By-Isaac Zote
RECAP: Keivawmhranga chuan amah avanga ringawt a Sikpui Ruai a hman hun pangngai aia an hmang hma ringawt chu zahthlak tiin chutianga ti lo tur chuan nasa takin a ngen a...Amaherawhchu, Mura kap Pasaltha ber Sikpui ruai an hmanna a a tel theih dawn loh chuan sera mu a thur thei dawn lo tia an hnial let ve tlat avang chuan rilru siam fel pawh Keivawmhranga chuan harsa a ti hle mai a...Dik tak chuan a silai duhlai leh ui em em lai pe phal ngat tu Lalpa hi han hnial tun tun chu a hreh takzet ani !!
Lalpa mai pawh nilovin Khawnbawl upate zawng zawngin Thla phal (November) thla tawp thleng tal la cham tura an ngen chiam tak avang chuan an ngenna pawh chu zahawm tiin loh theih loh chuan a remti ve ta ringawt mai a...A remtih thu a han sawi meuh chuan Lalpa Hrihlera chu lawm em em leh phur tak maiin a piah lawk a awm tlangaupa Burkhawna hming chu a lam chul mai a...Burkhawna pawh chuan hrilh chawp ngai lovin leh a thil tih tur chu hai hauh bik lo chuan an khaw Sadawt ko turin Lal in atang chuan a chhuak ta vang vang a.
Bung - 78
Lalpa Hrihlera leh Keivawmhranga te titi lai chu a rukin bang awng atangin lo bihthla tu an awm tlat mai a..Chu chu tudang nilovin Lalpa Hrihlera tunu hmeltha leh zei em em Renghluani ani...Renghluani hian chhun lama Keivawmhranga Mura hlauhawm tak laka a chet dan te avang leh a hmelthat leh pianthiam em em mai avang te chuan a ngaisangin a rukin a lo ngaizawng em em mai hi a lo ni a...A rilru tak chuan Keivawmhranga chu atan a khuanu ruat ni se a ti ngawih ngawih mai a..
Hmar ho zinga Kut ropui ber leh pawimawh ber mai Sikpui Ruai hi sakhaw biakna nen inzawmna nei meuh lovin buh leh bal lama malsawmna an dawn avanga lawmna leh khawtlang intihhlimna ani deuh ber mai a ...Khua chu ral leh thil dang hlauhawm laka a him kum ah te hman ani tlangpui thin..Sikpui ruai hman lai chuan nidanga khawtlang a dinhmun inang lo tak tak te pawh ang khat vekin an leng za a...Mi hausa leh mi pachhia; mi awm thei leh mi rethei; Khawnbawl upa leh mi naran; Pasaltha leh Hmeithai fa emaw pawh ni se inang tlang vek a hun an hman theihna Kut ani...
Buh leh bal an thar hnem leh ei sen loh an neih kum hi “ Fapang Ral-in-san” an ti thin a...Chutiang kum an thlen chuan Sikpui Ruai hi hman hram an tum thin ani...Amaherawhchu buh leh bal an ngah kum mah nise, chhiatna emaw harsatna nasa tak an tawh kum te anih palh vaih chuan he kut hi an hmang ngai lo thung..
Keivawmhranga’n buanzawl a va thleng chu Val Upa Leihanga’n tlangvalte hnenah chuan Sikpui Ruai an hman tur thu leh kum dang zawng aia an hman hma a ngaihna chhan te chu a lo hrilh dap dap hlawm a.. Hman hma an tum nachhan ber pawh amah Keivawmhranga vang ani tih a han ngaihtuah chhuah leh chuan inthiam lo lek lekin a zak ang reng hle mai a..Tih vak ngaihna erawh a awm tawh chuang si lo....
Keivawmhranga’n buanzawl lam a pan phei hnu reilote ah chuan Zote khaw sadawt Thiamdela, Leiri kaupeng Neingaite hnam chu Lalpa in chhungah chuan a rawn lut a...Lalpa in chu kum chu Sikpui ruai neih kum atan a tha nge tha lo chian nan a aisan tura a han tih chuan Thiamdela chu Lal in ata chu chhuak lehin ama in atang chuan khuang a va la chhuak a, Lal mualah chuan a khai ta a....
Thiamdela chuan Lal mual a khuang a khai zawh chuan buanzawlah chuan lut lehin chu zan chiah chu tumah inbuan lo turin leh ri bengchheng siam lova khawvar thleng a khuang chu vuak rik anih leh nih loh lo ngaithla turin a han ngen a...
Hetia khuang an khai hi tu tih hriat ni si lovin zanah an vuak rik vaih chuan hmui ngil lo turah inngaiin Sikpui Ruai an hman tum pawh chu an pamtul leh thin ani... Lalpa leh a khawnbawl upate pawh chuan chu ruai ropui chu an hman dan tur te; a hman hun chhung tur te; tu tu in nge chanvo nei tur tih leh khaw dang an sawm ve leh ve loh tur te thlengin khun khan takin an sawi tlang hlawm a...A then ngaihdan in an chiah loh avanga han inhnial leh bap bap thin tawk lah bo lo..
Thiamdela ngenna anga a khuang tar vaw ri tu an awm leh awm loh tlaivar zak a tlangval hovin an ngaihthlak hnu pawh a eng ri mah an hriat tak lovah chuan chu kum chu Sikpui Ruai neih kum atan a thiang ni ah ngaiin zingkar atang chuan an insingsa tan nghal mup mup mai a.. Sikpui ruai an hmanna tur hmun chu “Sikpui Lamzawl” tih ani thin a..Hemi atan hian a tlangpuiin Lal mual hi hman thin ani deuh ber a; amaherawhchu, Lal mual ni kher lo hmun dang rem zawk te pawh a remchan dan angin hman ani ve thin tho bawk..
Nula leh tlangval tuak thum; in tin a Sikpui ruai an hmang dawn ani tih leh an mawhphurhna neih theuh hrilh darh tu tur an ruat a..chung nula leh tlangval tuak thum te chu “Lawmlai Sa” tih anni thin...Khawchhung nula leh tlangval te chuan a hma kum a buh an thar chu in tinah sem kualin in tinin Zu an bilh zat tur an bituk sak a...An zu bilh te a rawn thawh a, a thlum tui hunah Sikpui lamzawl lamah an zavai chuan dahkhawm tur ani.
Lalpa Hrihlera chuan chu kum zet chu kum dang ang lo taka an khua chauh nilovin an chhehvel a Hmar hnam chenna khaw hnaivai te pawh sawm a rilruk a.. Thla phal (November) thla tawp a Sikpui ruai Zote khua a ropui taka hmanpui tura sawm turin a thianpa Rengpa Zamthatvunga, Lawipa an tih bawk lalna khua Chawnchhim ah te; Chhungte khua ah te; Zote khua atanga hmarchhak lam hret a awm Ngurte hnam ho sahchhuah Ngur khua ah te; hmar thlang lam hret a awm Khawbung hnam ho sahchhuah Khawbung khua ah te (tuna North Khawbung lo ni ta); chhim lam hret a awm Rengpa Zamthatvunga Chawnchhim a a pem hma a a khaw sahchhuah, Lawitlang hnam peng Varte ho awmna Lawihmun ah te (tuna Ruantlang lo ni ta); chhim lam a awm Pakhuang hnam in an sahchhuah Khuangleng khua ah te leh Pakhuang kaupeng Buangpui hnam ho khaw sahchhuah Buang khua ah te chuan Kut palai a tir darh ta hlawm a...
Khaw dang dang Lalpa Hrihlera chuan a sawm hnem bawk a; a khua a cheng chhungkaw tin te chu kum danga an bilh thin zat aia a let thum a tam zu an bilh theuh theih nan buhfai pawh a let thum sem tirin sa pawh hnianghnar taka mi tupawn an ei theuh theih nan ran lukimin leh a tul anih phawt chuan an mamawh ang zat zat talh mai thei turin ruahmanna felfai tak a siam lawk bawk a..Zu leh sa ah na na na chuan thlaphan a duh lovin mualpho a tum hauh hek lo bawk ani.
Bung - 79
Hetianga Sikpui ruai hmang tur a an inbuatsaih chhung zawng hian Keivawmhranga hi Zote buanzawlah a kai ve chang te pawh hian tumah buan ngam tu a tawng ngai lova; an zah lutuk chu hrehawm a ti lek lek zawk hial thin ani..Buanzawl a kai ve chang te hian hun remchang apiangah tlangval tuaitir Phuaisabaka chuan dilchhut takin a chet tlat dan leh Pasaltha chezia leh nungchang dik te chu a zawt thin a...Keivawmhranga pawh chuan a theih ang tawk leh a hriat leh thiam ang tawk chuan a hrilhin a zirtir ve thin bawk a...Keivawmhranga ang reng a Pasaltha a ngaihsan leh dah chungnun Phuaisabaka hian a nei lo !!
Sikpui ruai hman hun tur a an bituk lawk thlen hma kar khat vel a la awm ang tih ah chuan Lalpa Hrihlera chuan an khaw pa ho chu ramhnuai leh lui dung velah te Lungphek lian, hlai leh mam tha tak mai leh a nghahchhan tur lung dang pathum zawngin a vah chhuah tir ta a...Heng lungte hi an thlang uluk thei hle mai a; mihring kuthnu emaw engmah them leh keh heng lung ah te hian a awm tur ani lova...Tu ma lo khuaikhem emaw tih hmelhem tawh sa ani tur ani lo...
Zote khaw chhehvel ramhnuaiah an duh ang lung chu an hmuh zawh mai loh avangin hla tak a kalin an khaw chhak lama luang Tiau lui kam a awm lungphek lian leh rit tak mai chu Zote khaw pa ho chuan hah tak maiin an zu zawn chhuak ta a; tin, midangin a nghahchhan tur lung dang pathum an rawn zawn bawk a...Chung lungte chu harsa takin pa ho chuan rawn zawn lutin kut an hmanna tur Sikpui Lamzawl ah chuan an hlang thla ta hlawm a...Kut an hman tan hma ni chiah ah heng lungte hi phun tur anni...
Zote chhehvel khua te atang chuan Zote khaw lam panin mikhual, Sikpui ruai ropui chu chhim turin an rawn kal khawm tup tup mai a; a ni telin Zote khua ah chuan mikhual an pung bawk a...
Rengpa Zamthatvunga’n a awp khuate tibuai fo tu Mura chu Zote khaw pasaltha ten an kap hlum ani tih leh a lawmna ni pah fawmin Lalpa Hrihlera’n Sikpui Ruai ropui tak a hman a rawt ani tih a han hriat chuan a lawm in a phur em em mai a...Amaherawhchu, chu Mura tihbaiawm tak mai thattu hming erawh chu Rengpa hnena rawn thlentu Lalpa Hrihlera mi tirh pa chuan a sawi hmaih palh hlauh avangin Rengpa chuan Mura kap hlum tu chu a khaw tlangval pumpui deuh thaw Chawnchhim buanzawla inbuan a lo hneh tawh tu Keivawmhranga ngei kha ani tih reng a hre lem lo thung ...
Rengpa Zamthatvunga chuan Chawnchhim khaw tlangaupa chu Zote khua ah sikpui ruai ropui taka hman tur anih thu leh an khua atanga a duh apiang, a hmei a pa in Zote khaw lama chu kut ropui chhim tur an kal ve a phal sak thu chu a khaw mipui zawng zawngte hriat vek theih a puang tur chuan a han hrilh a....Tin, Lalpa Hrihlera mi tirh pa chu an khua a haw tur leh a Lalpa hnenah chuan amah Rengpa Zamthatvunga ngei pawh a rawn tel ve tur thu zu hrilh turin a ti ta bawk a..
Ral atanga Tlangaupa au lauh lauh a han hriat rual chiah chuan a thu puan chuan Buangpuii beng chu a verh ta zar mai a...Rang taka an in atang tlanchhuak nghalin an in chhak deuh hlek a awm, a thiannu Khuptlingi chu Zote khaw lama kal ve tur chuan a han sawm a...Khuptlingi hi Hmar Biate kaupeng Betlu hnam ani ...A thiannu Khuptlingi pawhin phur taka a lo dawngsawn takah chuan hlim em em maiin an in lamah a tlan thla leh ta nghal a...Inchhung a han lut chiah chu a nu chuan thinrim ti tih a lo melhin,” Inchhung hna tlansanin khawi ah nge maw i han chhuah bo leh daw daw thin mai le?..” a lo ti zek mai a...
A nu thusawi pawh chu hre mumal tawh lo chuan hah vanga thaw hlawp hlawp chung chuan,” Ka nu, Nichin a Tlangaupa thu rawn puan kha i lo ngaithla chiang ve em? Mura tihbaiawm tak mai Zote khaw Pasaltha hovin an thah avang leh an khua buh leh bala an hnianghnar em bawk avangin Zote khua chuan ropui takin Sikpui Ruai an buatsaih dawn a...An chhehvel khaw dang te pawh chhim ve turin an sawm nual anih hmel a.. ‘Rengpa in tupawh a duh apiang kal phal ani’ a ti bawk si nen ka thiannu Tlingi nen khian rem i tih chuan kal kan chak ve khawp asin..” chhanna duhawm beisei let tih hriat tak mai hmel pu in leh, khawngaihthlak leh lainatawm tak hmel pu hian a han ti a...
Tuahhniangi chuan rang taka rawn chhang letin,” Khawiah Sikpui Ruai a i tel chak avanga Zote khua a zin i chak va ni suh !! Thlakhlelh leh hmuh chak dang i nei tih te chu ka hre reng alawm...I nu ka nih hi !! Duh duh a bum kual theih ka ni lo..” a han ti thawr mai chu Buangpuii zak lutuk chu mittui parawl pur chung chuan a sen tawn tawn mai a... Chutah a beisei loh lutuk thil Tuahhniangi chuan rawn sawi lehin,” Zote khua a I pa Bawihhreka te inah in zu innghat dawn nia.. Anni chhung saw Zote khua ah chuan kan hnam pui awm chhun anni..” a rawn ti thut mai chu a nu thusawi awih lo lek lek chung si chuan lawm lutuk avangin a zuang chhuak lo chauh mai a...
Chutah insum hman hauh lo chuan luaithli nul zawih zawihin Buangpuii chuan a nu chu a va kuah chawt mai a,” Ka Nu, i duh loh zawng emaw nang leh ka pa hming ti hliau zawngin engtin mah ka awm hauh lovang tih ka tiam a che..” lungchhe takin a han ti a...Tuahhniangi pawh chuan hnuk ulh teuh chungin,” Ka hria alawm Buangpui, nangmah ka rin zawhna che hi vawikhat te mah a kiam ngai hauh lo asin..Nuam takin Tlingi nen chuan hun in zuk hmang dawn nia...” a han tih chuan Buangpuii hmelah chuan namen lova hlimna chawplehchilhin a rawn lang nghal a...
Nui sak chungin Tuahhniangi bawk chuan,” Eee chuan...Ani hnenah khan ka nu in ‘a mangtha che’ i lo ti bawk dawn nia...” a han tih chuan Buangpui sawi tur hre lo lai lutuk leh zak bawk si chu in atanga tlanchhuak leh ta ringawtin a nu in kal a phal thu chu phur em em in a thiannu Tlingi chu a han hrilh leh ta a.
Bung - 80
A tuk zing tukthuan ei kham fel hun awm velah chuan Rengpa Zamthatvunga ho chuan Val Upa Huangpawrha leh Chawnchhim lanu valrual sawmhnih thuar tham zet chu Zote khaw lam panin an chhuak a...A thianpa Lalpa Hrihlera khua a sikpui ruai chhim tura a zu kal ve takah chuan kut ruak a kal duh bik lovin Sechal lian tha tawk tak pahnih ngawt mai chu Zote khaw lam panin a tlangvalte a kaih tir a.. An hnung deuh ah chuan midang nawlpui chuan an zui dul dul mai bawk a...Buangpuii te thian dun pawh chung ho zingah chuan a hnu khawi pawl anni a..
Kalkawnga an kal lai mek chuan Buangpuii pawhin a thiannu Tlingi kiangah chuan,” Awwii... thiani, kei zawng ka rilru a hah riau mai ka ti nia...Min lo hre tha duh lo ta se engtin nge ka awm tehlul ang ni? Kan inhmuh lohna a rei tawh bakah ani ang pasaltha te chuan hmeichhe dang duh tu lah chu aN ngah dawn si a; nula dang a lo kawp tawh anih vaih chuan kei zawng fam dairial ka chang thei mai awm asin !! Min la be ve duh ve em ang chu maw ?!!...” tih leh zawhna dang dang te chu a thiannu ai mah chuan amah leh amah a inzawt zawk emaw tih mai turin an pahnih chiah hriat tawk lek chuan a phun ser ser reng mai a...
Khuptlingi chuan Buangpuii zawhna tam tak te chu chhan hman anni lo tih leh lo chhang tehreng pawh ni mahse awmzia a nei thui dawn chuang lo tih hria in a thiannu chu a nuih leh suk ringawt thin a..A chang leh,” I rilru ti hah duh suh thiani..” a han ti leh ringawt thin bawk a...
Sikpui Ruai an tan hma Ni chiah ni tawhin Lung hlai tha tak Zote khaw pa hovin an zu zawn chhuah chu phah leh a nghahchhan tur lung pathumte phun hun chu a lo thleng ta der mai a...Khaw dang dang atang pawhin mikhual pawh an thleng kim thawkhat tawh hle a...A hla ber khuangleng leh Buang khua atang te pawhin kawnga an rawn thang fe hnu in an rawn thleng fel tawh a...
Amaherawhchu, midang rawn thleng kim thawkhat viau tawh mahse Rengpa Zamthatvunga a rawn kal ve dawn ani tih a hriat avang chuan engmah lo tihsan erawh Lalpa Hrihlera chuan a duh hauh lo thung...
A hnu deuh ah chuan Zote khaw dawhlung awmna lam atang chuan Chawnchhim ho chu an rawn inzui lut ta tliah tliah hlawm a..A hmasa lama se chal pahnih lian tha tak mai an rawn kaih luh chu hmuhnawm ti em em in naupang ho chuan an lo thlir hlawm a...Keivawmhranga pawh chuan Chawnchhim ho rawn inzui lut chu kawng sir a ding meuh a lo thlir ve in beisei ngam chiah si lo mahse Buangpuii a rawn tel ve leh ve loh a lo thlithlai ve reng a...A hmasa lama rawn kalte zingah a tel ve tak si loh avang chuan beidawngin in lamah a lut leh hman tep tih ah chuan a hnuhnung lam a nula pahnih rawn inzui lut chu a va hmu ta a...Chung nula pahnih te zinga pakhat zawk chu tunge anih hrilh hriat hranpa a ngai lo kher mai...
Zote khua an han luh phat atang chuan Buangpuii chu hmuh tum leh hmuh chak nei tih hriat tak chuan a han hawi kual vel thin a...Mahse khaw tawntirh lamah chuan a hmuh duh chu a hmu mai bik lo tlat..Khua an han lut zel a a han hawi kual vel nak chuan Buangpuii mit chu kawngsir a lo ding tlangval hmeltha tak leh pian thiam em em mai chungah chuan a fu ta chat mai a..Chu tlangval ngei chu he piallei chunga a hmuh chak ber leh a thlakhlelh ber chu ani !!
Keivawmhranga kawng sir a dinglai Buangpuiin a han hmuh chiah chu Keivawmhranga chuan a lo en reng tawh zawk hi a lo ni a..Chutah chiah chuan hun rei tak ata tawh inhmuh thlahlel ve ve mit leh mit chu a intawng ta chiah mai le !! Chulai hmunah chuan hun chu che chang lovin a ding reng emaw tih mai tur ani a!! An chhehvela mite chu kal liam zut zut mahse anni pahnih erawh tuma tihbuai theih loh tura khawvel dang daih a awm ang mai anni !! Eng dang mah sawi a ngaihtuah thei tawh lovin an in en vawng vawng ringawt mai a...
Hun leh nite; Chawnchhim khaw mipuite emaw Zote khaw mipuite; khualkhua atanga mikhual tam tak rawn zin te; an hman tur Kut ropui tak te leh thil dang dang te pawh chuan anni pahnih tan hi chuan diktak chuan awmzia leh hlutna tak tak an nei zo tawh lem lova !! Hun engemaw chen hnu a an han inhmu leh chiah mai chu inkuah vawng vawng mai tak an nap hial a...Amaherawhchu, chu zawng thil tih awm a mawi ani si lo !!
Khuptlingi’n a thiannu an piah a tlangval ding mit tla lek lova en reng lai chu a ban a a han sih zeuh takah chuan Buangpuii pawh a suangtuahna ram atanga rawn let leh zawkin a zak lutuk chuan a thiannu Tlingi chu na vak lovin nui deuh hak chung chuan a han chum dawt a.... Keivawmhranga pawn chutia Buangpuiin a thiannu a chum dawt lai a han hmuh chuan a har chhuak zawk mai...
A lang a pau a inhmangaihna emaw induhna lantir lutuk te hi nupa karah pawh nise thil tih ngai ani meuh lova...Nupa nilo inkarah ngat phei chuan tih loh tawp tur ang hial a ngaih ani...Keivawmhranga leh Buangpuii pawh chuan inthlahlel viau mahse mi mitmei an ven a ngaiin an fimkhur hle a tul ani tih chu an hre chiang ve viau tho mai.
Bung - 81
Zote khaw tlangaupa Burkhawna chu rawn au lauh lauhin,” Khaih khaih khaih...Tualchhung mipuite leh khualkhua atanga rawn kal te kha Sikpui Lamzawl lamah kal khawm tawh tur ani a; 'Sikpui Lung' phahna hun hman tawh tur ani e..” a han ti dap dap a...Sikpui Lung hi thenkhat chuan “Zawllung Dawh” an ti thin bawk...Sikpui Lamzawl lam pan chuan Buangpuii te thian dun pawh zawi muangin an chho ve ta a..Inthlahlel viau mahse midang hmuh a han kal dun em chu a mawi chiah lo tiin an hnungah chuan Keivawmhranga pawh chu amah chauh chuan a rawn chho ve zel a..
Sikpui Lamzawlah chuan tualchhung mipuite leh khualkhua te chu an khat vek mai a...Mipui an tam lutuk chu an zavai pawn lamzawlah hian leng lovin kawngpui dung thleng thleng te chuan an khat mup mai ani...A then dinna chang ve lote chu a chhak tlang pawng deuh atang te chuan lamzawl lam chu rawn thlirin a then thingkung lo lawn pawl lah bo lo...
Sikpui lamzawlah chuan Rengpa Zamthatvunga leh a thianpa Lalpa Hrihlera te chu an lo titi dun mawlh mawlh a... Rengpa Zamthatvunga’n an khua leh a chhehvel tibuai thin tu Mura kaptu chu tu Zote khaw pasaltha ber nge ti a a han zawh chuan Lalpa Hrihlera chuan Mura kaptu chu tudang nilovin Sapui Chaih Pasaltha ngei anih thu a hrilh ta a... Rengpa Zamthatvunga’n chu thu a han hriat chuan zawi te in,” Thil inhmeh lo leh awm lo tak pawh anih hran lem loh chu...” a ti sap ringawt a...Lalpa Hrihlera thusawi chu mak tihna em em hran pawh a nei lem lo...
Lung an phun duhna lai bawr velah chuan rawlthar pahnih inbuan tir turin Val Upa Leihanga chuan a han ti a...Heng rawlthar inbuante hi a tlangpuiin Lungtau hnam kher ami an hmang thin...Zote khua a Lungtau chhungkua tlemte cheng te zinga mi atanga thlanchhuah rawlthar pahnihte chu tlangvalte chuan an han ko chhuak a..Rawlthar pakhat zawk chu Lungtau kaupeng Infimate hnam ani a; pakhat zawk erawh Lungtau kaupeng tho Lungchuang hnam ani( Lungchuang hi Inbuan/Inbuon hnam anti thin bawk) ...
Mahni khingpui pa chawi kang hmasa zawk zawk chu chak a puan ani thin a...A han chawi kan a, leia a dah thlak leh chuan a chak lo zawkin lei a zu rahna chiah chu an han chhinchhiah a.. Chumi hmunah tak chuan lung pathum an rawn zawn te zinga mi pakhat chu an phun ta a.... Lung dang pahnih kha a bul hnaiah, lungthu ang deuhvin an phun veleh a...
A tawp berah chung lung pathumte chungah chuan a dang pathumte aia lung phek lian bik leh hlai tha tak an zu zawn chhuah kha phah tur ani a...An phah fel hnuah chuan chu lungphek chu “Sikpui Lung” tia koh leh hriat a lo ni ta thin ani... Zote khaw tlangval hovin a huhova chu lungphek lian leh rit tak mai chu han phah an tum lai tak chuan Rengpa Zamthatvunga chu vawilehkhatah rawn tawngchhuak thutin,” Ngawi lawk rawh u tlangvalte u....Sikpui lung kha chu kan Mura Kap Pasaltha ngei khan kil khat lama amah chiaha tangin han chawi kang hmasa teh se..Kil lehlam chawi kang tu tur atan erawh tlangval dang panga paaruk vel thlan chhuah ni leh se...Tichuan han phah teh u ” a ti ta mai a..
He lungphek lian leh sei tak mai hi tanhmun siam a rem loh bakah a pumpui a mi pakhat tan vawn ngheh sen a nih loh avangin mahni chauh a chawi zawh a phah theih ani lova...Kil khat lam atanga mahni a han chawi kan ringawt pawh chu thil namai lo leh tuma tih theih loh hulhual tur a ngaih ani..
Chu thu an han hriat meuh chuan chulaia mipui pungkhawmte chu an phun ri ta mur mur mai a...A thenin Keivawmhranga hian kil khat chu amah chauhin a chawi kan zawh an rin laiin a tam zawk erawh chuan chutiang lungphek lian, sei leh rit hmel eltiang chu; kil khat chauh mah ni se, tungchho a kal hringfa tu tan mah mahni a han chawi zawh theih anih awzawng an ring lova...A thente phei chu an nuih a za lek lekin Rengpa Zamthatvunga thupek ni lo phei se chu a riin an nuihchhuah hial a rinawm a...
Chu thu a han hriat chiah chuan Chawnchhim khaw Val Upa Huangpawrha pawh insum zo lo hialin,” Khawngaihin min lo hrethiam hram la Rengpa zahawm...Amaherawhchu Keivawmhranga tan meuh pawh i thupek chu a huphurhawm mah mah lovang maw...Tlangval rual chak tak tak sawm vel bawr hian hlang kaiin phah zawk mai se a tha zawk dawn lawm ni?” a han ti phawng mai a... Lalpa Hrihlera leh Zote khaw Val Upa Leihanga pawh chuan Huangpawrha thusawi chu awm an ti ve tih hriat takin Rengpa Zamthatvunga ka atanga thuchhuak chu thlirin an ngaichang a...
Rengpa Zamthatvunga chu nui ver ver chunga rawn tawngchhuak lehin,” Kha laia tlangval ding kha tunge anih in la hrechiang tawk lo anih kha.... Ani kha Rengpa Tuchhinga Chawilung ropui leh rit eltiang pawh chawi zo Pasaltha awmchhun ani ngai e... Tuchhinga Chawilung la hmu lo tan chuan a thil tih ropuizia hriatthiam leh awih pawh a harsa reng ta ve ang...” a ti tlat mai si a.
Bung - 82
Chutia Rengpa Zamthatvunga’n Sikpui Lung phah tura a han tih tak tlatah chuan hnial chi ani tawh lo tih hria in zawi muangin Zote khaw Pasaltha ho zinga ding ve Keivawmhranga chu a rawn pen chhuak thak thak a,” Hetiang Lungphek sei leh rit tak kil khat hi zawng, keini ang tan chuan han chawi zawh theih rual anih pawh ka ring hran lova; amaherawhchu Rengpa thuchhuak anih angin ka han tum chhin ve ta poh aniang chu...” tih pah chuan chu Lungphek chu han tuai kual velin vawn a awlsam na lai tur te thlang felin a tanhmun te chu a han siamrem vel bawk a...
Keivawmhranga chetla vel hla vak lo atanga lo en reng tu Buangpuii chu a rukin a lo tang ru ve em em a...Hranga chanchin leh a chakzia te pawh mi ka atang chuan hre ve fo tawh mahse a mit ngei chuan a la hmu ngai bik lova...An hma a Lungphek lian tak mai chu a han en ringawt pawh chuan huphurhawm a tiin Keivawmhranga chuan kil khat chu a chawi kang zo lo palh mai ang tih mawlh chu a lo hlauh pui a...A chawi zawh loh palh vaih chuan khualkhua atanga rawn kal zawng zawngte hma ah chuan a mualpho palh ang a, a hmangaih ber mai chu miin an diriamin an hmusit hlauh dah ang tih mawlh chu a lo hlauthawng ani...
Keivawmhranga’n a tanhmun a han siam fel hnu chuan theihpatawpin thapui a han chhuah tak tak mai chu a taksa lang thei lai zawng zawng chu a pawng hian a pawng zawr zawr mai a..Chutah le..!! vawilehkhatah a entu mipui zawng zawng chu,” A kang e...A kang e...A phawi kang e..!!” tiin an te teng tung mai a... A kil lehlam chuan lei vitin a lehlam chu a awm thleng dawn chu hnehsawh takin a han chawi kang ta tehreng a le..!! Mipui chuan an mit ngei a an thil hmuh chu mak ti lutukin an thlir thup ringawt mai a; tlangvalho pawh chu tumah chet ve nachang reng hria an awm lo..An thil hmuh ropui lutuk chuan a ti chawmawlh zo hi ani ber mai !!
Chutah chiah chuan Val Upa Leihanga chu rawn khek chhuak thawtin,” Tlangvalte u..a hah lutuk ang asin..kil lehlam kha lo chawi pui vat ta che u...Keivawmhrang, i thil chawi kan kha awm chen chawi a ngai hran love...Khuangpu leh Khuangpuzailak (Hla hriltu) te thutna tur ani zawk e...Khang lung pathum chungah khan hlan kai a phah zawk tur anih kha...” a han tih tuarh tuarh takah chuan tlangvalho pawh chu harh chhuak thutin kil lehlam chu tlangval paruk bawr vel chuan an rawn chawi ve ta a...Sikpui Lung chu tha takin an phah fel ta ani...
Keivawmhranga’n Sikpui Lung kil khat a chawi kan lai lo en ve reng Khuptlingi chu rawn nui chhuak hawk hawkin,” Ka ban i hmer na vek alawm..Tunah tal chuan thlah ve tawh em em la...” a han tih chuan Buangpuii pawh harh chhuak zawkin Keivawmhranga’n Sikpui Lung kil khat a chawi kan lai khan a lo tang lutuk chuan a thiannu ban na takin a lo hmer vak ani awm a....Buangpuii chuan zak taka “tihpalh lutuk..” tih leh a thiannu ban thlah chu a rual ta nghal a..
Keivawmhranga leh tlangval dangten Sikpui Lung an han phah zo chiah chu Sikpui Lamzawl a pungkhawm mipui zawng zawng chu hlim takin an haw haw ta dur dur mai a... Lalpa Hrihlera leh Rengpa Zamthatvunga te chuan mipuite chu an thlen in theuh a let leh phawt turin leh a tuk atanga Kut ropui chu tan anih tur thu an han hrilh takah chuan mipui tam tak te chu an thlen in lam panin an haw ta dul dul mai a...
Buangpuii leh Khuptlingi te pawh Zote khua an thlen chiahin Sikpui Lamzawl lam pan ding nghal vang vang annih avang khan an thlen in tur pawh an la zawng chhuak hman lo kha ani a.. Tualchhung mi thenkhat an han zawh kual hnu chuan awlsam te in an thlen in tur pawh chu an zawng hmu thuai a.. Zote khua ah hian a tam zawk chu Zote hnam cheng mahse hnam dang pawh an awm ve tho a... Buangpuii te hnam pui Lawitlang kaupeng Tlawmte hnam pawh in pakhat awm ve in chutah chuan an thleng dawn ani..
Hmar ho zingah chuan hnam inang te hi “Laibung” tih ani thin a..Thisen a inzawmna neih kher loh pawhin Laibung te chuan Nupui Pasal inneih chungchangah te, man leh mual rel chungchangah te leh thil dang dangah pawh dinhmun pawimawh tak changin thu an nei hle thin ani... Buangpuii te pawh a nu in an thlenna tura a kawhhmuh an hnampui a pa Bawihhreka te in an va thlen chuan Bawihhreka te chhungkua pawh chuan lawm takin an thian dun chu an lo dawngsawng a...Buangpuii nu hmeithai Tuahhniangi chanchin te pawh an lo zawt ve luam bawk a...
Zanriah eikham hnu a Keivawmhranga Zote khaw buanzawl a han kai chuan Pasaltha Kawlruna leh Pasaltha Bualnguka te hnenah chuan zan dang ang lo taka chu zan chu lenna tur a neih ve thu a han sawi chuan; zan danga lengi run in sang kai tum ngai reng reng lo Pasaltha chuan khualkhua nula rim a tum ani tih hrethiam nghalin Zote Pasaltha te pahnih nuih chu a ti za ta riau mai a... An khaw nula zinga duh pakhat mah a nei lo leh khualkhua nula a thlang zawk hlauh chu hriatthiam har leh rilru nat thlak an tih thu te sawiin an lo fiam dun bawk bawk a...An thusawi lo hre pha ve Phuaisabaka chuan,” U Hrang, keichu keimahin nula tumah ka la rim ve ngam chiah si lova..Pawi i tih loh chuan i nula rimna ah chuan ka lo zui ve che min phalsak ta che..” zak deuh hlek chungin a rawn ti ve a... Keivawmhranga nuih te lam lam chu ti za in,” Rawn kal ve ta poh che..I tan inzirna remchang tak te pawh ani ve mahna..” nui hak hak chung chuan a ti ve ta a...
Bawihhreka inah chuan Keivawmhranga leh Buangpuii chu tudang ngai lo ten hlim takin an inkawm a.. A khat tawkin Khuptlingi chuan anni pahnih chu a rawn chhaih fiam leh zauh thin bawk nen a chang chuan an han nui ho leh dar dar rih thin a...Chu zan zet chu zan dang aiin hun a tawiin a kal chak emaw tih mai tur ani !! An inkawm tan chauh emaw an tih laia leng-haw-ar a rawn khuan meuh takah chuan hreh tak chungin Keivawmhranga leh Phuaisabaka te chu Zote buanzawl pan chuan an inzui chho leh ta hnak hnak a.
Bung - 83
A tuk tukthuan eikham ah chuan Kut ropui Sikpui ruai chu hman tan ani dawn ta a...Chhungkaw tin in Sikpui ruai an hman chhung zawnga duh thal a an in tur zu an bilh te pawh chu Sikpui Lamzawlah chuan an rawn dahkhawm sang sang a... An thuamhnaw nalh ber ber te inbel chunga tualchhung mipui leh khualkhua atanga rawn kal te Sikpui lamzawl a an han thlen kim thawkhat takah chuan a khaw neitu Lalpa anihna angin Lalpa Hrihlera chuan Sikpui ruai tan tawh tur anih thu a han puang dap dap a...Hlim takin Kut ropui chu an tan dawn ta ani...
Lalpa Hrihlera chuan mipui zing ata chu Keivawmhranga leh Keivawmhranga'n a fapa pahnih a thah sak Chhumbawha te chu a koh hrang a.. An khaw tibuai thin tu an thah tak avang leh Sikpui ruai hlim taka an hman tawh dawn avangin anni pahnih pawh chu tuna chinah inngeih tak leh inrem taka awm tawh turin a han ngen dun a...
Chhumbawha chuan Lalpa thusawi chu uluk taka a han ngaihtuah chuan thil tisual hmasa zawk tu chu amah ngei ani tih leh eng angin thinrim in lungni lo mahse tih theih a neih tawh loh mai bakah a fapate pahnih mitthi khua a tir liam tu pawh ama rilru chhiat vang tho ani tih te chu ngaihtuah chhuakin tha tak a Keivawmhranga nen chuan inrem mai zai chu a rel ve thei ta a..Keivawmhranga pawhin chutia Chhumbawha'n inrem a duh takah chuan thinlung takin Lalpa thusawi chu a pawm bawk a..
He mi ni atang hian Sikpui Ruai chu an mil pui theih loh emaw an inrem pui theih loh te nen a inremna sa-ui-tan nan an lo hmang tan ta a..Hei vang hian tun thlengin Sikpui Ruai hi "Inremna Ruai" tih pawh a hriat lar a lo ni ta ani !!
Sikpui ruai an hman chhung zawng hian a tlangpuiin lam chi kua emaw chi sawm an lam thin a..Khaw hran hran a an hman dan erawh inang lo zeuh zeuh te chu a awm ve tho mai...A tir a lam khuhhawnna atan Naupang lam antih mai chi hnih Durte lam leh Thlawram lam in bul an han tan hmasa phawt a....Naupang lam te an lam zawh hian puitling lam an tih mai heng - Buantlaw Hla, Sikpui Hlapui / Hla Serh, Hranthli Hla, Lamtluang lam, Saia Ketet lam, Anranlai lam,leh Chhimchhak lam te a hnu ah an sa in an han lam leh a...Tinna lam erawh hun tawp khar nan an hmang thin ani... Sikpui Ruai an hman chhung zawng hian nitin mai hi zai leh lamin hun an hmang thin a tih theih awm e...
Naupang lam te an han lawm zawh chuan Khuangpu leh Khuangpuzailak te chu Sikpui Lung dawhsanah chuan an rawn thu chhuak a... Chutia an rawn thu chhuak an han hmuh chiah chuan mipui pungkhawm te pawh chu thawklehkhatah an reh duak mai a..Tumah nui ngam emaw bengchheng siam ngam reng an awm lo... Chutia vawilehkhata an reh thuap nachhan chu eng dang vang nilovin Khuangpu leh Khuangpuzailak te Sikpui lunga an rawn thu kai mipuiin an han hmuh chiah khan tu ma hrilh buai leh sawi buai ngai lovin an hla sak leh tur chu an hrechiang em atin ni..!!
Khuangpu chuan zai rawn la in bul a han tan a...Mipuite chuan lam pah chuan an rawn zawm ve a:
Sikpui inthang kan ur laia,
Chang tuipui aw, senma hrili kang intang.
Kera lâwn a, ka leido aw
Sunah sum ang, zânah mei lâwn invâk e.
Ân tûr a sa, thlu a ruol aw,
In phawsiel le in râl feite zuong thaw ro.
Sûnra zûla, ka leido aw,
Ke ra lâwn a, meisûm ang lâwn invâk e
Sun ra zula, ka leido aw,
Laimi sa ang chang tuipuiin lem zova
A varuol aw la ta che,
Suonglung chunga tuizuong put kha la ta che
........an han ti dap dap a...
Sikpui Hla serh an sak lai chuan Keivawmhranga leh Buangpuii te chu mi mitmei an ven em avang chuan an lam dun ngam chiah lova...Chutia lam dun ngam chiah si lo; an hla sak leh lam pawh ngaituah leh hrechang meuh lova inthlahlel taka an lo in en leh vawng vawng thin tih Khuptlingin a han hmuh chuan insum zo lovin a nui chhuak zauh mai a..Chu a nuih lai tak chu Khuangpu chuan rawn hmu in a khuang vuak chu thawklehkhatah titawp thutin Khuptlingi lam chu thinrim takin a en ta vung vung mai a...
”Ngatinge khuang vuak a tawp tak thut mai ni?..” ti a Khuptlingi a han hawichhuah nak chuan Khuangpu mai bakah an khaw Val Upa Huangpawrha chuan thinrim em em in an lo en reng chu niin !!...A thil tihsual a han hriat chhuah chiah chuan Khuptlingi nui lai hmel chu vawilehkhatah hrehawm tihna chuan rawn thlakthleng nghal vatin a zak lutuk chu hnuai lam a bih ta ngawr ngawr ringawt mai a..Chuveleh chuan Khuangpu pawh chuan a piah a ding nula tuaitir chu a la naupang ve ani tih leh a thil tihsual a inhrechhuak tawh ani tih hrethiam thuaiin Sikpui Hla serh chu a bul atangin a han la tha leh ta a..
Sikpui Hla hi hla serh ti a hriat ani bawk thin a..He hla an sak lai leh Sikpui lam an thai lai hian an la urhsun thei em em mai a... He hla an sak leh an lam laia lo uangthuang zeuh emaw rilru lo pe lo zeuh an awm vaih chuan a bul atanga sak that leh ani hial thin ani...
Sikpui ruai hun chhung zawng hian buaina siam emaw intih thinrim te an khap tlat a..Sikpui lamzawl lai takah chuan Sawngka dawhin chutah chuan hruihrual fei leh sei tha tak “Vaiza hrui” an tih chu an khai a.. Tlangval hawklak thenkhat zu lo inhnem deuh emaw lo rui sual palh deuh an awm vaih chuan val Upate chuan he Vaiza hrui sei tak hian an kut leh ke te phuar sakin midang an tihbuai theih lohna tur hmun dangah an thiar fihlim thuai thin ani..
He mi ni pawh hian Khuangleng tlangval pahnih leh an zu dawn pui, an thian chhar thar Lawihmun (tuna Ruantlang khua) tlangval pakhat chu rui sualin buaina siam zawngin an khawsa tlat pek a.. Val Upa thu a tlangval hovin Vaiza hrui a phuarbeh an han tum chuan an zinga phanchang deuh ber Khuangleng tlangval pakhat zawk chuan,” In ngam chuan min han phuar vaih teh u..In duh in hmu lo viau ang..Tunge ka nih in hre lo anih kha...Kei hi Khuangleng Pasaltha fapa ka ni ngai e..” tiin chapo tak chuan tlangvalho chu a tawngkhum a...
A piah deuh lawk a chu tlangval thusawi lo hre pha tu Chawnchhim Val Upa Huangpawrha chu rawn phei nal nalin,” Eee khai...kan tlangvala chu !! A huaisenin hlauh a nei lo hle mai maw !! Tuman tikhan lo la phuar suh u...A tlangval hlauh ngei ngei tur leh ngam hauh loh tur ka han koh tir ang e...” tih leh chulai hmun a lo awm ve Chawnchhim tlangval tuaitir pakhat chu a beng bul a bekbawr zauh pah a tirh chu a rual ta mai a.
Bung- 84
A hnu lawkah chuan thil thlen dan leh thil chinchang engmah hrethiam lem lo “ ‘Val Upa Huangpawrha’n khawngaihin lo kal lawk teh se.’ ...a ti ” ti a tlangval tuaitir pakhatin a rawn koh avanga thuawih tak a rawn kal ve mai Keivawmhranga chu an sawngka dawhna ah chuan a rawn phei ta thauh thauh mai a...Tlangval pathum ten Keivawmhranga an han hmuh chiah chuan Lawihmun tlangval chuan hlauh hmel takin,” Sapui Chaih Pasaltha..” a ti sap mai a.... An pathum zingah chuan tawng leh ngam chu sawi loh che chang ngam reng reng pawh tumah an awm tawh lo !! An zu ruih zawng zawng te pawh vawilehkhata bo duakin thawklehkhat ah an harh fim kawk kawk nghal ta mai emaw tih mai tur ani...
Chutia tumah tawng leh ngam an awm tak lovah chuan tlangvalho pawh chuan tha tak a phuarin rilru fim an put leh hma loh chu hmun dangah an dah bo ta a..Thil thlen dan a han hmuh chuan Val Upa Huangpawrha pawh chu insum zo lovin a rukin a nui suk mai a... Keivawmhranga’n,” Eng nge ni ta U Huangpawrh? Min mamawhna i nei em ni??..” a han tih chuan Huangpawrha lah pek chuan,” Aaa.. Eng ni hran love...I hmel i rawn in lan ringawt kha a tawk mai e..Kan buaina chu chinfel ani tawh e !! Nuam takin lam va thai leh zawk rawh khai...Hetiang Kut ropui hi kan hmang leh mai mai awm tawh si lova..Hun a uihawm ania..” nui sang chunga a han tih takah chuan a ngaihna leh a thusawi awmzia hre lo tak chung chuan Keivawmhranga pawh chu a let leh ta ringawt a..
Sikpui ruai hi kar khat chhung te hman ani thin a..A chang phei chuan an hlim viau chuan chu aia rei mah te pawh an hmang thin bawk a...Ran lukim talhin Zu leh Sa a hnianghnar hle thin a..Lal atanga hmeithai leh fahrah te thlengin intluk tlang takin an puar in an tlai thin hle ani...
Sikpui ruai hman tur hunchhung chanve vel chiah atang hian zanah mahni thlenna in lam a lawi tawh lovin hlim takin an lam tlaivar thak thin a..Chu chu “Lamlai tan” an ti thin..Lam an thaina ah chuan nula leh tlangval dangte pawh duh duh a thiang ten an lam dun takah chuan Keivawmhranga leh Buangpuii te pawh insum zo bik tawh lovin hlim takin an vanglai nite chen in tudang leng dang ngai mawlh lovin Zote khaw Sikpui Lamzawlah ngei chuan lam an thai dun a...An hun hman dan chu nuam an ti takzet in chu hun chu kumkhua atan chelh din theih ni se an ti dun em em a...Amaherawhchu, eng ang pawhin ui mah se la hun leh nite hi chelh beh theih rual nilovin eng ang pawhin thlahlel mah se la a inher liam leh nge nge thin zawng chu a nih si hi !!
Zote khua a hlim taka hlimlai par tlan a lanu valrualten hun an han hman chhoh chuan hriatloh hlanin chu Kut ropui leh hlimawm tawp lam chu an lo thleng leh ta reng mai a...A tawp dawn zan hnih chu tlaivar pap in nula leh tlangvalte chuan lam an thai thin a..Chu chu “Sikpui Zawlchhuah Lam” tih ani...
A tawp zan an han thlen meuh chuan Kut ropui hmang tur a kal khawm zawng zawngte chu a hmei a pa in an ngui ruai mai a...Hlim taka an hun hman dan te an han ngaihtuah letin an lung a lo leng lawkin an ui em em thin a..A tawp khar nan Khuangpu chuan Tinna hla a rawn lak dawn chuan keivawmhranga leh Buangpuii pawh chu a thiang ten an ding dun a...Chutia an din dun lai tak chuan Buangpuii rilru ti na em em tu leh a hnu a a han ngaihtuah let pawh a vawitam luaithli nul tir thin tu thil a thleng ta tlat mai le !!
Keivawmhranga leh Buangpuii chu an in en dan atang ringawt pawhin an induh in an inngaina takzet ani tih hre reng mahse Keivawmhranga a duh em avanga zah pawh dawn zo tawh lo leh tih hreh pawh nei em em tawh lo; Keivawmhranga leh Buangpuii te hlim tak leh inngeih tak a lam dun lai lo thlir reng tu Lalpa Hrihlera tunu Renghluani chu Buangpuii dinna lo lam, Keivawmhranga sir lehlam zawkah chuan rawn ding ve in Keivawmhranga kut chu rawn vuan chatin lam puiah a rawn sawm ta tlat mai a...
Lalpa Hrihlera tunu Renghluani hi a hmelthatna ai mahin a duh zawng mipa te rilru lak pen a thiamzia te, mipa duh zawng leh rilru kuai zawng tak a han tawng leh khawsak a thiamzia te leh mipa rilru hneha a zun a uai tir dan a thiam riau zia te chu amah hrechiang tuten a ruk a an an sawi sep sep thin ani reng a..Amaherawhchu, amah duhtu leh a zun a uai an tam viau e ti lo chuan a hmangaih tak tak leh mipa a ngaihsan tak tak erawh a nunah a la tawng ngai hauh lawi si lo thung a..Eng emaw zawng tak chuan a vanduai ve viau tho mai !!
Lalpa tunu meuh te ani bawk a, chutia tha taka a rawn sawm takah chuan Keivawmhranga pawn hnial hrehin a duh ang chuan lam a lo thai pui ve ta mai pek bawk a...Lam derh derh chungin chulai a nula leh tlangval rualte chuan a huhovin Tinna hla chu an sa ta a:
“Tin rei aw, tin ta rei aw; kei nghaknu hai,
Indi Ar ruol angin tin ta rei aw..
Thlangfa faisawn hawi takin tin ta rei aw,
Indi Ar ruol angin tin ta rei aw...
Nghaknu senfen hawi takin tin ta rei aw,
Indi Ar ruol angin tin ta rei aw.”
Bung – 85
Tinna hla an sak zawh meuh chuan chu Kut ropui tak mai, Hmar hovin a hming an sawi ban theih mawlh loh Sikpui Ruai chu a lo tiak ta a...Ui tak chungin mipui kalkhawm te pawh chu an thlen in lam theuh pan chuan an haw darh ta sung sung mai ani...Renghluani nen an lam zo chu Keivawmhranga chuan a hma lawk a Buangpuii nen an din dunna lam chu a pan leh ta a...Amaherawhchu Buangpuii mai pawh nilovin a thiannu Khupzingi pawh chu hmuh tur reng reng an awm ta tlat lo mai le 11...
A ngaihna hre lo takin Keivawmhranga chuan a rilru te te in,” Buangpuii te thian dun chu min lo nghah ve ka rin tehlul nen...An thlen in thleng ka zu thlah haw ang ka ti asin maw le...Zan a rei tawh deuh a, an chau deuhin mut zal hlan an nghakhlel te pawh aniang e..Naktuk tukthuan ei kham ah zu leng lut zawk mai teh ang..” tiin ngaihthat lohna pawh nei hran chuang lo chuan a pu te in lam a pan ve ta a...
Ngaihzawng la nei ngai lo ve ve anni bawk a...Hringfate chunga kan thinlungin ro a rel dan an la hrethiam chiah lo deuh te pawh ani ang e !! Hringfate thinlung hi a chang chuan paukhauh leh chhel thei tak niin hringfate tan tawrh zawh rual loh tur khawp a ngaih harsatna, hrehawmna leh beidawnna namen lo pal tlang thei si hian a chang erawh chuan a awmnemin a derdep em em lawi si thin a.. Hmangaih tak te lakah ngat phei chu thil ho te leh nep te anga lang te pawh hi thinlung namen lova hliam a ti kehsawm tu annih chang a awm tlat thin si zawng anih hi !! Mihringte thinlung leh rilru puthmang leh sukthlek hi tu Pa nge chiang tak a hrefiah fai vek a hrilhfiah fai vek thei awm ang le?!!
A tuk zing tukthuan ei khama Buangpuii te thlen in lam Keivawmhranga’n a han pan chuan khualkhua atanga Sikpui Ruai ropui chhim tur a rawn kalte chu an khaw lam theuh pan a haw turin Zote khaw dai lam pan chuan an inzui chhuak chuah chuah mai a...Mikhual thenkhat erawh la haw mai lovin ni hnih khat la cham rih tum pawh an awm tho a...Buangpuii chuan an haw hun tur engmah a hrilh loh avang leh khaw hnaivai tak anni bawk a, an hmanhmawh em em a rin loh avang chuan an khaw lam pan a an la haw mai ring lovin Keivawmhranga chu ngaihtha takin a awm a..
Amaherawhchu, Buangpuii te thlen ina a zu luh nak chuan Bawihhreka chuan a mikhualte chu an hmanhmawh angreng thu leh tukthuan pawh hma tak a ei a Chawnchhim lam an pan tak thu a lo hrilh ta mai a...Chu thu a han hriat chuan Keivawmhranga chu lung a den ang dawt hi ani a...An inkarah engmah intih thinrimna emaw intih lungnih lohna a awm in a hre si lova... Buangpuii Zote khuaa a cham chhung zawng khan han inhauh eih emaw han intih tauh khum eih lah an nei pawhin a hre bawk hek si lo !!...
Chuti khawp a a hmanhmawh nachhan tur a lo nei te a lo nih pawhin kha leh chen a cham chhung kha chuan vawi khat tal te chu Buangpuii khan a hnenah a sawi ve a ring bawk si a...A tawpah chuan mak ti tak chungin a rilru in,” A nu hmeithai amah chauh a awm te ani bawk si a; a ngaihtuah viau tawh te pawh ani ang e..” a ti ta ringawt mai a..
Khatia Keivawmhranga leh Renghluani Tinna hla an sak laia lam dun a han hmuh khan Buangpuii thinlung chu fei a chhun ang zarin a lo na em em hi a lo ni a...Dik tak chuan Buangpuii hian a lampui nu Renghluani hi tunge anih a hai bik lova...Zote khua a cham chhung khan mite ka atangin Lalpa Hrihlera tunu duatlai anih thu leh Lal chhungkua atanga seilian leh chawrchhuak anih thu te a hre vek a...A rilru in Renghluani nen a han in khaikhin chhin ringawt pawhin ani hmeithai fanu ve mai tan chuan cho rual ani lovin a el pui phak ani lo tih te pawh a hrechiang em em si a..
Kha zan khan Tinna hla sak zawh pawh chu nghak peih tawh lovin Khuptlingi nen chuan an thlen in lam an pan vang vang a lo ni a...Zankhua in mutmu pawh tuah lovin luaithli a nul tlaivar zak a...Engan kher nge Khuanu pawh hian hetiang leh mai tur si chu a hringnun ah Keivawmhranga hi a lo tawn tir kher ni ang le ti a in ngaihtuah lungchhia in Khuanu pawh a dem lek lek hial a.. A changin lah a tir pawhin Pasaltha ani tih hre reng chung si a Keivawmhranga lak a beiseina a lo nei ve leh a thinlung a lo hlan ve ringawt te chu ama thiam loh liau liau zawk ani tiin Buangpuii chuan amah leh amah chu a han indem let zawk leh rih thin a...
Hei zet hi em ni an sawi phu loh hmangaihna zun a uai natzia chu ?!! Inchhir a inlamletin engmah sawtna a nei tawh hauh si lo..Kan duh emaw duh lo emaw, hmangaihna chu hmangaihna ani miau si a..Eng ang pawhin tal chhuah tumin bei thin teh mahse Hmangaihna a tang lak lawh tawh te chu a zunzamin a phuar bet tlat si thin a...Duh huna seng luh a, duh hun hun a paih bo leh mai theih ani tawh si lo zawng chu anih hi !!
Sikpui Ruai ropui tak mai a han tiak ta chu Keivawmhranga chuan hlim taka Buangpuii nen lam an thai lai leh hun an hman dun lai te kha a ngai em em mai a..Theih chang se khang hun hlimawm tak te kha koh kir leh mai a chak tak zet a...A chang leh Buangpuii a ngaih em avang chuan Chawnchhim khaw lama han chhoh leh mai te chu a chak rum rum thin a.. A tum reng vang nilo mahse Buangpuii rilru chu amah ngei hian a ti na ani tih leh Zote khua atanga Chawnchhim lama a haw hnuah pawh zan khat te mah luaithli nul lovin Buangpuii hian hun a la hmang lo tih te chu hre ve ngat se zawng keivawmhranga hi Chawnchhim khaw lam panin rang takin a chho vat tawh tur ani tehlul vaih nen...Hriatlohna hi chuan hringfate hi a va han tibuai thin tak em !!
Mahse, ngaihzawng te ngaih satliah avang ringawtin zawng, tun atan rih chuan Chawnchhim khaw lama zin a la rem bawk si lo..A lo tum lawk tawh anga a farnu Chawnghliri, Ngur khua a pasal nei han tlawh chhuah zai chu a lo rel lak lawh tawh bawk si a..Lunglen vang ringawt a mipa meuh in mahni thil tum thulh chu mi nep zia ani tih chu a hrechiang hle bawk si !!..Lungleng tak leh Buangpuii ngai tak chung chuan ni hnih thum a pu te bula awm lehin Ngur khaw lam pan zai chu Keivawmhranga chuan a rel ta a...
Mura hlauhawm tak lak a inven nan a "Mura puk" an siam te; Zote khaw hovin hlim taka Sikpui Ruai ropui tak hmanga tual an lo chaina hriatreng nan a Lungphek ropui an phah “Sikpui Lung” te hi tun thleng pawhin Zote khaw hmun hlui ah khian hmuh tur a la awm reng a...Mura puk erawh a tir chuan pasarih ni thin mahse a hnu ah leimin in a chhilh tak avangin tunah chuan paruk chauh a awm ta ani...
Post a Comment