TIMES OF MIZORAM

Vawiin chawhma khan Synod Conference Centre, Mission Vengah Department of Mizo, Mizoram university leh National Mission For Manuscripts, IGNA, New Delhi te tangkawpin an buatsaih " Three Day National Seminar on Writing in Mizo Manuscripts" chu hman tan a ni a. Chief Minister Pu Lal Thanhawla chuan he hun hi khuallian niin a hmanpui a, Bachelor of Arts (BA) zirlaibu thar, "Theory of Literature" chu a tlangzarh nghal a ni.

Chief Minister Pu Lal Thanhawla chuan, "Zofate hi Kumpinu policy " Awpbet la Thendarh rawh" tih hmalakna tuar ber te zinga mi ni mah ila; vanneihna tak kan nei a, chu chu Duhlian tawng hmanga inbe  thei deuh vek kan ni a. Myanmar, Bangladesh leh India hmarchhak state pathum -  Assam, Manipur leh Tripura a Zofate zawng zawng hian duhlian tawng hi kan hrethiam deuh vek tih a hriat a, min phuarkhawmtu a ni. Hei hi kan chakna leh inpumkhatna atan tangkai taka hman a nih theih nan thuziakmite an pawimawh hle a ni", a ti.  Mizo tawng vawnhim zel pawimawhna a rilruah a vei thin thu sawiin Duhlian tawng dik taka vawnhim zel a nih theihna tur leh thangthar ten Duhlian tawng, Mizo tawng tia hriat bawk, an tihchhiat mek te siamthat a nih theihna turin a hun leh hmun remchang a piangah theih tawpa thahnem ngaihna thu a lo sawi ve thin thu a sawi a.

Mizo tawnga ziak taima tak tak, thudiklo ziahching an awm erawh chu pawi thei  tih thu sawiin thangthar ten Mizo History dik tak an hriat theihnan, thudik dinchhuah puia thuziakmite rawn penchhuak turin a chah a. Vawiina programme buatsaih ang chi chu sawrkarin a phurpui zawng tak leh a remchan dan anga telve a duhna programme a nih thu Chief Minister chuan a sawi a, a zawngchhang thlak thu sawiin buatsaih a nih leh dawn chuan huapzo leh darh zau zawka  Zofate hmun hrang hranga awm te hriat ve theih tura hriattirna chhuah leh an tel ve theihna hun pawh siamsak a tha hle ang a ti. Nakin lawka Eminent writer leh Historian la ni tur te tan chuan National Seminar on Writing in Mizo Manuscripts chu hmaih phal chi a ni lo a ti a. 8th Schedule-a Mizo tawng telh turin hman ata tawh tun thlengin sawrkarin hma a la mek a, theih tawpchhuah a nawr zel a tum tih a sawi a. National language zinga Mizo tawng telh chu thil tihmakmawh hamthatna tam tak thlentu tur a nih bakah Mizo te zahawmna ti pungtu tur, Mizo hnam chawisanna kawnga thil  pawimawh leh hnam anga mite hriat hlawh lehzualna tur a ni a ti.

Three Day National Seminar on Writing in Mizo Manuscripts hi Upa Rochhinga, Kum 107, Kohhran rawngbawltu upa bera ngaih in a hawng a. Prof. Laltluangliana Khiangte, Head & Coordinator in programme hi kaihruaiin National Mission For Manuscripts, IGNA aiawhin he hun hman a nih chhan sawihawnna hun a hmang nghal a ni. Rev. Lalnghinglova, kum 92, Ordained Pastor  la dam zinga upa bera ngaih leh Ziakmite zinga upa bera ngaih Pu. J. Malsawma, Padma Shri dawngtu, Kum 90-a upa te pawh hun pawimawh hmantir an ni a.  Pu. J. Malsawma hian  Prof. Laltluangliana Khiangte  lehkhabu ziah tawhte kawm thlalak leh a chhunga inziak tawi fel taka ziah dahkhawmna bu, ' an album of books' chu a tlangzarh nghal a ni. National Seminar on Writing in Mizo Manuscripts neih hunchhung hian thupui hrang hrang siam in zirhona hun leh mithiamte inbuatsaihna ngaihthlakna hun te hman a ni dawn a.  A duh apiang te tan he hun hi chhim theih a ni dawn a, Zosap te, Bawrhsap hmasa te, official hmasa te leh Hranghluite kutchhuak leh an kutziak phochhuahte hmuhtur a awm bakah lehkhabu tha tak tak lei tur chhawpchhuah a ni.

Serchhip district-a Léng khua chuan faina kawnga hmalakna kal zelah nimin khan khawtlang huapin 'Faina beihpui thlak' hun an hmang a; SIRDPR direc­tor Maria CT Zuali, RK Lianzuala (ZONET Cable TV) leh East Lungdar BDO Vanlalṭanpuia ten an hmanpui.

Faina beihpui thlak inkhawm hi Leng V/C pre­si­dent B Vanlalfinga'n a kaihruai a; khuallian Maria CT Zuali chuan, faina chu hmasawnna kawng pawi­mawh pakhat a nih thu sawiin, khaw chhungah hnim hring en nuam tak takte phun turin Leng mipui a chah.

Khualzahawm RK Lianzuala chuan, faina leh thianghlimnain hriselna leh dam reina a keng tel tih sawiin, "Mizote hi hnam bâl leh ṭawp tak ni ṭhin kan nih laiin, sorkar hmalakna te, khawvel zau zawk avangtea hmasawnna tam tak kan hmuh tâk avangin hma kan sawn hle a ni," a ti a; Leng khuain bawlhhlawh báwm fai tak tak an siam chu lawmawm a tih thu a sawi.

RK Lianzuala chuan, Leng V/C-ten anmahni sum thawh chhuah (own source) hmanga hmasawnna tam tak an thawk chhuak chu lawmawm a tih thu a sawi a, "Sorkarin engkim min tihsak hian, keimahni aṭangin neitu nihna a pawnláng zel dawn a ni," a ti.

E.Lungdar BDO Vanlal-ṭan­puia chuan, a bial chhunga Leng khuain faina kawnga hma an lak dan chu lawmawm a tih thu leh, mo­del village-a puangtu pawh awm loa anmahnia model village-a an inpuang ngam chu fakawm a tih thu a sawi.

Faina beihpui thlak hun hman puala Leng V/C-in mipui aṭanga rawtna leh sawiselna thlen theihna tur bâwm an siam chu SIRDPR Director-in a hawng a; chawhnuah thing ṭiak eng emaw zat an phun a, tlaiah ruai an ṭheh a ni.

Governor Lt. Gen. Nirbhay Sharma chuan nimin khan Aizawla kohhran pawl hrang hrangte hmunpui a tlawh a; kohhran hruaitute chu khawtlang tana thawhpuiah a sáwm.

Tuikhuahtlanga Mizoram UPC hmunpui a tlawhnaah Larsap hi UPC general superintendent Rev. Dr Ngurthanpara Sailo-in a lo dawngsawng a; Larsap chuan, India rama state rálmuang ber Mizoram a nih chhan chu a chhunga chengte vang a nih thu sawiin, "Kristian kan nih angin kan rinnaah kan chian a ngai a, chutih rualin, sakhaw dangte kan hriat chian a, inzirtirna ṭha an neihte entawn kan hreh loh a ngai," a ti.

Governor chuan, ṭhalaite tibuai thei thil ruihhlo, zûk leh hmuam bakah, HIV/ AIDS lama sorkar leh tlawmngai pawlte hna thawh mekah thawhpui turin Mizoram UPC hruaitute a sáwm a ni.

Tuikual South-a Salvation Army hmun­pui a tlawhnaah Governor hi territorial commander Commissioner Lalzamlova hoin an lo dawngsawng a; Larsap chuan, Salvation Army rawngbawlnate chu ṭha a tih thu sawiin, hrisel­na lam hawi zawnga hma la zel turin a chah. 

Governor hian Salvation Army enkawl, Motherless Babies Home a tlawh nghal a, thawktute nen an inkawm bakah, naupangte thilpek a hlan a ni.

Chanmari-a Baptist Church of Mizoram (BCM) hmun a tlawhnaah Governor hi BCM Aizawl Area executive secretary Rev. R Lalrinthanga nen an inkâwm a; Lt.Gen. Nirbhay Sharma chuan, sakhaw dangte zirtirna hriat chian a, inzahtawn thiam a ṭul thu sawiin, "Kan hriat chian loh vangin sakhaw dang vuantute nen kan inkarah inngeih lohna leh tharum thawhna a thlen phah ṭhin a ni," a ti. 

Governor hian Aizawl Mosque pawh a tlawh a, mosque hotute nen an inkâwm a ni.

Congress party pre­sident Lal Thanhawla, chief minister ni bawk chuan, Mizote tana hlauh tur dik tak chu Hin­du kulmûk BJP-te leh Barang Dal-te an niin a sawi a, "Kohhran leh koh­hran hruaitute pawhin hlau se ka duh," a ti.

MPCC president Lal Thanhawla hian nimin khan Thenzawl Joint YMA Hall-a Serchhip Constituency Congress party Joint Block Con­ference a hmanpuinaah thu sawiin, "Hlauh tur dik tak Hindu kulmûk BJP leh Barang Dal-te an ni tih Congress mite'n hria ila, Kohhran leh kohhran hruaitute pawhin hlau se ka duh khawp mai," a ti a; kohhrante an ṭit dêk laiin vai rama Kristian-te chu BJP leh Bajrang Dal-te an sorkar loh nan an ṭawngtai niin a sawi.

Lal Thanhawla chuan, remna leh muanna duh vang­in Congress-in lal-ṭhut­thleng an kian nia sawiin, "Hetianga remna leh muanna duh vanga lalṭhutthleng ken hi khawvel history-ah a awm leh ang em tih ngaihtuah tham a ni," a ti.

Eptu party-te'n kawng chhia tih bak sawi tur an hre lo a, Congress sorkar dik lohna leh eirûkna sawi tur an hre lo nia sawiin Hawla chuan, "Kawng chhia chu khuarel chhiat­na a ni a, khuarel kawng­zawh khum te, bandh siam khumte a malsawm ang em? March thla aṭangin ruah a la sûr reng a, sorkarin lo hâl hun pawh a pawhsei phah a ni," a ti. State dangah pawh an kawngpui a chhe ve tho a, thih phah pawh an awm nia sawiin, Mizoramah chuan kawng chhiat vanga thi an la awm lo niin a sawi.

MPCC President chuan, NLUP-in a tum ber chu kut hnathawkte leh mi chhumchhia, hmeithai leh pachhiate chawikan a nih thu sawiin, Isua lamṭang a nih avangin a hlawhtling chho zel niin a sawi a; NLUP chu mamawh an awm chhung chuan an sem zel dawn thu a sawi bawk.

Lal Thanhawla chuan, Congress party a sorkar leh theihna turin Mizoram politics a insingsa mek tih sawiin, "Sorkar leh turin Pathianin min buatsaih a, chumi tichhe theitu chu keimahni chhungkuaa mi kan ni a, rinawm takin, tichhe lo turin i ṭang ang u. Tumah vuivai mai lo a, ka hun a la thleng lo a ni tia awm chu mi tak tak tih dan tur a ni," tiin an party mite a fuih.

Thenzawla Congress Joint Block Conference-ah hian resolution pali an pass a; an resolution-ah chuan, kum 2018-a Assembly inthlanah Congress pary aṭanga Serchhip biala ding turin Lal Thanhawla bawk an duh thu an tarlang. Con­ference-ah hian MPCC president Lal Than­hawla'n Congress party zawm thar mi 163 a lawm lût nia thu dawn a ni.