TIMES OF MIZORAM

Mizoram State Tobacco Control Society (MSTCS) chuan, Mizorama zirna in hrang hrangah Anti-Tobacco Club 266 an din tawh.

 MSTCS hian sikul hrang hrangah vaihlo ṭhat lohzia zirtirna an kalpui ṭhin a, a remchan angin Anti-Tobacco Club an din ṭhin.

MSTCS tarlan danin, Anti Tobacco Club hi Aizawl district-ah 126, Lunglei district-ah 44, Siaha district-ah pariat, Champhai district-ah 15, Kolasib district-ah paruk, Serchhip district-ah 12, Lawngtlai district-ah 30 leh Mamit district-ah 25 an din tawh.

MSTCS chuan, zirna in hrang hrangah vaihlo ṭhat lohzia, hriselna a tihchhiat dan leh natna a thlen theih dante zirlaite an zirtir ṭhin tih tarlangin, "Zirlaite'n an phâk tâwka zûk leh hmuam do kawngah hma an lak theihna turin Anti-Tobacco Club din a ni ṭhin. Hei hi zirlai naupangte, zirna ina thawkte leh a chhehvela mite vaihlo zûk leh hmuam laka an fihlim theihna tura hmalakna pawimawh tak pakhat a ni," an ti.

MSTCS tarlan danin, Anti-Tobacco Club dinna sikulah hian inkaihhruaina mumal tak nen hmalak a ni ṭhin a, zirtirtute zing aṭangin supervisor inruat a ni. Club leader leh member zirlaite nen an phâk ang tâwkin zûk leh hmuam do kawngah leh zirna in chhehvela dawrkaite hnenah hma an la ṭhin.

Anti-Tobacco Club hmalakna langsar zualte chu - sikul hung chhung leh a chhehvelah COTPA zawm a nih leh nih loh enfiah, zirlai zingah a tam thei ang ber vaihlo laka fihlim a ṭulzia kawng hrang hranga puanzar, zirna inah essay inziahsiak, poster insiamsiak, debate, extempore speech, etc. te hmanga awareness campaign buatsaih, zirna in bul velah vaihlo ṭhat lohzia lantirte a ni.

MSTCS chuan, Anti-Tobacco Club chu zirna in hrang hrangah din zel theih a nih thu an tarlang bawk. 

Mizoram Assembly speaker Hiphei chuan Central YMA hnenah lehkha thawnin, kumin YMA General Conference-a a genda pakhat, Chakma Autonomous District Council ṭhiah a nih theih nana hmalak rawtna chu pass lo turin a ngen.

Hiphei chuan, YMA agenda chu pass a nih chuan, Mizorama hnam leh hnam, chi leh chi inlungrual lohna thlentu a nih a hlauhthawn vang a nih thu a sawi.

Hiphei hian CYMA President address-in lehkha a thawn a; kumin YMA General Conference agenda-a 'Dan lo anga din CADC hi dan anga ṭhiah a nih theih nan CYMA-in hma la rawh se' tih chungchangah, Mizorama hnam tenau Mara, Lai leh Chakma aṭanga elected legislator zinga upa ber a nih angin, agenda chu pass lo turin a ngen a ni.

Hiphei-a'n ngenna a thawn chhan a ziahte

1.Parliament in pahnih - Lok Sabha leh Rajya Sabha-in an pass hnua Sixth Schedule-a khung luh a nih tawh avangin dan loa din tih hi dik theiin ka hre lo a, ṭhiah leh phei chu thil awlai niin ka hre lo.

2.Mi thil neih tawh sa ṭhiahsak hi a neitu tan a na em em dawn a, sentimental khawih thei a nih avang leh Kristian kan nihna angin mi dangte rilru tihnat lutuk a ṭhain ka hre lo.

3.Hemi chungchanga hmalakna hian Mizoram chhunga cheng hnam hrang hrang kar­ah chi leh chi zawnga inhmuh thiam lohna (disharmony) a thlen palh a hlauhawm.

4.Mizoram mipuite inlungrualna (integrity) a tihchhiat palh a hlauhawm.

5.Hun lo kal zel turah district council dang pahnih - Lai leh Mara ADC-te dinhmun a tiderthâwng theia a lan avangin Lai leh Mara unaute a tithlabár ang tih ka hlau a ni.

Assembly Speaker-in Central YMA-a ngenna a thlen chungchangah hian Hiphei chuan zawhna chhangin, agenda chu pass lo turin a ngen mai a ni tih a sawi a, "CYMA-in pass mah se, ṭhiah a nih phah ring lo mah ila, hnam leh hnam, chi leh chi lungrual lohna a thlen ka hlauh vang a ni," a ti.

LADC leh MADC a pian ruala CADC a pian ve chungchanga zawhna chhangin Hiphei chuan, "Pawih Lakher Regional Council hun lai khan Chakma an lang lo a, CADC pian dan hi MADC leh LADC pian dan nen chuan a inang chiah lo mai thei," a ti.

Hiphei sawi danin, tuna CADC huam chin chu Mizoram union territory a nih hmain Pawih Lakher Regional Council chhunga a awm ṭhin. PL Regional Council-ah hian Pawih leh Lakher ten elected member pali ve ve an nei a, Chakma-te'n elected member pahnih an nei ve bawk ṭhin. PL Regional Council chu ṭhen a, LADC leh MADC a pian dawnah, Chakma-te pawh Regional Council-ah dah zuai a ni a, chumi hnuah Lai leh Mara rualin district council pek ve nghal a ni.

Hiphei chuan, kum 1984-ah Mizoram UT sorkarah minister of state a ni tih sawiin, "Khatih lai khan Chakma refugee an tam a, CM Pu Lal Thanhawla'n Chakma foreigner-te chu va hnawt chhuak rawh min ti a, ka va kal. Bangladesh aṭanga rawn kal Chakma foreigner an tam em em a, khatih laia Pu Hawla sorkar khan a zualpui chu a hnawt chhuak leh vek a ni. Bangladesh-ah Chittagong state siam a nih hnuah rawn pêm lut an tam ta lutuk lo niin ka hria," a ti.

Hiphei chuan, MNF leh India sorkarin inremna an ziah hmain MNF hotu Laldenga'n Mizorama autonomous district council (ADC)-te chu ṭhiah vek a rawt tawh tih a sawi a, "PC sorkar laia chief minister Pu Ṭhena pawh khan a ngaimawh ṭhin," a ti. Laldenga chief minister a nih laiin House-ah CADC ṭhiah rawtna private resolution a lut tawh a, mahse, a tlang ta lo niin a sawi bawk.

September 21-22, 2017 chhunga Mizo­ram sorkar aiawhte leh HPC(D) hruaitute inbiaknaa inremna siam dan tur chungchanga rawtna siamte chu Hmar Inpui-in an pawm. 

Thu dawn danin, inremna thuthlung siam dan tur ruahman hi kar kal ta khan Churachanpur-a Rengkaiah HPC(D) Council aiawhin Hmar Inpui chuan an zir chiang a, ṭha tâwkah an ngai a ni.

Inbiaknaa kal meka a hmáwr bàwk dan tur chungchangah HPC(D) chuan Sakawrdaiah mipuite biakrâwn a tum a, inbiakrâwn hun atana ruahman lâwk October 24, 2017-ah erawh chuan HPC(D) chuan inpeih fel hman an inbeisei lo. 

NGO Coordination Committee member-te October 16, Thawhṭannia MUP pisaa ṭhukhawm chuan, kum 2018 inthlanah Chakma candidate nei lo tura an ngenna chu ZNP leh MPC-in an tihlawhtling thei dawn tih tarlangin, an chungah lawmthu an sawi a; ngaihdan mumal la nei lote chu nei thuai turin an beisei.

NGO Coordination Committee hian kum 2018-a Assembly inthlan lo awm turah Chakma candidate nei lo tura Mizorama political party hrang hrangte an ngenna leh ziaka an chhanna an ngaihtuah a; an ngenna tihlawhtling thei ZNP leh MPC-te chungah lawmthu an sawi a ni. Tun dinhmuna ngaihdan chiang tak la nei thei lo political party-te chu ngaihdan mumal tak an neih theih ngei an beiseiin, an ngen nawn nghal.

Ziaka an ngenna BJP-in an chhang lo chu hriatthiam har an tih thu tarlangin NGO Coordination Committee chuan, "Hun lo kal zelah Mizoram leh hnam dah pawimawh hmasa turin Mizoram BJP-te hi kan ngen nawn leh a ni," an ti.

Thudawn danin, Chakma candidate neih leh neih loa thutlukna mumal la siam lote hi MPCC leh MNF an ni. MPCC chuan All India Congress Committee-te nen an inrawn tlan tur thu NGO Coordination Committee hnenah an thlen a, MNF chuan Chakma candidate neih loh tur ngenna hi ṭha an tih thu an sawi rualin, party zawng zawngin neih loh nise an duh thu an thlen a ni.

NGO Coordination Committee hian Delhi MZP bultuma October 28, 2017-a New Delhi-a ram pum huap, 'Demonstration Against Illegal Immigrant' buatsaih tura tel ve tura ngenna chu tihhlawhtlin an rel a; October 28, 2017-ah Aizawlah 'Demonstration Against Illegal Immigrant' buatsaih ve an rel bawk. 

Joint NGO meeting hi Central YMA president Lalbiakzuala'n a kaihruai a; NGO Coordination Committee-a tel pawl hrang hrang - YMA, MHIP, MUP, MZP leh MSU hruaitute an tel a ni. 

YMA General Conference neih mekah nimin khan Champhai Zotlang khelmuala pandal sak, Zokhawpui Rûnah rorel a ni a; 'Dan lo anga din Chakma Autonomous District Council (CADC) hi dan anga ṭhiah a nih theih nan Central YMA-in hma la rawh se' tih chu pawm a ni.

Rorel inkhawmah hian agenda pariat a awm a, chu'ng zinga panga chu YMA khawih niin, pathum chu sorkar khawih a ni. Agenda pariatte chu sawiho a nih hnuah pawm vek a ni. Rorel inkhawm hi CYMA president Lalbiakzuala'n a kaihruai a, chawhma dar 10-ah ṭan niin, tlai dar 4 velah an zo.

Mizoram Assembly speaker Hiphei-a'n pass lo tura a ngen, 'Dan lo anga din Chakma Autonomous District Council (CADC) hi dan anga ṭhiah a nih theih nan Central YMA-in hma la rawh se' tih pawh sawiho a nih hnuah member tam zawk duh dan a nih avangin pass a ni.

Kumpuan atana rawtna lut pathum - 'Ram leh hnam humhalh' tih te, 'Zirna uar' tih leh 'Ruihhlo do' tihte chu sawiho hnuah, YMA kumpuan atana hman mek 'Ram leh hnam humhalh' tih chu hman zui leh turin an thlang.

Kum 2019 YMA General Conference thleng turin North Vanlaiphai khua thlan a ni a, nakkum Central YMA budget atan Rs. 1,14,87,900 pawm a ni.

Nimin khan rorel hlanin rorel palai ni lote tan Mangkhaia Hall-ah variety programme buatsaih a ni a, YMA branch YMA hrang hrangte'n item an nei. Conference-ah hian hriat theih chinah palai 3,512 an thleng tawh.

Nizan khan pandal-ah vantlang inkhawm buatsaih a ni a, chief minister Lal Thanhawla'n hmanpuiin thu a sawi a; vawiinah kum 2017-19 chhunga Central YMA office bearer tur thlan a ni ang.

Tun dinhmunah Central YMA hnuaiah YMA branch 805, group 47 leh sub-headquarters panga a awm a; YMA member 4,04,722 awmin, mipa 2,47,467 leh hmeichhia 1,57,255 an ni. Mizoram páwnah - Assam, Meghalaya, Manipur, Tripura leh Nagaland-ahte YMA group leh branch a awm a, ram páwn Bangladesh-ah Sajek branch a awm bawk. 

YMA General Conference thurelte

* Mizo lêngkhawm khawhar hla kan neihte hi ṭhangtharte'n a thlûk kan hriat reng theihna turin solfa-a dah a nih theih nan CYMA-in hma la rawh se.

* Hlo tûr leh rannung thahna hlo kan hman dan hi fimkhur tak leh a nihna tur ang taka hman a nih theih nan a ṭul anga hmalak ni se.

* Ruihhlo ngaite chhanchhuahna tur rehabi­litation centre ṭha leh changtlung tak neih a nih theih nan CYMA-in hma la rawh se.

* Mizoram chhunga central leh state institution hrang hrang awmah hian Mizote'n seat tam zawk kan chan theih nan CYMA-in hma la rawh se.

* Mizoram hmun hrang hranga inkalpawhna kan neihte hi tun aia ṭha leh changtlung zawka siam a nih theih nan CYMA-in hma la rawh se.

* Tun aia kan intodelh theih zawk nan thing­tlang aṭanga thlai thar Aizawl khaw chhunga zawrhna tur sorkarin ngaihtuah rawh se.

* Mizoram leh Bangladesh ramri khauh taka venhim a nih theih nan sorkar ngen ni rawh se.

* Dan lo anga din Chakma Autonomous Dis­trict Council (CADC) hi dan anga ṭhiah a nih theih nan Central YMA-in hma la rawh se. 

Sakawrdai;20-10-2017: Chief secretary Lalmalsawma chuan Sakawrdai khua leh a chhehvel fang turin nimin khan Sakawrdai a thleng. Chief Secretary zinga Sakawrdai tlawh hmasa ber a nih avangin Sakawrdai mipuiin an lo zâwn a ni.

Amah lawmna in­khawm Sakawrdai Tou­rist Lodge-a buatsaihah thu sawiin Chief Secretary chuan, "Sakawrdai hi ka vawi khat lo kalna a ni a, hetiang em ema chawimawina leh duh­sakna ka dawn hi ka beisei pha lo a, phu lo ka inti a, ka lawm em em a ni. Vawiinah hian thusawi tura lo kal ka ni lo a, in mamawh ngaithla tura lo kal ka nih zawk avangin, nangmahni lam aṭangin in mamawh rawn sawi u la, a ngaihthlak leh a chhanna hun kan hmang ang," a ti a; mipuite'n an mamawh an rawn sawi apiang chu a bawhzui a tum thu a sawi.

Chief Secretary duh dan angin inkhawm hi mi­pui tan zawhna siam hun atan leh mamawh thlen­na hun atan hman a ni. 

Mipui kalkhawmte chuan Sinlung Hills Development Council a puitlin an duh thu te, SDO (Civil) a puitlin an duh thu te, Sakawrdai mipui eizawnna tur Tuiruang thleng thei tur kawngpui an mamawh thu te, Sa­kawrdai damdawi-in (community health center) chu a nihna anga a kal theih an duh thu te, Tuisualral Higher Secondary School chu adhoc grant-in-aid-a hlankai an duh thute leh, Sakawrdai khaw chhung mamawh hrang hrangte an thlen.

Lalmalsawma chuan mipuite thu thlen hrang hrang hi a hlawhtlin ngei theihna atan theihtawp chhuaha en zui a tum thu a sawi a ni.

Chief Secretary hian vawiin hian Sakawrdai khaw chhehvel a fang kual ang a, an mamawhte a en thlithlai dawn a ni.

October 17, 2017 zana Champhai Zotlanga neih ṭan, YMA General Conference chu nizan khan a ṭiak. Nimin khan kum 2017-19 chhunga Central YMA office bearer tur thlan a ni a, president atan vice president ni mek Vanlalruata, Tuikual South thlan a ni.

Kum hnih chhung atana CYMA hruaitu tur hi post by post-a thlan a ni a, president-ah Vanlalruata, Tuikual South; vice president-ah R Lalngheta, Hlimen; general secretary-ah Lalhmachhuana, Chaltlang North; assistant secretary-ah Peter Chhakchhuak, Maubawk; treasurer-ah C Lalrochuanga Pachuau, Zarkawt leh finance secretary-ah Fabian Lalfakawma, Chawlhmunte thlan an ni. 

Nilaini zan khan vantlang inkhawm buatsaih a ni a, chief minister Lal Thanhawla'n a hmanpui. Kumpuan bawhzui ṭha, ramngaw leh nungcha humhalh ṭha, faina kawnga hma la ṭha leh tuihna humhalh ṭha group leh branch-te hnenah lawmman sem a ni.

Nizan khan palai thlahna hun hman a ni a, Central YMA president kal chhuak tur Lalbiakzuala'n thuchah a sawi.

YMA General Conference-ah hian Mizoram hmun hrang hrang aṭangin palai 4,000 chuang an kal a, vawiin hian palai tam zawk chuan an khaw lam an pan dawn a ni.

Kum 2019 YMA General Conference thleng turin North Vanlaiphai khua thlan a ni a, nakkum Central YMA budget atan Rs. 1,14,87,900 pawm a ni. Kumpuan thupui atan chuan tuna hman lai mek 'Ram leh Hnam Humhalh' tih chu thlan nawn a ni.

Tun dinhmunah Central YMA hnuaiah YMA branch 805, group 47 leh sub-headquarters panga a awm a; YMA member 4,04,722 awmin, mipa 2,47,467 leh hmeichhia 1,57,255 an ni.

Mizoram páwnah - Assam, Meghalaya, Manipur, Tripura leh Nagaland-ahte YMA group leh branch a awm a, ram páwn Bangladesh-ah Sajek branch a awm.