Vawiin khan Home Minister Pu R.Lalzirliana chuan I&PR Department leh Mizoram Art Development Society (MADS) tangkawpa buatsaih Mizo lemziak thiam Lalramchuana Sailo ‘First Solo Exhibition of Painting’ chu Recreation Centre, Zarkawt-ah a hawng a; Mizo senior artist Pu Tlangrokhuma chu he hunah hian khualzahawm a ni bawk.
![mizoram home minister r lalzirliana](https://blogger.googleusercontent.com/img/b/R29vZ2xl/AVvXsEjoDoiPkpOdWGX_mQ9VfUOsMq84mJSk5nOwEDl1X-Sb3KHJ-hx5WQxSUxSaqWD-U4tztW-a8KwMFEK3GPYABZzMIPH_PPafo86f5wQhHdr0bM525DRRXgUDYsScIMt_zBEscEOHBQaO4NET/s1600/solo_painting_%2528_1509963080.jpg)
He hunah hian Joint Director, I&PR leh Nodal Officer ni bawk Pi Lallianpuii pawhin thusawiin artist-te chu mi bik, talent bik nei an nih avangin mi nawlpui aia chungnung an ni a, Mizo mipuite pawhin art hlutzia leh chawisan a pawimawhzia kan hre tulh tulh hi a lawmawm takzet a ni, a ti. Thalai lehkhathiam hna neilote zingah art lama talent nei thate chu eizawnna tlaka siam sak tumin sorkar pawhin anmahni puih nan I&PR Department chu nodal department-ah ruatin sum an dah sak a, chu chu I&PR leh artist ten thawhhona tha tak nen hmang zelin workshop, training leh exhibition engemawzat an buatsaih tawh thu a tarlang a. State pawna Mizo artist-te kutchhuak phochhuah ve a nih theih nan te, sorkar building leh hmun pawimawhte chei nan Mizo artist kutchhuak hrang hrang tar/khawi ni thei se chu nasa takin Mizo artist-te thehlar leh chawimawi an ni lehzual ang a ti bawk.
![](https://blogger.googleusercontent.com/img/b/R29vZ2xl/AVvXsEh7PRIyapYtGD4h6R6r8DGDeLuL2lzRK-9zrQgEaVXR9S1uqqhBJZVOPuow06oYMVsJTdSbylxWF7UMGmT7rMZn7H0wiUG3AFwJBbgRYvGnHPeZwvemzYFg-hKk3KKByty5QFPrc4GgqVGQ/s200/solo_painting_%2528_1509963132.jpg)
Lalramchuan Sailo 1st Solo Exhibition of painting hi 6-11, November 2017 chhungin neih a ni ang a, chawhma dar 10:00 atanga tlai dar 5:00 thlengin Recreation Centre, Zarkawt-ah a duh apiang tan tlawh theih a ni a, painting hi lei theih a ni nghal bawk a ni. -DIPR Mizoram
Post a Comment