Tweet Share Share Share Share Share

October 17, 2017
Rev. Dr. Vanlalnghaka puala lehkhabu siam,  'Thuhriltu ropui'  tih chu a kum 77 tlin pualin tihchhuah a ni. 

Dr. Ramengliana leh Rochamliana-te chuan he lehkhabu hi an buatsaih a, mi 52 zetin Rev. Dr. Vanlalnghaka chanchin hi an ziak a ni. Mizo ṭawng leh sap ṭawnga ziah niin, hmun hrang hranga rawngbawlna a lo neih tawhna te, ama mimal chanchin ngaihnawm tak tak te tarlan a ni. A buatsaihtu zinga mi Rochamliana chuan, "Mizote zingah mi ropui tak tak an lo chhuak tawh a, an la chhuak zel dawn bawk. Mi ṭhenkhatte erawh hi chu 'mi bik' an ni a, 'anmahni ang' hi Mizo zingah hmuh tur an awm lo va, lo la piang leh tur zingah pawh an awm ang ngem tih hi ngaihtuah tham tak a ni" tiin, Rev. Dr. Vanlalnghaka chu mi bik a nih zia a sawi.

Nagaland chief minister hlui, Maharashtra, Gujarat leh Goa state Gonernor pawh lo ni tawh, tuna Odisha Governor ni lai SC Jamir chuan, "Pathian thu sawitu lar tak takte thusawi eng emaw zat ka lo ngaithla ve tawh a, amaherawhchu, Rev. Dr. Vanlalnghaka tluka thusawi thiam hi ka la tawng lo" a tih hian Zoram pawn thlenga mite hriat hlawh a nih zia a tarlang bawk. 

He lehkhabuah hian a mimal chanchin mai bakah, a sermon  'Pathian Hmangaihna' tih te, a sermon thupui hman lar zual hmanga mi dangin sermon an ziahte pawh chhiar tur a awm bawk. He lehkhabu hi dawr hrang hrangah lei theih a ni.

Read more »
Tweet Share Share Share Share Share

October 17, 2017
Minister Zodintluanga, Congress Legislature Party (CLP) treasurer chuan, Mizorama tualṭo party-a sorkarna chelh tawh zinga tla tawh zingah sorkarna chelh tura tho chhuak leh an awm ngai lo niin a sawi a, "Tualṭo party ding chhuak nawn an awm ngai lo," a ti.

Nimina Congress Bhavan-a inkhawmah thu sawiin Zodintluanga chuan, "Mizoram political history thlirin, Mizorama tualṭo party sorkarna aṭanga tla tawh Mizo Union leh PC Party-te dinhmun kan hre tawh. MNF-te pawh an tla tawh a, an ding chhuak leh tawh dawn lo," a ti a' MNF-te chuan ral lam an pan mek niin a sawi.

Zodintluanga chuan, MNF-te chu kum 10 chhung eptu lama an awm hnuah pawh an sorkar laia an thil tihsual tawh avangin tun thlengin an la buai zel niin a sawi a, "MNF dintu Pu Laldenga a awm tawh loh hnuah MNF hi a malin an la sorkar ngai lo. Kum 1998-ah PC nen thawk dunin an sorkar a, kum 2003 inthlanah khawchhak lamah silai chelek niin, helte nen theihtawpa an ṭang chungin sorkarna an chang hram a ni," a ti.

Congress party political session-ah hian MPCC treasurer H Liansailova leh MLA Dr Ngurdingliana ten thu an sawi bawk.

Read more »
Tweet Share Share Share Share Share

October 17, 2017
Pachhunga University College (PUC) leh Kolasib College-a Mizo department chuan nimin khan Kolasib College-ah Mizo Kristian hla phuahtu lâr, RL Kamlala ‘Mihrinna Hla’ chungchang zirhona seminar an buatsaih a; Bualpui khuaa RL Kamlala thlân an chei thar chu an hawng nghal.

RL Kamlala pual seminar leh a thlân chei ṭhatte hi Mizoram University vice chancellor Prof. Lianzela'n a hawng a; seminar hawnna inkhawmahah Prof. Lianzela chuan, Mizo hla phuah thiamte ngaih hlut an pawimawh thu sawiin, hnam nihna leh timawitu chu thu ziak mite an nih thu a sawi.

Seminar hi PUC-a Mizo department HoC Dr Lalzama'n a kaihruaia a; PUC-a Mizo assistant professor Dr Zoramdinthara'n RL Kamlala mihrinna hla chungchang a sawi. PUC principal Dr Tawnenga leh Kolasib College principal Dr C Lalmuankima ten thu an sawi bawk. Mizorama college hrang hrang leh MZU-a mithiam 20-te thuziak zirho a ni a, zirlaite pawhin paper an buatsaih a ni.

Mizo léngkhawm zai hla phuahtu lâr RL Kamlala hian Kristian hla 50 chuang a phuah a, ama inpuanchhuahna, a iráwm chhuak nia a sawi ‘Mihrinna hla’ pakua a phuah bawk. Seminar-ah hian a mihrinna hlate bik zirchian a ni.

Read more »
Tweet Share Share Share Share Share

October 17, 2017
Lalremruata Ralte s/o Lalchunglura, Zarkawt chu August 10, 2013 zanah a nupui Zohmangaihi a thah avangin Aizawl Additional Session Court-in dam chhunga jail-a táng turin a hrem a; ruang senghawinaa amah puitu a unaupa Lalthlamuanpuia, Kolasib chu kum hnih táng tura hrem a ni bawk.

Zohmangaihi (L) ukil chuan, Lalremruata Ralte hi IPC Section 302 leh 201 hnuaiah dam chhung bakah, kum thum dang táng tur leh Rs. 1,00,000 chawitir turin Court a ngen a, Lalthlamuanpuia chu kum thum tàntir tur leh Rs. 50,000 chawitir turin a ngen bawk. Lalremruata te ukil erawh chuan, Lalremruata chu Rs. 10,000 chawitir turin Court a ngen thung.

Additional Session Court judge Vanlalmawia chuan ukil pahnihte thusawi te, thuhretu thusawite leh finfiahna aṭangtea thutlukna siamin, Lalremruata Ralte chu IPC Section 302 hmangin dam chhunga táng tur leh Rs. 10,000 chawi turin a hrem a, pawisa a pe thei lo a nih chuan thla li dang tàn belh turin a ti a ni.

Sorkar ukil chuan Lalremruata Ralte chu IPC Section 201 hnuaiah kum thum dang tàn belhtir tur leh Rs. 50,000 chawitir turin a ngen bawk a; hemi chungchangah hian Court chuan kum hnih táng tur leh Rs. 5,000 chawi turin thutlukna a siam a, pawisa a pe thei lo a nih chuan thla hnih dang tàn belh turin a ti. Hetiang chiah hian, Lalthlamuanpuia pawh kum hnih táng tur leh Rs. 5,000 chawi tura hrem a ni a, pawisa a pek theih loh chuan thla hnih dang a tan belh dawn a ni.

Court chuan Zohmangaihi (L) nu, Lalhmingthangi Chhangte, Zarkawt chu Mizoram Victims of Crime Compensation Amendment (Scheme) hnuaia zangnadawmna Rs. 2,00,000 pe turin Mizoram State Legal Service Authority a ngensak nghal.

Police-in he thubuai kaihhnawiha an thil man zawng zawng pawh Court chuan a sem darh nghal a; Lalremruata leh Lalthlamuanpuia te chu an mobile phone pe let leh turin a ti a, a bak zawng chu Zohmangaihi (L) nu Lalhmingthangi Chhangte hnena hlan turin thutlukna a siam.

Lalremruata Ralte hi August 11, 2013 khan Delhi panin a zin a, a nupui Zohmangaihi chu a chin hriat loin a awm zui a ni. Zohmangaihi chanchin hriat a nih loh avangin chhungkhat lainate'n an zawng a, August 17, 2013-ah Aizawl Police Station-ah a bo thu thlen a ni. A tûk August 18-ah a nu, Lalhmingthangi Chhangte-in FIR a thehlut ṭha leh a ni.

Lalremruata Ralte hi August 18, Pathianni-ah New Delhi aṭangin a lo haw a, Lengpui Airport-ah police-te'n an lo man nghal a, zan dar 10 velah a nupui chu a thah a nih thu a puang. Lalremruata chuan, Zohmangaihi chu tubohin vawi li vel a chhú a, a thih hnuah buara ipah thunin, Santro car-a phurin Sihphir dái bawlhhlawh paihna ṭhin khâmah an paih thu a sawi.

Zohmangaihi (49) d/o Ramfangzauva (L) Zarkawt ruang chu August 19, 2013 chawhnu dar 2 velah a pasal Lalremruata'n a paihna nia a sawi Sihphir daia bawlhhlawh paihna khâm thuk tak aṭanga lak chhuah a ni a, forensic lama mithiamte leh police-te'n an endik hnuah Aizawl Civil Hospital-ah postmortem leh a ni.
Read more »
Tweet Share Share Share Share Share

October 17, 2017
Zanin dar 7:00 hian Balewadi Stadium-ah MPL champion Chanmari FC-in Indian Super League club FC Pune City an hmachhawn dawn a, Pune-a friendly match khelh tur hi Mizo club leh player-te tan inphochhuahna ṭha tak a ni.

Mizo club fiahna

ISL season thar atana inpuahchahna nei mek Pune City hian Chanmari FC nena an inkhel turah hian player neih ṭhat an chhawr dawn a, Mizo club tan fiahna a ni thei ang.

Pune City assistant coach Pradyum Reddy chuan, "ISL atana inpuahchah mek kan nih avangin kan inkhel tur hi kan ngai pawimawh a, kan player-te khelhna hmun pek vek kan duh. Foreigner pariat kan nei a, ISL danah panga chiah chhawr theih a nih avangin he dan hi kan bawhchhe lo ang. Hun chanve hma lamah foreigner pali, second half-ah pali dang kan luhtir ang," tiin an khelh dan tur hmang a sawi.

ISL club hian defender pahnih Rafa Lopez (Spanish) leh Damir Grgic (Croatian), midfielder pathum Marcos Tebar (Spanish), Robertino Pugliara (Argentine) leh Jonaton Lucca (Brazilian) te an kawl a, forward-ah Uruguayan pakhat Emiliano Alfaro leh Brazilian pahnih Diego Carlos leh Marcelinho te an kawl a ni.

Inphochhuahna

Pune City assistant coach Pradyum Reddy chuan, "Mizo football nen hian tun hma aṭangin inthlunzawmna ṭha tak kan nei a, naupang chher chhuak ṭha Chanmari FC nen kan inthlun zawm thei hi kan lawm. MPL hi kan ngaihven reng a, Chanmari tan Joe Zoherliana, Muanzova, Thomas-a leh midang an khel ṭha tih kan hria a, friendly match hmang hian inelna sang zawkah hman tlak a ni dawn em tih kan fiah ang," tiin Mizo player-te chu an en chik tur thu a sawi a, Pune-a Mizo awmten inkhel hi an ngaihhlut ngei a rin thu a sawi tel bawk.

Pradyum hi Shillong Lajong coach hlui a ni a, I League club a enkawl hun lai hi Shillong club tana Mizo khelh tam lai ber a ni. Kum 41 mi hian Mizo player a ngaina a, Pune City-ah pawh hian Shillong Lajong player hlui Lalchhuanmawia leh Isaac Vanmalsawma te an awm.

Chanmari FC managing board secretary Andrew Lalremkima chuan, "Pune City nena friendly match kan khel tur hi kawng tinrengah kan hlawk pui a, inkhelh zawhah rah duhawm tak a neih ngei kan beisei a ni," tiin Vanglaini a hrilh bawk.

Engtin zel?

Chanmari FC coach H. Vanlalthlanga chuan, "Player-te tan hun ṭha a ni a, chuvangin kan hruai chin te hi chu khelhna hun kan pe vek ang. Chak tum emaw draw tum ngawr ngawrin a khelh theih dawn lo a, kan player-ten an ṭhatna an phochhuah theih turin ruahmanna kan siam ang," tiin an khelh da tur hmang a sawi.

MPL champion lai Chanmari hian Pune City hmachhawn tur hian captain Rochhingpuia chu AFC C Licence Course a kal dawn avangin an hruai thei lo a, an keeper F. Lalmuanawma chuan Inrinni khan nupui a neih avangin a zin ve thei lo bawk.

Thlanga hote hian October 19 hian Lammualah match an nei leh nghal dawn a, Ningani tlaiah I League champion Aizawl FC an hmachhawn lehnghal ang.

Source: Vanglaini
Read more »
Tweet Share Share Share Share Share

October 17, 2017
Mapuia Chawngthu
 Mapuia Chawngthu


India rama chanchinbu lian 'The Hindu' chuan tun hnai khan hmarchhaka filmmaker ṭhazual a thlang chhuak a, chung zingah chuan Mapuia Chanwgthu (Leitlang Pictures) a tel. Filmmaker ṭha thlan rual hian, film ṭha pawh thlan chhuah a ni bawk. 
The Hindu chanchinbu chuan hmarchhak huamchhuanga film siam ṭhin hming eng emaw zat lakhawmin, heta ṭang hian an kutchhuakte a zirchiang leh a ni. Film siamtute leh an kutchhuakte ngun taka zirchian a nih hnuah a ṭha zual thlang chhuakin, October 13 khan a tichhuak ta a ni. Mapuia hi Khawnglun Run film a siam avanga thlan a ni. 
Mapuia hian hun eng emaw chen film siam lam a chawlhsan lai hnuah, kum 2010 March thla khan 'Khawnglung Run' film a buaipui ṭan leh a. August thlaah shooting nei ṭanin, October-ah zawhfel a ni. Mahse dam lohna avangin editing lam khawih chhunzawm lawk theih a ni lo a, kum 2012  khan zawhfel a ni chauh a, kum tawp lamah release a ni. 
Khawnglung Run hi Mizo history ṭhenkhat tarlanna a nih avangin ngaihven a hlawh hle a, ram chhung mai ni lo ram pawn thlengin pho chhuah a ni.  Cine Asia International film festival, Guwahati-a neihah chhuah a ni a, kum 2012 vek khan Goa-a International Film Festival of India-ah, North East Section bikah Opening show atan thlan a ni leh bawk. 
Hemi hnu hian North East Fragrance Information and Broadcast Ministry-te'n kum tina an buatsaih ṭhin, 'Siri Fort' Delhi-a neihah opening show a chang leh bawk. Khawnglung Run hi National leh International huapah ṭum 30 vel zet chhuah a ni tawh a, heng bakah hian University eng emaw zatin, North East zirchianna leh research tihna tan an lo hmang tawh bawk. Chung zingah chuan Singapore University-te pawh an tel. Assam-a chanchinbu lian Assam Tribune-in kum 2012-a hmarchhak film ṭha a thlan chhuah panga zingah a tel tawh bawk.
Mapuia kutchhuak zingah hian Lungdumtu, Nunna Thar leh Scooty-te chu mite hriat hlawh zual a ni. Filmmaker ṭha thlan chhuah zingah hian National Film Awards pawh lo dawng tawh Assam mi Bhaskar Hazarika pawh a tel a ni. 
Read more »
Tweet Share Share Share Share Share

October 17, 2017
Prime Minister Narendra Modi chuan khavela university ṭha 500 thlan zingah Indian university an tel pha lo chu ram tan hmingchhiatna a ni tih sawiin, ram chhunga university-te tihmasawnna turin sorka rlapui chuan cheng vaibelchhe 10,000 a pe dawn tih a sawi. 

Kar kalta Inrinni-a Patna University kum 100 tlin lawmna a hmanpuinaah thu a sawia, PM chuan ram chhunga sorkar university 10 leh private university 10-te chu world class-a siam a nih theihnan kum nga chhungin cheng vaibelchhe 10,000 hi pek an nih tur thu hi a sawi a ni. 

PM Modi chuan, "University ṭha 500 zingah kan lang pha lo a, he hmingchhiatna hi kan tihbo a ngai a ni. Tumruhna leh thawhrimna hmangin kan thlak danglam thei dawn a ni", a ti. Sorkar laipui chuan sorkar university 10 leh private university 10-te tihhmasawn an nih theihna turin sorkar lak aṭanga khuahkhirhna emaw, zalen lohna an neihte pawh hlih a, mahnia ro inrel tura thuneihna pawh pek an ni dawn tih a sawi. Heng university thlan chhuahte tan hian kum nga chhungin cheng vaibelchhe 10,000 pek an ni dawn a ni, a ti. 

Univerity tihhmasawnna tura sum pekchhuah dawng thei tur thlanna chu an history, performance leh khawvel huapa langpha tura hmathlir leh ruahmanna an neih dante behchhanin mithiamten an thlang dawn a ni, tiin PM chuan a sawi. 

PM chuan Patna-ah public meeting nei zuiin, Bihar Chief Minister Nitish Kumar nen Bihar state hmasawnna tur an kalpui mek thu sawiin, state chhungah infrastructure project cheng vaibelchhe 53,000 kalpui anih thu leh, heng zingah project ṭhenkhat chu zawhfel a nih tawh thu a sawi. CM Kumar-a kaihhruai sorkarin central scheme hrang hrangte tihhlawhtlin a nih theihna atana theihtawpa an thlawp chu lawmawm a tih thu a sawi bawk. 

PM hian Namani Gange programme hnuaia sewerage project pali leh national highway project pali lungphum a phum nghal a, Bihar state chuan Diwali leh Chhath denchhenin thilpek hlu tak a dawng a ni, a ti
Read more »
Subscribe to: Posts (Atom)

Contact Form

Name

Email *

Message *

TOM © 2026. All Rights Reserved.
Published by Songate G
Powered by Blogger.