TIMES OF MIZORAM

Kawng hranga District hmasawnna thlithlaitu leh viltu Aizawl District Development & Monitoring Committee chu an Chairman Lok Sabha MP Pu CL Ruala leh Co- Chairman Rajya Sabha MP  Pu Ronald Sapa Tlau kaihhruaina-in vawiin khan New Secretariat Conference Hall-ah an thukhawm. 

Meeting-ah hian thutkhawm hnuhnung bera thudah thlirletna neih a nih rualin, tih hlawhtlin a nih dan pawh thlirlet hmasak a ni. Kumin chhunga thutkhawm vawi 2-na niin April-June, 2017 leh July-September, 2017 meeting pahnih kaihkawp niin kumin April atanga September thla chhung Aizawl District huam chhunga hmasawnna hnathawh hrang hrangte an thlir ho bakah hmachhawpte sawiho a ni bawk. 

Aizawl DRDA hnuaiah MGNREGA Job Card kawltu mi 28352 awmin hnathawh tur duanlawk 2223 ah 1366 (61%) an thawk tawh. Pradhan Mantri Awas Yojana - Gramin (PMAY-G) hnuaiah in 121 sak niin sum awm zat atanga chhutin za zelah 44 - cheng nuai 69.95 hman ral a ni. Prime Minister Krishi Sinchayee Yojna (Watershed Development Component) hnuaiah project 18 awmin sum cheng nuai 429.97 an hmang ral tawh a, heng project 18 huamchhungah hian 69366 Ha a zauah hmalak tawh a ni.

PHE Department kaltlangin Swachh Bharat Mission (Gramin) hnuaiah cheng nuai 155.11 hmangin khaw panga - Aibawk, Darlan, Phullen, Thingsulthliah leh Tlangnuamah hma an la a, Sanitary Complex 18 an sa. Power & Electricity Department chuan Deen Dayal Upadhyaya Gram Jyoti Yojana kaltlangin Aibawk, Phullen leh Thingsulthliah Block chhunga khaw pangaah eng pek luh niin BPL chhungkaw 67 hnenah eng pek an ni bawk. Urban Development & Poverty Alleviation Department chuan Swachh Bharat Mission (Urban) hnuaiah cheng nuai 789.20 sengin mimal ekin 1440, vantlang inthiarna 8 an siam a, pawna inthiar awm lohna Open Defecation Free (ODF)-ah khaw 11-te chu puan an ni tawh. Pradhan Mantri Awas Yojana- Urban hnuaiah mi 300 hnenah in sak tanpuina pek an ni bawk. 

Sarva Shiksha Abhiyan hnuaiah a thlawnin  text book - Primary School-ah 13937 leh Middle School-ah 10078 sem a ni a. Uniform a thlawnin zirlai 21609 hnenah sem a ni. Mid day meal hnuaiah Primary School 282 leh Middle School 236 tuam a ni a, choka 16 sak thar a ni. Health Department hnuaiah National Health Mission hnuaiah naupiang 630 awmin nung dama piang 629 chhinchhiah a ni.

Meeting-ah hian Aizawl District chhunga MLA te - Pu R.Romawia, Minister; Pu R.Lalrinawma, Deputy Speaker; Lt.Col.Z.S.Zuala; Pu R.Vanlalvena; Pu Vanlalzawma; Pu Lalthanliana; Er.Lalrinawma te bakah Pu PC Lalhmingthanga, Aizawl Municipal Corporation (AMC) Mayor te leh mi pawimawh dangte an tel a ni. 

Vawiin hian D.C Conference Hall Mamitah RTI week, 2017 Mamit-a hman dan tur D.C Charge la mektu  Pu H. Lianzela Addl D.C hovin rel a ni.

Meeting hian RTI Week 2017 ni (5-12) october hman dan tur ngaihtuah a ni a, Mamit khawpuiah ni 5.10. 2017  hman ni se tih a ni , programme kimchang duanlawk nghal a ni.

He ni hmang tur hian Mamit khawpui chhunga sorkar Department hrang hranga SPIO/SAPIO, khawtlang hruaitu, tlawmngai pawl hrang hrang aiawh, political party aiawh, leh thuthar thehdarh tute sawm ni se tih a ni. Mipui leh kalkhawm te tana hlawk zawk leh tangkai zawka he ni hman a nih theih nan ruahmanna hrang hrang siam niin kalkhawmte atangin extempore speech leh sawihona zau zawk  te buatsaih ni se tih a ni bawk.

Meeting-ah hian SDO (sadar) SDC, DIPRO,  Presedent Joint V.C, President MJA te an tel a ni.

Vawiin chawhnu khan New Secretariat ah Directorate of Hospital & Medical Education Office Building thar Chief Minister Pu Lal Thanhawla chuan a hawng a. Hemi hma chiah hian DHME Office piah ram awl a sak tur, Directorate of Health Service Building sak hna tawh bul tan nan lung a phum nghal a ni. 

 DHME Office hawngtu Chief Minister Pu Lal Thanhawla chuan tunhnai lawkah New Secretariat huam chhungah Sawrkar building tha tak tak hawn a ni ta chu lawm awm a tih thu sawiin chung office thar te chu a 'Hawn Ni' ang tluka vawnfai zel ni se tih sawrkarin a beisei thu a sawi a. Sawrkar Office te chu vawnfai tur a nih mai bakah a chhungah vaihlo zuk leh hmuam ti mi leh kuhva khawr ei te pawh an inthlahrun na turin zahawm taka enkawl ni se a tha hle ang a ti. 

Hmanrua leh bungrua a awm loh vanga sum tam tak senga Mizoram pawnlam Damdawi In te pan a nih tawh lohna turin hmanraw tha, bungraw tha leh Mizoram Doctor ten tangkai taka an hman tur, NEDP leh kawng dang danga dap leh hmanraw siamtu company te hnen  atanga lei turin sawrkarin hma a la mek a ti a. Medical College din pawh, Mizoram ang state tenau tana thil harsa ni mahse MBBS seats Mizoram in a neih te tih tlem chhoh zel a nih takah chuan, sawrkar thuneituten kan state theihna zawng zawng sawm khawm in tih ngei tha a an hriat leh an remhriat angin an kalpui mek a ni a ti a. RIMS, Manipur a bul tanpuitu Prof. L. Fimate hovin a tahtawla hmalak mek leh hnathawktu tur engemaw zat lakna tur pawh Central sawrkar atanga phalna hmuh a nih tawh thu a sawi a. Thenzawl a Ayush Hospital hawn chu hlawhtling a tih thu leh sum lama mi harsa zawk leh mirethei te tan a hlu tih sawiin Ayush hmanga inenkawlna chak zawka Mizoramah kalpui a nih theih nan Ayush chu Directorate puitlingah hlan thuai sawrkar thuneitu ten an duh a ti. 

Chief Minister chuan, " Kan natna tam zawk hi chu kan hriatloh vang, tih leh tih loh tur kan hriat loh vang leh min hrilhtu kan neih loh avanga kan vei ni in a lang a. Hengah hian kan Daktawrte hi min hrilh hriat tu, min kawh hmuh tu leh min zirtirtu ni turin kan beisei a. Chu chu Medical Education thatak a nih pawh ka ring a.  Zirtirtu leh Daktawrte file khawih chu mihring an nih avangin 'Hna Zahawm' tih a ni a Rawngbawlna rilru pua thawh a ngai a ni. Tin, damlo te pawhin an beiseina phak a enkawlna pe tur che u in an thlir che u tih in hriat ka duh", a ti a. Hriselna chungchangah, faina chungchangah, Vaihlo zuk leh hmuam bakah kuhva khawr ei chunchangah te pawh Daktawrte chuan mipui tan entawn tur an nitin nun hmandan atangin chhawp chhuak se  zirtirna pawmawm leh mipui zawm duh zawng tak a nih a rin thu a sawi a ni. 

Thusawitu dang Planning Minister Pu Lalsawta chuan India hmarchhak bialah RSBY enrollment-ah Mizoram titha ber a puan a nih thu sawiin sawrkarin mi harsa zawkte healthcare a ngaih pawimawh zia a langchiang hle a ni a ti. Kum 1987 a state a hlankai chauh nimahse Mizoram chuan kawng tin rengah India Independent  tantirh lai atang tawh a state puitling tam tam tuna Mizoram a department awm thar, building thar nei te ang chi lo nei khep khup tawh te kawng tam tak ah a umpha tan tawh a ni a ti. Hriselna kawnga hmasawn zawk ni turin a thawktute tanlak a pawimawh rualin mipui te pawn thu an awih a ngai tih a sawi a. Khawtlang nun pawh a changkang zela vantlang puipunna hmuna midang tana hrisel lo vaihlo ziak zuk khuk luih luih te pawh a reh ta duak chu hmasawnna nasa tak a ni a ti a. DHME hnathawk te chu kawng tin renga mipui hriselna tura hnathawnna hmun atana an office building chu hmang tangkai turin a chah a ni. 

Health Minister Pu Lal Thanzara chuan DHME building thar hawn a ni ta chu lawmawm a tih thu sawiin an duhkhawp a lian erawh a nih lo tih a sawi a. DHME chu Department thang duang tak anih thu sawiin  programme hrang hrang – NCD , Trauma, Disaster Management, CEA , PNDT te an lo awm tawh bakah, Medical Council leh Pharmacy Council te pawh an accommodate a la ngai dawn tih a sawi a.  Chubakah sum tam tak sen ngaihna thin training na tur hall te pawh mamawh a la nih bawk avangin sawrkarah Rs 2.5 crore vertical extension atan an dil leh mek tih a sawi a. Directorate of Hospital & Medical Education hmalak tawh leh hmalak mek chungchang a sawi chhun zawm a. 

Health Minister in a tarlan dan chuan  :- INFRASTRUCTURE DEVELOPMENT hnuaiah Khum 100 awmna District Hospital, Siaha Rs. 1592.52 lakhs leh Khum 50 awmna District Hospital, Lawngtlai Rs. 1191.51 lakhs man te chu Ministry of DoNER, Govt. of India, NLCPR hnuai atangin hmuh ani a, sak mek a ni. 

District Hospital hrang hrang te changtlung zawk leh tha zawka thuam mek zel niin hnuaia mi te hi NEDP, NEC leh Ministry of H&FW Govt. of India (GoI) sum hmuh atanga hmalak mek leh hmachhawpte anni: 

I)             NEDP sum Rs. 900.00 lakhs hmangin District Hospital te hmanrua leh bungruate lei a bun chhoh mek a ni. 

II)            CT Scan, Civil Hospital, Aizawl atan Rs.280.00 lakhs hmangin a thar lei a bun fel mek a ni. 

III)          Cardiology Department, Civil Hospital Aizawl  hi Rs. 499.00 lakhs seng a din a ni. 

IV)          Central Sterile Supply Department (CSSD) Civil Hospital Aizawl, Lunglei leh District Hospital Siaha, Serchhip, Kolasib atan  Rs. 300.00 lakhs hmangin Hospital hmanrua tih thianghlimna lei ani a, bun fel ani tawh bawk. 

V)           Hospital Management Information System (HMIS) hi Civil Hospital, Aizawl, Cancer Hospital Zemabawk, Kulikawn Hospital, Aizawl atan te Rs. 466.51 lakhs hmangin siam zawh fel ani tawh. 

VI)          State Medical Library ,Civil Hospital Aizawl atan Rs. 361.18 lakhs hmuh ani a, a building sak zawh tawh a ni a, lehkhabu leh thil tul dangte buaipui mek a ni. 

VII)         Dental Department, District Hospital atan Rs. 443.76 lakhs hmuh niin, a building pawh sak zawh tawh ani a, hmanrua leh tul dangte buaipui chhoh mek a ni. 

VIII)       Bio Medical Waste Management System District Hospital Lawngtlai, Serchhip, Champhai, Mamit atan Rs.468.00 lakhs hmuh ani a, a thawhna tur supply order pek fel tawh ani a, bun fel thuai beisei a ni. 

IX)          CT Scan Lunglei atan Rs.228.00 lakhs NEC atanga hmuh a ni a, tender chhuah mek a ni. 

X)            Trauma Care Facilities Centre, District Hospital, Siaha leh Lawngtlai atan Rs. 988.40 lakhs hi building sakna leh equipments leina turin hmuh ani a, hmalak mek a ni. 

XI)          Trauma Care Facilities, Civil Hospital, Aizawl atan Rs. 1027.20 lakhs hi building sak leh equipments leina turin hmuh ani a, building sa tan turin ruahmanna kalpui mek a ni. 

 Ministry of Health & Family Welfare, Govt. of India atangin Hospital dinglai tih changtlun a, Medical College dinna turin sum Rs.189.00 crore hmuh ani tih  Health Minister chuan a sawi a. State Referral Hospital chu Mizoram Institute of Medical Education & Research dinna atan hian thlan anih thu leh hmalak chhoh mek a nih dan a sawi a.Medical College atan hian post chi hrang hrang 677, DP&AR, Govt. of Mizoram chuan siam phalna a pe tawh a, Council of Ministers, Govt. of Mizoram rem tihpuina leh phalna nghah mek a ni a ti a. Ministry of Health & Family Welfare, Govt. of India atangin Cancer Hospital Zemabawk tih changtlunna turin sum Rs. 44.27 crore (90:10) Building sakna turah leh Equipments leina tur hmuh anih thu sawiin Cancer hemna khawl changkang Linear Accelerator (LINAC-Varian TrueBeam) leina tur supply order pekchhuah tawh a ni a ti. Pu Lal Thanzara chuan Cancer natna vei te tha zawk leh changtlung zawka enkawl an nih theih nan JICA ( Janpan International Cooperation Agency) atanga tanpuina sum (grant) Rs. 150 crore hmuhna turin Detailed Project Report buaipui mek ani a ti a.Ministry of H&FW (Nursing Division), Govt. of India (GoI) atangin GNM School pali (4) - Siaha, Serchhip, Champhai leh Kolasib a dinna tur hmuh anih thu leh  hma lak chhoh mek anih thu a tarlang bawk a ni. 

DHME Office Building hawnna inkhawm hi Health Commissioner/Secretary Pu Lalrinliana Fanai in a kaihruai a. He hunah hian Pu Lalmuankima Henry, Chief engineer, PWD, Buildings in Technical Report a pe a Dr.F.Lallianhlira, Principal Director, Health & Family Welfare pawhin thusawina hun a hmang a ni.  PWD Technical Report tarlan dan chuan DHME Building hi Kum 2013 October ni 9 khan, Special Plan Assistance, Planning Commission tanpuina sum  Rs.825.01 Lakh hmanga sak tan niin kum March ni 28 khan sak zawh a ni a. He building-ah hi chhawng 5 niin a pumpui lenzawng belhkhawm chu sq.metre 3105.26 a ni a. DHME building-ah hian Elevator in bunna tur dahawl a ni a, RCC tuizem litre 20,000/- leng pawh dah tel a ni.

Oct 1 atanga ni 15, 2017 chhunga India ram puma hman tur, Gram Samridhi Evam Swachhata Pakhwada inbuatsaihna leh urlawkna atan nimin, ni 28.9.2017 khan PMKSY, Serchhip Project- III & V bul tumin E.Lungdar Block chhung khaw hrang hrang High School leh Higher Secondary School zirlaite tan painting Competition, Hmingthangi Memorial HSS, E.Lungdarah buatsaih a ni.

He painting competition ah naupang inel nan hian thupui (theme) hrang hrang- Cleanliness, Sanitation, Health, Green, Water Conservation te hman a a ni a. Block chhung hnun hrang hrang atangin school naupang lemziak thiam mi 60 chuang an tel a ni. Lawmman semna neih nghal a ni a, pakhatna hi Lalhlimpuia, Hrangturzo HSS, N. Vanlaiphai niin Certificate leh Rs. 5000 a dawng a. Pahnihna hi Malsawmhlui Presbyterian English School, E Lungdar niin Certificate leh Rs. 4000 pek a ni a, pathumna hi Lalruatfeli, Presbyterian English School, E. Lungdar bawk niin Rs. 3000 leh Certificate hlan a ni a, a ti tha zual thlan chhuah mi 10 te hnenah Rs. 500 theuh hlan an ni bawk.

He hun hmanpuitu E.Lungdar BDO Pu Vanlaltanpuia, MCS chuan, He painting competition a telte kutchhuakte hi uluk takin an vawn that tur thu leh Oct 1-15 a Pakhwada hman hunah khaw hrang hrang kawtthler lun laiah mipuite hmuh theih tura pholan a nih tur thu a sawi a, mipuite hnena faina leh thianghlimna zirtirna te, khawtlang hmasawnna atana thil tul an hriat ve ang ang te Gram Sabha a tela sawi thin tura inzirtir te chu he Pakhwada in a thil tum lian zual te a ni a. October ni 1 – 15 chhung hian ram puma khaw nuai 2.62 ah a ruala hman tur a ni.

Vawiin khan kum 2016 chhunga PRRS hri leng vanga Lawngtlai Disrtrict-a vawk thite ralna hun chu Lawngtlai AH & Vety Department chuan DVO office complex-a Farmer’s Training Hall-ah an buatsaih a. LADC-a AH & Vety changtu Executive Member Pu C. Lalneihkhuma’n khuallian niin a hmanpui.

Pu C. Lalneihkhuma chuan Mizoram sawrkarin vawk vulhtute ngai pawimawha hri lengin an vawk a tihhlumte ralna a buatsaih chu lawmawm a tih thu leh vawk vulhtute tan a thlamuanthlak hlea a hriat thu a sawi a. NLUP hnuaia vawk vulh thlangtu tam takin an hlawhtlinpui thu leh tuna vawk chan tate zinga tam tak hi NLUP hnuaia vawk vulhtu an nih thu sawiin, beidawng mai lo leh hlawhtlin tuma tha thara hma la leh turin a chah a. Hlawhtling tur chuan kalhmang fel leh tum mum tak neia vawk vulh a tul tih sawiin, vawk hralhna atanga sum hmuh te hmang zo nghal zel lo va, khawl nachang leh vawkte tam zawk vulh tura lei belh thin nachang hriat a pawimawh a ni, a ti.

Nimin chawhnu khan Environment and Forest Department leh YMA Sub-Headquarters Lunglei tangkawp buatsaih Hmawngva Lui leh Tlawng Lui humhalh hawnna programme chu Chawngbawla Hall, Pukpui-ah neih a ni. Pu Lalthafamkima Jongte, SP Lunglei District chuan khuallian niin a hmanpui.

Pu Lalthafamkima Jongte, SP Lunglei District chuan YMA leh Environment & Forest Department te tangkawp hmalakna chu chhuanawm a tih thu sawiin ramngaw leh nungchate humhalh chu mitin mawhphurhna a ni, a ti a. Mizo mipuiten kan thing leh mau, ramngaw leh a chhunga cheng nungchate hlutzia kan hriat thar leh a tul a ni tiin Pu Lalthafamkima Jongte chuan he hmalakna pawimawh tak ti hlawhtling turin kan zavaia tan kan lak a tul takzet a ni, a ti bawk.

Divisional Forest Officer, Lunglei District leh Chairman, Science & Environment Committee, YMA Sub Hqrs ni bawk Pu H. Lianmawia, IFS chuan he hun hi kaihruaiin programme buatsaih a nih chhan leh an thiltumte a sawifiah a. Kan Ram leh Hnam humhalhna atana peng pakhat kan Environment chereu zel tur ven nan he hmalakna hi kalpui niin Hmawngva Lui dung tluan leh Tlawng Lui (Haulawng Kai – Saipui chhuah leh Arsi ram inkar) chu Humhalh area-ah puan a ni a. Tlawng Lui dunga Kawla Buk leh Li Bial inkar chu uluk zuala humhalh tur niin eng hmanrua mah hmangin Luia nungchate hi man phal an ni tawh dawnlo a ni.

He hunah hian Pu C. Lalrindika, Secretary, Science & Environment Committee atangin Report ngaihthlak a nih bakah Pu R. Lalnunthara, President, YMA Sub-Hqrs Lunglei leh Pu R. Malsawmdawngzuala, Judicial Magistrate First Class ten thu tawi an sawi a. VCP Pukpui leh VCP Mausen te pawhin thu sawiin nungchate humhalhna kawnga hma an lo lak thin tawh dan leh harsatna an tawn te kalkhawmte an hrilh a. Pu R. Lalnghakliana, Asst. Secretary, YMa Sub-Hqrs Lunglei chuan lawmthu sawiin hun tawp a khar.

Vawiin khan DRDA Lawngtlai buatsaihin Lawngtlai DC Conference Hall-ah sawrkar laipui hma lakna Mission Antyodaya chungchang leh thingtlang khaw hmasawnna tur leh faina atana October ni 1 atanga ni 15 chhunga beihpui thlak tur chungchang zir ho a ni.

He hun hi Lawngtlai DRDA Project Director Pu R. Lalremsanga MCS chuan a kaihruai a. Mission Antyodaya chu thingtlang khuate’n chak zawka hma an sawn theihna tur leh an tana sawrkarin ruahmanna a siamte tanngkai zawka an hman thiam nana zirtirna tura ruahman a nih thu a sawi a. October ni 1-15 chhunga Gram Samridhi Evam Swachhta Pakhwada (Village Well-Being and Cleanliness Fortnight) hman chhungin thawktute’n theih tawp chhuaha hna thawk turin a chah.

Mission Antyodaya chungchang leh he kar hnih awh beihopui thlak (Pakhwada/Fortnight) tur chungchang hi Lawngtlai BDO Pu Zoramsiama Hmar MCS chuan PowerPoint presentatiuon hmangin a sawi fgiah a. Pakhwada chhunga hun hman dan tur hrang hrang leh thawktute mawhphurhna tur te a tar lang nghal bawk.

Lawngtlai DRDA-a Assistant Project Officer Pi Lalramliani pawhin lawm thu sawiin, DRDA hnuaia in sak tanpuina (PMAY-G) kalpui mek dinhmun tlangpui a sawi nghal a. Thingtlang mi chenna in nei lo, mahnia in rel thei si lote tana in sak tanpuina scheme hnuaiah hian kum 2016-17 chhung atan target-ah beneficiary 1817 dah a ni a. He’ng zinga beneficiary 696 hnenah tanpuina 1st instalment pek chhuah tawh niin, 2nd instalment pe chhuak leh thuai thei tura hma lak mek a ni bawk. Vawiin hun hmannaah hian Lawngtlai DRDA hnuaia thawktu te, MzSRLM staff te, VLA te, WDT te leh Technical Assistant te bakah, thu thar theh darhtute an tel a ni.

Mission Antyodaya hnuaiah hian India rama thingtlang khaw singnga (50000) thlang chhuakin, he’ng khaw thlan bikte hi kum 2022-ah chuan mi rethei awm lohna khuaa siam tuma hma lak mek a ni a. He’ng khaw thlan chhuah zingah hian Mizorama khaw 183 telin, Lawngtlai District atang hian khaw 30 an tel. He’ng khuate hian sawrkarin an khaw hmasawn nana ruahmanna a siamte an lo hriat a, anmahni zawna mawhphurhna an neih vete hlen chhuah tuma tan an lak ve theih nana zirtirna atan Pakhwada hi ruahman a ni a. Khawtlang huapa faina hnatlang thawk leh khawtlang hmasawnna tura ruahmanna hrang hrang zir hovin hun hman tur a ni.