TIMES OF MIZORAM

Vawiin khan Home Minister Pu R.Lalzirliana chuan I&PR Department leh Mizoram Art Development Society (MADS) tangkawpa buatsaih Mizo lemziak thiam Lalramchuana Sailo ‘First Solo Exhibition of Painting’ chu Recreation Centre, Zarkawt-ah a hawng a; Mizo senior artist Pu Tlangrokhuma chu he hunah hian khualzahawm a ni bawk.

Lalramchuana Sailo 1st Solo Exhibition hawnna inkhawm Vice-President, YMA Zarkawt Pu Lalhmangaiha kaihhruaiah Khuallian Pu R.Lalzirliana chuan mihring tan mahni tuina lam hi chian a ngai a, vawiina lemziak phochhuaktu pawhin a tuina lamah chiangin sorkar atangin engmah tanpuina pawh beisei lovin hetianga ama puala solo exhibition a tipuitling thei hi a fakawm hle a ni, a ti. Painting exhibition buatsaih a nih hian zirlaite chu en tura sawm nise a duh thu a sawi a, vawiina exhibition hawn takah phei chuan hmanlai Mizo pipute nunphung pholanna a tam em em a, heng atang hian zirlaite chuan lehkhabuah chauh an chhiar thin chu heng lemziak atangin an mitthla thiam thei ngei ang, a ti bawk.

He hunah hian Joint Director, I&PR leh Nodal Officer ni bawk Pi Lallianpuii pawhin thusawiin artist-te chu mi bik, talent bik nei an nih avangin mi nawlpui aia chungnung an ni a, Mizo mipuite pawhin art hlutzia leh chawisan a pawimawhzia kan hre tulh tulh hi a lawmawm takzet a ni, a ti. Thalai lehkhathiam hna neilote zingah art lama talent nei thate chu eizawnna tlaka siam sak tumin sorkar pawhin anmahni puih nan I&PR Department chu nodal department-ah ruatin sum an dah sak a, chu chu I&PR leh artist ten thawhhona tha tak nen hmang zelin workshop, training leh exhibition engemawzat an buatsaih tawh thu a tarlang a. State pawna Mizo artist-te kutchhuak phochhuah ve a nih theih nan te, sorkar building leh hmun pawimawhte chei nan Mizo artist kutchhuak hrang hrang tar/khawi ni thei se chu nasa takin Mizo artist-te thehlar leh chawimawi an ni lehzual ang a ti bawk.

Lalramchuan Sailo 1st Solo Exhibition of painting hi 6-11, November 2017 chhungin neih a ni ang a, chawhma dar 10:00 atanga tlai dar 5:00 thlengin Recreation Centre, Zarkawt-ah a duh apiang tan tlawh theih a ni a, painting hi lei theih a ni nghal bawk a ni. -DIPR Mizoram

Vawiin chawhma khan NITI Aayog Vice Chairman Dr. Rajiv Kumar leh Adviser Jitendra Kumar te chuan Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) chu a pisaah an hmu a, Mizoram hmasawnna tur an sawiho.

Mizoram Governor chuan North Eastern Council (NEC) leh DoNER Ministry te hnathawh tur chu chiang zawka thliar hran nise a ti a. NEC chu hmarchhak bialte tana hmasawnna ruahmantu ah siamin, NEC kaltangin rualkhai zawka hmasawnna kalpui tha a tih thu a sawi a ni. Digital connectivity chungchang chu sawiin, internet hmanga Mizoram thlunzawm a nih chuan, intlawhpawhna (connectivity) dangten a rawn chhunzawm thuai dawn a ni, a ti. Ziak leh chhiara kan thiamnate chu eizawnna tlaka chantir turin skill development lama tan lak  a ngai a ti a. Ramri hrul leh a depa awm khuate tihhmasawn a pawimawh thu sawiin, kan ram  him nan pawh  a pawimawh a ni, a ti. Mizoram chuan khualzin hip turin potential tha tak a nei a ti a, hemi ti tur hian sumdawng liante puihna a ngaih thu a sawi a ni. Kawngpui siam mumal zawka kalpui a nih theih nan, kawngpui siamtu agency-te tih tlem a rawt bawk a ni.    

Planning Secretary Dr. C. Vanlalramsanga, IES chuan Mizoram ei leh bar dinhmun tlangpui presentation hmangin a tarlang a. Mizoram tana hmalak ngaihna te tarlangin, NITI Aayog hmaa sawiho turin hmarchhak ramte harsatna hrang hrang chu a tarlang bawk a ni. - DIPR Mizoram

Indian Institute of Public Administration (IIPA) a training mek Central Sawrkar hnuaia Official te chu vawiin khan Kolasib DC Conference Hall ah Bawhrsap Pu Zarzosanga kaihhruaina hnuaiah an thukhawm.

Heng Central Sawrkar Official te hi mi 9 niin IIPA Faculty member 1 in a rawn tawiawm a, Rural field Visit rawn neiin Kolasib District hnuaia Central Scheme hrang hrang kalpui mekte chu chipchiar taka zirchianna  an rawn nei dawn a. Vawiina thutkhawm ah hian Central Sawrkar Scheme hrang hrang kalpuitu Department hotute heng Rural Development, Health, Social Welfare Department, Education te an kalkhawm a, Central Team member te nen hian inkawmhona neiin, Scheme hrang hrang an kalpui dan te chu sawi zauna te neiin an scheme kalpui dan leh harsatna an tawh chungchangah te zawhna leh chhanna hun hman  a ni. Inkawmhona neih zawh hian Central team leh Central Scheme kaihhnawih Department hotute te chuan Buhchangphai khua a Self Help Group te kalphung leh an hmalakna te zirchiang turin an kal a, naktuk lamah Bilkhawthlir khua a Central Scheme hmalakna hrang hrangte an zirchiang leh dawn a ni.

He team ah hian IIPA Faculty member 1 bakah Indian Army a Brigadier 2, Indian Air Force leh Indian Navy Officer 1 ve ve, Indian railways Officer 4 leh Sri Lanka Official 1 an tel a ni. -DIPR Mizoram

Vawiin chawhma khan Saikuti Hall, Lunglei-ah MSU Regional Headquarters buatsaihin zirna leh aia upa zah chungchang sawihona leh inhrilhhriatna hun “Awareness Campaign on Education and Aia Upa Zah” tih thupui hmangin programme neih a ni a. Social Welfare Minister Pu PC Lalthanliana chuan khuallian niin a hmanpui.

Pu PC Lalthanliana chuan mihring nun hi zirna tel loin a puitling thei lo a, zirna tel lo mihring nun chu nun kawrawng mai a ni tiin zirlai kalkhawmte chu tum mumal fel tak nei chunga ngawrh taka lehkha zir thin turin a chah a. Zirlaite hnenah fuihna thu sawiin “Zirna kawngah tunge i nih tih hian nakin hun lo awm zel turah tunge i nih dawn tih a hril a ni”, tiin fimkhur tak leh rilru nei taka an hun hmang tangkai thin turin a chah a . Hmasawnna tluantling nei tur chuan zirna a pawimawh takzet a ni tiin Social Welfare Minister chuan zirna tihmasawn turin sorkarin theihtawpin hma a la chhunzawm zel dawn a ni, a ti a. Kan pipute hun laiin aia upate an zah thiam em em thin a, he kan hnam nunze mawi leh hlu tak hi kan chhawmnun zel a tul a ni, a ti bawk.

Khualzahawm Pu R. Lalnunthara, President YMA Sub Hqrs Lunglei pawhin thu sawiin MSU Regional Headquarters ten zirlaite hmakhua ngaia programme pawimawh tak an buatsaih chu an fakawm takzet a ni, a ti a. Hmasawnna nei tur chuan inlungrualna kan mamawh a ni tiin zirlaite chu midang tana malsawmna ni turin tlawmngaihna thinlung pu chunga hma la theuh turin a chah bawk.  

 

Vawiin programme ah hian Lunglei khawpui chhunga Higher Secondary zirlai thahnem tak an kalkhawm a. Pu Laltholeha Chhakchhuak, SSA Mission, Lunglei District leh Pu Malsawmdangliana, Legal Adviser MSU- ten thupui thlan bik hmangin zirtirna an pe a ni. - DIPR Mizoram

Yamaha Fiamthu Fest top 10 intihsiak result chu kar kalta Zirtawpni zan khan puan a ni a, mi pathum an tla a, mi 7-te'n inelna an hmachhawn chhunzawm thung. 

Top 10 result puan zan hian V.L Dinsanga (New Serchhip North), Lalnunsanga (Folkland) leh Laldawmliana (Saitual) te thlah liam an ni. Hetih lai hian inelna hmachhawn zui zel turin mi pasarih an tling a, an ni hian result puan zan hian intihsaik hi an hmachhawn leh nghal a ni. Mimala che ṭhafal sawi tur an awm lo a, judge-te lu pawh a hai khawpin a rinawm. Contestant-te an thiam tlang tawh a, an inbuatsaihna a ṭha hle bawk. 

Ṭum dang ang bawkin Kanghmun tlangval C. Lalhmangaihzuala a hmuhnawm leh a, a awki danglam takin a fiamthu sawi a tingaihnawm zual kan ti thei ang. Chutih rualin aw lian lem lo Lalrinfela Fanai te an che sual duh bik lo a, an thiam dan a inang tlang viau mai. Lalngaihsaka a hmuhnawm leh pek viau bawk a, a fiamthu thawh paha a nui hmel chu hmuhnawm tak a ni. Hrangkapchhunga a che ṭha viau bawk a, Zoremsiama, Lalhmingmawia leh A. Lalhlimmawia te chu tla tura dah phal mai chi an ni bik lo bawk. 

Intihsiak result hi naktuk zanah puan a ni dawn a, mi pahnih an tla ang. A tling mi pangaten intihsiakna an hmachhawn leh nghal dawn a, November 10 zanah result puan a ni ang. Zirtawpni zan hi final a ni tawh dawn a, top 5 aṭanga top 3-a inhlangkaiten pakhatna nih tumin inelna an hmachhawn dawn a ni.

Fiamthu Fest hi Yamaha, Ramhlun-te'n an sponsor a ni a, pakhatna hian Rs. 1,00,000/- a dawng dawn a, pahnihna Rs. 50,000 leh pathumnain Rs. 30,000  dawng dawn a ni. 

#Hming - Khua/Veng

Territorial Salvation Army Youth Council (TSAY) leh Salvation Army Communication Network (SACNET) ṭangkawpten an buatsaih 'Quiz 2017' intihsiak chu kar kalta Inrinni zan khan zawhfel a ni a, Collgege Veng Corps pakhatna an ni.

Finala-ah hian Coprs panga - Lily Veng, Tanhril, Bawngkawn, Bazar leh College Veng-te an inlan a, Corps pakhat aṭang hian SAY member mi pahnih zel an tel a ni. Contestant-te an inel tawk hlawh viau a, a tawpah Tanhril Coprs leh College Veng Corps-te'n point inang hmuhin pakhatna tur zawn a ni. Zawhna pathum ve ve zawh leh an nih hnuah College Veng an vannei a, an champion ta a ni. Tanhril Corps pahnihna an ni a, Lily Veng Corps-te pathumna an ni. 

Intihsiakna hi Booth Mansion Conference Hall Tuikual South-ah neih  ania, top 10 aṭangin LPS leh Zonet-ah live-a pekchhuah a ni. Chhuanhlupuii, Edenthar Coprs chuan quiz hi host a ni. 

Quiz 2017 hi Indian Eastern Territory (IET) huamchhunga SAY member-te tana buatsaih a ni a, Corps 35 an tel a ni. Pakhatna hian lawmman Rs. 50,000/- leh Trophy an dawng a, MS Bajaj Dawrpui Vengthar ten an sponsor a ni. - Vanglaini

Congress ṭhalai (MPYCC) chuan thuchhuah siamin, MNF ṭhalaite chu November 2, 2017-a Zuangtui kudam an tlawh ṭumin, buhfai chhia sem loh tura dah tawh la chhuak luiah an puh a, "Dik lo taka sorkar tihmualpho an tum kha kan dem tak zet," an ti.

MPYCC thuchhuah tarlan dan­in, MNYF hruaitute chu kudam enkawltute'n ṭha takin an lo dawngsawng a, buhfai chhêkkhawl sa quintal 10,000 chuang a awm thu an lo hrilh. Mahse,  MNYF-te chuan mipui hnena ration sem chhuah tur buhfai ṭha ip ṭhahnem takte chu en duh loin, buhfai chhia (rejected), sem loh tura kudam bang sír kila dah hran tawh chu an hnûk chhuak lui a, kudam kawtah an paih darh a ni.

Buhfai chhiate chu mipui ei tura sem chhuah tur buhfai a nih loh thu kudam enkawltu leh thawktute'n an sawi thu tarlangin Congress ṭhalai chuan, "A chhia dah khawm a nih thu kudam enkawltute'n an sawi chung pawha mipui bum a, dik lo taka sorkar tihmualpho an tum kha kan dem tak zet a ni," an ti a; thu dik lo puangzar a, mipui tibeidawng tur leh tichîai zawnga thu vawrh darh sim turin MNF ṭhalaite an chah.

MPYCC chuan, February 23, 2017 khan Mizoramah ruahtui a tlak ṭan thu sawiin, "Ruahtui a tlak hma avang leh a tlak tam êm avangin Mizoram khaw hrang hrang inkalpawhna kawng a hun takah thawm ṭhat theih a ni hlawm lo. Chuvangin, ration buhfai khaw hrang hranga thiar velna kawngah kum dang pha lo mah se, harsatna lian tham awm loin Mizoram sorkar­in nasa takin hma a la a, vawiin thlenga ration buhfai nghei khua an la awm lo hi a lawmawm tak zet a ni," an ti. -Vanglaini