taxi-a airport pan tur ka ni a. Taxi man ka han zawh chuan Pound 50 vel anih thu min hrilh a. Chu chu Rs 4000/- tihna a ni. Chuti zat zat han sen chu dikin ka hre lo va. Train/ Bus-a kal dan ka han zawt a. Train vawihnih thlakin Bus-in minutes 10 vel kal lehin Heathrow Airport chu ka thleng thei a. Underground Train Map te min pe a, fiah takin min hrilhfiah hnu chuan train-a kal tum chuan ka mu ve ta a.
Thawhlehni (21/2/06) zing dar 6:30-ah thovin Waterloo Station ka pan a. Heathrow Airport thlenna tur ticket ka han lam a Pound 4 man chauh a lo ni a, ka ringhlel lek lek a ni. Jubillee Train-ah chuangin station hnih ka kal hnuah Green Park-ah ka chhuk a. Picadilly train man leh tur ka ni a, ka han kal chu ka thleng harin ka kal kual nasa hle mai a. A tawpah chuan ka thleng ve ta hlawl a. Station paruk zet ka kal hnu chuan Hatton Cross-ah chhukin Bus ka la a, minute nga lekah Heathrow Airport Terminal No 4 chu dar 8am-ah ka thleng ta mai a. Ka thlawh hun tur chu dar 10:30am a ni. Tih tur neuh neuh a tam a, ka thlawh chhuahna tur Gate No 27 ka thlen meuh chuan dar 9am a lo ri ve mai a. Thlawh hun tur aia minutes 15 vela tlaiah kan thlawk chhuak thei.
Nilaini (22/2/06) zing dar 1:30-ah Kolkata kan thleng a. Domestic terminal lamah kalin dar 10:25am a thlawk leh turin ka nghak ta vang vang a. Ka hmanin tih tur a vang kher mai. Ka thuamhnaw te ka check-in hnuin dar 8:30am velah ka lo thu muhil a, ka thianpa Liana Delhi kal hawin min rawn kaitho thut mai a. Ka khawhar rei tawh bawk a, ka lawm hle mai. Kan thlawhna an delay zel a, chawhnu dar 2-ah kan thlawk chhuak ta chauh a. Dam takin tlai dar 4 velah Zawlkhawpui hlim takin kan lut ta a ni.
Karhnih zet hun khat taka ka zin vei vah chhungin kohhranhote tawngtaipuina a zarah Pathian awmpuina leh amite thatna zar ka zo nasa hle a. Pathian leh a kohhranhote chungah lawmthu ka sawi
a. Hetia hah taka ka vah velna hi Pathian kohhranho tana tangkai leh chhawrawm ni ve hlauh se tih hi ka zin chhung leh tun thlenga ka tawngtaina a ni.
Read more »
Tweet Share Share Share Share Share

July 23, 2017
Kum thar leh Krismas in kar chawlhlai remchanga hmangin Wales rama kan Missionary la damte tlawhna hun neih thain ka hria a, tin, an mahni han tlawh takah chuan ka zirlai atan leh Zoram mipuite tan a tangkai ringin an mahni kawmna hun nei pah a zawhna zawh turte ka duang lawk bawk a. Tichuan tuna Wales rama Pathian thu zir mek Rev.K.Lawmzuala phonein ka va bia a, ani pawhin remchang minlo siam sak theih tur thute min hrilh a, phur takin December 27, 2005 khan Birmingham chhuahsanin Bangor ka pan a, Bus-a darkar 5 zet ka kal hnuin tluang takin Bangor khua chu ka thleng a, Rev.K.Lawmzualan Bus station ah min lo hmuak a, a nupuite leh fanaute nen hlim takin min lo lawm a, Mizo chaw pangngaite kan han ei leh a, taksa leh thlarau lam a dam sawng sawng mai.
Ni 28, 2005 zing thingpuite in zawhin Rev.K.Lawmzuala nen a hmasa ber atan Pu. Roberta te nupa (Rev. Alywn and Mair Robert) tlawh turin kan chhuak a, an ni hi Bangor khawdai a veng pakhat Tregarth ah an cheng a, an vengah hian In 46 vel an awm a, tlang thengthaw nuam tak mai ani. An in pawh in nuam tak ani a, kan han thlen chuan zotawngin min lo lawm a, Pi.Robert-in Cake leh thingpui tui tak min hlui a, zawhna chhan tur ka siamte Pu.Roberta ka han pe a, Mizoram an awmlai chanchinte kan sawi hova, hlim taka hun kan hmanho hnuin kan tin san leh ta a. An ni hi Mizoram hmar lama Missionary lo kal te zingah chuan Nupa a la dam chhun an ni awm e.
Ni 29, 2005 chuan Pi.Rovi (Dorothy Imogen Puleston Roberts) Durtlang Damdawiina thawk tawh tlawh turin zing dar 9:15 khan Bangor ka chhuah san a, Bus in darkar 4 chuang ka kal hnuin Mary Winchester Baibul leina Pi.Rovi te khua Bala chu ka thleng a, Pi.Rovi Kum 80 a upa tawh chuan a in kan lut chu Mizopa dik tak ka hmu chu ka va lawm em! tiin min lo kuah chung a, khua a vawh deuh avangin a meilumte kan han ai a, mi tawng duh leh kawm nuam tak mai ani anih avangin kan ti ti ta bawrh bawrh a, Mizoram leh India ram rawngbawlna chungchang tam tak min zawt a, kei pawhin ka zawhna duan sate chu kan zawt ve a, chung a chhanna zinga then khat kan tarlan duhte chu: Mizoram I awm chhunga I hun tawng a nuam itih ber enge tiin ka zawt a, ani chuan, “ Tam tak sawi tur a awm anga, mahse nuam ka tih ber thin chu Mizotena min mikhual dan kha ani. Thingtlang khuaahte kan zin a, vangvat leh sakeite hlau reng rengin ramhnuaiah kan han kal a, khua kan luh dawnah nghahkhlel hmel em emin hlim takin min lo hmuak thin a, khatiang ang in lawmna (hospitality) kha ropui ka tiin ka hrereng thin ati. Tin, Mizorama I awm laia harsatna I tawh lian ber enge tih zawhna chu “ A missionary puite nena thawhhona tha an nei theihloh kha ani ati”. A sawi zel naah chuan, Mizoramah khan luphum tumin ka neih zawng zawng nen ka lo kal a, mahse ka thawhpuite nen kan thawhhona a that loh avangin kum reilote ah ka hawng leh ta mai a, hrehawm ka ti khawp mai ati. Anih leh hunte nei lehin I rawngbawlna hna ngai ang chiah kha thawk leh dawn la I tih ngei ngei tur pakhat min hrilh thei angem tih zawhna chu-“Ka thawhpuite hmangaih ka zir ang” tiin min chhang a, hei hian ka rilru pawh a hneh hle mai, rawngbawltu leh keini ringtu zawng zawngte pawhin harsatna a tawh ang hi kan tawh ve fo thin tan kan lakna tur pawimawh tak pawh ani ve awm e.
Ni 30,2005 chuan Pi. Lloyd-i (Rev. J.M. Loyd-a nupui) leh Pi.Puii (Dr.Gwyneth Parul Roberts) tlawh turin zing dar 9 ah Prestatyn panin Relin ka chhuak a, England ram ka thlen hnuah Rel a ka vawi khat chuanna ani a, India ram Rel ai chuan a bengchheng nep a, kalkawng pawh a mam tha hle.Rel atang chuan kawng tluan deuhthawin Wales ram ka thlir vel a, an ram hi phai, tlang ram leh tuipui kama awm ani a, mizoram te nen pawh in anna lai a neive in ka hmu, an ram enkawl danin a zir bawk a, kawng kama tlangah te chuan pangpar leh thing in ang an phun a, duhthusam taka siamtun a duan ni awm tak ani. Thingtlang hmuna an eizawnna pui ber chu Beram vulh ani a, an ram phul tha em em leh tlang thengthaw nuam takah te chuan Beram, Bawng leh Sakawr hmuh tur a tam hle(Ka rilruin an ni tan chuan Lal Isua pian lai vela Beram vengtute dinhmun leh awmdan pawh kha a fiah deuh dawn hi te ka ti a). Tluang takin Prestatyn chu ka thleng a, Pi.Lloydi te in chu ke a kal phak lek ni a min hrilh avangin kein ka kal a, mahse Wales ramah pawh kan Indian unau thenkhatte ang deuh an lo awm ve nuk ni tur ani, an kawng min hrilh dan a in anglo hle mai a, darkar khat vel ka tei hnu chuan ka bo nileng thei tak ngial dawnin ka hria a, Pi. Lloydi lah chu ka phone thei reng reng silo. Tichuan Rel stationah bawk kir lehin Taxi ka la a, in ka va thleng chu Pi.Lloydi pawh a lo lawm rualin a lo mangang hman hle a, a phone kha a lo dah diklo alo ni. A chenna hmun hi khaw daifem deuh fianrial nuam tak mai, mual awihtlan , phul hring dup mai bulah ani a, lunglengmite tan chuan a hmun hi lungtileng duh deuh tur niin ka hria. Coffee te in pahin kan in kawm a, kum upa lam anih tawh avangin a sawi ngai a sawi zing hle mai a, abik takin Mission Vengthlang YMA leh tualthah chungchang kha a sawi zing hle mai a, Mizoram lam then leh rual ten lehkha tein an hrilh bakah Mizo chanchinbu a kawl atangte a hriat ani awm e, mahni ram chanchin nimahse Mizoram chanchin Tuipui rala mite pawhin an hriat atana pawimawh vaklo deuh niin ka hria.
Pi. Lloydin chawhlui tui tak min lo buatsaih sak chu kan ei dun a, chaw kan ei lai chuan zawhna hrang hrang ka zawt a, chung zinga thenkhatte chu: Mizoram I awm chhunga nuam itih ber enge tih chu- Mizo ten an mahni mi leh sa ang taka min ngai a, min lawm kha a hlu ka tiin a ropui ka ti tiin min chhang a. Tin, hrehawm itih ber enge ti a zawhna chu- Krista zara unau duh takte nena inthenna ni kha hrehawm ka ti ber tiin min chhang a, thinlung tak zetin Mizo fate minlo hmangaih tih a hmelah pawh a la langin ka hria. Chawte kan ei kham hnu chuan Pi. Puii (Miss. Dr. Gwyneth Parul Roberts) tar enkawlna hmuna awm tlawh turin kan kal a. Pi. Puii hian a kum 96 na a hmang mek a, a hriselna pawh a pan tawh hle mai a, tlem lai deuh atang khan min kalsan tawh mai dawn emaw tih turin a dinhmun a derthawng a, a awmna kan va thleng chu vanneih thlak takin a lo harh vang ang reng hle mai a, Mizotawng fiah fai tak hmangin min lo lawm a, Mizofate hnenah thuchah tur pawimawh tak enge I neih tiin ka zawt a- “ An chanchin ka hriatin ka lawm em em ani” tih I han hrilh dawn nia tiin min chhang a, hun rei vak awm a rem loh avangin kan chhuah san leh ta a, kan kal dawn chuan Mizote nen Krista zarah unau pumkhat vek kan ni hi a ropui ngawt mai, tiin min thlahliam ani. Pi. Lloydi nen Pu.Lloyda thlanah kalin thla te kan la a, chumi hnuin Bangor lamah ka hawng phei leh ta a. Kumhlui thlah zanah chuan Pu.Lawmzuala te chhungkua nen Pathian hnena in hlanna hunte kan hmang ve a, Kum thar ni chuan an lawina Kohhran mi 20 vel inkhawmna ah in khawmin kan tlingtla ve ta ani. Wales ram fang thei tur leh kan Missioanryte an mahni chenna in leh lo ngei a hmuh theihna hun min petu Pathian hnenah thinlungin lawmthu ka sawi mawlh mawlh a, Krismas leh Kum thar chu tisa lama u leh naute nen hmang theilo mahila, rinna lama unau duh takte chhungkua nen Lalpa hovin hlim tak leh hlawk takin kan hmang a, ka dam chhunga ka hun tawngte zingah hun danglam tak anih rualin hun hlu tak pawh ani. Amah nen kan in pawl chuan dam chhung kan tawh apiangte hi lawmna tur hlir alo ni.

- Zaichhawna Hlawndo
Read more »
Tweet Share Share Share Share Share

July 17, 2017
HT Sangliana KPCC Vice President14th of July 2017: 'Super Cop' ti pawha kan hriatlar Dr. HT Sangliana chu Karnataka Pradesh Congress Committee a Vice-President ni turin hlankai a ni.  
Vice president tharte - Veeranna Mathikatti, Motamma, N.Y. Hanumanthappa, B. Shivaram, H.T. Sangliana, A.M. Hindasageri, Veerakumar Patil, D.R. Patil, L. Hanumanthaiah, Radhakrishna, N.S. Boseraju, R. Krishnappa, Mittu Chengappa, and K.C. Kondaiah.
Congress Vice President Rahul Gandhi chuan Karnataka Pradesh Congress Committee (KPCC) thar hi a pawmpui tawh nghe nghe a ni.
Karnataka state chhung ah hian, abikin Bengaluru ah hian Zohnahthlak tamtak kan awm avangin kan Hnam chanpui ngei ngei politics lama nihna sangtak chelh thei kan nei hi a thlamuan thlakin a kaisanna hi a lawmpui awm takzet ani.
Read more »
Subscribe to: Posts (Atom)

Contact Form

Name

Email *

Message *

TOM © 2026. All Rights Reserved.
Published by Songate G
Powered by Blogger.