TIMES OF MIZORAM

MNF ṭhalaite chuan thuchhuah siamin, tun hnaiah chief minister Lal Thanhawla'n, a zinna man kum khata Rs. 2,00,000 a lak theih vawi khat mah a la lo nia a sawi chu lawmawm an tih thu an tarlang a; chutih rualin, "Helicopter-a zin chunga TA lak loh hi, lirtheia zin minister dangte TA la aiin sorkar sum sên a tam zawk hle thoah kan ngai a, lawmna tur a awm loah kan ngai," an ti.

MNYF chuan, Chief Minister-in TA a la lo tia sawi theiha a awm hrim hrim chu lawmawm an tih thu sawiin, "Hei hi minister dangte pawhin entawn ngei se kan duh hle," an ti a; bill theih tih vanga bill theih zawng zawng bill chu ṭha lo an tih thu an tarlang.

MNYF tarlan danin, January 1, 2014 leh July 31, 2017 chhunga minister pakuate TA/DA lak zawng zawng chu Rs. 41,55,559 a ni. H Rohluna'n Rs. 9,10,440, Zodintluanga'n Rs. 8,15,724 leh Lalsawta'n Rs. 7,20,934 an bill tawh a; R Lalzirliana'n Rs. 14,000 chiah a la bill thung. Minister dang zawng chuan cheng nuai khat chuang ṭheuh an bill tawh a ni.

National e-Governance Plan (NeGP) hnuaiah sawrkar laipui chuan Passport Seva Project a kalpui mek a, hei hi ramchhunga project lian ber pawl a ni. He project hi Ministry of External Affairs leh Tata Consultancy Services ten Public Private Partnership (PPP) hmangin an kalpui mek a ni.

Ramchhungah Passport leh a kaihhnawih thil dang mamawh tu an tam zel avangin hun hma lama kalpui dan chuan a huap zo ta lo a, chuvang chuan Passport Seva Project hi ruahman a ni ta a ni. Kum kalta 2013 khan sawrkar chuan passport nuai 85.17 a sem chhuak a, hei hi passport sem chhuah tam ber kum niin, kum 2000-a sawrkar semchhuah zat let thumin a tam zawk a ni. Tun dinhmun anga a kal chhuah zel chuan kumin chhung hian passport vaibelchhe 1 aia tam pek chhuah rin a ni. Ram pawna atanga Passport dilna chhiar tel lovin kumin kum tir atanga June thleng khan ramchhunga Passport Office te chuan dilna nuai 42 an dawng tawh a ni. June ni 30, 2014 thleng khan India khua leh tui vbch 5.4 te chuan Passport an nei tawh anga chhinchhiah a ni.

Passport Seva Project hi India khu leh tui ten an duh huna awlsam taka Passport leh a kaihhnawih thil dang an neih theihna tura ruahman a ni a. Kum 2012 June khan ramchhunga a khawpui 63 leh state 23 ah te he Project hi kalpui a ni a. Private Service Provider atangin IT lam khawih turin mi 2500 thawh tir mek an ni a, MEA chuan official 2500 a dah belh bawk a ni. He project hi Build Own Operate Transfer Model hmanga kalpui niin a tirah Private Partner ten sumpai an seng anga, sawrkar chuan a tlem thei ang ber sumpai a seng dawn a ni.

Thil Tum: 

“Passport leh a kaihnawih thil dangte mi thiam ten khua leh tui te tana a tangkai leh rintlak tan pe chhuak a, a mamawh tu ten awlsam zawk leh a hun taka an dawn theihna tur”. 

Passport Seva Network

Passport Seva Network hi ramchhung hmun hrang hrangah neih a ni a, tunah hian Passport Seva Kendra (PSK) 77 leh Passport Issuing Authorities 39 a awm mek a, hei bakah hian pawn lam atanga pui turin Police, India Security Press leh India Post te an awm bawk a ni. Passport data te hi Immigration Check Post tin atanga en theih a ni a, Indian Mission leh Post ram pawna awm 183 atangin a en theih bawk a ni.

Khua leh tui te tana a tangkaina

He project hian tun hmaa Passport leh a kaihhnawih thildang pek chhuah dan leh kalphung a thlak danglam mek a ni.

1. Awlsam zawk leh Langtlang

Sawi tawh angin he project in a tum ber chu awlsam leh langtlang zawka Passport pekchhuah a ni a. Application/ Dilna te hi ramchhung hmun hrang hrang atangin online thawn theih a ni. Http://passportindia.gov.in ah engtik lai pawhin dil theih ani a, heta tang hian sum sen ngai zat leh PSK-a kal hun turte a hriattheih a ni. PSK ah hian lehkha pawimawh leh thildang te chu Passport Office-a thawkten an endik nghal bawk a ni.Passport dilte tana awlsam zawkna turin Electronic Queu management System (EQMS) siam a ni a, kum upa te tan a hrana an nghahna tur hmun siam a ni bawk.

2. Remchang siam

Passport diltute tana a remchan zawk nan leh hahdam taka an nghah theihna turin PSK tinah Air-Condition leh thutna nuam dah a ni. PSK tinah hian Photocopy Machine, Public Phone Booth, Baby Care Room, Newspapers &Journls, ATM, Internet Kiosks leh ei leh in lamna dah a ni. PSK te hian a mamawh tana hman turin Wheel Chair, inthiarna fai leh nuam leh harsatna nei te tana awlsam zawkna turin lift te pawh an an nei bawk a ni.

3. Inbiak pawhna awlsam

Passport Seva Project hian hmun hrang hrang atanga mipuite an hman theihna turin ruahmanna a siam a, chungte chu: 

(a) Passport Seva Portal: He online portal hi Single Window Online Interdace niin, rang taka update thin a ni a, hmun hrang hrang atanga hman theih a ni.

(b) Call Centre & Help Desk: Zawhna emaw hriat chian duh nei te tan National Call Centre din a ni a, tawng hrang hrang 17 hmangin a zawhfiah theih a ni. He bakah hian email hmangin zawhna te chu chhan theih a ni bawk.

c) 'mPassport Seva' Mobile Application: mPassport Seva mobile application hi mipuiten awlsam taka an hman theihna tura ruahman a ni a. Hei hi Smart Phone zawng zawnga hman theih turin Android, iOS, Wondows leh Blackberry phone ah te dah a ni. 

(d) Value Added SMS Sercvice for Status Tracking: Passport Seva hian SMS hmangin file update a thawn chhuak thin a, mipuiten office a an kal ngai kher lovin an dilna ten engchen nge a thlen tawh tih an hre thei dawn a ni. A hmang turte SMS Service hmang hian man tlawm takin an file dinhmun pawh an zawt thei bawk. 

4. Huam zau zawk:

Passport Seva Project hian mipuite hnenah Passport Service a thlen theih nan hian huam zau zawk nei a tum a, chumi ti hlawhtling tur chuan hmalakna hrang hrang a nei a ni.

(a) Passport Seva Mela: Mipui tam zawk ten an hnathawh leh an tana a awlsam zawkna turin in hrilhhriatna hun Passport Seva Mela te chu neih thin a ni. 

(b) Passport Seva Camp: Hmun hla zawk leh PSK awmlohna hmunah te Passport Seva Camp neih thin a ni.

(c) Common Service Centres: Ministry chuan mipuite hman tangkai turin Citizen e-Governance Service a din a. Hmun hla zawka awm te tan Common Service Centre (CSC) hmangin mipuite passport dilna leh fee te an pe thei reng a, hei bakah hian Post Office kaltlangin an buaipui thei reng bawk a ni.

5. Rang zawka hmuh theih

Passport Seva chuan rang zawka an kawtkaia mipuiten an hmuh theih turin electronic data exchange a ruahman a, passport siamna tur atana mamawh hrang hrang Police, India Security press leh India Post ten an pekchhuak te chu awlsam zawka en theih leh hmuh theihin a siam a ni.

6. Mipuite ngaihsakna

Passport diltute an ngaihsak zia ti lang turin passport seva chuan Network Operation Centre leh Secutity Operation Centre a din a, hengte hian darkar 24 chhung nitin hna an thawk a ni. 

Chawimawina

Passport Seva Project hian hna a thawh that avangin chawimawina tam tak a dawng tawh a chungte chu:

- Computer Society of India Nihilent Award of Excellence, 2012

-eIndia Award of Excellence, 2013

- Promising Innovation Award at Tata Innovista Regional Rounds, 2013

- Secure IT Award for Information Technology, 2014

Passport Seva Project din anih atang hian mi tam takin an hmang tangkai tawh a. System thar ah hian vawiin thlengin dilna maktaduai 18 a dawng tawh a, khua leh tui sing 4 chuangin nitin dilna an thehlut bawk a ni. Darkar 24 chhung hman tura ruahman Call Centre pawhin din a nih atangin vawiin thlengin maktaduai 20 phone call a dawng tawh a, chungtiangin Mobile phone atang pawhin nitin mi sing chuangin an dilna te an thawn mek a ni. 

* Mukesh K Pardeshi hi Ministry of External Affairs hnuaiah Chief Passport Officer nilai a ni a, amah hi Joint Secretary a ni bawka ni.

India ram hi hnam hrang leh ze hrang, rin hran nei leh hmel inanglo tak tak te inlungrual taka an chenna ram anih avangin zah leh ngaihsan a hlawh hle a. Tribal te hi kan ram lungphum pawimawh tak dintu te niin ngaihpawimawh an hlawh em em a ni.

Ram hruaitu tam takte phei chuan tribal te dinhmun chawisanna hi an ngaipawimawh hmasak ber niin India ram Prime Minister lo ni tawh Indira Gandhi hi tribal ten hmasawnna an neih nana hmala tu langsar tak a ni a. Indira Gandhi chuan tribal hnam te chu mawlmang taka khawsa, rilru zau tak pu, mi rinawm tak nia ngaiin an hmasawnna kha a ngaipawimawh em em a ni.

Changkan duhna rilru pua mahni inringtawk taka hmalam thlir thintu niin ram inrelbawlna leh hmasawnna kawnga hmalakna chi hrang hranga sawrkar policy leh ruahhmannaah tribal te ngaihdan kha a ngaipawimawh em em a ni.

Hnam hnufual zawkte leh tribal te tanpui duhna rilru a pa Pandit Jawaharlal Nehru India ram Prime Minister hmasa ber hnen atanga chhawm nungin an hmalakna hrang hrangah rilru zau tak pu chunga tanpui a peih reng thin a ni.

A pa Jawaharlal Nehru khan Nagaland kha State puitlingah a hlang kai a, a thih hnuah pawh a pa tihdan chhawm zelin Manipur leh Meghalaya te chu State puitling nihna pe lehin khang hunlaia Union Territory pahnih Mizoram leh Arunachal Pradesh te hmasawnna atan sum leh paia tanpuina kawngah hma nasa takin a la a ni.

A rilru chhungril tak atanga tribal te nena inzawmna neiin India ram khawpui atanga an nundan ngaithla liam mai lovin an mamawhte phuhru turin an in leh lo te hmuh puiin a kawm thin a, Tribal te amah lawmnana an lam changte chuan lamin a zawm ve ngei ngei thin a ni. Tribal te pawhin an nel em em a, thian ena an en rualin anmahni hmakhua ngaia thiamna hmanga an nun kaihhruaitu zawlnei angin an en hial a. An hruaitu an thian ni bawk chu rinna leh hmangaihna rilru nena en letin inthlan lo thlen changa amah leh an party tanpuitu mi rinawm rual an lo chang thin a ni.

A thihcham a lo thlen hian Indira Gandhi-in tribal te inrintawkna pea a enkawl dante kan hrereng a, A bik takin Hmar chhak State te tana hma a lakna te chu Manipur leh Meghalaya ten State puitling dinhmun an chan atang ringawt pawh hian a hriat awm e. Kum 1970 chho vel khan mel lung chhinchiahthlak tak phunin helna leh hnam leh hnam buaina hrang hrang chhuak thin karah hma nasa taka la in hmar chhak state te chu `Seven Sisters` tia koh theih khawpa inlungrual an ni ta reng mai.

Naxal helte India ram hmun danga an lo chhuah tak hnuah phei chuan Indira Gandhi-in hnam hnufual zawkte tana hma a lakna fakawm zia a lang chiang tawlh tawlh a ni.

Kum 1990 tawp lama Ministry of Tribal Affairs din anih khan Indira Gandhi hmathlir thui zia entirin kha Ministry kha India rama hnam hnufual leh chawikan ngai ber Schedule Tribe ten hmasawnna kawng an zawh theih nana hmalakna mumal tak a duang a ni.

Indira Gandhi khan tribal te zirna kha a ngaipawimawh em em a. North Eastern Hill University (NEHU) Shillong-a din a nih nan amah ngeiin hma a la a. Mumal taka zirna kalpuina chuan tribal te chu an mamawh tak hriatna pein kum tamtak chhung chu Meghalaya, Mizoram leh Nagaland-a zirlaiten an chhawr tangkai em em a ni.

Hnam ziarang leh tihdan Indira Gandhi khan ngaipawimawhin chung atang chuan zir chhuah tur tam tak a awm a ni tih ring tlat tu a ni a. A mitthlaa India ram thar thlirin Tribal ten chanvo pawimawh zawk changa an dinhmun an siam that hun tur nghakhlel taka thlir puiin Tribal te chu an hnam ziarang theihnghilh lova chak zawka an hmakhua an sut hun nghakhlel takin a thlir a ni. 

Prime Minister a nih lai leh ram hruaitu anih laia amah belchiangtu Nagaland Chief Minister Hlui Himachal Pradesh Governor ni tawh Hokishe Sema chuan Indira Gandhi chuan tribalte nundan chu a ngaipawimawh mai ni lovin an lak atang pawhin thil tam tak a zir a ni, a ti.

*Special Representative with the Statesman, New Delhi

Thil mamawh avanga leitu mipui (consumer) ten hriatna leh finna lama hma an sawn theihna tura multi-media campaign kawngah te, bungraw chi hrang hrang hmanga sumdawnna zaa 34.9 a thanna atan te, thil man awmsa leh nakina lawka a man tur chhut lawkna, dawr, post office, bank hnuaia rural bank hnena sem chhuah leh Essential Commodities Act dan leh hrai awm zawng zawngte mipuite hnena hriattir tura campaign thlak hi kum 2009 chhung Department of Consumer Affairs hlawhtlinna ropui tak a ni.

CONSUMER-TE HUMHALHNA LAM HAWI THEH DARH

Ram puma consumer-te zirtirna turin multi-media campaign lian tham tak neih a ni a. DAVP kaltlangin national leh regioanl ni tin chanchinbu hrang hrang 400 aia tam hnenah advertisement pek chhuah a ni bawk.

Department hrang hrangah - ISI, Hallmark, labelling, MRP, weight and measures leh thil dang chungchang an hriatthiam theihna turin hma lakna lian tham tak neih a ni bawk a. Telecom, real estate, credit cards, financial product, pharmaceuticals, BEE, etc. lam thil lo inlar chhuakte chungchang hriat thiam theihna turin print advertisement bakah department hrang hrangte joint campaign neih a niin heng department hrang hrangte biakrawnna hun hman a ni bawk.

Print advertisement-ah hian thil lian tham leh pawimawh 30 vel pho chhuah a ni a, chanchinbu-ah hian thubelh 12,000 vel zet siam a ni bawk.

Department vek hian Doordarshan leh Satellite channel-te kaltlanga thawn chhuah tur consumer-te zirtirna lam hawi second 30 awh video a siam bawk a. Lok Sabha TV-ah pawh consumer-te zirtirna lam hawi special programme pek chhuah a ni a. Advertisement hrang hranga ngaih pawimawh ber chu thingtlang leh hmun kilkhawra mite an ni.

Hmarchhak state hrang hrang tawng bikte hmangin consumer-te zirtirna tur video pawh siam a ni a. Hmarchhak state hrang hranga hmun kilkhawrte hnen thleng turin Meghdoot Calendar pawh he thuchah puan chhuah nan hian hman a ni a, he zirtirna chi hrang hrang, consumer-te tana tangkai tak tak tur hi ram chhung post office nuai 1,55 chuang hmanga sem darh a ni. Khawpuia post office 25,000 aia tamah consumer-te zirtirna atan poster chi hrang hrang sem chhuah a ni bawk.

Consumer-ten real estate, zirna, damdawi lam, banking sector lam, telecommunication lam chanchin chiangkuang taka an hriat theihna turin publicity pawh tih a ni a, chungte chu in chhunga tar mai theih tur banner leh hoarding-a siam a ni. Hetianga inzirtirna hi rel ticket-ah te leh chhungtinina kan hman electric bill bakah rel reservation chart-ah te chhut kai vek a ni a. Hindi leh Englsih tawng chauh ni lo, tawng chi hrang hrang hmangten an hriatthiam theihna tura an hnambil tawngtea chhut chhuah a ni bawk.

National Consumer Helpline 

Department vek hian kum 2005 khan National Help Line a siam bawk a. Consumer-te harsatna sutkiana puih an nih theihna tura counselling chu Delhi University hnuaiah din a niin Toll Free Number 1800-11-4000 kaltlanga rawn theih reng an ni. Consumer-ten an rawn duh chuan phone hman man chawi lovin Thawhtanni atanga Inrinni inkar zing lam dar 9:30 atanga tlai lam dar 5:30 chhung harsatna thlena tanpuina dil theih a ni a, Normal Call charges pawh 011-27662955-58 hmanga tih theih a ni. Department of Consumer Awareness lamin advertisement an tihchhuah bakah hian National Helpline kaltlang hian zirtirna pawh tam tak pek a ni a, harsatna tawk consumer-ten national helpline kaltlang hian kaihhruaina leh counselling an dawng thin. Kumtluanin DD news channel-ah scroll hmangin National Consumer Helpline chungchang hi tarlan a ni bawk.

CONFONET

Plan X-na chhunga National Informatics Centre (NIC) kaltlanga scheme pawimawh tak mai 'Ram chhunga Consumer Fora-te computer leh network hmanga thlunzawmna' project chu Plan XI chhung atan pawh Cheng vaibelchhe 25.69 senga chhunzawm tur a ni. He scheme hnuaiah hian ram chhunga Consumer Fora reng reng computer hmanga tih vek a ni a, chu chu consumer-ten an mamawh an rawn thlen pawha awlsam taka chin fel thuai thuai theihna tur a ni. Plan XI-naah hian Technical support personnel (TSPs) leh training hmangin he ruahmanna hi tihchak lehzual tum a ni.

Consumer Fora inrelbawlna tihchak leh thuam that

Sorkar laipui chuan State leh UT-tena consumer fora inrelbawlna chak lehzuala an kalpui theihna turin sum lama tanpuina a pe a, consumer forum tin chu hna an thawh theih ngei ngeina tura hmanrua leh mamawhte pek vek tura tih a ni. Heng zingah hian consumer fora building thar sak te, building awmsa sak belh, tihdanglam leh tuai thar te a tel a, bungrua leh office hmanruate lei belhna tur grant pawh a tel. Kum 2009 chhung khan hemi atan hian Cheng vaibelchhe 13.20 pek chhuah a ni a, kum 1995-986 atanga 2008-09 chhunga State/UT-a pawisa pek chhuah tawh zat chu Cheng vaibelchhe 159 a ni.

RAMCHHUNGA SUMDAWNNA

Kum 2009 chhung khan national exchange 4 - Multi Commodity Exchange, Mumbai; National Commodity and Derivatives Exchange, Mumbai, National Multi Commodity Exchange, Ahmedabad leh India Commodity Exchange Gurgaon-te kaltlanga bungraw chi 115 hmanga sumdawnna kalpui a ni a. Regional exchange 18-ah pawh bungraw thenkhat hmanga sumdawnna neih a ni a, chung bungruate chu Commission-in Forward Contracts (Regulation) Act,1952 behchhana a pawm vek a ni.

Tunlai technology hmanga National Commodity Exchange kalpui chuan ram puma bungraw hrang hrang hmanga sumdawnna kawng a sial mek a. Kum 2009 (January 2000-November 2009) chhunga sumdawnna hlut zawng chu Cheng vaibelchhe 62,94,000 a nih laiin kum kalta sumdawnna hlut zawng chu Cheng vaibelchhe 46,65,000 a ni thung a, a thanna hi zaa 34.9 a tling. Exchange kaltlanga bungrua an thawnchhuahte chu thir hlawm, thir tlang, energy lam thil leh thlai thar chi hrang hrang a ni a, heng zinga hemi kum chhunga hralh tam ber chu rangkachak (gold), tangkarua (silver), \darsen (copper), suan (lead), zinc, chana, bekang, be, jeera, hmarcha leh energy lam thilte a ni. Hemi hun chhung vek hian almond, heating oil leh gasoline lama sumdawnna kawng thar hawn a ni a, Thermal Coal lakluhna kawng hawn a ni bawk.

Commission thil tum ber chu a dik lo zawnga market kaihher a ni tur ven te, market hrang hrang inzawmna tur kawng duan te, sum virvel thunun leh consumer-te humhalh a ni.

Kum 2009 nchhunga Commission-in Regulatory leh Development lama hma a lakna lian thamte chu :

Regulatory lama hmalakna :

* Kum nga zet an lo hman tawh National Exchange-a divestment of the equity kaihhruaina chu July ni 29, 2009 khan tih chhuah a ni.

* October ni 9, 2009 khan Gurgaon-a India Commodity Exchange Limited chu 'national exchange' tia pawm (recognised) a ni.

* Exchange account leh an member-te hming chuanna lehkhabu hrang hrang enfiah a ni a. Commission chuan kum 2006-07 atang khan Exchange Members, a bikin National level Commodity Exchanges, entir nan - MCX, Mumbai, NCDEX, Mumbai and NMCE, Ahmedabad-te account book a enfiah ziah thin. Kum 2009 khan National Commodity Exchanges member 99-te a audit tan a. Heng auditor-te hian National Exchange 3 leh Regional Exchange 14-te pawh an audit nghal a ni.

* The Forward Markets Commission hian Commodity Exchange-a pek chhuahna kalphung (delivery system) mual taka a kal theihna turin kaihhruaina chi hrang hrang a siam a, hei hi sumdawngte emaw midang tupawh, he market-a an inrawlh tam theihna tura tih a ni. 

Kum 2009 chhunga Regulatory lama hmalakna lian thamte chu :

Direct Delivery System hman : Hmun thenkhat, bungraw dah khawmna in (warehouse) atanga hla taka awmte bungraw lak chhuah dan phung tihzauh leh hawn zauh a nih theih nan leh tunhmaa bituk chin chauh lak chhuah theih a nih chungchangah Commission chuan ni 16.3.2009 khan NCDEX kalphung zuia Direct Delivery mechanism hman a pawm ta.

I. Exchange for Physicals (EFP) leh Alternate Future Settlement Mechanism (AFS) dan hman a ni.

II. Sumdawng leh chanvo neiten mumal leh awlsam zawka thil an lak chhuah a, an pek chhuah theihna tura NAFED thuneihna sang lutuk tih hniam a ni.

III. Bungraw thlan bik a hma thei ang bera sem darh a nih a, fel fai taka duh thala sem chhuah a nih theihna turin a pek chhuahna dan siam that a ni.

IV. Pawisa tih chingpen (Money Laundering) awm thei thlir chungin commodity exchange member-te zui tur kaihhruaina pek chhuah a ni.

Heng bakah hian Commission chuan market kaihhruaina dan a lek kawh tha hle a, alu leh aieng ang chi mamawhna a san ang zelin a tul angin market-te hi a endik thin.

Hmasawnna (development) lam kawnga hma lakna :

Commission hian market-te bul thut tihzauh a, Commodity Market-a chanpual nei zawng zawngin hlawkna an chan theihna turin tun hnai khan ruahmanna chi hrang hrang a siam a, hengte hi a ni:

* Thilsiamtu, lo tidanglamtu, thawnchhuaktu leh laluttu (hedgers) te an tel tam theihna kawng chu thil man nena inbuktawk turin a ruahman.

* Chanpual nei mi chi hrang hrang, a bikin loneituten market hrang hranga hlawkna an chan ve theih dan tur te, ruahmanna siamtute thurawn an pek theihna tur leh commodity sector lama an chakna tihpun a nih theihna tura zirtirna pek an ni.

* Commodity Exchange-a chanpual neitena hlawkna an chan ve theihna tur leh loneituten an thil thar chhuah man, man man tawka an tel ve theihna turin Aggregation model hrang hrang siam a ni.

* APMC leh centre dangte kaltlanga loneitute tihchakna leh thil man hriat zung zung theihna turin Price Dissemination project siam a ni.

* Chanvo nei hrang hrangte harsatna tawhte hriat sak theihna tur leh an thil tum an tihpuitlin theihna tura an mamawh thil chi hrang hrangte hriatsakna turin chanvo nei zawng zawngte nena meeting huaihawt a ni.

Chanvo neite tel tam theihna tura ruahmanna

Commission chuan bungraw hrang hrang hralh zelna kawnga chanpual nei (hedger) tel tam theihna tur kawng hrang hrang a duang a. Market lo awm zel tura chanvo nei hrang hrangte an tela an inrawlh theihna tura kaihhruaina dan siam danglam tulte pawh siam danglamin exchange leh chanpual neite inkawmna leh inbiak theihna tur hun remchang a bituk bawk a. Hetianga inkawmhona leh sawihona bakah hian India ram pumna corporate house-te nen meeting vawi duai lo neiin thlai thar lam thil te, thir leh energy lam thil siam chhuah tihpunna tura chanvo neite rawtna pawh ngaihthlak thin a ni.

Meeting atanga thu an dawn leh market lama mithiamte thil hmuh behchhan hian Commission chuan exchange-a delivery system tihthat nana ngaihtuahna thar siamin, delivery period hun pawhsei chungchangah te, direct delivery te, exchange forphysicals (EFP) te, contract rei zawng te, a that leh that loh thu leh bungraw thenkhat bik chungthu ngaihtuahna te a nei zui thin a, thil man danglam thut thuta chanvo neite harsatna tawh tur pawh theihtawpin lo thlir lawk thin a ni.

Inzirtirna lam:

Loneitute leh an kaihhnawih pawl leh mimaltena an hriat tur zirtirna hi kum thum kal ta chhunga Commission hnathawh pawimawh ber pakhat a ni. Kum 2009 chhung khan commodity future market-a chanvo neite zirtirna programme vawi 208 zet neih a ni a. Heng programme zinga 96 chu loneitute pual liau liauva tih a ni.

Thil man tar chhuahna project

Forward Markets Commission chuan Commodity Exchange nena tangrualin mandi, post, office, thingtlanga bank branch leh loneituten an tlawh zin lai hmunahte thil man dinhmun leh a danglam theih dan pho chhuahna project an bawhzui bawk. Thil man dinhmun tarchhuah hi a pawimawh em em nachhan chu loneituten thlai chi an theh hma leh an seng hnua ngaihtuahna an sen theihna tur leh APMC lama an dinhmun tur leh sumdawngte nena an inkar an chhut chian lawk theihna tur a nih vang a ni. Hemi hmang hian an thil thar chhuah atangin hlawkna an dawng thei bawk. State huam chin te, hmun bik te leh bial chhung bhika thil man pho chhuahna leh tar chhuahna hi AGMARK nena inberawna tih a ni a. Hemi project thawhna atan hian Mandi 885 chu pawm a ni tawh a. Mandi leh hmnundang, loneitute mamawhna sanna hmunah la tih zui zel tum a ni. Thil man reng reng chu electronic price ticket board an tih maiah an tar nghal zel dawn a ni.

ESSENTIAL COMMODITIES ACT, 1955 KALPHUNG LEH A KENKAWHNA DAN

State leh UT thuneituten Essential Commodities Act, 1995 behchhana a tuka bungraw mamawh chheprelh venna kawnga hma an lak theihna tur leh a tul anga hremna an lek theihna turin Cabinet phalna angin Central order chu ni 15.02.2002 khan tih chhuah a ni a. Chutah chuan bungraw chheprelh khap zingah be lam chi, hriak ei chi, buhfai, buhhum leh chini te a tel a ni. State/UT sorkarte chuan heng bungruate hi phalna bik hmangin chhelkhawl theih chin tur bi an tuk ang. Heng thil chi ngate humhalh bikna dan hi Ni 30.09.2010 thleng (extended vide order dated 25.09.2009 published in the Gazette of India) a nung dawn a. State/UT sorkarte atanag report dawn danin State/UT 23 te chuan heng thil chi hnih emaw dah khawl theih chin dinhmun an puang chhuak ang a, license an mamawh dan te, an khawl zat puan chhuah te an ti vek ang. Tunah hian State/UT 18-te stock limit order chu pek chhuah tura enfiah mek a ni a. State/UT panga hnenah licensing requirements/stock declaration requirements chu pek chhuah a ni tawh.

Chini (sugar) bika order hi Ni 08.10.2010 thleng a nung a, chu chu Ni. 30.09.2010 thlenga nung tura pawhsei a ni. Chini chungchangah sorkar laipui chuan stock zat tur leh an chhekkhawl phal chin hriattirna order pawh a pe chhuak tawh bawk a ni.

India in zalenna hmuh hnu kum 1947 August thla atang khan sawrkar siam tur thlang turin inthlanpui neih tan a ni a, hei hi Universal Adult Suffrage system a kalpui a ni. India danpui Constitution hnuaia Article 324 a tarlan angin Election Commission chu constitutional authority angin a hrang hlaka din niin kum 1949 November ni 26 khan din niin a kum leh January ni 26 atang khan hna a thawk tan a ni.

Dan ang thlapin Election Commission of India chu kum 1950 Jan ni 25 khan din tan ani a, hemi ni atang hian India chu Sovereign Democratic Republic ram a ni nghal a, Chief Election Commissioner hmasa ber atan Sukumar Sen chu March ni 21, 1950 khan ruat a ni.

Election Commission hi member pakhat chuahin a enkawl hnuin kum 1989 October ni 16 atanga 1990 January ni 1 thleng khan member 3 in a enkawl a, tih danglam leh a nih hnuin vawiin thlengin kum 1993 atang khan member 3 in an enkawl mek a ni. Chief election Commisisoner leh Election Commissioner 2 te chu Supreme Court Judge hlawh ang pek an ni a, an ni 3 hian thuneihna thuhmun an nei a, CEC leh EC term hi kum 6 chhung a ni a, kum 65 a tlin hma chu he hna hi chelh theih a ni.

India rama Lok Sabha leh Vidhan Sabha inthlanpui chu kum 1951, August ni 13 khan President in a puang a, hei hi Election Commission thurawn angin lehin Parliament in rem a tihpui hnua puan a ni. Dan hnuaia felfai taka inthlanna neih anih theih nan Representation of People Act, 1950 chu sawrkarin kum 1950 May ni 12 khan a pawm a, electoral roll mumal siamna turin Representation of the People Act, 1951 chu July ni 17, 1951 khan pawm leh niin, hei hi state tinah hman a ni.

India ram puma electoral roll hmasa ber chu kum 1951 November ni 15 khan tarchhuah niin Jammu and Kashmir tel lovin vote nei 17,32,13,635 tarlan a ni. Lok Sabha, Rajya Sabha leh state Assembly inthlan te neih anih hnu hian kum 1952 May thla khan President thlanna chu a vawi khatna atan neih ani bawk a ni. Inthlanpui hmasa berah hian Election Commission chuan political party 14 chu recognized political party, state tina unit nei ah a dah a, 39 chu state political party bik angin a chhinchhiah a ni. Tunah hian National party 7 awmin state party 40 an awm mek a ni. 

Inthlanna ah hian Balloting system hmangin paper ballot a vote thlak thin a ni a, mahse kum 1982 khan Kerela ah Arur Assembly Costituency thlanna ah Electronic Voting Machine (EVM) chu a vawi khatna atan hman niin hemi hnu hi chuan hmun hrang hrang ah hman ani ta a ni. Lok Sabha inthlanpui 2004 khan a vawi khatna atan ram pumah hman a ni a, tunah chuan state legislative assembly inthlan ah pawh EVM hi hman ani vek tawh a ni.

Kum 1951 atanga chhut chuan kan ramah hian inthlanpui hi hlawhtling taka neih alo ni tawh thin a, Lok Sabha inthlanpui 16-na tur atan pawh hian nasa takin sawrkar a inpuah chah mek a ni. 

Infiamna, Sport hi ram leh hnam kalphunga bet tel leh intuh nghet tlat a nih rualin mihring hmasawnna leh thanlenna atana thil pawimawh a ni a. Nitin nunah sports hi seng luh kan tum dawn chuan hmanraw tha leh hmunhma neih hmasak a ngai a. Kan ram mipui zinga maktaduai 770 vel hi naupang leh tleirawl an ni a, an zingah hian khawpuia cheng maktaduai 50 vel chauhin Sport hmanrua an hmang phak a ni. Ram chhung mihring za-a 75 zet thingtlanga chengte hian infiamna hmanrua leh hmunhma an nei tha lova, infiamna lam zirna hmun tha an neih loh bawk avangin Sport lama rampum hmasawnna tur a tithuanawp nasa hle a ni.

Sport lama ram pum thanmawhbawk sukiang tur hian sawrkar chuan rampum huap programme ‘Panchayat Yuva Krida aur Khel Abhiyaan(PYKKA) a buatsaih a. Ministry of Youth Affairs and Sport chuan kum 2008-09 atang khan kalpui tanin, naupangten sports an tuipui theihna turin thingtlang hmun tinah sports hmanruate a lo bun tawh a ni. PYKKA in a tum bulpui ber chuan kan ramah Infiamna boruak tha, Sport culture tihlar a nih a, zirna bakah nitin nuna infiamna seng luh a ni.

PYKKA hnuaiah hian Sporting Discipline hrang 20 a awm a - chungte chu : Athletics, Gymnastics, Swimming, Badminton, Table Tennis, Archery, Wushu, Taekwando, Weightlifting, Cycling, Boxing, Judo, Wrestling, Kabadhi, Kho kho, Hockey, Football, Volleyball, Basketbawll leh Handball te a ni.Hengte hi infiamna lar zualte niin mipuiten sports an hlut lehzual theihnan infiamna larte hian tangkai taka hman chhoh mek a ni.

PYKKA hian tum mumal tak leh Panchayat level-a kalpui dan turte, Campaign leh sum lama ruahmannate a nei vek a. Heng a thiltum mumal takte avang hian PYKKA chuan India rama sports tihhmasawn dan tur pawh a duang chhuak thei a ni. Bang awm lova mitin telna buatsaih chu a tum ber a ni a, theihna ‘talent’ in tawp chin a nei lo ang bawkin hmanraw mumal awm loh avanga ‘tel ve thei lo’ leh ‘thiam ve lo’ an awm lohna turin hma a la chho zel a ni.

PYKKA hian peng 3 a nei a, chungte chu - a ruhrel(infrasturcture component) intihsiakna boruak tha (competition component) leh theihna haichhuah tura hmalakna (capacity building component) te an ni. Infrastructure Component in a tum chu kan ram mi tam zawk chenna thingtlang lama talent nei tha tam takin sport an hmelhriat vena tura hmalakna a ni a. Infrasturcture component hian kalphung 3 nei lehin One time capital Grant, Annual Acquisition Grant leh Annual Operational Grant te a ni a. One time Capital Grant hnuaiah hian mihring 4600 chin chenna Village Panchayat ah cheng nuai 1 pek an ni a, Block Level PYKKA Centre in cheng nuai 5 an dawng a, he sum hi Central leh State sorkarin 75 : 25 in an intumsem a ni. Ramri bula cheng kum lama naupang zawkte tan nundan tha lo leh ram tana pawi zawnga khawsak zir a awl bik avangin heng hmuna chengte hi ngaihsak deuh bik an ni bawk.

Annual Acquisition Grant : Panchayat/Block level PYKKA Centre tinah kum 5 chhunga Sports bungrua leh damdawi te leh a tul dang leina tura pek chhuah a ni thin a. Sum pek chhuah zat hi Panchayat ah cheng sing khat niin Block levelah cheng sing 2 a ni a. Kum 5 hnuah chuan State/UT ten he grant hi an tum ve tawh ang.

Annual Operational Grant pawh hi kum 5 chhung atan niin Coach te leh Staff te mamawh anga hman tur a ni a. Panchayat ah cheng 12,000 pek a ni a, Block levelah cheng 24,000 pek a ni.

A kalphung 2-na, Competition Component hi chuan PYKKA hnuaia Block, district, state leh national level inelna buatsaih hi a tum a ni. Hetiang inelna hi a pawimawh hle a, mimal theihna pho chhuahna hun tha a nih bakah midang ten tel ve an lo chak phah thin a ni. PYKKA hian a bulthut atanga Sports tihlar dan tur a chhui uluk hle a, hei vang hian competition chi 3 - Rural competition, Women’s championship leh Games/Sports for North Eastern States te hi khel lovin a huaihawt thin a ni.

PYKKA Annual Competition Grant hnuaiah hian inelna buatsaihna tur leh lawmman atan sum pek thin a ni a. Level hrang hrang in-elna leh lawmman tur ruahman dan chu hetiang hi a ni. 

Sl.No. Level         Inbuatsaihna senso Lawmman tur

1. Block level       Rs.50,000 Rs.45,000

2. Dist Level        Rs.2,00,000 Rs.90,000

3. State Level      Rs.10,00,000 State Rs.2,00,000 UT Rs. 1,00,000

4. National Level   Rs.70,00,000 Rs.14,00,000

Intihsiaknaah hian PYKKA sport discipline 20 atangin tualchhung mite tuipui zual tura ngaihte thlan chhuah a ni thin a. Block leh Dist. level-ah infiamna lar zual chi 5 ah in-elin State leh UT levelah chuan chi 10 ah in-elna buatsaih a ni a. National Levelah erawh chuan avaiin infiamna chi 20 hi inelnan hman vek a ni.

PYKKA kalphung 3-na, Capacity Building hnuaiah chuan Sports administrator te, Coach te leh instructor ten hma an sawn theih nan leh thil tul an hriat belh theih nan kar hnih daih programme huaihawt thin a ni a. Sports in hma a sawn zelna turin State leh UP level-ah hetiang programme hi neih thin a ni. Hetiang programme bikah hian PYKKA Resource Centre(PRC) chu Laxmibai National University of Physical Education, Gwalior, Madhya Pradesh a ni a. He hmuna training chhuak, master trainer te chuan State leh UT levelah a tul angin zirtirna an pe chhawng leh thin. India ram zau takah hian mitin hnena training pek a hautak avangin hetiang hian midang zirtir leh chhawng turte hnenah training pek thin a ni a, a remchang hle.

Kum li chauh kalpui a la ni chungin PYKKA hian hlawhtlinna hrang hrang a nei nual tawh a. State 28 leh UT 5 ah a hlawhtlinna a lang chhuak der tawh a ni. Thingtlangah PYKKA hmalakna avangin khelmual sing 2 lai laih a ni tawh a. PYKKA in inelna a buatsaih chuan ngaihhlut a hlawh avangin mi sang tam tak he inelnaah hian an tel tawh a ni. North East States Competition hian hmarchhak bial thalaite zingah ram inpumkhatna a thlen nasa hle a. Womens Competion pawhin hmeichhe thenkhat, mipa ang bawka talent nei thate chu chawimawi a hlawhtir a, inrintawkna an neih phah mek a. Kawng hrang hrangin hnam nunphungah pawh entawn tur thil thar a pian chhuah belh ta zel a ni.

PYKKA Scheme hi sorkar scheme hrang hrangte nen hmehrem a remchang hle bawk a. eg. MGNREGS hna thawh turah PYKKA hnuaia Field siam tur laih te a remchang hle. PYYKA Volunteer te pawhin hun kal zelah harsatna tam tak - ziak leh chhiar thiam lo tam takte hnenah thiamtir chakna pein an thiam tir ang a, taksa mamawh chaw tha ei phak loh vanga chak lohte buaipui an ngai tih mipuite an la hriattir zel thei dawn a ni. Heng avang hian PYKKA hi rampum huap thil tangkai ber zinga mi a ni thei a, nakin hun lam thlir phei chuan India ramah hian infiamna lama harhna thlentu a la ni thei ngei dawn a. Mi tamtak rilru-a infiamna chu chhiatna thlentu anga ngaihna pawh paih bo a la ni ang a, ‘an thinlungah infiamna hi hriselna leh engkim atan a lo tha e’ tiin mipui ngaihdan a la rawn thlak ngei dawn a ni.

*******************

PIB, Aizawl

Vawiin tlai khan Pu Shivemdra Bhatnagar, Sr. DDG, Department of Telecommunications, Ministry of Communications  leh Mizoram sawrkar aiawh te chuan Mizoram Governor Lt. Gen. (Retd) Nirbhay Sharma PVSM UYSM, AVSM, VSM chu a pisaah a hmu a. Mizorama digital connectivity tih hmasawn dan tur an sawiho.

Governor Lt. Gen. Nirbhay Sharma chuan internet inthlunzawmna chu a ngaih pawimawh thu leh sawrkar laipuia a lo thlen tawh thu a sawi a. Mizoram, a bik takin khawthlang lam hmasawn nan leh ziak leh chhiar thiam nan pawimawh a tih thu a lo sawi a ni.  

Pu Shivemdra Bhatnagar chuan Mizoram district 2-ah Optical Fibre Cable (OFC) phum a nih tawh thu sawiin, district dang thlun zawm tura hma lak mek a nih thu a sawi a. Hemi lama hmalaknaah sawrkar laipuiah theihtawp lo chhuahpui a tum thu a sawi bawk.