TIMES OF MIZORAM

Vawiin chawhma dar 10 khan DC Conference Hall Serchhipah ah Workshop on “Hazard Risk and Vulnerability Analysis” (HRVA) neih a ni a, Pu Chuauhnuna, MCS, Deputy Commissioner chuan khuallian niin a hmanpui.

Khuallian chuan thusawiin vawiin ah hian thil tul leh pawimawh zawng zawng kan inhrilh vek hman dawn lova, mahse mithiamte sawi ang ang erawh vawng reng tura ngaihtuahna hmang turin a chah a. Sawrkar laipuiin a ngaih pawimawh em avangin chhiatna lo thlen thulha invenna chungchangah vawi tam tak inzirtirna neih thin ani a, eng emaw pawh tawk palh ila inpuibawm tawn thei tura kan inbuatsaih hi a tul ani a ti bawk.

He Workshop ah hian Mizoram Remote Sensing Application (MIRSAC) ten, Serchhip khawpui chu khuarel chhiatna chi hrang hrang laka an him tawk loh dan zirchianna an neih mek puitu atan buatsaih a ni a. Pi Vanlalduhi Ralte, District Organiser chuan ‘Vulnerability of Serchhip Town against Various Hazards’ tih thupui hmangin a lem nen zirtirna a pe a. Serchhip District leh town chhunga chhiatna thleng langsar zualte, hmun hlauhawm lai leh hmachhawp turte a tarlang bawk.

Pu ZD Laltanpuia, Sr. Scientist, MIRSAC chuan Hazard Risk and Vulnerability Analysis (HRVA)  chungchangah zirtirna pe in, an thil buatsaih tur HRVA an duan dante, GIS mapping leh technical data hrang hrang te a tarlang bawk a ni. He Workshop hi Pu Vabeimozachhi Chozah, SDC chuan a kaihruai a, department hrang hrang hotute, Village Council hrang hrang aiawh leh sub headquarters YMA aiawhte an tel a ni.

Mizoram Sanitation Task Force hmalakna pawimawh, NEDP Climate Change Adaptation & Mitigation Strategy, UD&PA Department bul tuma hmalakna, Cleanliness Drive in Drains, Rivers and Streams Component hnuaiah vawiin hian Serchhip District Sanitation Task Force bul tumin Serchhip khawpui thli dawng lui pahnih Sesah Lui leh Hmawngawn Lui thenfai beihpui thlak a ni.

Heng lui pahnih thenfai hnatlang beihpui thlaknaah hian District Sanitation Task Force in a ngen angin Government Serchhip College zirlai naupang mi 350 vel te an thawk chhuak a. Zirlai naupang te hi Teaching Faculty, mipa zawngten rawn thawhchhuah puiin hlawm hnihah an inthen a, hlawm khat hian Serchhip Hmar Veng kawr, Hmawngawn Lui an thianfai a, hlawm dangin Darnam Venga Sesah lui an thian fai thung a ni. Hun rei tak ata bawlhhlawh tawih theilo lo inchhekkhawl tawhte chu thiar chhuakin UD&PA bawlhhlawh paihna motor hmangin Serchhip Dumping Ground, Dawngzawl ah thiar phei an ni.

District Sanitation Task Force in a lo ruahman tawh angin heng hnatlang hlawm hnih te hi Pu K. Saitluanga, DIPRO leh Pu Beitlotha Nohro, SDC, DLAO ten an hova, zirlai naupang thahnem tak an rawn tirh avangin Government Serchhip College Principal chungah te, zirlai naupang ten thahnem ngai taka an theih ang tawk hmanrua keng chunga an rawn thawh avang te, NSS lamin kutkawr engemawzat an rawn thawh chhuah pui avangtein lawmthu an sawi tak zet zet a ni. Vawiina hnatlang te tan hian District Sanitation task Force chuan chhun chaw tuihnai tak a buatsaih sak a ni.

Save Chite Lui Coordination Committee (SCLCC) leh State NSS Office, Mizoram te tangkawpa huaihawt Chite Lui Thianfai tura NSS Hnatlangpui thawhkhatna chu vawiin khan Chite Veng Mini Sports Complex-ah leh Bethlehem Vengthlanga Chite kaiah thawh tan a ni.

 Chite Veng Mini Sports Complex-a NSS Hnatlangpui hawnna inkhawm hi Mizoram Upa Pawl President Pu R.K.Thanga, IRTS(Retd.)-in a kaihruai a; AMC Mayor Pu P.C.Lalhmingthanga-in hnatlangte hi a vailiam a. Bethlehem Vengthlang kaia a hawnna inkhawm hi Central YMA President Pu Lalbiakzuala-in a kaihruai a, Mizoram Pollution Control Board Chairman Pu R.C.Thanga, IFS (Retd.)-in hnatlangte a vailiam thung a ni.

Vawiin hnatlangah hian Mizoram University NSS Unit leh Aizawl khawpui chhunga college hrang hrang Pachhunga University College, Govt. Aizawl College, Govt. Hrangbana College, Govt. Zirtiri Residential Science College, Govt. Aizawl North College, Govt. Aizawl West College, Govt. T. Romana College, Govt. Johnson College, Mizoram Hindi Training College leh Mizoram Law College-a NSS Unit-te an thawkchhuak a, hnatlang zawng zawng hi an zavaiin zirlai 400 chuang an ni a, Unit tin hi zirtirtu (Programme Officer) engemawzatin an hova. Chite Veng leh Bethlehem Vengthlang atangin mi thenkhatin hnatlang hi an tawiawm bawk a ni.

NSS Hnatlangpui Thawhhnihna hi November 24, 2017-ah neih leh tura ruahman a ni a. He hunah hian Aizawl khawpui chhunga Higher Secondary School-a NSS Unit-te an thawkchhuak ve thung dawn a ni. Hnatlangpuia thawkchhuak NSS Volunteer-te hian Chite luidung engemaw chen fai takin an thian a, an bawlhhlawh chharkhawm tlingkhawm hi truck trip 4 zet a tling a ni. 

Aizawl SP Traffic chuan Seling leh Champhai inkar kawngpui chhelai siamthat hna chak zawka thawh a nih theih nan leh chhiatna liah zawk a thlen loh nan, lirthei lian ke paruk aia tam nei chin leh a chunglam te Seling leh Champhai inkar One way Traffic a intlanchhawk dan tur ruahmanna a hnuai ami ang hian a siam: 

1. Monday: Aizawl to Champhai (12:00 AM atangin a tukleh 12 :00 AM thleng) 

2. Tuesday: Champhai to Aizawl (12:00 AM atangin a tukleh 12 :00 AM thleng) 

3. Wednesday: Aizawl to Champhai (12:00 AM atangin a tukleh 12 :00 AM thleng) 

4. Thursday: Champhai to Aizawl (12:00 AM atangin a tukleh 12 :00 AM thleng) 

5. Friday: Aizawl to Champhai (12:00 AM atangin a tukleh 12 :00 AM thleng) 

6. Saturday: Champhai to Aizawl (12:00 AM atangin a tukleh 12 :00 AM thleng) 

7. Sunday: Aizawl to Champhai (12:00 AM atangin a tukleh 12 :00 AM thleng) 

Kawng laka tangkhang an awmloh nan a chunga lirthei tarlan te tan hian Seling hi Chawhnu dar 1:00 PM hnu lamah Keifang pawh tlai dar 3:00 PM hnu lamah chuan paltlang phal a ni lovang. 

Seling leh Champhai inkar kawng (NH-6) hi lirthei rit phurte tan a dinhmun a that tawkloh avangin chhiatna nasa zawk a thlen loh nan hemi kawngah hian passenger leh chakkhai (essential commodities) phur Bus leh lirthei huam lovin Motor lian (ke paruk aia tam nei) chin leh a chunglam tlan phal a nilo.

Aizawl Traffic S.P Pu C. Lalthanmawia, MPS chuan hetiang hian thuchhuah a siam : 

Aizawl Road South Division, PWD ten ni 30.9.2017 (Inrinni) atanga 2.10.2017 (Thawhtan) chhung hian AOC leh PWD, SE Office inkar (Congress Bhavan bul) kawng siamthat hna an thawh dawn avangin helai kawngpuiah hian hnathawh anih laiin lirthei eng chi mah tlan phal ani lo tih mipuite a hriattir. 

Hei hian chhiatrupna thil kangmei leh emergency kaihhnawiha duty leh Dan leh thupek pawimawh bika Duty te chetvelna a huam lovang.

Tukin zing khan Faina Hapta 2017 hawnna programme chu CHANEM Buillding tualah neih a ni a. Champhai DC mawhphurhna chelh mektu Pi Zosangzuali Pachuau, Project Director, DRDA, Champhai chuan Faina Hapta 2017 hi hawngin  hemi puala hnatlangte a vailiam a ni. 

Pi Lalsangzuali Pachuau chuan Mizoramah faina hapta kum 40 lai hman anih tawh thu sawiin faina inzirtirna leh nunpuina chu hapta khat chhung chauh ni lovin kumtluana hmang thin turin kalkhawmte chu a chah a. Ram changkang tehnaah pawh faina chu ngaih pawimawh anih thu tarlangin khua leh tui tha ni tur chuan mahni invawnfai mai bakah khawtlang bungrua leh hmun hmate vawnfai a ngai a ni, a ti. Sawrkar laipui Prime Minister Pu Narendra Modi kaihhruaina hnuaiah faina lama inzirtirna lamah nasa taka tan lak mek anih thu sawiin hemi tipuitling tur hian Scheme leh programme hrang hrangte kalpui mek a ni, a ti a. Faina inzirtirna bul tanna chu naupangteah anih thu sawiin hei hian inchhung, veng leh khawtlang thlengin rah duhawm a thlen  dawn a ni, a ti a. Faina kawngah Champhai District-in nasa takin hma a sawn zel a, khawlaia inthiar awm lohna, ODF (Open Defecation Free) ah pawh India rama District puan hmasak pawl a ni thei chu a chhuanawm hle a ni tiin “Faina kan tita sa sa a, theihtawp i chhuah zel ang u”, tiin Champhai District mipuite chu a sawm nghal a ni. 

Faina hapta hnatlangah hian Sawrkar Department hrang hranga hotute, khawtlang hruaitute leh Swachh Bharat Mission (SBM) Urban Volunteer , Scouts and Guides te an tel a. Faina Hapta 2017 pual hian faina lama inelna buatsaih a ni dawn a; Sawrkar Pisa, Zirna In leh Veng hrang hrangahte endikna neiin a tithate hnenah lawmman pawisa fai leh certificate hlan an ni ang. 

Kumin Faina Hapta kharna hun hi October Ni 9, 2017 hian Govt. Champhai College Multipurpose Hall-ah neih tura ruahman a ni a. He hunah hian Fai inelna a tithate hnenah lawmman hlanna neih a ni ang. 

Tukin Faina hapta hawnna programme hi Pu K. Lalhmuakliana, DUDO Champhaiin a kaihruai a.  Pu C. Lalengkima , SDS, UD&PA in report tawi leh hnatlan dan tur sawifiahin veng chhung hmun hrang hrang thian faia hnatlang neih a ni.

AIZAWL, Oct 1: Two persons were arrested with 46 grams of heroin at Keitum village in central Mizoram district of Serchhip on Saturday, Mizoram Excise and Narcotics department said. The department spokesman said that JH Lalhmingthanga (27) and Vanlalrochhunga (27) were arrested for possession of the contraband worth around Rs 1.5 lakh in the local market. 

The two accused were booked under relevant sections of Narcotic Drugs and Psychotropic Substances Act, 1985 and were produced before the Special Court (ND and PS Act) who remanded them to judicial custody. – PTI