By: Isaac Zote
THUHMA: Tun tum pawh a sei em avangin Part A leh B ah ka rawn thenhrang leh ta mai...Chhiartute tan chhiar tham lawih law law a rawn post ka duh thin si a..
RECAP: Chhumbawha pawh a fate ruang kuah pah a rawn tawngchhuakin,” Ni e Pasaltha..,Ka fapate min thah sak takah chuan he khawvelah hian dam chhan dang reng ka nei tawh chuang lova...I pa nunna ka lak sak avanga I phuba lak chu han puitlin law law ta che..Ka lu chu i chempui khan rawn la rawh le...” a ti chuai raih a.
Keivawmhranga chu Chhumbawha lam rawn hawiin,” Thisen kan inchhuah hnem lutuk tawh e...Lalpa, ani hi khawngaihin ngaidam hram ang che...A fapate pahnih a chan tawh a, a phu tawk hremna a tling tawh ani...Ti hian a damchhung chu a fapate ngaiin a hun leh ni te hmang zo ve rawh se...” a han tih chuan Lalpa Hrihlera chuan a hma a ding Pasaltha huaisen leh rothap chu ngaisang takin a thlir dauh dauh mai a...
Lalpa Hrihlera chu rawn tawngchhuak leh hluaiin,” Hei zet hi ani Pasaltha dik tak chu !! Rengpa Chawilung Chawi Pasaltha ngei chu a lo ni ngai e !!” a han ti te te a....Chhumbawha lam chu hawi phei lehin,” A chunga i thil tih sual a berin a ngaihdam tawh si che chuan kei pawhin ka ngaidam ang che..Mahse, in chhunkaw pahnih buaina hi vawikhat mah rawn thar thawh leh ngai tawh lo la, pu Ngulkauva te chhungkaw chungah hian vawikhat mah rilru chhia rawn pu leh tawh ngai hek suh ang che...Chuti lo zawng in Lalpa ka nihna angin ka thuneihna ngeiin ka tlangvalte i nunna lak sak tur che in thu ka pe tawh ang che tih ka tiam e..” thinrim tak chuan a ti ta a... Chhumbawha erawh a thil tihsual an khaw mipuiten an hriat vek tawh avang chuan zak lutuk avangin a kun tlawk tlawk thung a..
He mi tum a Zote khua a thil thleng avang hian tlang tin mual tin mai ah te chuan Keivawmhranga chanchin chu nasa tak a sawi chhawn a lo ni leh ta a...Hemi ni atang hian Keivawmhranga chempui hriam tak chu “Thisen Ngai Chempui” an lo tih phah ta bawk ani...
Bung – 71
Keivawmhranga pawh Zote khuaa a chhungte bulah chuan hun engemaw chen chu a cham ve leh ta a..Hun leh nite hriat loh hlanin a liam chakin Changer thla (Hmar ho thla chhiar dan a October) an lo chuang kai leh ta der mai a... Zote khua leh a chheh vel ramte hi Vankal khaw lam ai mahin a vawt zawk a...Thlasik tak tak lai phei chuan Zote leh Chawnchhim khaw chheh vel phai ah te hial vur a tla hial thin ani...
[Mizo in “Vur tla” kan tih thin hi ram dang anga van atanga vur sur sung sung ang hi ani lem lova...Zan a dai tla te a vawh lutuk avanga zing Ni chhuah hma lama lo khang thin hi Vur a tla kan ti ve mai thin ani..
Keivawmhranga chuan Vankal khua a a rawn kalsan tak a nu chu a ngaihtuah tawh ang reng hle mai a...Amaherawhchu, helai thleng a thleng chho ve tawh a, Zote khaw hmar lam a awm khaw hnaite, Ngurte hnam hovin an sah chhuah Ngur khua a a farnu Chawnghliri thlawhchhuak lova han haw leh ringawt zawng ni thei ngangin a hre bawk si lova...Tin, chutihlai mek chuan a pu Ngulkauva leh a nite nupa lah chuan an ngaihzia thu leh cham ve reng rih tur a an duh thu an lo hrilh chamchi ve mai bawk si a...Rilru pawh siam fel harsa a ti kher mai !!
Tum khat chu a Pu Ngulkauva nena an titi dun na ah a nu Lawikungi chungchang an sawi chhuak hlauh mai a...Keivawmhranga chuan,” Eee thil pakhat ka hrechhuak zawk mai ti nia..ka nu hian a chhungte chanchin hi vawikhat mah min la hrilh ngai miah lovin tun hma chuan Chawnchhim khua a an chen thin thu chiah hmanah ka hnenah a sawi lang zauh a...Chawnchhim khua a ka awm laia ka han zawh kual vel lah khan tuman an hre bawk si lova.. Khawnge ka nu chhungte hi an awm tak tih hi i hre mial mai lo maw?” tiin a han zawt a..
Chutia a han zawh takah chuan Ngulkauva pawh chuan uluk tak a maimitchhing meuh a han inngaihtuah vang vangin,” I sawi takah chuan i nu chhungte chanchin hi ka hre thui tehchiam bik hauh lo mai ka ti.. I pa nen a an inneih lai kha chuan Chawnchhimah khian an cheng thin ngei mai a..I nu Pa hming chu Khawhlianga ani a, Lawitlang kaupeng Hrangchal hnam anni a..I nu te unau hi an vanduaiin i pi khan i nute hi an tleirawl laiin a boral san a; i pu Hlianga erawh Vankal khaw lama in pem thlak san hnu khan a boral thung a..I nu hi a upa ber niin nuta pakhat leh laizawn pakhat a nei a; mahse an hming te erawh chiang takin ka hrechhuak thei ta tlat lo mai...
.....Khatia i pi leh pu in an boral san takah khan khaw dang bel turin an pem ta niin ka hria a..Ka hriat sual loh chuan i nutei kha chhim lam khua Lamsial khaw bul, Khawbung hnam ho khaw sahchhuah Khawbung khua ah a pem ta a; i putea erawh Biate hnam ho sahchhuah Zialung khua ah a pem thung niin an sawi...Zialung khua hi a khaw sat tute hnam hming chawiin Biate khua an ti thin bawk” a han tih dap dap takah chuan Keivawmhranga pawh chuan a pu thusawi chu ngaihnawm ti tak leh chik tak mai chuan a lo ngaithla a...
Lalpa Hrihlera in chhungah chuan boruak a ritin Lalpa Hrihlera, Khawnbawl upate, Zote khaw Pasalthate leh Val Upa Leihanga te chu muk takin an lo thukhawm hlawm a...Chutia an zavaia bengsika an inngaihtuah lai chuan Phuaisabaka pa Pasaltha Tinhriama, a hma lawk a khawnbawl upa a hlan kai thar chu rawn ding chhuak hluaiin,” Eng pawh ni se Lalpa, hei hun a zawng a kan khaw tan a hun huphurhawm leh hrehawm ber mai Thlasik chu a intan leh dawn tawh chu ani ta reng mai si a... Tun kum chu engtin emaw tak hma kan lak chu a ngai tawh takzet ani...Kum dang ang bawk a mihring kan inchan teuh leh zawngin kan khua hi dam khaw chhuak zo tawh lovin kan khaw mipui tam zawk te hian khaw dangah min pem san vek mai ang tih ka hlau takzet ani..” a rawn ti a...
Tinhriama thusawi chu tawmpui tih hriat takin midangte pawh chuan an lu an bu nghut nghut a, Lalpa Hrihlera kamchhuak chu an ngaichang tih hriat tak maiin chulai a thukhawm zawng zawngte chuan amah chu an en thap mai hlawm a...
Muang changa Lalpa Hrihlera chu a thuthmun atanga rawn ding chhuakin,” A dik khawp mai...Kum dangah pawh thlasik hun hi kan khaw tan chuan hun hrehawm ber leh a rawn thlen hun tur pawh kan huphurh ber kha ani thin a...Amaherawhchu, tun kum erawh kum dang nen a a danglamna chu kan khua ah “Sairal Buan Pasaltha” a rawn lawi lut hi ani...Ka rilru chhungril tak chuan ani ngei hi kan khaw chhanchhuaktu tur anih ka ring tlat a...Ani hi he manganna leh buaina lak ata min hruaichhuak tu tur atana khuanu rawn tirh ngei anih hi ka ringhlel mawlh lova...Ani kaihhruaina hnuaiah hian lo hmachhawn ila a that ber ka ring e...” a han tih chuan khawnbawl upate leh Pasaltha dangte pawh chuan Lalpa thusawi chu an pawmpui tlang hle a...Pasaltha Kawlruna leh Bualnguka te pawn Keivawmhranga chu anni aiin naupang zawk mahse an chung en tlat avangin Lalpa remruatna chu dik an tiin tha an ti hle ani...
An sir a ngawi reng a lo thu Tlangaupa Burkhawna lam chu hawi pheiin Lalpa Hrihlera chuan,” Sapui chaih pasaltha kha zu ko ta la, Lalpa Hrihlera’n i tanpuina a mamawh tlat mai zu ti ta che..” a han tih chuan Burkhawna chu rang taka tho in Ngulkauva te in lam pan chu a rual nghal a...Keivawmhranga’n Lalpa in a rawn thlen chhoh chuan Lalpa Hrihlera chuan lawm takin a lo dawngsawng a, manganna leh beidawnna ruk tak nei tih hriat takin,” Keivawmhrang, hei i hriat angin Changer thla chu kan thleng der tawh mai si a...Thlasikah hian abik takin kan khua hian vanduaina namenlo kan tawk thin a...Tun kum erawh nangmah avangin beiseina thar kan nei a...kan harsatna hi su kiang tura hma min lak sak i inhuam em ?” a han ti te te a.
Bung- 72
Keivawmhranga chuan,” Eng thil nge ni ngai Lalpa? Ka sutkian sak thei ngei ang che u chu ka ti lo nangin ka theihna hnuaia awm te ani ve ngai anih chuan ka theihtawp chu ka chhuah ang tih ka intiam e...” a ti ve ta a...Chu thu a han hriat chiah chuan Lalpa Hrihlera chu lawm em em in,” A va lawmawm tehreng em...!! Thil awm dan chinchang hre hauh lova min tanpui i han inhuam nghal mai te hi a va han ropui tehreng em !!..Pasaltha diktak zawng i lo ni e !!...Thil awm dan chu hetiang hi ani e..Kum engemaw zah liam ta atang khan kum tin deuh thaw mai hi thlasik lai hian Mupui lian em em mai, “Mura” kan tih mai chuan kan khua hi rawn beiin ka khaw mipuite lak fo a ching a...Eng ang pawhin kan theih ang tawkin lo bei let ve thin mah ila awmzia reng a nei si lo... A kum tel hian a huangtau tawlh tawlh tawh emaw tih mai tur ani zawk a... He mu rapthlak leh hlauhawm tak lak ata hi min chhanchhuak turin leh a beihna kawngah hian ka khaw tlangvalte min kaihhruai sak a ka tlangvalho hruaitu ni turin kei Zote khaw Lalpa hian ka ngen duh che ani..” a ti ta a...
Mura hi mupui a zawnga hlauhawm leh tihbaiawm ber a sawi thin ani a... A khabawr pawh patling lukhum tawk zet niin a ketin ringawt pawh hi sepui ki tiat zet niin hriam tha tak anga sawi ani... Inchungah bawkin a thla in bang chhak leh bang thlang a hup a, kawmchar lam atangin a meiin inchhung a hawl a, kawngka lam atanga mihring tlanchhuak chu awlsam takin a lo chuk mai thin ani anti..Chutiang khawp a mupui hlauhawm leh lian anih avang chuan a chet tawhna khua ah chuan mihring an hek duh hle ani...
He Mura hi engvangin nge thlasik hun velah kher hian Zote khaw ho hi a rawn beih thin tih hriat ani lem lova...Thenkhat ngaihdan chuan thlasik leh thalva-ek-char hunlai chuan ramsa te an inthlah pung chak lovin ei tur an tlem deuh ang a; ramsa dang ei tur a han tlem takah chuan man awlsam ber mihringte a rawn bei mai thin niin an ngai a..Mahse chiang taka a chhan leh a vang diktak sawi thei erawh Zote khaw pa tumah an awm lem lo thung...
Keivawmhranga chuan thil awm dan engkim uluk taka a han ngaihthlak hnu chuan rawn tawngchhuakin,” Aw le Lalpa, chutiang khawp a lo ti ralti tu che u bei tur chuan ka intiam a..Amaherawhchu, tlangval ho kaihhruai tur chuan ka tlak hran lova..Kei aia huaisen, remhria leh fing zawk U Leihanga te, Pa Tinhriama emaw U Kawlruna te pawh an awm alawm...Anni rual U zawkte chu ka theihtawpin ka lo tanpui zawk ang e..” inngaitlawm tak chuan a han ti a...
Lalpa in a chhan leh hma chuan Khawnbawl upa leh Pasaltha ni bawk Tinhriama chu rawn dingchhuakin,” Ni love Hranga, Nangmah lo chu he kan manganna leh beidawnna lak ata hi min chhanchhuak thei tu midang tumah an awm lo tlat ani..I tello in ti thei ni ila chuan, a hma hma khan he buaina hi keimahni chauh pawhin kan lo chingfel daih tawh lovang em ni? I duh ang ang leh i mamawh ang ang chu inthlahrung miah lovin sawi zel la, keini hian kan pe zel ang che...Min hruaitu tur chu nang ngei hi i ni e...” a han tih chuan a thusawi pawmpui tih hriat takin chulaia awm zawng zawngte chuan an lu an lo bu ve nghut nghut a..
Inthlahrung viau mahse Lalpa leh a rual U zawk te chu a hnial hneh tak ngang si lovah chuan hreh tak chungin Keivawmhranga chuan an ruahmanna te chu a pawm ve ta a... Mura beihna a a tlangvalte kaihruaitu ani dawn tih a han hriat chuan Lalpa Hrihlera pawh a phur em em mai a...Bang a intar a silai tha mi, mawi em em mai chu la thla in,” ‘Sapui chaih pasaltha’, hei hi ka silai tha mi, ka duat leh roh em em mai ani a... He Mura ka khua leh tui te tan a hnawksak tak hi kan thah hma loh chu i duh ang anga i hman turin i kawl dawn nia...Duh tawk a i hman tur a mu pawh ka pe bawk ang che..” a ti ta mai a...Keivawmhranga chuan zahthlak tiin hnial eng ang mahse Lalpa chuan “Vawikhat ka sawi tawh chu ka sawi tawh ni rawh se !!” a tih ve tlat tawh avangin a hnial chhunzawm ngam ta lova...Heta tang hian Keivawmhranga hian a damchhunga a vawikhat nan silai a khawih tan ve ta chiah ani...
Keivawmhranga chu han thaw chhuak halhin,” Aw le Lalpa, ka chunga i thatna lantir tam tak te avang hian ka lawm hle ani... Tling lo tak a tlangvalho te kaihruaitu tur a min ruat tak si ah chuan hei hi ka ruahmanna siam hmasa ber ni rawh se... He Mura rawn kal leh hun tur atana kan lo inven ve theih nan nunau leh awmnem zawk te tawm himna tur a tam thei ang ber puk siam ni se la...Mura chuan min rawn bei thut anih pawh a chawplehchilh puk chhunga tlan lut te an inven theih nan puk tin bulah a kharna tur lungchhin dah zel ni bawk rawh se...” a han tih dap dap chuan Lalpa in a kalkhawm zawng zawngte chuan Keivawmhranga remruatna chu fing anti in remhria an ti em em mai a..An hruaitu tur atan an thlang chu tifuh an inti hle ani.
Lalpa Hrihlera chuan,” I remruatna te chu a tha hle mai..Pasaltha huaisen leh chak chauh nilovin Pasaltha fing leh remhre tak pawh i lo ni tak meuh ani tih vawiin ni hian ka hre thar e !! Anih leh hemi chhung hian nangmah puitu tur che emaw i thachhang dawltu tur atan tunge i duh le?” a han ti a...
Chutia Lalpa in a han zawh takah chuan Keivawmhranga pawh uluk taka a inngaihtuah hnu chuan,” Aw le Lalpa, dan naran chuan hetiang a hlauhawm ka hmachhawn dawn hi chuan midang tumah dinhmun derthawng a ka hnuh luh duh ngai loh avang hian mahni in ka chetla mai thin a...Amaherawhchu, tun tumah erawh mahni chauh a beih a harsat dawn avang leh min lo tanpui ve tur ka mamawh dawn avangin min puitu tur hreh tak chungin mi tuemaw chu ka thlan ve a ngai dawn a... A remlohna a awm te anih lem loh chuan in khaw tlangval tuaitir Phuaisabaka hian min pui se a lawmawm ngawt ang..” a han tih chuan a duhthlanna chu chulai hmun a awm ve thenkhat te chuan mak an ti ang reng hle mai a...
Chu thu a han hriat chiah chuan Khawnbawl Upa Tinhriama chu vawilehkhata rawn thawchhuak hawkin,” Ka fapa Sabaka maw? ‘Sairal Buan Pasaltha’, min lo hrethiam la ka fapa i thachhang dawltu atana i thlang hi pawi ka ti ani hran miah lova...Tanpui thei che dinhmuna a ding ringawt pawh hi chang sang ka tiin ka lawm takzet zawk a...Amaherawhchu, heti zat amah aia huaisen leh tawnhriat ngah tawh zawk Pasaltha ropui tak tak an awm a, ani ang tlangval tuaitir mai i thlang hi mak ka ti em atin ni...” mak ti lutuk leh awih lo lutuk hmel pu chuan a han ti phawng mai a..
Keivawmhranga erawh nui var var chungin,” I fapa hi i hrechiang lo pawh ani mai thei asin Pa Hriam...A kum ngaihtuahin a huaisen reuh mai piah lamah a mawng a zangin a intha zo a...He inbeihna bik atan phei hi chuan a that ber ka ring a..Tin, Tlangval tuaitir fel tak niin ka hre bawk e..” a han tih chuan a thusawi lo ngaithla ve reng tu Pasaltha Kawlruna leh Bualnguka te pawh chuan a thlan chhan chu awm an tiin ngaihloh lamah an ngai hran lem lova...
Bung - 73
Phuaisabaka chu Keivawmhranga’n a thachhang dawltu ah a thlang ani tih an han hrilh chuan mak a tiin a hrilhhai lek lek zawk mai a...A pasaltha ngaihsan em em maiin midang tam tak zinga a han thur chhuak nawlh mai chu awih har a ti lek lek zawk a; a mi zui tur chu a hnungzui zawh huphurhawm hle dawn a hria in Keivawmhranga’n amah a beiseina ang chu a pha zo lo palh mai ang tih mawlh chu a hlauh hle ani..
Muangchanna hun a awm tawh lo tih hria in Keivawmhranga remruatna ang chuan a khaw nawt mai chuan an hmanraw neih ang ang hmangin Mura laka invenna tur puk siam chu bul an tan ta luih luih mai a... Mura in an khua a rawn beih hma ngei a an khaw mipui an zavaia an len theihna tur puk te chu laiin a khaw nawt chuan an phu suau suau ani ber mai a...Tin, Keivawmhranga remruatna angin Zote khaw tlangval ho chuan mau sat in mau fei an siam teuh mai bawk a...
Heng hun chhung hian Keivawmhranga chuan Lalpa in silai a kawl tir chu han chul nel velin kah te a han zir ve a..Mahse Pasaltha diktak na na na tan chuan rei tak han zir vak a ngai tehchiam lo..Reilote chhung chuan a nu pumchhung ata chengrang chawi a rawn chhuak nghal emaw tih mai turin a hmang thiam ta em em a...Chutiang bawkin Zote khaw Pasaltha dangte leh tlangvalte pawh chu mahni theih ang tawkin an lo inbuatsaih ve a; an mau fei siam te pawh chu khawh te zirin an intihsiak ve thin bawk a...
Thla a liam a Thlaphal (November) an han chuan kai leh meuh chuan ni khat chu Keivawmhranga inchhunga a awm lai chu Losul haw hun awm velah hian pawn lama mipui vantlang leh nunau mangang tak a te chel chul ri a hre ta mai a...Rang taka a han tlanchhuah chuan mipuite chuan hlauhthawn hmel em em hian van lam an lo en fur hlawm mai a...
Eng thil nge maw an en thup tehreng ni ti a van lam a han hawi chhoh nak chuan Zote khaw chungah chuan nidanga a la hmuh ngai reng reng loh leh chutiang awm thei pawha a lo ruat ngai loh Mupui lian em em mai chuan van sang takah khua chu a lo thlawh hual mek a...
Keivawmhranga chuan a rilru te te chuan,” A va pawi em aw...Puk pasarih chiah kan siam hman si a; nunau leh awm nem zawk deuh te tal an leng kim em ang chu maw..” a ti nauh nauh a...A duhthusam ang zan chuan an la inbuatsaih hman lo deuh chu ani...Mahse, sawisel leh lungnih loh ringawtin engmah sawtna a nei tawh der mai si lo !! A neih ang ang leh an awm dan ang ang chuan chu hlauhawm chu an lo hmachhawn a ngai tawh miau si a le !!
Keivawmhranga lam pan chuan hmanhmawh tak leh a remruatna ngaichang tih hriat takin Val Upa Leihanga, Pasaltha Kawlruna, Pasaltha Bualnguka leh tlangval tuaitir Phuaisabaka te chu an rawn tlan hlawm a.... Keivawmhranga chuan Val Upa Leihanga hnenah chuan,” U Leihang, khawngaihin rang takin naupang leh hmeichhia zawng zawng te kha kan puk siamte ah khan luh tir vek ula..Tin, pawn lam atangin tlangval hovin lungchhin khan puk tin te chu chhin vek se la...Tin, Lalpa leh Khawnbawl upate zawng chu Buanzawl lai taka awm tirin tlangval ho zawng zawng khan an hmanraw neih ang ang te nen veng turin Lalpa chu hual khat vek bawk rawh se...” a han ti zung zung a...
Chutah Phuaisabaka lam chu hawi lehin,” A hma a ka hrilh lawk tawh ang che khan Buanzawl bul chiah a awm Mualkil mitha pa (Khawnbawl Upa min) In ah chuan i lo awm dawn nia...A in bul chiah a thingkung zar atang khan keimah ngei hian ka lo chang dawn ani..” a ti ta a
Keivawmhranga ruahmanna ang ngei chuan rang tak maiin chet chu an han la zung zung a...An chunga Mura lah chuan tu hi nge a awm nem ber leh beih nuam ber ang ti ni awm fahran hian a mihring lak tur chu van sang tak atangin mupui mit var tha tak mai chuan a thli thlai reng a...Mahse kum dang angin a hlawhtling kher ang em tih chu tuman an sawi lawk thei kherin a rinawm tawh lem loh tlat !! ... A chhan chu tum dang ang lo takin tun kum chu Pasaltha Keivawmhranga Zote khua ah a awm tlat atin ani !!...
Zote khaw Mualkil Mitha pa hming chu Hliapfima ani a..Amah hi Zote kaupeng Chawngtual hnam ani...Keivawmhranga rorelna anga Lalpa leh a khawnbawl upate Buanzawl lai taka an han luh tir vat vat hnu chuan Phuaisabaka chu Mualkil mitha in ruakah chuan rang takin a tlan lut vat a... Zote khaw Buanzawl hi Lalpa In leh Mualkil mitha pa in inkar chiah a awm hi ani a...
An awmna tur atana Keivawmhranga’n a ruat lawk theuh ah chuan mitin an awm fel vek ta maw tih ah chuan Keivawmhranga pawh rang takin Mualkil mitha pa in bul chiah a awm thingkung zar buk tak mai ah chuan inthazo fahran mai hian a lawn kai vat a...Phuaisabaka hriat phak turin,” Khai le...tunah le !!” a han ti a...
Bung - 74
Chutia Keivawmhranga a han au chiah chu Phuaisabaka chuan Mualkil mitha pa in chhunga a hma a an lo dah lawk Khuang te, Darkhuang, Darbu te leh ri bengchheng siam thei chitin reng te chu a han khawng ri tak tak mai a...Chung lama Mura, Zote khua thlawh hual mek tu pawh chuan chu ri bengchheng tak mai chu a lo hre fuh chiang ve kher mai !!...Van sang tak atang chuan Mualkil mitha pa inchhungah chuan ri bengchheng nasa tak siamtu mihring tam tak an inhnawh khawm anih ringin chak tak maiin Mura chu a rawn bir thla ta vang vang mai a...
A chhung mihring tam tak awm anga ngaihruat theih chu pakhat tal rawn man a tum ani tih chu a chiang reng mai le !! Amaherawhchu, chu chu Keivawmhranga thil lo tum lawk leh thil thlen dan tur atana a duh dan chiah a lo ni reng mai si a!! Mihring awm tamna tak tak zawk buanzawl bei lova a bul a in awm zawk tawktarh atana hman chu Keivawmhranga ruahmanna dik tak chu ani !! Tin, Mualkil mitha pa in hi Keivawmhranga’n a thlan kher nachhan pawh a bul hnaite a thingkung birukna tur remchang a awm vang chu ani bawk a...
Mura van sang tak ata chak taka a rawn bir thla vang vang lai tak chu Keivawmhranga chuan kah fuh tumin Lalpa Hrihlera silai chuan a lawnna thingkung atang chuan a lo sai dur mai a !! Mahse chak taka boruak a rawn bir thla ani bawk a, a kah thelh ta tlat mai le !! Pasaltha diktak te pawh hian an thil tum hlah palh emaw kah thelh palh te hi an nei ve thin tlat zawng chu anih hi maw !!
Keivawmhranga chuan a kah thelh chu pawi a ti em em mai a..Inchunga a rawn fuk chian hnu ah uluk taka duh thala tin vang vangin kah a thlang zawk thei tih chu a inhre tho a; a kah thelh tak si ah chuan duhthlan theih pakhat zawk a lo thlang lo chu a inchhir hnuhnawh hle mai a..Amaherawhchu, kawng lehlamah chuan khatia rang taka boruaka a awm laia kah vat zawk a thlan nachhan pawh kha eng dang vang nilovin inchunga Mura bawk chu a kah hlum loh palh vaih chuan Mura thinrim chuan inchhunga ri bengchheng siam mek Phuaisabaka chu zu hawl chhuak thuaiin a ching hlum palh ang tih a hlauh luat vang zawk ani...
Chu Mura chu Keivawmhranga’n a kah thelh takah chuan Mualkil mitha pa in chhunga ri bengchheng tak siamtu rawn man tumin in chungah chuan a fu ta vun mai a..Keivawmhranga chuan hnai tak atangin thingkung hnah kar atang chuan a hma lawk a Mupui lian em em mai chu chiang takin a en reng a..Lian leh rapthlak a ti hle mai !!...Chutiang ang tiat sava emaw ramsa reng awm ngaiin a lo ring pha ngai lo hrim hrim a !!...Reilote chhung chu engmah ngaihtuah thei lek lovin hmuhnawm thlirin a hma a mupui lian tak mai chu a thlir ringawt mai a...
A hma a Mualkil mithapa in chunga fu Mura lian lutuk chuan a thlate a bang chhak leh thlang hup a kawmchar lam atanga a mei a Phuaisabaka han hawl chhuah a tum chiah chu Keivawmhranga pawh harh chhuak zawkin a Fei-ki-bar hmawr hriam tak mai chu chak fahran mai hian thingkung buk tak kar atang chuan a rawn thlawk chhuak zawk mai a...Chu Mura lian em em mai nghawngah tak chuan a fuh a; mahse a hmul a chhah tha ngang aniang e, awmzia fumfe a nei tlat lo mai !!...
Chu veleh chu Mura chu rawn inher thutin inchhunga ri bengchheng siamtu lam chu buaipui ta lo chuan fei rawn chhuahna thingkung lam ah chuan vawilehkhatah a rawn thlawk phei thut mai a...A zar leh hnahte a buk that em avang chuan a tin hriam tak te chuan Keivawmhranga chu a rawn ching fu hlei thei bik lova; mahse a chak em avang chuan chu thingkung ata chu Keivawmhranga meuh pawh thingkung hnuaia lei charah tak mai chuan a sawi thla chiang kher mai !!
Chutia thingkung a biru Pasaltha a han sawi thlak dawt takah chuan tifuh inti fahran ni awm taka hram chhuak thawt pahin Keivawmhranga chu a tin hriam tak te nen chuan zu nangching nghal a tum a...Mahse pasaltha diktak chu chiai duh miah lovin rilru fim tak nen a lo insiamrem thuai a; thawh a han dinna hman a awm tak lovah chuan a lo lum sawn hman tawk chu ani mai a, mahse a chet ran em avang chuan chu Mura tin hriam tak te chu a pumpelh hman tlat tho mai!! Rang taka veilam a lo lum sawn zauhin a “Thisen ngai chempui” ngei mai chuan chu Mura ngal dinglam chu a han sat chawrh tehreng a le !! A vun chhah viau mahse chutianga Pasaltha chak leh tharum ngah chungchuangin duh thal a hmun leh hmuna a han sah chilh meuh takah chuan a lo na ve chek ni tur ani...Chu Mura tihbaiawm tak pawh chu na ti lutuk a hram in a te chhuak ve chel chul ta mai a....
Chutia na ti lutuk ri Mura in a han chhuah takah chuan inchhunga Phuaisabaka awm chu rawn tlanchhuak vatin hnai set sawt atang chuan chu Mura hlauhawmzia chu theihnghilh vek tawhin a mau fei zum tak ken chuan a rawn khawh zawt mai a..A thla ah tak a khawh fuh avang leh a khawh fuh na lai ber kher chu a chhah that em avang chuan a taksa a chhun tlang zo tlat lo mai a..Amaherawhchu, a duh angin khawh fu chiah kher lo mahse Phuaisabaka thil tih chuan chu Mura chu a chhaihbuaiin a ti phawklek ve tho mai a...
Chempuia a ngal sat tu Keivawmhranga zawk chu a ke na lo lam zawk a veilam chuan duh tawk a han tham chiam a tum leh a; mahse pasaltha tuan rang tak chu a hma ang bawk a lo inhersawn leh vatin chiang em em mai hian a ke veilam zungtang pakhat chu bung tep khawpin a han sat leh ngat mai chu a hma aia ring zawk mahin a na tuar chu a hram chhuak leh a...
Chutah tak chuan a hram dan atangin chu Mura chu dinhmun chhia ah a ding mek ani tih hrethiam thuaiin vawilehkhatah Buanzawl atang chuan Pasaltha Kawlruna leh Bualnguka hova au dur dur a chak tak a rawn tlanchhuakin tlangvalho chuan an mau fei suih zum te chu Mura lamah chuan an rawn khawh fur fur hlawm mai a...Pasaltha Kawlruna leh Bualnguka phei chuan hnai taka rawn pan hnaiin mahni sahimna ngaihtuah hauh lovin an mau fei te chuan Mura chu an rawn khawh dun a..
Bung - 75
Nidangah chuan beih let tawk ngai mang lovin harsa lem lo takin he Mura hian a duh duh a zu thur chhuak mai thin kha ani ngai a...Hemi tum a chutia Zote khaw hovin an lo bei let thut mai chu a chiai in a phawklek ani teh chek ang chu, mihring man lam pawh ngaihsak thei tawh lo chuan chulai hmun ata chu inthiarfihlim a tum ta zawk a..
Chulai hun tak chu Keivawmhranga lo chan lawk khiau chu ani !! Ral anni emaw sa hrang pawh nise, an insaseng tur emaw an tanhmun an han insiamrem tur chiah hi hun reilote chhung lek mah nise an lo inthlah dul palhin an lo inveng fimkhur lo zauh palh ve thin a; chulai hun tak chu Pasaltha dik tak te chuan an hmuhhmaih ngai lovin dinhmun tha zawk chan nan rang tak leh thiam tak maiin an lo hmang hlauh zawk thin... Chutiang chiah chuan chu Mura, Zote khaw rawn beitu pawh chu a insaseng dawn lai tak chu Keivawmhranga pawh hian remchangah lo lak a tum ani..
Zote tlangval hovin mau fei a an khawh luai luai a an lo tihbuai lai chuan rang tak a inperh tho zawkin a tlakna thingkung hnuai hnah ro tla khawm chhah tak chunga vanneihthlak taka tla Lalpa Hrihlera silai chu chhar vatin hmanhmawh takin silai mu chu a thun thuai thuai a...Inthiarfihlim tum a Mura a thlawk chhuak leh tan dawn chiah tih chu uluk takin silai chuan a tin ta vang vang mai a...
Pasaltha dik tak tan pawhin vawikhat tihsual chu hriatthiam theih pawh ani mai thei a...Amaherawhchu, vawi tam tak tihsual nawn fo erawh awih ani tawh lo... Vawikhat a kah thelh tawh a, Keivawmhranga hian kah thelh a tum tawh hauh lo...Kah thelh a tum tawh lo mai nilovin chiang tak a a thih ngei na tur lovah chuan kah loh law law a duh zawk hial ani !! Mura thlawk chhuak chu mit siai meuh a han tin vang vang lai chu Zote khaw tlangvalte chuan an en thup ringawt mai a; thawk la ngam lo lekin an lo thlir hlawm a...
An inbeihna mual a pel fel tep tawh pawhin a silai a la hmeh puah tak lovah chuan thenkhat phei chuan a thlawh bo tir hman tak ngial dawn anih hi an lo ti hial hman a...Mahse Keivawmhranga hi mahni thil tih a chiang leh mahni inrinzawhna a khat Pasaltha ani tlat si ani !!
An inbeihna lai zawn boruaka a pel fel dawn tawh tih ah chuan thawklehkhatah a silai chu a han hmet puak dur tehreng a le !! Zote khaw tlangvalho chuan,” A fuh e !! A mit ah !! A mit ah !! A chiang lutuk !!” tiin an au chel chul mai a...An au ri a han hriat veleh chuan inbeihna a tel duh ve hle mahse Val Upa leh tlangvalten hmun him zawk a an ngaih Buanzawl chhunga awm tlat tur a an ngen beh Lalpa Hrihlera pawh lawm leh phur em em in a rawn tlan chhuak a....
Keivawmhranga’n a mit taka a kah Mura chu a thi tur beidawng leh mangang chu ring lutuk mangkheng hian a te rei ruai tawh mai a... Chu ri zet chu a rapthlakin a tihbaiawm takzet ani !! Sava hram pawh ang tawh lovin ramsa lian lutuk, nidanga tuma la hmuh leh hriat ngai loh rapawm taka midang tihthaih tum a te chel chul hi a ang ber mai a...Chu Mura chu beidawng duh mai lovin a theih chin chin han thlawh tum ve bawk mahse; a thil tum chuan awmzia a nei meuh tawh lova...Zote khaw piah chiah tlang chu na taka va su in chu tlanga thingkung tuai leh te deuh te chu a bawh bung rem rum mai a; chung lai hmun vel a hnimbuk te pawh chu a bawh eng hen hun mai bawk ai...
Hemi tum a he Mura na tuar hram hi a ringin a rapthlak zet zawng aniang e; Zote khua mai pawh nilovin an chheh vel khaw thenkhat – Chawnchhim, Lawitlang kaupeng Varte hnam ho chenna Lawihmun (tuna Ruantlang lo ni ta), hmarchhak lama awm Ngur khua leh hmar thlang lama Khawbung khua te thlengin hre phak an awm in an sawi ve tlat mai a...
Hreh tak chungin fam dairial a chang dawn ani tih hriat tak maiin a tawp nan vawikhat chu a han hram leh a, mahse a hram ri erawh a hma aia ring tawh lo zawkin chakna a nei tam tawh lo ani tih chu a hriatthiam theih mai a...Chu Mura lian tak mai thi tur chalchang leh nasa taka thihna suala a tal vel chu ral atang chuan fiah lo takin a va hmuh theih a... A hram ri erawh muangchanga zawi zawi a chuai thla raih raih zelin reilote hnu chuan a nunna a thlah fel ta tih hriat takin ri hriat tur reng a awm tawh lovin ral atang chuan chu Mura chu chet pawh a che eih tawh lo ani tih chu an va hmu thei a !! He mi atang hian vawi khat te mah Mura hian Zote khua hi a tibuai leh tawh ngai hek lo !!
Chu veleh chuan Zote tlangvalho chu lawm lutuk vanga sapatalin an Lalpa ho ho chuan an haw haw dur dur mai a...Tlangval thenkhat te chuan puk a an chhin hnan an nupui fanau, an farnu, nu leh pi te chu hruai chhuak turin an va kal a; Phuaisabaka leh tlangval thenkhat erawhin an Pasaltha ngaihsan em em mai chu an lo zawn mek bawk a; thenkhatte lahin an zawn mek Pasaltha chu lo va chibai tum sekin thenkhat erawh chuan a dar velah emaw a ke velah te chuan engtin emaw tal a lo va khawih a lo va dek chu an lo tum ve mek bawk a...
Lalpa Hrihlera chu a khaw tlangvalte lam hawi a ring taka rawn tawngchhuakin,” Khua a tlai tawh ang reng si a...A tlai chhiat lutuk hma in kha Mura thi ta kha hmanhmawh takin kan piah mualah khan va zawng ta ula, kan khua ah hian rawn zawn lut teh u...Ropui takin sa-lu-kimin ka ai duh e...A thla ropui tak te kha Lal mualah hian ka tar anga; a tin sei leh hriam tak te kha ka bang mawitu atan ka hmang bawk dawn ani..” a han tih chuan Val Upa Leihanga chuan rang takin tlangval eng emaw zah chu Mura zawn tur chuan a han tir nghal vat a..
Bung - 76
Lalpa Hrihlera chuan Lal in lam pan in tlangvalho hnenah chuan ngaisang taka an mi zawn mek chu a in lam rawn pan pui turin kutzaizirin a han hrilh a...Phur taka haw haw dur durin Lal in lam chu an panpui ta a...Lalpa Hrihlera chu a in chhunga reilote lut a rawn chhuak lehin se-ki lian tak mai hian zu a rawn thal chhuak a,” Khawnge maw vawiin zet chu...Kan ‘Mura Kap Pasaltha’ kha Pasaltha ropui chawimawina ka Zu Nopui ka han zuk ve reng reng teh ang !! Ka khua tan hian hei lo liama ni ropui a awm leh tawh ngai kher in ka ring love...Kan Mura Kap Pasaltha hi khual khaw pasaltha ani lova, ka khua leh tui ngei Pasaltha Ngulkauva tupa leh Saithlunga fapa ngei ani ngai e..Ani ngei hi he Zu Nopui hi ka tawk e...” chhuang tak chuan a han ti dap dap a...
Tlangval hovin Keiawmhranga an dahthlak hnu chuan Keivawmhranga chu rawn tawngchhuakin,” E khai Lalpa...Kei mi tling lo tak hi hetiang chawimawina ropui chang tura min duhsak avang hian phu lo inti tak chungin ka lawm em em a...Chutih rualin vawiin ah hian keimah nilovin kha Mura huaisen tak a beitu, he chawimawina phu zawk midang pathum an awm in ka hria a...Rem i tih chuan anni hian he i zu tui leh thlum tak hi an dawn hmasak zawk min phalsak hram ta che..” hawihhawm taka a han tih chuan Lalpa Hrihlera chuan a inngaihtlawmna chu ropui ti em em leh mak ti tak chung chuan,” I duh ang chuan ni ang hmiang..” a han ti a..
Lalpa in rem a ti tih a hriat rual chiah chuan tlangvalho zing ata Pasaltha Kawlruna, Pasaltha Bualnguka leh tlangval tuaitir Phuaisabaka te chu a han ko chhuak a... An hming meuh a a han koh chhuah takah chuan chu chawimawina chu phu lo inti in zak eng ang mahse Keivawmhranga’n a tih luih tlat si avang chuan an hnial hneh ta ngang lova; hreh tak chungin an pathum chuan Zu Nopui atang chuan tlemte theuh an han lem diat diat hnu chuan Zu nopui changtu dik tak ni a chulaia pungkhawm mipui ten an hriat leh an hmuh hmaih hauh loh Keivawmhranga chu an han pe let thuai a...
Keivawmhranga pawh chuan Zu nopui ata chu tlemte han lem zeuhin,” Lalpa zu nge nge a thlum tui mang e..Thingkung atanga ka tlakna ka taksa leh pang kham them thum te pawh kha vawilehkhatah a bo ta duak a ka hriat chu le..” nui sang chunga han tiin Nopui chu rang takin Lalpa a pe let thuai a...
Lalpa Hrihlera chuan a hma a ding keivawmhranga chu pasaltha ropui leh hmingthang tak ni chung si a, chapona nei hauh lo leh inphahhnuai taka a chan tur dik tak leh a phu hliah hliah chawimawina ngei, midangte a han hlan chhawng mai chu a ngaisang ngang aniang,” Vawiin ni hian kei in Lalpa Hrihlera hian he Mura Kap Pasaltha; ka khua leh tui te kum tina thihna ruam a min hnuh luh sak thin tu Mura tihbaiawm tak min thiar fihlim saktu hi; he a kahna ka silai roh leh duat em em ngei mai hi tuma chuh buai theih hauh loh turin ka pe a...
... Vawiin ni hian kei hian ka silai tha mi hi ka pe ngei ani tih hi nangni ka khua leh tui duh takte hi ka thuhretute in ni bawk e.. Tuna ka thilpek erawh hi zawng Chawimawina Zu Nopui anga midang hlan chhawn emaw pawm duh loh ka remti tawh lovang...” a han ti phawng mai chu Keivawmhranga pawh a hamhaihin sawi tur a hre lo hial a...Lalpa Hrihlera duhsakna leh thil phalna te chu mak a tiin phu lo inti hle mahse, a hma anga hnial ngamna chi niin a hre tawh ngang lova, lawm takin a pawm ta ringawt mai ani...
Chuveleh chuan Zote khaw mipuite chu a hma aia nasa zawk mah a lawm avanga khekin an haw haw dur dur mai a; an hma a ding an khaw pasaltha dik tak anga an rilru a an ngaih ngheh hmiah tawh Keivawmhranga chu ngaisang em em maiin a hmei a pa chuan an thlir thup ringawt mai a...Kil khat atang chuan a pu Ngulkauva leh a nite pahnih chhungkua chuan chhuang takin thil thleng chu an lo thlir ve reng a...Zote khaw nulaho lah chuan a mitmei dawn tum ran chuan an theihtawp leh thiam ang tawkin an lo meng no ve mekin mitmei an lo pe ve mek bawk a..
Pasaltha Kawlruna, Bualnguka leh tlangval tuaitir Phuaisabaka te chuan an hma a Pasaltha ding chu tluk loh rim nam an ti em em mai a...A chak leh huaisenzia chu sawi lova leng ni sela; an ngaihsan nachhan tak leh a ropui an tihna chhan em em zawk chu a inngaihtlawmna, a inphahhnuaina leh a hawihhawmna zawk chu ani thung !! Keivawmhranga ropuina dik tak chu chumi ni chuan Zote khaw tlangvalho leh Lalpa Hrihlera chuan an hre fiah ta chiah ani !!
Phuaisabaka phei chuan a rilru te te in,” Hei zet hi a lo ni ngai e Pasaltha dik tak chu !! Ani tluk a pasaltha eng kawng zawng pawh a ngaihsanawm leh entawn tlak reng hi ka la hmu ngai lo !!” a ti hial mai a..A upat hnu pawhin Keivawmhranga huaisenna, chakna leh tharum ngahna te chu tluk pha dawnin in ring kher lem lo mahse; a tlawmngaihna leh hawihhawmna tal erawh tluk phak a tum ruh ve hle ani..
Hemi ni atang hian Keivawmhranga chuan Silai a nei ve tan ta chiah a...A hma zawng kha chuan a chempui leh a fei-ki-bar hi a hmanraw rinrawl ber te pahnih anni mai thin kha ani a .... Tin, chu mi ni ata chu Keivawmhranga pawh “Mura Kap Pasaltha” ti a hriat lar a lo ni leh ta ani..
Heng hming hran hran a put nachhan hi ama duh vang reng emaw a chhung leh kua emaw vua leh vangten an phuak sak vang nilovin khaw hrang hrang a a thil ropui tih avang te a miin an lo hriat lar dan atanga rawn piang thin zawk anni a... An koh dan zawng zawngte pawh hi amah Keivawmhranga ngei pawh hian a duh vekin a pawmpui vek tihna ani bik hran lova; mahse midangin an hriat lar dan ani miau zawk thin si ani
!!
A hming hre miah lo thenkhatte pawhin heng hming danga an koh dan te erawh an hre bel leh em em lawi thin si a; a then lahin mi pakhat an sawina vek tih hre lovin Pasaltha hran hran an kohna emaw lo ti tawk an lo awm ve leh zel bawk si nen !! Khaw hrang hranga a chanchin an put darh tak chiam ah chuan amah hian a duh emaw duh lem lo emaw sawisel lova a put mai a lo ngai ta thin a.. Mi zawng zawng ka hup sak a han dan rual lah ani si lo a le !!
Bung - 77
Chutia Lal muala mipui an punkhawm mek lai chuan a hma a Lalpa in Mura zawn tura a tirh tlangval rualte chu hmanhmawh tak a Lal in lam pan chuan rawn tlan phei hlawp hlawpin an zinga pakhat chu thawchham lek lek a rawn tawngchhuakin,” Lalpa, nichina tlang lehlam a Kevawmhranga’n kan zavaia mithmuh ngei a Mura a kah thlakna hmun kha kan va thleng phei a; tlang a va sut hnu a chulaia thingtuai leh hnimbuk a bawh eng hen hun te pawh kha kan va hmu ngei e...Amaherawhchu, mak tak maiin Mura reng reng kha a lo awm tawh lova, a thla tliak hlek emaw pawh hmuh tur a awm tlat lo ani...” a rawn tih takah chuan Lalpa Hrihlera leh chulaia tlangval awmkhawm ho chuan mak ti lutuk leh awih lo lutuk chuan tlangval rual rawn let te chu an en he haw ringawt mai a...
Thinrim lek lek a Val Upa Leihanga chu rawn tawng chhuakin,” Kan mit leh kan beng ngeiin tlang a sut lai leh a hnuk chhat tur chalchang te pawh kan hmu in kan hriat tlan vek kha... In thil sawi chu awih a va har ve maw le !! In zawng tha meuh maw?..” a han tih chuan Val Upa Leihanga meuhin an thil sawi a awih sak loh avanga lunghnur leh thinrim lek lek chung chuan tlangval rual kal ve te zinga midang te pawh chu rawn tawng chhuak ve sap sap hlawmin an thusawi leh thil hmuh te chu thudik ngei anih thu leh Lalpa meuh hma ah dawt an sawi loh tur thu chu huai takin an sawi ve ta piap piap mai hlawm a...
Chutah zet chuan Lalpa Hrihlera pawh a khaw tlangval rualte chu an inhnial thui ang tih hlau a rawn tawngchhuak ve in,” A tawk tawh e...In thu rawn hawn chu thudik ngei anih ka ring e...Kan thil beih leh thah tak kha thil mak leh rapthlak tak mai ani a; sava emaw ramsa ngei nge anih a huaite leh Khuavang thiltihtheihna nei lam thil tih pawh tu pa hriat va ni suh !!...Chiang takin a thi tih chu tupawhin kan hmu vekin kan hre vek kha ani a... Ka tum anga ropui taka ka ai thei lo anih pawhin tun hnu zelah kan khua a rawn tibuai tawh lo tur ringawt pawh hi ka tan chuan lawmna nasa tak a tling tawk viau tho e...Tuman in rilru ti hrehawm duh suh u..” a han tih chuan mipuite chuan an Lalpa chu fing leh fel an tiin a khua leh tuite a hmangaih hle in an hria ani...
Mura hi thawnthu ah te tam viau mahse hmanlai a sava lo awm thin ngei ani em tih hi tuma finfiah hleih theih ani tlat lo mai a... Sava tak tak lo ni se chuan tun hnu ngei pawh hian a thla te emaw a ruhro te chu hmuh tur emaw laihchhuah tur a la awm ve ngei awm si a..Amaherawhchu, chutiang chiang taka finfiah theih han sawi tur a awm tlat lo mai te hi a makna ti zualtu ani a...Thenkhat te phei chuan sava tak tak nilovin Ramhuai chi khat niin mihringte rawn nghaisa a rawn ei thin tur a sava lianpui a rawn chang ta mai thin ni te pawhin an ngai hial a; amaherawhchu a eng hawi zawng zawng pawhin engmah finfiahna belchian dawl a awm chuang lova, thuthlukna chiang fak a siam theih lah ani hek lo...Ram dang leh hnam dang hmakhawsang thawnthu a Dragon (Rulpui tihbaiawm) leh Rannung maksak dangte ang pawh ani lovang tih a sawi theih loh !!
Mipui kalkhawm an han kian darh hnu chuan Keivawmhranga pawh a pu te in lamah chuan zanriah kil turin a haw ve ta a...Zanriah ei kham hnu chuan Zote buanzawl a kai a han tum chu Lal in kawt a Val Upa Leihanga lo ding chuan a kut in lal in a lut tur chuan a han hui zauh a..Keivawmhranga Lal ina a han luh chuan Lalpa Hrihlera leh a Khawnbawl Upate chu an lo thu khawm thap mai a..Keivawmhranga a hmu chiah chu Lalpa chu rawn dingchhuakin,” Mura Kap Pasaltha, thil engemaw pawimawh tak zawh duh che ka nei a, ka koh tir che ani e... Mimtuk thla tawp emaw Tualbual thla thleng he khua ah hian i cham ang em?” a han ti phawng mai a...
Keivawmhranga chuan chhangin,” Lalpa, chutiang chen chen chu ka cham ka ring tawh lo ani..Vankal khua ah ka nu ka kalsan avangin ka ngaihtuah tawh hle mai a; mahse hetiang chen rawn thlen tawh hnu a ka farnu Ngur khua a pasal nei a awm ta tlawh lova haw leh erawh ka hreh si avangin Ngur khaw lam pan thuai mai ka lo in rilruk asin..” a han ti a..
[ Mimtuk thla chu Hmar ho thla chhiar dan chuan December ani a; Tualbual erawh January ani thung..]
Bengsika ngaihtuah tih hriat tak chuan a khabe meuh Lalpa chuan han dawmin,” Chutia ka zawh kher che chu mak pawh i ti deuh mai thei a...Ka zawh kher nachhan che erawh hei hi ani e.. Kan khua hian khuanu malsawmna kan dawn a buh leh bal lama kan hnianghnar zual kum te hian Hmar ho zinga kan kut pui lian ber leh pawimawh ber Sikpui Ruai chu kan hmang thin a..Dan naranin thlasik vawh vanglai tak Mimtuk thla tawp lam emaw Tualbual thla ah te hian kan hmang tlangpui thin a... Nikum lamah khan kan khua hian buh leh bal kan ngah em em a, tunah pawh buh kan seng leh hma hauhin ei sen loh chu kan la nei hlawm a..Tin, tun kum lah a hma kum ang bawkin kan ngah leh a beiseiawm bawk a..Amaherawhchu, chu chauh chu tun kum a Sikpui Ruai kan hman duhna chhan ber erawh ani hran lem lo thung...Tun kum hian Sikpui Ruai hman ngei ka duh nachhan chu eng dang vang nilovin kan khua kum tam tak chhung min lo tibuai a min lo ti thlabar tawh tu Mura ngei a thih tak vang kha ani a...
.....Ropui takin i Mura kah hlum chu sa-lu-kimin ai thei lo mah ila Sikpui Ruai erawh kum dang zawng aia ropui zawkin kan lawm thei thung ani...Amaherawhchu, he Kut ropui takah hian he hun hlim taka hmang thei a min siamtu Pasaltha hi tel ve ngei la ka duh si a...Tun thla tawp thleng tal i la cham dawn anih chuan chawplehchilhin kan inbuatsaih chuk chuk ang a, thla tawp ah chuan kan in peih fel hman mai hi ka ringhlel hauh lo nia...Kum dang ang lo takin tun kum chu Sikpui Ruai kan hmang hma dawn tihna anih chu...” a han ti dap dap a..
Keivawmhranga chuan amah avanga ringawt a Sikpui Ruai a hman hun pangngai aia an hmang hma ringawt tur chu zahthlak tiin chutianga ti lo tur chuan nasa takin a ngen a...Amaherawhchu, Mura kap Pasaltha ber Sikpui ruai an hmanna a a tel theih dawn loh chuan sera mu a thur thei dawn lo tia an hnial let ve tlat avang chuan rilru siam fel pawh Keivawmhranga chuan harsa a ti hle mai a...Dik tak chuan a silai duhlai leh ui em em lai pe phal ngat tu Lalpa hi han hnial tun tun chu a hreh takzet ani !!
Lalpa mai pawh nilovin Khawnbawl upate zawng zawngin Thla phal (November) thla tawp thleng tal la cham tura an ngen chiam tak avang chuan an ngenna pawh chu zahawm tiin loh theih loh chuan a remti ve ta ringawt mai a...A remtih thu a han sawi meuh chuan Lalpa Hrihlera chu lawm em em leh phur tak maiin a piah lawk a awm tlangaupa Burkhawna hming chu a lam chul mai a...Burkhawna pawh chuan hrilh chawp ngai lovin leh a thil tih tur chu hai hauh bik lo chuan an khaw Sadawt ko turin Lal in atang chuan a chhuak ta vang vang a..
Read Next Chapter>>>
Read Next Chapter>>>
Post a Comment